LÛK BǍMPÉM ḾBÉ BANONG KYI-KIM NE JISOS KARÂS ERINGE NYÍ LÛK O/SÁNG 22 - Bokyi Bible

Banet-Jûs ba/nam Jisos Dyiju

¹ Nkéré o/mû oo/fárâng mú badachi dyijî-kyifen ńkyí Berêt ne ńkyí Shwôm.

² Batu-banchi kyifen-Osówo ne bantánge Byije-Músis ba/mû mbe ba-kyé ng bukwóp ḿbú badaju Jisos ké kadip, ké ebóng, mbé ba/mû ba-shî ng kángkáng banet ḿbé kwán.

Júdas o/bángê o/fu, Nyǐ o-chi i ba-kám Jisos

³ Sátan o-nung kâng Júdas-Esakáryot ké byiko. Mú o/mû ké burwám-bǎmgbán-Jisos ḿbé ashí diǐkpú ne afee.

⁴ Júdas o-dim o-kâm batu-banchi kyifen-Osówo ne banet-ashí-banet ḿbé mbe ba-bám m kiǐtí-kyise-kyifen-Osówo echi, o-tóbê ne mbé eringe nyí nyǐ o/chi o-chi ba-kám Jisos.

⁵ Kyi/nyîn kámbé kanong kanong, ne ba-ryí ocím ba/fu, mbé ba-kyâ ǎ akpuga.

⁶ Júdas o-bángê ne mbé ne o-kpet ekyé bukwóp ḿbú bunong ḿbú odachi ne ba-kám Jisos, eringe nyí banet baa*nyît*.

Jisos o/kpá Byiko ḿbyí odaryí Byiryíng-Dyijî-Kyifen ńkyí Shwôm

⁷ Dyicí dyi-ba-fyi ké dyijî-kyifen ńkyí Berêt ńkyí badaju byisu-etám-ebû ké byiryíng-dyijî-kyifen ńkyí Shwôm.

⁸ Jisos o-twóm Pyíta ne Jǒn, o-sét kámbé o/fu, ca n̂g ba-da-rám byiryíng ḿbyí eten ḿbyí dyijî ba-tî bě.

⁹ Mbé ba-bí Jisos ba/fu, wo amu a-ryuu ng a/fu, byida-rám kámbyí nyá.

¹⁰ Jisos o-sét kámbé o/fu, fwôo n̂g atông ba-jwo. Â ba-nung ng ké oshê ba-bâ, ba/chi ba-kwárê ne onyinchéng obónge mú o/tû katí-omu. Ca n̂g ne nyǐ ké kyikû ba-da-nung ké kyise ńkyí o/chi o-nung.

¹¹ Sét n̂g oyén-kyise ánkyi ba/fu, ntánge byiraa-Osówo o/fu, nfût mú emen mu nyá, mú nyǐ ne bǎmgbán emen badaryí byiryíng-dyijî.

¹² Nyǐ o/chi o-tông běn kiimbâng-nfût kyíbóng-enyóng ńkyí baa/nap kángkáng byěm ba-tî. Ányi nké ba/chi ba-kpá byiko ké kángkáng byěm ba-tî.

¹³ Ne mbé ba-dim ba-da-ri kángkáng byěm kerededet wǎ eringe nyí Jisos o/sét kámbé. Ne ba-rám byiryíng-dyijî ándyi ányi.

Byiryíng ḿbyí Otu Kyítá

¹⁴ Ké nkéré mú nkéré oo/fyi mú badaryí byiryíng-dyijî ándyi, Jisos o/kyú me ne bǎmgbán emen ké ókpákpúrúk-byiryíng eryí.

¹⁵ Ne o-raa ne bǎmgbán emen o/fu, me m/mû mu n-ryuu ng kanong kanong n/fu, n-ryí i byiryíng ḿbyín ḿbyí dyijî ne ben, ne n-kûri busông.

¹⁶ Ké ebóng, me mu n-sét ng běn n/fu, â ńdyín dyi/shwôm, me mm*ba/chi n-chîryí byiryíng-dyijî ńdyín* tete ké dyicí ńdyí ochíchí-dyijî ńdyín dyi/chi byi-bâ ké ntûntû ké Butu ḿbú Osówo.

¹⁷ Jisos o-yip kâng mmîk-bato, ne ké nkéré mú oo/kó Osówo asǎma, o-raa o/fu, koo n̂g ba-jwáp ba-kye barî,

¹⁸ ké ebóng, me mu n-sét ng běn n/fu, me mm*ba/chi n-chîjwáp bato ḿbén* tete Butu ḿbú Osówo bu-byí kyíjí wááng.

¹⁹ Ne o-yip berêt, ne ké nkéré oo/kó Osówo asǎma, o-ját kámú o-kye kámbé. O-raa o/fu, nyín enyam-byiko ejí [nyí me mu n-yip ng n-kye ké dyishí enen. Chi n̂g ńkyín ké ozîim ejí.

²⁰ O/kye to kámbé mmîk-bato ké eringe ányi ebónge ké nkéré baa/ryí byiryíng, o-raa o/fu, mmîk-bato mún o-chi i ocím mú ofyîfî mú Osówo o/ryí ne banet o-sem byiko emen, o-kúlî kámú ne baróng ejí ḿbé ba/chi ba-byí mě ké dyishí enen.]

²¹ Nké kan n̂ achi ba-ri. Onet mú mu o-chi i o/fu, bakám mě, mu nyín o-ryí i byiryíng ne me.

²² Ké ebóng, Wǎn mú Onet o/chi o-kpú wǎ eringe nyí Osówo oo/sét o/fu, kyichi. Nké kyi/chi kyi-bên kanong kanong ne onet ámu mú mu o-chi i o/fu, bakám ǎ.

²³ Ne bǎmgbán emen ba-kpet ebí barî ba/fu, yeě ké burwám ebe mu o-bâ echi chwǒm ńkyín.

Okân ké Dyishí kyi-kim ne Ḿgbán mú mu Kiǐtí o-shwôm

²⁴ Okân ké dyishí o-ba-róng bǎmgbán-Jisos kyi-kim ne onet mú banet mbe ba-kabe ng ba/fu, mu kiǐtí o-shwôm ké burwám ebe.

²⁵ Jisos o-raa ne mbé o/fu, ké ejíí ńnyín, batu nké mbe ne busa ba-shwôm banet ḿbé mbe ké bubwô ebe. Ne batu-ashí mbe ba-ryuu ng ba/fu, banet bakûfu kámbé ba/fu, mbé ba-chi i banet ḿbé banong.

²⁶ Nké *chí eringe ányi nké nkyi ne ben*. Ne ben kâng, onet mú mu kiǐtí o-shwôm ké burwám enen o-man o-kyú wǎ wǎsíng. Onet to mú mu onet-dyishí o-man o-kyú wǎ ḿgbán enen.

²⁷ Yeě mu kiǐtí o-shwôm. Onet mú o/kyú me mu o-ryí i byiryíng aa, aa onet mú mu o-kyâ ǎ byiryíng. *Chí onet mú o/kyú me nké mu kiǐtí o-shwôm*? Nké me mu ké burwám enen wǎ onet mú mu o-kyâ byiryíng.

²⁸ Ben ba*da mě emîng ne* ké kángkáng okan ejí*.

²⁹ Eringe nyí Bonchí ejí oo/kúng mě butu, éné to nké me n/chi n-kúng běn.

³⁰ Ben ba/chi ba-ryí byiryíng, ba-jwáp bato ké ókpákpúrúk obónge ne me, ké Butu ejí. Ne ba/chi ba-kyú to ké bukyúng-butu ba-pan byikû-banet ḿbyí Ézerel diǐkpú ne byifee mpan.

Jisos o/sét o/fu, Pyíta o/chi o-né ǎ

³¹ Jisos o-raa ne Pyíta o/fu, Sámon, fwôo atông a-jwo. Sátan oo/koo busa ne Osówo o/fu, nyǐ o-kan n běn ashí amúmú. O/fu, nyǐ o-cage ng běn wǎ eringe nyí onyinyi odacage esang-ácangê.

³² Nké me nn/fé nshwam n-kye Osówo ké bubwô eyên, ǎ Sámon, n/fu, dyityém eyên ńdyí wo a/fé ne me dyi*dachi dyi-kyee*. Ké nkéré mú wo a/chi a-bwa esim kyicê ńkyí ejí, kám bwǎn-bané eyên kíngkíng.

³³ Pyíta o-faa o/fu, Otu Kyítá, me mm/kpá byiko ḿbyí ndadim ne wo ké mgbokobá ne ḿbyí ndakpú ne wo ké kyikû.

³⁴ Jisos o-faa ǎ o/fu, me mu n-sét ng ǒ, ǎ Pyíta, n/fu, ne otúkwa o-kûkó ké buchú ḿbú kurún, wo a/chi a-né kampén kachât a/fu, wo aa*nyît mě*.

Kaambam ńké badafé Akpuga ne Kiimbam ne Kashwám

³⁵ Ne Jisos o-raa ne bǎmgbán emen o/fu, ké nkéré mú n/twóm běn, n/fu, *da n̂g eyip kaambam ńké badafé akpuga* nang kiimbam* nang abe* chwǒm nang kyibónge kyi/kaa běn dí. Mbé ba-faa ba/fu, nang kyibónge kyi*da bě ekaa*.

³⁶ Jisos o-raa ne mbé o/fu, nké kántîk kâng, nang yeě nké mu ne kaambam ńké badafé akpuga nang kiimbam o-man o-kúng. Nang yeě nké o*fí ne kashwám* o-man o-shee nkyû emen o-ré kabónge.

³⁷ Ké ebóng, me mu n-sét ng běn ńkyín n/fu, kyikit-ejá-Osówo nyí ba/sáng kyísí ńkyí kyi/fu, nyǐ ba/pan ǎ ba-cibi ne banchi byibî, kyi-man kyi-chi ntûntû ké enyam-byiko ejí. Ké ebóng, dyikpen ejí dyi-kú dyi-bâ eman.

³⁸ Bǎmgbán emen ba-faa ba/fu, kûri, be byimu ne bushwám nyín bufee, ǎ Otu Kyítá. Jisos o-sét kámbé o/fu, bǎmpém ḿbén ba/kwárê.

Jisos o/fé Nshwam ké Kaku ńké badakó Ólif

³⁹ Jisos o/mîng oshê mú Jerúsélem o-dim ké kaku ńké badakó Ólif wǎ eringe nyí mu o-fwam m ece. Bǎmgbán emen ba-dim ne nyǐ ké kyikû.

⁴⁰ Ké nkéré ba/ribi ké ochíchí-kyikit ńkyí mu o-ryuu ng, o-sét bǎmgbán emen o/fu, fé n̂g nshwam, eringe nyí baa*ba/chi ba-róng ké okan*.

⁴¹ Ne Jisos o-dim kâng o-mîng kámbé ányi, o-tín o-ca ké kashú, o-tím arông kyísí, o-fé nshwam o-kye Osówo.

⁴² O/fu, Kyítá, â kyi/nyîn ǒ, fîm mě ké mmîk-busông eri mún ejwáp. Nké *dachi ńkyí me mu n-ryuu ng*. Chi ńkyí wo amu a-ryuu ng. [

⁴³ Orím mú onong o-fím kyíbóng o-byí o-kâm ǎ, o-ba-fé ǎ dyityém.

⁴⁴ Bafip ḿbé ba/mû ǎ ké dyityém ba/chi ǎ o-chîfé nshwam ne busa o-shwôm eringe nyí o/mû o/fé ké kashú. Nsísóngé mú o/mû o-byí i ǎ ké byiko o-róng ng kyísí o/mû wǎ abán-baróng.]

⁴⁵ Ké nkéré o/man nshwam efé, o-bwa esim o-kâm bǎmgbán emen, o-ba-ri kámbé ké ba-kú ba-rê ng. Bafip baa/chi busa bu-man kámbé ké byiko.

⁴⁶ Ne o-bí kámbé o/fu, ebóng bamu ba-rê ng. Bûu n̂g nensang ba-fé nshwam, eringe nyí baa*ba/chi ba-róng ké okan*.

Ba/kám Jisos

⁴⁷ Jisos o/mû o/tôong o-raa ng ké nkéré bujê-banet ba/baribi. Ḿgbán-Jisos obónge mú odabángê Júdas, mú o/mû ké burwám ḿbú ashí diǐkpú ne afee o/mû o/bwóp kámbé kashú, o-ba-kâm Jisos, eringe nyí oda ǎ erwâm.

⁴⁸ Jisos o-bí ǎ o/fu, Júdas, a-yip ng dyirwâm a-chi ba-kám Wǎn mú Onet?

⁴⁹ Ké nkéré bǎmgbán ḿbé ba/mû ne Jisos ké kyikû ba/ri ńkyí nkyi kyi-bâ ebachi, ba-bí ǎ ba/fu, Otu Kyítá, byiyip bushwám eten byi-nwa ne mbé dí.

⁵⁰ Ḿgbán-Jisos obónge o-kpet ósóng-otu-nchi kyifen-Osówo kyibáp ké butông ḿbú bubwô-etyebéng o-két.

⁵¹ Jisos o-raa ne mbé o/fu, mîng n̂g, kyi/kwárê. O-yip bubwô o-ta onyinchéng ámu ké kyibáp ńkyí ba/két ǎ butông éné, ne butông emen bu-bwa esim kerededet.

⁵² Ne Jisos o-raa ne batu-banchi kyifen-Osówo ne banet-ashí-banet ḿbé mbe ba-bám m kiǐtí-kyise-kyifen-Osówo echi ne bakínkán-banet-Jûs ḿbé ba/bê ǎ ebakám o/fu, ben ba/bê mě ebakám ne bushwám ne echí wǎ n-chi i onet-kajii?

⁵³ Ké nkéré me m/mû ne ben kángkáng ací ké kiǐtí-kyise-kyifen-Osówo echi, ben ba/da mě ekám*. Nké kántîk, Osówo oo/bángê o-kye běn, ké nkéré mú Otu-Byibî-Barím mú odatún banet ké kyifip.

Pyíta o/né Jisos

⁵⁴ Ba-kám kâng Jisos ba-dim ne nyǐ ké kyise ńkyí otu-nchi kyifen-Osówo. Ne Pyíta o-nyábê o-ca kámbé ké kyikû.

⁵⁵ Ké nkéré mú baa/wóngê okwâ ké otyém-kafâ-kabám ńké otu-nchi kyifen-Osówo ámu, ba-kyú me mbe ba-jwaa ng, Pyíta o-da-kyú to ányi ne mbé.

⁵⁶ Wǎn-onyinyi mú mu ḿgbán o-ba-ri Pyíta kâng ké kiinwángé-okwâ, o-kpúrî ǎ dííng, o-raa o/fu, onyinchéng mún to o/mû o-cen n ne Jisos ké kyikû.

⁵⁷ Nké Pyíta o/né kánkyí. O-faa o/fu, me nn*nyît ǎ nang onyît ónyit* ǎ otu-onyinyi*.

⁵⁸ Ka*da/chîbwon* onyinchéng obónge o-cêe Pyíta, o-raa ne nyǐ o/fu, wo to amu ké burwám ḿbú mbe ba-cen n ne Jisos ké kyikû. Nké Pyíta o/né o/fu, otu-onyinchéng, me n*fí ké burwám ebe*.

⁵⁹ Ké nkéré mú kii/chîbwon wǎ égbáng ebónge, onyinchéng okíri o-chîraa o-fé busa o/fu, ké ntûntû, onyinchéng mún to o/mû o-cen n ne Jisos ké kyikû. Ké ebóng, mu o-raa ng ejá-Gályílyi.

⁶⁰ Nké Pyíta o/faa o/fu, otu-onyinchéng, me n*fí n-nyît ng ńkyí wo amu a-raa ng*. Ké abe ányi nyí Pyíta o/tôong o-raa ng éné, otúkwa o-waa ányi o-kó.

⁶¹ Ne Otu Kyítá o-pín achi ké esim o-tún Pyíta, ne Pyíta o-zîim byiraa ḿbyí Otu Kyítá o/mû o/raa ne nyǐ o/fu, ne otúkwa o-kûkó ké buchú ḿbú kurún, wo a/chi a-né kampén kachât a/fu, aa*nyît mě*.

⁶² Ne Pyíta o-byí kyíjí o-sêe ne bukyû.

Ba/fát Jisos Kiikuku ba-mín ǎ

⁶³ Banet ḿbé ba/mû ba-bám m Jisos ba-fát ǎ kiikuku, ba-chî ǎ emín ba-cibi ányi.

⁶⁴ Ba-bwá ǎ kyídí ké achi, ba-bí ǎ ba/fu, kabe a-sét bě onet mú o/díp ǒ.

⁶⁵ Ne ba-raa byiraa byikíri to chwóó ḿbyí byi/kye Jisos edángé ké byiko.

Jisos o/bwom ké Bushú-Esuk nyí Eryên nyí Banet-Jûs

⁶⁶ Ké nkéré mú dyicófóróng dyi/cé, bakínkán-banet-Jûs ne batu-banchi kyifen-Osówo ne bantánge Byije-Músis ba-ba-kyú ké esuk ebe nyí eryên ne ba-yip Jisos ba-ca ne nyǐ ké bushú ebe.

⁶⁷ Ba-bí Jisos ba/fu, sét bě, wo a-chi i onet mú Osówo o/kúng ǎ butu dí. Jisos o-faa kámbé o/fu, â n/sét běn, baa*ba/chi ba-bángê ne me*.

⁶⁸ Nang m/bwa m-bí běn ḿbím kántîk, baa*ba/chi ba-faa*.

⁶⁹ Nké kyi-fím kurún kyi-ca kashú, Wǎn mú Onet o/chi o-kyú ké kyicê-bubwô-etyebéng-Osówo mú kángkáng busa.

⁷⁰ Mbé ashí amúmú ba-bí ǎ ba/fu, wo kâng a-chi i Wǎn-Osówo dí. Jisos o-faa kámbé o/fu, ben nké ba/fu, me n-chi i.

⁷¹ Ne mbé ba-raa ba/fu, byi*fí to byi-ryuu ng ntûesé nang obónge*. Be bayén bii/jwo ńkyí nyǐ oo/sét ké ocím mú emen nyǐ oyén.