LÛK BǍMPÉM ḾBÉ BANONG KYI-KIM NE JISOS KARÂS ERINGE NYÍ LÛK O/SÁNG 21 - Bokyi Bible

Eyáré nyí Onyǐnkú

¹ Jisos o-bírî achi o-ri eringe nyí banfang-banet mbe ba-fâ akpuga-eyáré ké mkpukpu-eyáré mú mu ké kafâ-kiǐtí-kyise-kyifen-Osówo echi.

² Ne o-ri to onet-kyikpu-onyǐnkú obónge o/fé baderyí deryí bafee.

³ Ne Jisos o-raa o/fu, me mu n-sét ng běn n/fu, onyǐnkú mún mú mu kyikpu o/fé eyáré ké mkpukpu-eyáré e-jê e-shwôm nyí kángkáng banet ḿbé áku.

⁴ Ké ebóng, banet ḿbé áku ba/fé akpuga nyí a/waa kámbé kyísí, nké onyǐnkú mún ne kyikpu ké byiko o/fé kángkáng ńkyí nyǐ o/mû o/chi o-kpen ké nkyí.

Jisos o/raa kyi-kim ne eringe nyí ba/chi ba-bên Kiǐtí-Kyise-Kyifen-Osówo echi

⁵ Ké nkéré banet bakíri mbe ba-raa ng kyi-kim ne kiǐtí-kyise-kyifen-Osówo echi, eringe nyí nkyi kyi-nwa ng bunong, ne bunong ḿbú aká nyí ba/yip ne ba-bi kánkyí, ne bunong-eyáré nyí banet mbe ba-kyâ Osówo nyí ba/tî ké kafâ emen, Jisos o/sét banet ḿbé ba/mû ányi o/fu,

⁶ kángkáng byěm ḿbyí bamu ba-ri ng něen, nkéré mu o-bâ mú buká ḿbún nang bubónge boo*ba/chi bu-chîwaa ké kyikit emen ńkyí mbu*. Ba/chi ba-bú kányí kángkáng ba-pwó kyísí.

Afaníkong ne Busông eri

⁷ Ne bǎmgbán emen ba-bí ǎ ba/fu, ntánge byiraa-Osówo, nkéré orá mú chwǒm ńkyín kyi/chi kyi-chi. Ebóng ekap nyí e/chi e-tông ké nkéré chwǒm ńkyín kyi-kú kyi-bâ echi.

⁸ Jisos o-sét kámbé o/fu, kû n̂g ebám byiko enen, eringe nyí banet baa*ba/chi ba-nîm běn*. Ké ebóng, banet chwóó ba/chi ba-bâ ké dyizîn ejí ba-kûraa ba/fu, dǐi, me nké mu onet mú Osówo o/kúng ǎ butu. Ba-kûsét to ba/fu, nkéré oo/fyi. Nké *da n̂g echi ba-ca ne mbé ké kyikû*.

⁹ Ofong o*dachi o-kédê běn* â ba/jwo kyi-kim ne byití* nang bunwa ḿbú mbu ké oshê*. Azong-byěm ányi a-man a-chi kpá, nké kyi*da/byí kyi/fu, nkuli kyikû-nkéré oo/fyi*.

¹⁰ O-chîraa o-ca kashú o/fu, oshê ne oshê ba/chi ba-kûnwa ne barî. Kyibám-butu ne kyibám-butu byi/chi byi-kûnwa to ne barî.

¹¹ Esí e/chi e-náng kakânkakân. Esong ne byirwóm ḿbyí byidakoo oshê omúmú byi/chi byi-róng ké kángkáng byikit. Biǐtí-ekap ḿbyí byi/chi byi-chi banet ba-firi ne bushî byi/chi byi-tông kyíbóng.

¹² Nké ne byěm ḿbyín byi-kûchi kâng, banet ba/chi ba-kám běn ba-kye běn busông. Ba/chi ba-yip běn ba-bwom ké mpan, ké byise-ékwâbashi ḿbyí banet-Jûs, ne ba/chi ba-mán běn ké mgbokobá. Ba/chi ba-yip běn ba-bwom ké bushú ḿbú batu ne banet-ashí ké dyishí ejí.

¹³ Nkéré ámu nké ben ba/chi ba-já mpât mú badasét banet Bǎmpém ḿbé Banong.

¹⁴ Kabe n̂g ba-tigi ne dyityém ba/fu, ben baa*ba/chi ba-kérê kpá ne nkéré o-kûfyi* kyi-kim ne eringe nyí ben ba/chi ba-pan mpan*.

¹⁵ Ké ebóng, me n/chi n-kye běn dyizong-ejá ne bubong ḿbyí onet-bushwôn enen nang obónge oo*ba/chi o-man běn ekpógê* o-né to nang ńkyí ben badasét*.

¹⁶ Banchí enen ne bané enen ne bwǎn-bané enen ne banet-kyikû enen ne bacín enen ba/chi ba-kám běn ba-kye kámbé. Ne ba/chi ba-ju kyicê-banet ké burwám enen.

¹⁷ Ba/chi ba-kûsa kángkáng banet kafâ ké dyishí ejí.

¹⁸ Nké oji nang obónge oo*ba/chi o-zûu běn ké dyishí*.

¹⁹ Cíp n̂g dyityém, ké ebóng, ké dyityém ecíp nké ben ba/chi ba-nyii byiko enen.

Jisos o/raa kyi-kim ne eringe nyí ba/chi ba-bên Jerúsélem

²⁰ Ké nkéré ben ba/chi ba-ri basúja ké baa/wâng Jerúsélem ba-fé ké kafâ, nyît n̂g ba/fu, nkéré oo/fyi mú badabên kámú.

²¹ Banet ḿbé mbe ké Judyâ kâng ba-man ba-chêe ba-jâ ké eku. Banet ḿbé mbe ké kafâ-oshê ba-man ba-dim. Banet ḿbé mbe kyíjí ba*dachi ba-fu, mbé ba-bwa ng esim ké kafâ-oshê*.

²² Ké ebóng, ací ányi a/bwom ké ací nyí Osówo o/chi o-kye banet-Ézerel busông, eringe nyí kyi/chi kyi-chi wǎ eringe nyí ejá-Osówo nyí ba/sáng kyísí e/fu,

²³ kyi/chi kyi-bên ké ací ányi kanong kanong ne banyinyi ḿbé mbe ne afít ne ḿbé ba/tôong ba-nyâm m bwǎn abî. Afaníkong nyí aa*nwa eri* a/chi a-bâ ké esí ńnyín. Busa-dyityém ḿbú Osówo bu/chi bu-shû bu-kâm banet ḿbén.

²⁴ Banet bakíri ba/chi ba-ju kámbé ké kashwám. Bakíri ba/chi ba-kúng kámbé wǎ bamgbokobá ba-jâ ké kángkáng eshê. Ne banet ḿbé ba*fí banet-Jûs* ba/chi ba-bên Jerúsélem kángkáng tete nkéré ebe o-man.

Obê mú Wǎn mú Onet

²⁵ Ekap e/chi e-tông ké óbyísû ne ké otukáku ne ké ékpére. Ké ejíí, eshê ee*ba/chi e-chîkyú ne okabe mú dyikpen* ké bushî ḿbú ba/chi ba-kûshî kyirime-baya ne onâng emen to mú ba/chi ba-kûnáng kakânkakân.

²⁶ Banet ba/chi ba-kûjwâa ké bushî ké nkéré mú ba-kú ba-bám m ba-ri chwǒm ńkyí nkyi kyi-bâ echi ké ejíí emúmú. Ké ebóng, busa ḿbú mbu bu-níbî ng byěm ḿbyí kyíbóng bu/chi bu-náng.

²⁷ Ne ba/chi ba-ri Wǎn-Onet kâng ké o-kú o-bâ ké ófíbí ne busa ḿbú kiǐtí ne kiǐtí-busan ḿbú ragerage.

²⁸ Ké nkéré mú byěm ḿbyín bii/kpet echi, dim m̂ nensang ba-bêem kashú kyíbóng, ké ebóng, nkéré mú Osówo oda běn enyii oo/fárâng.

Chwǒm ekwâa kyi-kim ne Kyichí ńkyí badakó Fyîk

²⁹ Ne Jisos o-tím kámbé kâng dyitím-ekan ńdyín o/fu, zîim m̂ kyichí ńkyí badakó fyîk, ńkyí nkyi wǎ kyifem, ne byichí byikíri to.

³⁰ Ké nkéré mú byi-kú byi-byet ng eshǎan, ben bayén ba-ri ng, ba-nyît ba/fu, kyifang kyi/firi jwángjwáng.

³¹ Eringe ebónge to, ké nkéré mú baa/ri byěm ḿbyín byi-kú byi-chi i, nyît n̂g ba/fu, Butu ḿbú Osówo bu-kú bu-bâ ebyí kyíjí wááng.

³² Zîim m̂ ńkyín ba/fu, kángkáng byěm ḿbyín byi-man byi-chi ne banet ḿbé mbe kántîk ké ejíí kángkáng ba-kpú kpók.

³³ Bubóng ne esí byi/chi byi-man, nké ejá ejí ee*ba/chi e-waa kyísí ne banyá*.

Kyi-nwa ng ńkyí badabám Byiko Enen

³⁴ Kû n̂g ebám byiko enen. *Da n̂g echi ba-mîng okabe mú ajî eryí ne bato ejwáp ḿbé badabwóm ne ekyíkéré ké dyityém kyi-kim ne dyikpen ńdyín byi-cít běn*. Â kyi*fí éné* dyicí ándyi dyi/chi dyi-byí běn kiǐmút.

³⁵ Ké ebóng, dyicí ándyi dyi/chi dyi-bâ dyi-kám kángkáng banet ḿbé mbe ké ejíí emúmú wǎ kaǎtám.

³⁶ Kû n̂g ebám byiko ba-fâ nshwam kángkáng nkéré, eringe nyí badaman ekyú ne busa ḿbú badafem ké byěm ḿbyín kángkáng ḿbyí byi/chi byi-chi, ne ba-bwom ké bushú ḿbú Wǎn mú Onet.

³⁷ Jisos o/kúng ací ányi mu o-tángê e banet byěm ké kafâ-kiǐtí-kyise-kyifen-Osówo echi. Ké nkéré mú dyikurúku dyidafyi, nyǐ mu o-byí i o-da ng erí ké kaku ńké badakó Ólif.

³⁸ Kángkáng banet ba/mû ba-dim m ké dyicófóróng pirípirí, ba-câ ké kafâ-kiǐtí-kyise-kyifen-Osówo echi ba-da ng ejwo byiraa ḿbyí mu o-tángê e.