LÛK BǍMPÉM ḾBÉ BANONG KYI-KIM NE JISOS KARÂS ERINGE NYÍ LÛK O/SÁNG 5 - Bokyi Bible

Jisos o/kó Bambwôp Kashú-Bǎmgbán Emen

¹ Nkéré obónge, Jisos o/mû o/bwom ké bukô-baya ḿbé badakó Genézéret. Banet ba-kpet etín ba-fárâng ng ǎ ba-bâ byiraa-Osówo ebajwo.

² Jisos o-ri ékpǐ efee nyí ba/tú ké dyiga. Bankâm ekworê baa/mîng kányí ányi mbe ba-sâ ng boǒsém.

³ Jisos o-da-nung ké ókpǐ obónge. Ókpǐ ámu o/mû mú onyinchéng obónge mú odabángê Sámon. Ne o-sét Sámon o/fu, otín kámú o-chînung ké kace kaǎnyín. Jisos o-kyú ányi ké mǔ, ne o-tángê dyizu-banet ándyi byiraa-Osówo.

⁴ Ké nkéré mú oo/tángê kámbé o-mîng, o-raa ne Sámon o/fu, chîtín ókpǐ o-ca kashú ké kyikit ńkyí kyi/ríbî, eringe nyí wo ne bánen badafé boǒsém enen ké kace ba-kám ekworê.

⁵ Sámon o-faa ǎ o/fu, bonchí, kyirim-buchú ḿbú kurún, bii/fé boǒsém ofé ófe. Nang kaǎkworê byi*da/kám*. Nké â wo a/fu, nchîfé, n-fâ.

⁶ Ne ba-fé kâng boǒsém, ba-kám bujê-ekworê! ḿbú boǒsém ebe bu/mû bu/waa kaǎnyín bu-járê.

⁷ Ne ba-me bubwô ba-kó bábe ḿbé ba/mû ké ókpǐ okíri ba/fu, babâ ba-ba-chwáp kámbé. Ḿbé áku ba-bâ. Ne ba-wuri ekworê ányi ba-fé ké ékpǐ ányi efee e-sú, kyi/mû kyi/waa kaǎnyín e-sémê.

⁸ Ké nkéré Sámon-Pyíta o/ri ńkyí kyi/chi éné, o-tím arông kyísí ké bushú-Jisos, o-raa ne nyǐ o/fu, dim a-mîng mě nyín, ǎ Otu Kyítá, ké ebóng, me n-chi i nchi byibî.

⁹ Sámon ne kángkáng banet ḿbé ba/mû ne nyǐ kyi/chi kámbé chwǒm-akat ké bujê-ekworê ámbu ḿbú mbé ba/kám.

¹⁰ Éné to nké kyi/gaa Jêmsyi ne Jǒn ḿbé bwǎn-Zébédyi, ḿbé ba/mû ne Sámon. Ne Jisos o-raa ne Sámon o/fu, *dachîshî* fím kurún kyi-ca kashú, wo a/chi a-mîng ekworê ekám, a-kûkám banet.

¹¹ Ne ba-fung ékpǐ ányi ba-ba-tîm ké dyiga. Ba-mîng kángkáng byěm ebe ányi, ba-dim ne Jisos ké kyikû.

Jisos o/chi Onet-Kyibî-Orwôm o-nyange

¹² Nkéré obónge, Jisos o/mû ké oshê obónge mú onyinchéng obónge o/mû ányi, mú kyibî-orwôm-enyam-byiko kyi/mû kyi/kám ǎ byiko byimúmú. Ké nkéré onyinchéng ámu o/ri Jisos, o-myii ǎ ké byiká. O-tîm ǎ arông o/fu, bonchí, â kyi/nyîn ǒ, a-man n mě echi n-nyange.

¹³ Jisos o-tan bubwô o-ta ǎ. O-raa ne nyǐ o/fu, nkyi kyi-nyîn n mě. Orwôm eyên oman. Ké abe ányi, orwôm mú onyinchéng ámu o-waa ányi o-man.

¹⁴ Jisos o-kuri ǎ ekó o/fu, *dachi a-sét onet nang obónge chwǒm ńkyín*. Nké ca kyikit-nchi kyifen-Osówo o-jebe ǒ enyam-byiko eyên. Ne a-chi kyifen-Osówo wǎ eringe nyí Músis o/sét o/fu, bachi. Eringe nyí kyidatông nang yeě nang yeě o-nyît o/fu, orwôm eyên oo/man.

¹⁵ Nké bǎmpém ḿbé mbe ba-pem m kyi-kim ne Jisos ba/bwa ba-káng okáng ba-shwôm. Ne bujê-banet chwóó ba-bâ ba/fu, mbé ba-bâ ng ejwo ńkyí Jisos mu o-sét ng, ne eringe nyí odachi to kámbé erwôm ebe e-man.

¹⁶ Nké Jisos o/mû mu o-dim m o-da ng ekyú ké byikit ḿbyí banet ba*fí* o-fâ nshwam.

Jisos o/chi Onyinchéng mú o/mû o-rwôm m Kyibok o-nyange

¹⁷ Dyicí dyibónge, ké nkéré Jisos o/mû mu o-tángê e, kyicê-banet-ncibi mú Fárasyî ne bantánge Byije-Músis ḿbé ba/fím ké kángkáng eshê nyí ké Gályílyi ne Judyâ ne ḿbé ba/fím Jerúsélem ba/mû ba/kyú ányi to. Busa ḿbú Otu Kyítá bu/mû ne Jisos, ḿbú odachi banet-byirwóm ba-nyange.

¹⁸ Banet ba/tû onyinchéng obónge ké karíng, mú o/mû oo/bok, ba-bâ ne nyǐ. Ne ba-kyé bukwóp ḿbú mbé bada ǎ eyip ba-nung ne nyǐ ké kyise, eringe mbé bada ǎ etî ké bushú-Jisos.

¹⁹ Nké ba*da/ri mpât* mú bada ǎ eyip ba-nung ne nyǐ*. Ké nǎ, banet ba/mû ba/jang ejê. Ne mbé ba-yip ǎ kâng ba-yú kyíbóng-mbwôm ne nyǐ. Ba-rim mbwo kyíbóng-mbwôm, ba-shû ǎ ké karíng emen, o-ribi ké otyém-dyizu-banet ándyi. Ba-tî ǎ ké bushú-Jisos.

²⁰ Ké nkéré mú Jisos o/ri eringe nyí obánge ebe ne nyǐ o/jê, o-raa ne onyinchéng ámu o/fu, ocín ejí, byibî eyên baa/pwoo ǒ kámbyí.

²¹ Bantánge Byije-Músis ne banet-Fárasyî ba-kpet eraa ne barî ba/fu, nyín ebóng onyinchéng něen mú mu o-cábê ng Osówo ké dyizong-bukwóp ḿbún. Onet o*fí mú odaman epwoo byibî* kyi-cibi ne Osówo kǎnchí*.

²² Jisos o-nyît ńkyí mbe ba-raa ng, ne o-raa ne mbé o/fu, ebóng ben bamu ba-kabe ng azong-byěm ányi.

²³ Kyirá kyidasóng efu. Ńkyí ndafu, baa/pwoo ǒ byibî eyên aa, aa ńkyí ndafu, bûu nensang a-kpet ecen.

²⁴ Me n/chi n-tông běn kâng ba-nyît ba/fu, Wǎn-Onet mu ne busa ké ejíí ḿbú odapwoo byibî. Ne o-raa kâng ne onet-kyibok ámu o/fu, n/sét ǒ n/fu, bûu nensang a-yip karíng eyên a-dim dyijê.

²⁵ Ké abe ányi, onyinchéng ámu o-bûu nensang ké bushú ḿbú banet kángkáng. O-yip karíng ńké ba/mû ba/tû ǎ ké nké o-dim dyijê, o-kpee ng Osówo o-câ.

²⁶ Kángkáng banet ba-waa ocím ké dyishí fúú, bushî bu-róng kámbé. Ba-kpee Osówo ba/fu, ebóng byěm-akat ḿbyí be bii/ri něen kurún.

Jisos o/kó Onyinchéng Obónge mú odabángê Lyíva

²⁷ Ké nkéré oo/man ne kyiraa ńkyín, Jisos o/byí o-dim, ne o-ri nkoo akpuga-dyishí obónge mú odabángê Lyíva ké oo/kyú me ké kyikit-bǎmkpóngé emen. Jisos o-raa ne nyǐ o/fu, bâ ne me ké kyikû.

²⁸ Lyíva o-bûu nensang, o-mîng kángkáng byěm ányi o-dim ne nyǐ ké kyikû.

²⁹ Lyíva o-chi kâng Jisos kiǐtí-dyijî ké kyise emen. Bankoo akpuga-dyishí chwóó ne banet bakíri to ba/mû ba-ryí i byiryíng ké dyijî ándyi ne mbé.

³⁰ Kyicê-banet-Fárasyî ne bantánge Byije-Músis ḿbé mbe ké ncibi mú banet-Fárasyî ba-kpet eraa ne bǎmgbán-Jisos ba/fu, ebóng ben bamu ba-ryí i byiryíng, ba-jwáp ng bato kyikit kyibónge ne bankoo akpuga-dyishí ne banchi byibî.

³¹ Jisos o-faa kámbé o/fu, banet ḿbé ba*fí ba-rwôm m* baa*ryuu nchi bakye*. Banet ḿbé mbe ba-rwôm m nké nke nké bada ǎ eryuu.

³² Me n*da/bê n/fu, m-bâ ng ekó banet ḿbé mbe ba-fâ kámbé n/fu, byiko byikpú kámbé ba-mîng byibî echi*. Nké m/bê ekó banet ḿbé bamu ba-ri ng kámbé wǎ banchi byibî.

Ḿbím kyi-kim ne Esong ecíp

³³ Kyicê-banet ba-raa ne Jisos ba/fu, bǎmgbán ḿbé Jǒn mbe ba-cíp ng esong kángkáng nkéré, ba-fâ banshwam. Bǎmgbán ḿbé banet-Fárasyî mbe ba-chi i to dyizong dyibónge. Nké bǎmgbán ḿbé eyên mbe ba-ryí i byiryíng, ba-jwáp ng bato.

³⁴ Jisos o-faa kámbé o/fu, ben ba/kabe ba/fu, ba-man n echi banet ḿbé mbe ké dyijî-dyibé ba-waa esong ésong, â oyén-dyijî mu ányi ne mbé? Ńkyí nkyí kii*nwa echi*.

³⁵ Nké nkéré mu o-bâ mú ba/chi ba-yip oyén-dyijî ba-dim ne nyǐ. Ací ányi kâng nké ba/chi ba-kûwaa esong.

³⁶ Jisos o-tím kámbé to dyitím-ekan ńdyín o/fu, onet o*fí mú odaját kyicê-kyídí ké nkyû mú ofyîfî o-tim mbyí mú mu ké okâa-nkyû*. Â o/chi éné, o/chi o-ját nkyû mú ofyîfî. Ne kyicê-kyídí ńkyí kyifyîfî to kii*ba/chi kyi-tyeem ne ńkyí okâa*.

³⁷ Onet to nang obónge o*fí mú odakúng bato ḿbé dyicí o-fé ké okâa-kyiféng*. Â o/chi éné, bato ba/chi ba-chi okâa-kyiféng ámu o-ché. Bato ba/chi ba-pwôo, kyiféng to kyi-bên.

³⁸ Kyi*fí éné*. Dyicí-bato ba-fâ ké kyiféng ńkyí kyifyîfî.

³⁹ Onet to o*fí mú odafu nyǐ o-chî ng ejwáp dyicí-bato* â oo/jwáp akyî-bato*. O-fu ng o/fu, akyî nyi kanong a-shwôm.