LÛK BǍMPÉM ḾBÉ BANONG KYI-KIM NE JISOS KARÂS ERINGE NYÍ LÛK O/SÁNG 3 - Bokyi Bible

Bǎmpém ḿbé Jǒn mú o/mû o-kyâ Banet Osoo mú Osówo o/pem

¹ Kyi/mû kii/byí aje onyiryiká, ké nkéré mú onyinchéng obónge mú odabángê Tabyíryos o/mû otu mú Rûm. Ányi Póntus-Pálet o/mû otu-dyishí mú Judyâ. Otu Hérot o/mû otu mú Gályílyi. Wǎn-boné emen mú odabángê Fyílip o/mû onet-dyishí mú Eturyâ ne Torokónyítis. Lyisányas o/mû onet-dyishí mú Abyíléne.

² Ánas ne Káfas ba/mû batu-banchi kyifen-Osówo. Kyi/mû ké nkéré mún nké Osówo o/kó Jǒn mú wǎn-Zákaryâ ké kyikim-dyikán o/fu, osét kyitwóm emen.

³ Ne Jǒn o-dim kâng o-cen ké esí emúmú nyí kace ńké badakó Jódan. O-sét ng banet o-câ o/fu, byiko byikpú běn ba-mîng byibî echi, n-kye běn osoo mú Osówo, ne Osówo o/chi o-pwoo běn ké byibî enen.

⁴ Wǎ eringe nyí mkpábé mú odasét byiraa-Osówo, mú odabángê Azáya o/sáng ké nwet emen o/fu, onet obónge mu o-wonge e ké kyikim-dyikán o/fu, nap n̂g bukwóp ḿbú Otu Kyítá ba-tî ǎ. Chi n̂g kiǐfáng kyi-kyú dángdáng ńkyí odacen ké nkyí.

⁵ Ba-man ba-fé ecing ké kángkáng ewo. Ne ba-man ba-sé kángkáng ecím-eku ne eku nyí eryên. Ba-man ba-chi akwóp nyí a*fí dángdáng* a-firi dángdáng. Ne ba-chi to biǐfáng ḿbyí byi*fí kanong* byi-firi kanong.

⁶ Kángkáng banet ba/chi ba-ri onyii mú Osówo mu o-nyii ng banet.

⁷ Bujê-banet chwóó ba-byí ba-kâm Jǒn ba/fu, okye kámbé osoo mú Osówo. Jǒn o-raa ne mbé o/fu, ben bamu wǎ efyi. Yeě o/sét běn o/fu, ben ba-man n efem ké busa-dyityém ḿbú Osówo, ḿbú bu-kú bu-bâ ebê.

⁸ Chi n̂g byěm ḿbyí byidatông byi/fu, byiko bii/kpú běn ba-mîng byibî enen. *Da n̂g echi ba-kpet eraa ne barî ba/fu, be byi-chi i banet ḿbé kyikû ńkyí Ébarahâm*. Me mu n-sét ng běn n/fu, Osówo o-man n eyip byirim-aká ḿbyín o-chi kámbyí byi-firi banet ḿbé kyikû ńkyí Ébarahâm.

⁹ Dyikye dyi/firi kyísí ńdyí badafîm byichí ké eriri ba-twóp kyísí. Kyichí nang kyirá ńkyí kyi*fí kyi-zím m byirim ḿbyí byinong* ba/chi ba-twom kánkyí ba-fé ké okwâ.

¹⁰ Banet ámbe ba-bí ǎ ba/fu, kántîk kâng, be byichi nǎ.

¹¹ Nyǐ o-faa kámbé o/fu, nang yeě nké mu ne bankyû bafee, o-man o-fîm obónge o-kye onet mú nkyû o*fí ǎ nang obónge*. Nang yeě to nké mu ne byiryíng, o-man o-kyii kámbyí ne barî-banet.

¹² Kyicê-banet ḿbé mbe ba-koo ng akpuga-dyishí ba/bê ba/fu, mbé ba-bâ ng ekoo osoo mú Osówo. Ne mbé ba-bí ǎ ba/fu, ntánge byiraa-Osówo, be byichi nǎ.

¹³ Nyǐ o-sét kámbé o/fu, *da n̂g ekûkoo akpuga-dyishí a-shwôm ocím mú kyije kyi/fu*.

¹⁴ Kyicê-basúja ba-bí ǎ to ba/fu, aa be kâng. Be byichi nǎ. Nyǐ o-raa ne mbé o/fu, *da n̂g ebam akpuga nyí onet nang obónge ké busa ba-koo* ba-bât to onet nang chwǒm ńkyí kyi*fí ké kafâ*. *Da n̂g enabe kyitông ké chwǒm kyikíri* kyi-cibi ne akpuga-otukáku nyí mbe ba-kyâ běn*.

¹⁵ Okabe mú banet o-kpet eyángê o-câ. Ba-kpet ebwóp ne dyityém kyi-kim ne Jǒn. Ba-kpet ekabe ba/fu, katô nyǐ nké mu onet mú Osówo o/kúng ǎ butu.

¹⁶ Jǒn kâng o-sét kámbé ashí amúmú o/fu, me mu n-yip ng omu ne n-kye běn osoo mú Osówo. Nké onet mú o/rêe o-shwôm mě mu o-bâ. Me n*da/kwárê mú nda ǎ epii nang abe emen*. Nyǐ nké o/chi o-yip Busun-Osówo ne okwâ o-kye běn osoo mú Osówo.

¹⁷ Nyǐ oo/kám kiincage-byěm emen ké abwô, ńkyí odacage kángkáng esang-byichí. O-cá esang nyí enong enong o-bwât o-tî. Nké o/chi o-yip boǒmpwǎt-esang o-shí kámbú ké okwâ mú oo*ríbî ne banyá*.

¹⁸ Ké azong-akwóp chwóó chwóó, Jǒn o/tírîng banet o/fu, bajwo ǎ ńdyí mu o-sét ng kámbé Bǎmpém ḿbé Banong.

¹⁹ Nké Jǒn o/bîn Otu Hérot. Ké nǎ, Otu Hérot o/mû o/bé onyinyi obónge mú odabángê Heródyas, mú o/mû onyi mú wǎn-boné emen. Otu Hérot to o/mû oo/chi byibî-byěm byikíri chwóó.

²⁰ Otu Hérot kâng o-bwa o-chi kyibî-chwǒm ńkyí kyi/bwa kyi-bên kyi-shwôm, ńkyí o/fé Jǒn ké mgbokobá.

Jǒn o/kye Jisos Osoo mú Osówo

²¹ Ké nkéré mú Jǒn oo/kye kángkáng banet osoo mú Osówo, o-kye to Jisos osoo mú Osówo. Ké nkéré mú Jisos mu o-fâ nshwam, bubóng bu-bâa.

²² Ne Busun-Osówo bu-shû éné wǎ karúú, bu-bâ ǎ ké byiko. Ejá e-fím kyíbóng e-raa e/fu, wo a-chi i Wǎn ejí mú dyityém. Dyityém ejí ndyi dyi-nyîn n mě kanong kanong ne wo.

Kyikû-Banet ńkyí Jisos

²³ Ké nkéré Jisos o/kpet bǎmkpóngé emen echi, nyǐ o/mû oo/rí chwǒm wǎ aje bujam esim diǐkpú. Banet ba/mû ba-kabe ng ba/fu, nyǐ o/mû wǎn mú Josêf, mú o/mû wǎn mú Helyí.

²⁴ Helyí o/mû wǎn mú Mátat. Mátat o/mû wǎn mú Lyíva. Lyíva o/mû wǎn mú Mékyi. Mékyi o/mû wǎn mú Janyâ. Janyâ o/mû wǎn mú Josêf.

²⁵ Josêf o/mû wǎn mú Matatáyas. Matatáyas o/mû wǎn mú Émos. Émos o/mû wǎn mú Náhum. Náhum o/mû wǎn mú Éselyi. Éselyi o/mû wǎn mú Nagyâ.

²⁶ Nagyâ o/mû wǎn mú Mât. Mât o/mû wǎn mú Matatáyas. Matatáyas o/mû wǎn mú Sémin. Sémin o/mû wǎn mú Jósek. Jósek o/mû wǎn mú Jóda.

²⁷ Jóda o/mû wǎn mú Jowánan. Jowánan o/mû wǎn mú Résa. Résa o/mû wǎn mú Zerubábel. Zerubábel o/mû wǎn mú Shátyel. Shátyel o/mû wǎn mú Néryi.

²⁸ Néryi o/mû wǎn mú Mékyi. Mékyi o/mû wǎn mú Ádyi. Ádyi o/mû wǎn mú Kósam. Kósam o/mû wǎn mú Emádam. Emádam o/mû wǎn mú Êe.

²⁹ Êe o/mû wǎn mú Jóshwa. Jóshwa o/mû wǎn mú Elyěze. Elyěze o/mû wǎn mú Jórim. Jórim o/mû wǎn mú Mátat. Mátat o/mû wǎn mú Lyíva.

³⁰ Lyíva o/mû wǎn mú Syímyon. Syímyon o/mû wǎn mú Júda. Júda o/mû wǎn mú Josêf. Josêf o/mû wǎn mú Jónam. Jónam o/mû wǎn mú Elyǎkim.

³¹ Elyǎkim o/mû wǎn mú Mélya. Mélya o/mû wǎn mú Ména. Ména o/mû wǎn mú Matatâ. Matatâ o/mû wǎn mú Nátan. Nátan o/mû wǎn mú Otu Dívit.

³² Otu Dívit o/mû wǎn mú Jésyi. Jésyi o/mû wǎn mú Obêt. Obêt o/mû wǎn mú Bówaz. Bówaz o/mû wǎn mú Sálamon. Sálamon o/mû wǎn mú Náshwon.

³³ Náshwon o/mû wǎn mú Amínádap. Amínádap o/mû wǎn mú Ádamin. Ádamin o/mû wǎn mú Anyí. Anyí o/mû wǎn mú Hézoron. Hézoron o/mû wǎn mú Pérez.

³⁴ Pérez o/mû wǎn mú Júda. Júda o/mû wǎn mú Jekôp. Jekôp o/mû wǎn mú Ázik. Ázik o/mû wǎn mú Ébarahâm. Ébarahâm o/mû wǎn mú Téra. Téra o/mû wǎn mú Náho.

³⁵ Náho o/mû wǎn mú Séruk. Séruk o/mû wǎn mú Rû. Rû o/mû wǎn mú Pélek. Pélek o/mû wǎn mú Éba. Éba o/mû wǎn mú Shéla.

³⁶ Shéla o/mû wǎn mú Kánan. Kánan o/mû wǎn mú Áfasat. Áfasat o/mû wǎn mú Shêm. Shêm o/mû wǎn mú Núwa. Núwa o/mû wǎn mú Límek.

³⁷ Límek o/mû wǎn mú Metúséla. Metúséla o/mû wǎn mú Énok. Énok o/mû wǎn mú Járet. Járet o/mû wǎn mú Mahalályi. Mahalályi o/mû wǎn mú Kénan.

³⁸ Kénan o/mû wǎn mú Énoshi. Énoshi o/mû wǎn mú Sêt. Sêt o/mû wǎn mú Ádam. Ádam o/mû wǎn mú Osówo.