Lamantéshan 5 - Bokyi Bible

Nshwam-Bafip eri

¹ Ô Óburúkpâbí, zîim ńkyí kii/chi bě. Bírî a-tún bě a-ri éshwân eten.

² Esí eten e/firi ké abwô nyí bacinbánet. Bacinbánet ba-kú ba-kyú u ké byise eten.

³ Banet-bushwôn eten baa/ju banchí eten, ne bané eten kántîk ba/firi banyǐnkú.

⁴ Be byi-man byi-kye akpuga ké omu mú byidajwáp. Byi-man byi-ré ekwón nyí byidawóngê okwâ.

⁵ Ké mbe ba-tut ng bě wǎ boonyam-atû, be bii/kyee, nké baa*bángê bě byi-jáng*.

⁶ Eringe nyí badaré byiryíng ḿbyí byidaryí byi-kpen, be byi/dim banet-Éjip ne ḿbé Asyírya arông etîm.

⁷ Banchí eten ḿbé kpákpá ba/chi byibî, nké kántîk, mbé ba*fí to* ne be byi-kú byi-ri ng busông ké bubwô-byibî ebe.

⁸ Be byi/firi ké bubwô-banet ḿbé ba*da/shwôm básóng* ne onet o*fí mú oda bě enyii ké abwô ebe*.

⁹ Banju banet mbe ba-yêe ng ké dyikán. Be byimu byi-bángê e bukyû ké nkéré byi-kú byi-kyé ng byiryíng.

¹⁰ Esong ee/chi bě byi-kú byi-mang ng tete enyam-byiko eten e-kú e-sóng ng wǎ okwâ-bure.

¹¹ Baa/bam banyi eten ne bwǎn eten ba-rí ne mbé ké kaku ńké Záyon kayén, ne ké oshê-Júda nang orá.

¹² Baa/kúng banet-ashí eten ba-da-shwân. Ofê o*fí mú badakye bakâa-banyinchéng eten*.

¹³ Ba-kú ba-chi i byisat eten ké busa ba-kwa esang-byichí wǎ básóng. Bwǎn-banyinchéng ba-kú ba-cíng ng ne biǐróró-atû-ekwón.

¹⁴ Bakâa-banet ba*fí to ba-kyú u me ké dyifyi-oshê* ne byisat byi*fí to byi-chi i ane*.

¹⁵ Akpen eten a*fí to ne bunyîn-dyityém*. Bafip baa/kúng kyikit ńkyí ane eten.

¹⁶ Chwǒm kyi*da/chîwaa nang kyibónge ńkyí byi/mû byi-tông ng byiko kyi-kim ne nkyí*. Be byi/chi byibî, ne kántîk byi/firi ké busông.

¹⁷ Bafip baa/sú bě ké atyém eten, ne batíí baa*bángê bě byi-ri kanong*

¹⁸ ké nǎ, kaku-Záyon ka/firi kafâ dyikáá, ne byibî-enyam byi-kú byi-yêe ng ké biǐbwô-byise emen.

¹⁹ Nké wo, ǎ Óburúkpâbí, nké amu Otu mú ne banyá, ne wo a/chi a-kyú Otu tete nkuli kyikû-nkéré.

²⁰ Ebóng ńkyí aa/mîng bě ka-jang erí. Wo a/chi a-chî bě ezîim dí.

²¹ Bwa ne be esim byi-kâm ǒ, ǎ Óburúkpâbí, bwa ne be esim. Bwa ne be esim ne akpee eten nyí kpákpá.

²² Aa a/né bě ne banyá? Kafâ esa eyên ka*fí ne bunyerenyere dí*.