Lyívyítyíkus 1 - Bokyi Bible

Byifen ḿbyí badashí Byirim-Byitú

¹ Óburúkpâbí o/bwom ké mpyep mú odakyú o-kó Músis, o-sét ǎ byije ḿbyín,

² ḿbyí banet-Ézerel badakûtî ké nkéré ba-kú ba-chi i byifen. O/fu, nang yeě nké o-kú o-chi i kyifen-enyam, ké mpong nang etám-ebû nang ebúbǔu emen,

³ â mu o-kúng ng nang mpong emen o-chi kyifen ńkyí badashí kyirim-enyam kyimúmú, o-man o-kúng otyép-mpong mú o*fí ne kyinêm ké byiko*. O-man o-tî otyép-mpong ámu ké ocím-dyifyi mú mpyep mú Óburúkpâbí odakyú, eringe nyí Óburúkpâbí oda ǎ ekoo.

⁴ Onet ámu oyip bubwô emen o-twôom kámú ké dyishí, ne Óburúkpâbí o/chi o-koo kámú wǎ kyifen ńkyí kyi/chi kyi-soo ǎ byibî.

⁵ O/chi o-ju otyép-mpong ámu ányi, ne banchi kyifen-Osówo ḿbé bwǎn ḿbé Éron ba/chi ba-kúng baróng emen ba-kye Óburúkpâbí, ba-pwó to kámbé ké bakô-kyikit-kyifen echi banyii, ḿbé mbe ké ocím-dyifyi-mpyep.

⁶ O/chi o-kúng kâng enyam ányi o-pwát kányí ekwop, o-két kányí byikim byikim,

⁷ ne banchi kyifen-Osówo ba/chi ba-wóngê okwâ ké kyikit-kyifen echi.

⁸ Ba/chi ba-kúng byikim-enyam ámbyi ba-fé ké okwâ, cibicibi ne dyishí ne bafwám

⁹ Onet mú mu o-chi i kyifen o-man o-soo efong-enyam ányi ne byiká, ne nchi kyifen-Osówo o/chi o-shí kyirim-enyam ánkyi kyimúmú ké kyikit-kyifen echi. Kyinung ńkyí nkyi kyi-fím m ké kyifen-byiryíng ńkyín kyi-nyîn n Óburúkpâbí.

¹⁰ Â onet ámu mu o-kúng ng etám-ebû nang ebúbǔu emen o-chi kyifen ánkyi, ebû ányi e-man e-kyú otyép mú o*fí ne kyinêm ké byiko*.

¹¹ O/chi o-ju kányí ké kyicê-bushûyû ńkyí kyikit-kyifen echi, ne banchi kyifen-Osówo ba/chi ba-yip baróng emen ba-pwó ké bakô-kyikit-kyifen echi banyii.

¹² Ké nkéré onet mú mu o-chi i kyifen oo/két kányí, nchi kyifen-Osówo mú mu o-kúng ng kyifen ánkyi o-kye Óburúkpâbí, o/chi o-kúng kángkáng byikim-enyam ámbyi o-fé ké okwâ, cibicibi ne dyishí ne bafwám.

¹³ Onet mú mu o-chi i kyifen ánkyi o-man o-soo efong-enyam ányi ne byiká, ne nchi kyifen-Osówo o/chi o-kúng kyifen ánkyi o-kye Óburúkpâbí, o-shí enyam ányi kángkáng ké kyikit-kyifen echi. Kyinung ńkyí kyidafím ké kyifen-byiryíng ánkyi kyi-nyîn n Óburúkpâbí.

¹⁴ Â onet ámu mu o-kúng ng kanurung o-chi kyifen ńkyí badashí kánké kamúmú, kanurung ánke ka-man ka-kyú ámalê nang kaatǒmtǒm.

¹⁵ Nchi kyifen-Osówo o/chi o-tî kánké ké kyikit-kyifen echi, o-nyibi kánké kyitông, o-yip dyishí emen o-fwá dyi-shí ké kyikit-kyifen echi. O/chi o-pwó baróng emen ké bukô-kyikit-kyifen echi.

¹⁶ O/chi o-fîm kiǐfít emen ńkyí ké kyitông ne byěm ḿbyí mbyi ké kafâ emen o-twóp ké kyicê-kyikit-kyifen echi ńkyí esû nyi e-byí i, ké kyikit ńkyí mbe ba-pwó ng atông.

¹⁷ O/chi o-níbî kánké ké abyibabang o-ját kánké o-pénê, oo*két abyibabang emen o-pwó* o-kúng kánké o-shí kamúmú ké kyikit-kyifen echi. Kyinung ńkyí kyidabyí ké kyifen-byiryíng ńkyín kyi-nyîn n Óburúkpâbí.