LÛK BǍMPÉM ḾBÉ BANONG KYI-KIM NE JISOS KARÂS ERINGE NYÍ LÛK O/SÁNG 18 - Bokyi Bible

Dyitím-Ekan kyi-kim ne Onyǐnkú ne Onet mú odapan Banet Bampan

¹ Ne Jisos o-tím bǎmgbán emen dyitím-ekan ńdyín, eringe nyí badakûfé nshwam kángkáng nkéré, baa*zú dyityém*.

² O/fu, mpan banet bampan obónge o/mû ké oshê obónge, mú o/mû oo*shî onet* nang Osówo*.

³ Onyǐnkú obónge o/mû to ké oshê ámu mú o/mû o-câ kángkáng nkéré o-kâm m mpan banet bampan ámu o/fu, okét mpan mú nyǐ o/mû ne mǔ ne onet-bushwôn emen o-nwa ǎ.

⁴ Ké kyikim-nkéré chwóó, mpan banet bampan ámu o/né. Nké ké nkéré mú kaa/bwon, o-bwa o-raa ne byiko emen o/fu, ké ntûntû, me n*fí n-shî ng onet* nang Osówo*

⁵ nké ké bubwô ḿbú onyǐnkú mún mu o-jang ng mě ekye afaníkong, n/chi n-két mpan o-nwa ǎ. Â kyi*fí éné* oo*ba/chi o-bángê mě n-jáng*.

⁶ Ne Otu Kyítá o-sét kámbé o/fu, ba/jwo ńkyí mpan banet bampan mú mu o-két ng byibî-bampan o/fu?

⁷ Osówo kâng oo*ba/chi o-két mpan o-nwa banet ḿbé nyǐ o/cá kámbé*? ḿbé mbe ba-tii ng buchú ne esû ba-kó ng ǎ*? O/chi o-bên nkéré ne o-kye kámbé ńkyí mbe ba-ryuu ng dí.

⁸ Me mu n-sét ng běn n/fu, Osówo o-man o-kye kámbé ochéé óchee ńkyí mbe ba-ryuu ng. Nké ké nkéré Wǎn-Onet oo/bê ké ejíí, o/chi o-ri banet ḿbé ba/fé dyityém ne nyǐ dí.

Dyitím-Ekan kyi-kim ne Nkoo Akpuga-Dyishí ne Onet mú mu ké Ncibi mú badakó Fárasyî

⁹ Jisos o-tím to dyitím-ekan ńdyín kyi-kim ne banet ḿbé mbe ba-kpee ng byiko ebe ba/fu, mbé mbe kanong, ba-bîn n banet ḿbé áku, o/fu,

¹⁰ banyinchéng ashí afee ba/dim nshwam efé ké kafâ-kiǐtí-kyise-kyifen-Osówo echi. Onyinchéng obónge o/mû onet-ncibi mú badakó Fárasyî, mú obónge nkoo akpuga-dyishí.

¹¹ Mú onet-Fárasyî o-bûu o-bwom ké otyém, ne o-fé nshwam o/fu, Osówo, me n/kó ǒ asǎma, ké nǎ, me n*fí wǎ banet bakíri* ḿbé mbe banjii bujii* ne byibî-banet* ne banchi byinam*. Me n*fí wǎ nang nkoo akpuga-dyishí mún*.

¹² Me mu n-cíp ng esong kampén kafee ké kyipyán. Me mu n-kyii ng kángkáng byěm ḿbyí mu n-já ng ké byikit diǐkpú, n-kúng kyikit kyibónge n-yárê ǒ.

¹³ Nké mú nkoo akpuga-dyishí o/bwom áku ké esim cát. O*da/man ebêem nang achi nyǐ nyi kyíbóng* nké o/fút abwô ké kakim ne bafip, ne o-raa o/fu, Osówo, ri mě bafip, ké nǎ, me n-chi i nchi byibî.

¹⁴ Jisos o-sét kámbé o/fu, me mu n-sét ng běn n/fu, onyinchéng mún o/jé ne kanong ké bushú ḿbú Osówo. *Chí onyinchéng mú áku* ké ebóng, nang yeě nké o/yip byiko emen kyíbóng kyíbóng, Osówo o/chi o-bwa ne nyǐ kyísí kyísí. Nké nang yeě to nké o/kúng byiko emen kyísí kyísí, Osówo o/chi o-yip ǎ o-tî kyíbóng kyíbóng.

Jisos o/jware Boǒbwásíng

¹⁵ Kyicê-banet ba/bê ne boǒbwásíng ba-kâm Jisos, eringe nyí odata bwǎn ámbe abwô ké byiko. Nké bǎmgbán-Jisos ba/ri kámbé, ba-kpet eró banet ámbe.

¹⁶ Nké Jisos o/kó ḿbé boǒbwásíng ámbe ba-kâm ǎ, o-raa o/fu, mîng n̂g ḿbé boǒbwásíng ba-bâ ba-kâm mě. *Da n̂g echîku kámbé* ké ebóng, banjware ḿbé Butu ḿbú Osówo ba/já banet ḿbé mbe wǎ boǒbwásíng ḿbún.

¹⁷ Zîim m̂ ńkyín. Nang yeě nké o*da/koo Butu ḿbú Osówo wǎ wǎn-ojújwô* oo*ba/chi o-nung ké Butu emen*.

Nfang-Onyinchéng

¹⁸ Onet-dyishí mú banet-Jûs o-bí Jisos o/fu, ntánge byiraa-Osówo mú o/nwa dyityém, me m-man n-chi ebóng ne n-já dyikpen ńdyí ne banyá.

¹⁹ Jisos o-bí ǎ o/fu, ebóng a/fu, me n/nwa dyityém. Onet o*fí mú o/nwa dyityém* kyi-cibi ne Osówo kǎnchí*.

²⁰ Ná wo amu a-nyît ng ńkyí byije-Osówo byi/fu. Byi/fu, *dachi kyinam* *daju onet* *dajii kajii* *dasét kyisédéng* fé ńchân ne ńnân.

²¹ Onyinchéng ámu o-faa o/fu, kyi-fím ké dyikwá ejí tete kyi-ribi kántîk, me mu n-tî ng byije ḿbyín.

²² Ké nkéré Jisos o/jwo ńkyín, o/raa ne mú nfang-onyinchéng ámu o/fu, chwǒm kyi/waa kyibónge ńkyí adachîchi. Shee kángkáng byěm ḿbyí amu ne mbyí, a-yip akpuga ányi a-kye banet-byikpu, ne wo a/chi a-fang kyíbóng. Ne a-bâ kâng a-kûcen ne me ké kyikû.

²³ Nké ké nkéré onyinchéng ámu o/jwo ńkyín, kashú emen ka-bên, ké ebóng, o/mû kiǐtí-nfang-onet.

²⁴ Ké nkéré Jisos o/ri eringe nyí kashú ńké onyinchéng ámu kaa/bên, o-raa o/fu, kyi/chi kyi-sóng! ne banfang-banet ba-nung ké Butu ḿbú Osówo.

²⁵ Kii*jang esóng kaanyam-atû eshwôm ké mbyí-ága* wǎ eringe nyí kyidasóng nfang-onet enung ké Butu ḿbú Osówo*.

²⁶ Banet ḿbé ba/jwo kánkyí ba-bí Jisos ba/fu, yeě kâng mú Osówo o/chi o-nyii ǎ.

²⁷ Nké Jisos o/sét kámbé o/fu, ńkyí banet baa*man echi* Osówo o-man n echi.

²⁸ Ne Pyíta o-raa ne Jisos o/fu, bonchí, ké ntûntû, be bii/mîng byise eten byi-dim ne wo ké kyikû.

²⁹ Jisos o-faa kámbé o/fu, nkyi éné. Me mu n-sét ng běn ńkyín ké ntûntû n/fu, nang yeě nké o/mîng byise emen nang onyi emen nang bwǎn-bané emen nang banet ḿbé ba/fwon ǎ nang bwǎn emen ké bubwô ḿbú Butu ḿbú Osówo,

³⁰ onet ámu o/chi o-já kámbyí kántîk byi-jê byi-shwôm ḿbyí nyǐ o/mîng, ne o/chi o-já dyikpen ńdyí ne banyá ké nkéré mú mu o-bâ ké kashú.

Jisos o/chîraa ké Kampén Kachât kyi-kim ne Bukyû Emen

³¹ Jisos o/kúng bǎmgbán emen ḿbé ashí diǐkpú ne afee o-bwom ké bukô ne mbé, ne o-raa ne mbé o/fu, kû n̂g eri, byi-kú byi-wâa ng Jerúsélem. Ányi nké kángkáng byěm ḿbyí bamkpábé ḿbé badasét byiraa-Osówo ba/sáng kyi-kim ne Wǎn-Onet byi/chi byi-chi.

³² Ba/chi ba-kám ǎ ba-kye banet-Rûm, ḿbé ba/chi ba-fát ǎ kiikuku, ba-kye ǎ edángé, ba-shú ǎ akorong ké byiko.

³³ Ba/chi ba-mín ǎ, ba-ju ǎ. Nké ké ací achât, Osówo o/chi o-jwóbê ǎ ké bukyû.

³⁴ Nké bǎmgbán emen ba*da/jwo dyishí-chwǒm ńkyí Jisos mu o-raa ng*. Osówo o/mû oo/rôo kámbé kyikû-byiraa ḿbyí Jisos o/raa něen, ne ba*da/nyît ńkyí Jisos o/raa*.

Jisos o/chi Nsêe Achi mú o/mû o-rém m Byěm o-nyange

³⁵ Ké nkéré mú Jisos o-kú o-fárâng ng Jéríku, onyinchéng obónge mú o/mû o/sêe achi o/mû o/kyú ké bukô-bukwóp mu o-rém m byěm.

³⁶ Ké nkéré nsêe achi ámu o/jwo ké bujê-banet bu-kú bu-shwôm m, o-bí o/fu, ebóng banet mbe ba-shwôm m něen.

³⁷ Ba-sét ǎ ba/fu, Jisos mú o/fím Názáret nké mu o-shwôm m.

³⁸ Ne o-wonge ne ejá kyíbóng o/fu, Jisos mú wǎn-Otu Dívit, ri mě bafip.

³⁹ Banet ḿbé ba/mû ké kashú ba-nyán ǎ ba/fu, ocíbî pyêp. Nké nyǐ o/bwa o-kpet eraa kakânkakân o-shwôm oshwǒm o/fu, wǎn-Otu Dívit, ri mě bafip.

⁴⁰ Jisos o-bwom kâng, ne o-kye busa o/fu, baníbî mú nsêe achi ámu ba-bâ ne nyǐ. Ké nkéré mú nsêe achi ámu oo/fárâng, Jisos o-bí ǎ o/fu,

⁴¹ wo amu a-ryuu ng a/fu, me nchi ǒ ebóng. Nsêe achi ámu o-faa o/fu, bonchí, me mu n-ryuu ng n/fu, n-chî ng erángê.

⁴² Ne Jisos o-sét ǎ kâng o/fu, chîkpet erángê, dyityém eyên ńdyí a/fé ne me dii/chi ǒ a-nyange.

⁴³ Ké abe ányi, onyinchéng ámu o-kpet erángê, ne o-dim ne Jisos ké kyikû, o-kpee ng Osówo o-câ. Kángkáng banet ḿbé ba/mû ányi, ké nkéré ba/ri kánkyí, ba-kye Osówo akpee.