LÛK BǍMPÉM ḾBÉ BANONG KYI-KIM NE JISOS KARÂS ERINGE NYÍ LÛK O/SÁNG 8 - Bokyi Bible

Banyinyi ḿbé ba/cen ne Jisos ké Kyikû

¹ Ka/chîrí kaǎnyín, Jisos o-cen ké byire ne ké eshê o-sét ng banet Bǎmpém ḿbé Banong o-câ kyi-kim ne Butu ḿbú Osówo. Bǎmgbán emen ḿbé ashí diǐkpú ne afee ba/mû ba/ce to ne nyǐ ké kyikû.

² Kyicê-banyinyi ḿbé nyǐ o/mû o/ró kámbé byibî-bací ké byiko ne ḿbé o/mû o/chi kámbé erwôm ebe e-man ba/mû ba/ce to ne nyǐ ké kyikû. Banyinyi ámbe ba/mû Méryi mú ba/mû ba-kó ng ǎ Méryi mú o/fím Mágádála, mú Jisos o/ró ǎ byibî-bací káchâtkányi ké byiko,

³ ne Jowána mú onyi-Kúza, mú o/mû onet-dyishí-bǎmkpóngé ké kyibám-butu ńkyí Otu Hérot, ne Susána ne banyinyi bakíri to chwóó ḿbé ba/mû ba-yip ng akpuga ebe ba-chwáp ng Jisos ne bǎmgbán emen.

Dyitím-Ekan kyi-kim ne Onet mú o/kwón Esang-Byichí

⁴ Banet ba/mû mbe ba-fím m ké eshê chwóó ba-bâ ba-kâm m Jisos. Ké nkéré banet ámbe baa/jê kanong kanong, Jisos o/tím kámbé dyitím-ekan ńdyín o/fu,

⁵ Onyinchéng obónge o/dim esang-byichí emen ekwón. Ké nkéré mú nyǐ mu o-pwó ng kányí o-câ ké kafâ-kyifát emen, esang ekíri e/róng ké kiǐfáng, banet ba-cím kányí ké byiká, bunurung bu-ba-cút kányí bu-ryí.

⁶ Ekíri e-róng ké katárábá. Ké nkéré mú e/byí, e/waa ányi e-jwóm, e-kpú, ké ebóng, ecing ányi e*fí ne omu*.

⁷ Esang ekíri e-róng ké kyikit ńkyí byiwong byíwong ḿbyí byi/kán byi-tim boǒsín-esang-byichí ámbu.

⁸ Nké esang ekíri e/róng ké kyikit-ecing ńkyí kyinong. E-byí, e-kán, e-zím barî-esang. Dyisín nang dyirá dyi/zím bajam-esang batánge. Ne Jisos o-kúlî kâng, o-sét kámbé o/fu, kû n̂g ejwo kâng, â bamu ne atông nyí badajwo.

Chwǒm ńkyí kyi/chi ne Jisos o-raa ké Atím-Ekan

⁹ Bǎmgbán emen ba-bí ǎ ba/fu, osét kámbé kyikû-dyitím-ekan ándyi.

¹⁰ Jisos o-faa kámbé o/fu, ben baa/jwo ńkyí nkyi Osówo ké dyityém kyi-kím ne Butu emen. Nké banet ḿbé áku kángkáng ba-jwo ng ké atím-ekan, eringe nyí nang ba-tún túntún, baa*ri*. Nang ba-fwôo atông fwôofwôo, baa*nyît dyishí*.

Jisos o/sét eringe Dyitím-Ekan kyi-kim ne Onet mú o/kwón Esang-Byichí dyi/byí

¹¹ Jisos o-sét kámbé o/fu, dyitím-ekan ándyi dyi/byí něen. Esang-byichí, ányi bǎmpém-Osówo.

¹² Esang-byichí, nyí e/róng ké kiǐfáng e/bwom wǎ banet ḿbé ba/jwo bǎmpém-Osówo. Nké Otu-Byibî-Barím o/bafîm bǎmpém ámbe ké atyém ebe, eringe nyí baa*ba/chi ba-bángê Osówo o-nyii kámbé*.

¹³ Esang-byichí nyí e/róng ké katárábá nyi wǎ banet ḿbé ba/jwo bǎmpém-Osówo, ba-koo kámbé ne bunyîn-dyityém. Nké bǎmpém ámbe ba*da/nung kámbé ké dyityém*. Mbé ba-bángê ké kaǎnyín-nkéré. Ké nkéré-okan o/bê, ba-róng.

¹⁴ Esang-byichí nyí e/róng ké kyikit ńkyí byiwong byíwong e/bwom wǎ banet ḿbé ba/jwo bǎmpém-Osówo, nké ékyíkéré ké dyityém ne akpuga ne bunyîn-dyityém ḿbú ejíí ńnyín byi/cibi kyikit kyibónge byi-tím bǎmpém ámbe byi-ju. Banet ámbe ba-waa éné wǎ esang-byichí nyí e*da/kán*.

¹⁵ Esang-byichí nyí e/róng ké kyikit-ecing ńkyí kyinong e/bwom wǎ banet ḿbé ba/jwo bǎmpém-Osówo, ba-koo kámbé ne dyityém ńdyí dyinong ne ofê. Ba-cíp dyityém ba-tî kámbé tete bǎmpém ámbe ba-chi kámbé ba-chi byěm wǎ kyichí ńkyí kyi/kán kyi-zím byirim.

Otyuryíkáng mú ba/mee ba-cít Dyicáng

¹⁶ Onet o*fí mú odamee otyuryíkáng o-yip dyicáng o-cít kámú* o-bwa o-yip nang kámú o-fé ké dyifít-karíng*. Nké o-tî ng kámú ké kyikit ńkyí mbe ba-twôom m otyuryíkáng, eringe nyí banet badari bukwóp ba-nung ké kyise.

¹⁷ Nang ebóng chwǒm ńkyí ba/rôo kánkyí, ba/chi ba-byí ne nkyí kyíjí. Nang ebóng chwǒm to ńkyí ba/cít kánkyí, ba/chi ba-ri kánkyí, ba-bâa ba-tî kyíjí wááng.

¹⁸ Bám m̂ byiko enen ké eringe nyí bamu ba-fwôo ng atông ba-jwo ng byiraa. Ké ebóng, nang yeě nké mu ne chwǒm, Osówo o-chî ng ǎ enye kyikíri. Nké nang yeě nké o*fí ne chwǒm* nang kaǎnyín ńké nyí o/kabe o/fu, nyǐ mu ne nké, Osówo o/chi o-bam o-koo.

Boné ne Bwǎn-Bané-Jisos ḿbé Banyinchéng

¹⁹ Boné-Jisos ne bwǎn-bané-Jisos ḿbé banyinchéng ba/bê ba-kâm ǎ. Nké ba*da/man eribi ké kyikit ńkyí o/kyú* ké ebóng, banet ba/mû ba/jang ejê.

²⁰ Onet obónge o-sét Jisos o/fu, boné eyên ne bwǎn-bané eyên ba/bwom kwán kyíjí, mbe ba-ryuu ng ba/fu, mbé ba-ri ng ǒ.

²¹ Jisos o-sét banet ḿbé ba/mû ányi ashí amúmú o/fu, boné ejí ne bwǎn-bané ejí, ányi banet ḿbé mbe ba-jwo ng byiraa-Osówo ba-tî ng to kámbyí.

Jisos o/chee Afú nyí Aryên

²² Dyicí dyibónge, Jisos o/nung ké ókpǐ ne bǎmgbán emen, o-raa ne mbé o/fu, mîng n̂g byi-nyáng byi-jâ esim-baya nyí áku. Ne ba-dim kâng.

²³ Ké nkéré mbe ba-cen n ké ókpǐ ba-câ, Jisos o/rí sáre mu o-rê ng. Afú nyí aryên aryên a-kpet etugi ké baya. Omu o-kpet enung ké ókpǐ, mbé ashí amúmú ba/firi ké bukwóp-bukyû.

²⁴ Bǎmgbán-Jisos ba-bâ ba-ba-jwóbê ǎ ba/fu, bonchí, bonchí be byi-kú byi-bâ ekpú. Jisos o-bûu nensang, o-nyán afú ne kace ńké nke ka-náng ng. Afú a-mîng etugi, kace ka-mîng enáng, ne kángkáng byikit byi-chee beem!

²⁵ Ne o-waa kâng o-bí bǎmgbán emen o/fu, ebóng ben ba*da/fé dyityém ne me*. Nké mbé byiko byi/kaa kámbé, bushî bu-róng kámbé, ne ba-raa ne barî ba/fu, ebóng dyizong-onet něen. O-nyán n afú ne kace byi-jwo ǎ.

Jisos o/ró Byibî-Bací ké Byiko-Onyinchéng Obónge

²⁶ Mbé ba-cen ba-da-ribi ké oshê mú banet ḿbé Gérasa, mú badafím ké Gályílyi ba-nyáng ba-ribi ké mǔ.

²⁷ Jisos o-cím m byiká ké bukô-kace o-bâ, o-kâm onyinchéng obónge mú o/fím ké oshê ámu, mú o/mû ne byibî-bací ké byiko. Ké kyikim-nkéré ńkyí kii/shwôm ké esim chwóó, onyinchéng ámu mu o-cen n osíndyíbang. O*fí to o-man n ekyú ké kyise* o-kyú u kángkáng nkéré ké akun.

²⁸ Ké nkéré o/ri Jisos, o-wonge kakânkakân, o-myii ǎ ké byiká, ne o-raa ne ejá kyíbóng kyíbóng o/fu, Jisos mú Wǎn-Osówo, Osówo mú mu kyíbóng kyíbóng, wo amu a-ryuu ng a/fu, a-chi i mě ebóng. Me n/tîm ǒ arông, *da mě echi n-ri busông*.

²⁹ Nyǐ o/raa ńkyín, ké ebóng, Jisos o/mû oo/nyán kyibî-bucí ánkyi o/fu, kyibyí ǎ ké byiko. Kampén chwóó ńké kyibî-bucí ánkyi kyi/mû kii/kám onyinchéng ámu. Nang ké ba/mû ba/fé ǎ ké mgbokobá, ba-bwá ǎ bamgbokobá ké byiká ne abwô, o/mû mu o-két ng bamgbokobá ámbe, kyibî-bucí ánkyi kyi-tut ǎ o-jâ ké kyikim-dyikán.

³⁰ Jisos o-bí ǎ o/fu, wo a-bángê e nǎ. Onyinchéng ámu o-faa o/fu, me m-bángê e Bujê, ké ebóng, byibî-bací chwóó byi/mû ǎ ké byiko.

³¹ Byibî-bací ámbyi byi-tîm Jisos arông byi/fu, Jisos o*dachi o-ró kámbyí o-twóp ké kiǐríbíríbí-dyibíng-busông eri*.

³² Dyibóng-akûk ńdyí dyi/jê kanong kanong dyi/mû ányi fáráng dyi-ryí i baryî ké bukô-kaku. Byibî-bací ámbyi byi-tîm Jisos arông byi/fu, omîng kámbyí mbyí byi-da-nung akûk ányi ké byiko. Ne Jisos o-mîng kámbyí.

³³ Byibî-bací ámbyi kâng byi-byí onyinchéng ámu ké byiko, byi-da-nung ké akûk ányi. Kángkáng dyibóng-akûk ándyi dyi-zóngê dyi-shû ké bukô-kiǐmbém, dyi-da-róng ké baya dyi-jwáp omu dyi-kpú.

³⁴ Banet ḿbé ba/mû ba-bám m akûk ányi ba/ri ńkyí kyi/chi, ne ba-chêe kâng ba-sét ng kiǐshwô ánkyi ba-câ ké oshê ne ké bampyep.

³⁵ Banet ba-dim ba-wâa edari ńkyí kyi/chi. Ba-bâ ba-kâm Jisos. Ba-ri onyinchéng ámu mú byibî-bací bii/byí ǎ ké byiko ké oo/kyú ányi kyísí ké byiká-Jisos ne byídí ké byiko ne dyityém emen kanong kanong. Mbé ashí kángkáng ba-kpet eshî.

³⁶ Banet ḿbé ba/mû ba/ri kánkyí ba-sét banet ámbe eringe nyí Jisos o/chi onyinchéng ámu o-nyange.

³⁷ Kángkáng banet kâng ḿbé ba/fím ké oshê ámu ba-kpet esét Jisos ba/fu, odim ké esí ebe, ké ebóng, mbé ba/mû mbe ba-shî ng kanong kanong. Jisos o-nung kâng ké ókpǐ, o-kpet ebwa esim dyijê.

³⁸ Onyinchéng ámu mú byibî-bací byi/mû bii/byí ǎ ké byiko o-kpet etîm Jisos arông o/fu, mîng mě m-bâ ne wo ké kyikû. Nké Jisos o/sét ǎ o/fu, odim. O-raa ne nyǐ o/fu,

³⁹ ca dyijê a-da-sét ńkyí Osówo oo/chi ǒ. Onyinchéng ámu o-dim, o-cen ké oshê ámu omúmú o-sét ng ńkyí Jisos o/chi ǎ.

Wǎn-Járos mú Onyinyi ne Onyinyi mú o/ta Nkyû mú Jisos

⁴⁰ Ké nkéré Jisos o/bwa esim ké esim-baya nyí ebónge, bujê-banet ḿbé ba/mû ányi ba/kó ǎ aa/fyi, ké ebóng, mbé ashí amúmú ba/mû ba/kyú mbe ba-bám m ǎ.

⁴¹ Onyinchéng obónge kâng mú odabángê Járos o-ba-ribi. Onyinchéng ámu o/mû onet-dyishí mú kyise-ékwâbashi kyibónge ńkyí banet-Jûs, ńkyí nkyi ké oshê ámu. O/bê o-ba-myii Jisos ké byiká, o-tîm ǎ arông o/fu, oca ké kyise emen.

⁴² Ké ebóng, kaancen-wǎn emen mú onyinyi, mú o/mû oo/rí aje diǐkpú ne afee, o/mû o/firi ké bukwóp-bukyû. Ké nkéré Jisos mu o-cen n o-câ, banet ba/mû mbe ba-fárâng ng ǎ ba-câ byicê byimúmú.

⁴³ Onyinyi obónge o/mû ányi mú oo/ri busông ké bunyinyi ḿbú bu/waa ǎ ké kyikû, ké aje diǐkpú ne afee. Oo/bên akpuga emen kángkáng ké kyikit-banchi bakye, nké onet o*fí nang obónge mú o/man ǎ echi o-nyange*.

⁴⁴ Onyinyi ámu o-ba-nung ké bujê-banet ḿbú bu/mû bu-câ ne Jisos ké kyikû, ne o-ta ocím-nkyû mú Jisos. Bunyinyi emen bu-waa ké abe ányi bu-man.

⁴⁵ Jisos o-bí o/fu, yeě o/ta mě. Nang yeě nang yeě o/né, ne Pyíta o-raa ne nyǐ o/fu, bonchí, kángkáng banet ba/wáp ǒ ba-fé ké kafâ, mbe ba-ta ng ǒ byicê byimúmú.

⁴⁶ Nké Jisos o/raa o/fu, onet obónge o/ta mě, ké nǎ, me n/nyît kánkyí ké nkéré busa bu/byí mě ké byiko.

⁴⁷ Mú onyinyi ámu o/nyît o/fu, Jisos oo/ri, ne o-byí kâng o-tím m banê o-câ ne bushî, o-da-myii Jisos ké byiká. O-waa ányi ké bushú ḿbú kángkáng banet, o-sét Jisos ńkyí kyi/chi ne nyǐ o-ta ǎ, ne eringe nyí orwôm emen oo/waa ké abe ányi o-man.

⁴⁸ Jisos o-raa ne nyǐ o/fu, wǎn ejí, dyityém eyên ńdyí a/fé ne me dii/chi ǒ a-nyange. Ca kanong ké bunyîn-dyityém.

⁴⁹ Ké nkéré Jisos mu o-raa ng ńkyín, onet-kyitwóm o/fím ké kyise-Járos o-ba-sét ǎ o/fu, wǎn eyên oo/kpú, *dachîkye ntánge byiraa-Osówo afaníkong dyikáá*.

⁵⁰ Nké Jisos o/jwo kánkyí, ne o-sét Járos o/fu, *dachi a-shî* nké fé dyityém eyên ne me nké nke, ne wǎn eyên o/chi o-nyange.

⁵¹ Ké nkéré Jisos o/ribi ké kyise-onyinchéng ámu, o*da/bángê onet okíri o-nung ne nyǐ* kyi-cibi ne Pyíta ne Jǒn ne Jêmsyi ne bonchí ne boné-wǎn ámu*.

⁵² Nang yeě nang yeě mú o/mû ányi o/mû mu o-tii ng, o-ta ng dyikán ké bukyû-wǎn ámu. Jisos o-raa ne mbé o/fu, *da n̂g echîtii*. Mú wǎsíng o*da/kpú* mu o-rê ng oréng.

⁵³ Mbé kángkáng ba-kpet ejwó Jisos, ké ebóng, ba/mû mbe ba-nyît ng ba/fu, mú wǎsíng oo/kpú.

⁵⁴ Nké Jisos o/níbî mú wǎsíng ámu ké bubwô, ne o-kó kakân o/fu, mú wǎsíng, bûu nensang.

⁵⁵ Dyikpen emen dyi-bwa esim, ne o-bûu nensang ké abe ányi. Ne Jisos o-sét kámbé o/fu, bakye mú wǎsíng ámu chwǒm o-ryí.

⁵⁶ Bonchí ne boné-wǎn ámu ba/waa ocím ké dyishí fúú, nké Jisos o/kuri kámbé ekó o/fu, ba*dachi ba-sét onet nang obónge ńkyí kyi/chi*.