LÛK BǍMPÉM ḾBÉ BANONG KYI-KIM NE JISOS KARÂS ERINGE NYÍ LÛK O/SÁNG 15 - Bokyi Bible

Etám-Ebû nyí e/tánê

¹ Nkéré obónge, bankoo akpuga-dyishí chwóó ne banchi byibî to chwóó ba/bê ebajwo byiraa ḿbyí Jisos mu o-sét ng.

² Banet-ncibi mú badakó Fárasyî ne bantánge Byije-Músis ba-kpet erime ké kyitông ba/fu, onyinchéng mún něen, banchi byibî ba-nyîn n ǎ, o-ryí i ne byiryíng ne mbé.

³ Ne Jisos o-tím kámbé kâng dyitím-ekan ńdyín o/fu,

⁴ ben â nang onet enen obónge nké o/mû ne bajam-etám-ebû batánge, ne ebónge e-ba-tánê ǎ, onet ámu o-chi i nǎ. O-man o-mîng nyí áku bajam banyii esim onyiryiká ne enyii ányi ké kyikit ńkyí nyi e-ryí i baryî, o-dim edakyé nyí e/tánê éné tete o-ri kányí.

⁵ Ké nkéré mú oo/ri kányí, o-firi ng ké bunyîn-dyityém, o-kúng kányí o-twôom ké byikem.

⁶ O-bwa esim ne nyǐ dyijê. O-ba-kó bacín emen ne barî-banet emen ba-ba-kyú kyikit kyibónge. O-sét kámbé o/fu, me n/firi ké bunyîn-dyityém. Bâ n̂g ba-jêe ne me, ké ebóng, nn/ri ebû ejí nyí e/mû e/tánê.

⁷ Ne Jisos o-sét kámbé o/fu, me mu n-sét ng běn n/fu, eringe ebónge to nké bunyîn-dyityém bu/chi bu-jê chwóó kyíbóng, â nchi byibî obónge o/saa byiko o-mîng byibî echi, bu-shwôm ḿbú bajam-banet banyii esim onyiryiká ne banyii ḿbé mbe biǐtí-banet, ḿbé kyi*da/chîbát mú mbé badachîsaa byiko ké byibî ebe*.

Kóbo mú o/tánê

⁸ Â nang onyinyi obónge to nké mu ne bakóbo diǐkpú, ne obónge o-ba-tánê ǎ, onyinyi ámu o-chi i nǎ. O-man o-mee okwâ, o-jwoo kyise emen, o-tún kanong kanong tete o-ri kámú.

⁹ Ké nkéré mú oo/ri kámú, o-da ng ekó bacín emen ne barî-banet emen ba-ba-kyú kyikit kyibónge. O-sét kámbé o/fu, me n/firi ké bunyîn-dyityém. Bâ n̂g ba-jêe ne me, ké ebóng, nn/ri kóbo ejí mú o/mû o/tánê.

¹⁰ Ne Jisos o-chîraa ne mbé o/fu, me mu n-sét ng běn n/fu, eringe ebónge to barím ḿbé banong ḿbé Osówo ba-jêe ng, â nchi byibî obónge o/saa byiko o-mîng byibî echi.

Wǎn-Onyinchéng mú o/tánê

¹¹ Jisos o-chîraa o-ca kashú o/fu, onyinchéng obónge o/mû ne bwǎn-banyinchéng ashí afee.

¹² Mú wǎsíng o-sét bonchí emen o/fu, kyítá, kyii byěm ḿbyí ejí a-kye mě kántîk. Ne bonchí o-kyii byěm emen o-kye bwǎn emen ámbe ashí afee.

¹³ Ka*da/rí* wǎn emen mú wǎsíng ámu o-shee byěm ḿbyí emen. O-kúng akpuga o-dim ne nyǐ, o-jâ oshê okíri mú tíbítíbí, o-da-sâm akpuga emen ányi ké kyibî-dyikpen ekyú.

¹⁴ O-bên kángkáng akpuga emen nyí o/mû ne nyǐ. Ne kyibî-esong kyi-ba-nung ké oshê ámu. Nang kaǎchwóm ka*fí ǎ to*.

¹⁵ O-dim kâng bǎmkpóngé edachi ne onet obónge mú o/fím oshê ámu. Onyinchéng ámu o-twóm ǎ ké dyikán emen o/fu, mú mǔ okûdatún akûk emen.

¹⁶ Esong e-nwa wǎn ámu nyí e/nwa ǎ! Ne o-kpet esaa byiko o/fu, kyi/bát nyǐ ori nang biinkwobe-byiryíng ḿbyí akûk nyi a-ryí i, nyǐ o-ryí. Nké onet o*fí nang obónge mú o/kye ǎ nang kaǎchwóm ńké odaryí*.

¹⁷ Ké nkuli kyikû, o-ba-kabe ké dyityém emen dííng o/fu, kángkáng banet-bǎmkpóngé ḿbé bonchí ejí o/yámê mbe ba-ryí i byiryíng byi-waa ng kyísí, ne me mu nyín, n-kú m-bâ ekpú esong.

¹⁸ N/chi m-bwa esim n-kâm bonchí ejí. N-da-sét ǎ n/fu, kyítá, me nn/chi kyibî ké bushú-Osówo ne ḿbú eyên.

¹⁹ Me n*da/kwárê mú wo ada mě echîkó wǎn eyên*. Tî mě wǎ banet-bǎmkpóngé eyên ḿbé a/yámê.

²⁰ Ne wǎn ámu o-bûu nensang o-kpet ebwa esim dyijê kyikit-bonchí. O/waa kú tete, bonchí o-ri ǎ. Byiko byi-kpú bonchí, o-zóngê o-da-rwâm ǎ, o-kpárê ǎ o-bât ké kakim.

²¹ Wǎn ámu o-sét bonchí o/fu, kyítá, me nn/chi kyibî ké bushú-Osówo ne ḿbú eyên. Me n*da/kwárê mú wo ada mě echîkó wǎn eyên*.

²² Nké bonchí o/kó bǎmgbán emen o-sét kámbé o/fu, ca n̂g babap ba-bâ ne ágbádá nyí anong anong ba-fé ǎ. Ba-fé ǎ ókpâl ké kafwa ne abe ké byiká.

²³ Ba-ca kâng ba-da-kám mpong ejí mú oryên oryên ba-ju, byi-chi dyijî.

²⁴ Ké ebóng, wǎn ejí mún o/mû oo/kpú, nké kántîk oo/jwóbê. O/mû oo/tánê, nké kántîk oo/fyi. Ne dyijî dyi-kpet kâng.

²⁵ Nkéré ámu, wǎn emen mú okínkán o/mû o/tôong ké dyikán. Ké nkéré mú nyǐ o-kú o-fyi ng dyikán o-bâ, ńdyí oo/fárâng ké byise, o-jwo ekam nyí mbe ba-kim m ne ane nyí mbe ba-ne ng.

²⁶ Ne o-kó ḿgbán-bonchí emen obónge o-bí ǎ o/fu, ebóng kyi/chi kwán.

²⁷ Ḿgbán ámu o-sét ǎ o/fu, wǎn-ńchân oo/fyi, nké ńchân oo/ju ǎ mpong mú oryên oryên. Ké ebóng, o/fyi o-kâm ǎ kanong, nang chwǒm kyi*da ǎ echi*.

²⁸ Kafâ ka-sa mú okínkán emen ámu kanong kanong. O-né o/fu, nyǐ oo*nung ké kyise*. Ne bonchí emen kâng o-byí o-da-tîm ǎ arông o/fu, onung ké kyise.

²⁹ Ne wǎn ámu o-sét bonchí emen o/fu, kûri, kángkáng aje ńnyín, me mu n-chi i ǒ bǎmkpóngé wǎ ósóng. Nang kabónge n*da ǒ ené ne kyitwóm*. Wo aa/kye mě ebóng. Nang ebû ebónge a*da mě ekye ne a/fu, nchi dyijî ne bacín ejí*.

³⁰ Nké wǎn eyên mún oo/bên kángkáng byěm eyên ké dyishí-banyinyi. Ké oo/fyi kántîk, aa/ju ǎ mpong mú oryên oryên.

³¹ Bonchí emen ámu o-faa ǎ o/fu, wǎn ejí, kángkáng nkéré wo amu nyín ne me. Ne kángkáng byěm ejí ḿbyí me mu ne mbyí ḿbyí eyên.

³² Nké byi-man byi-chi dyijî byi-kyú ké bunyîn-dyityém. Ké ebóng, wǎn-ńnân mún o/mû oo/kpú, nké kántîk oo/jwóbê, o/mû oo/tánê, nké kántîk oo/fyi.