Lamantéshan 4 - Bokyi Bible

Ńdyí Jerúsélem oo/róng

¹ Gûl eten mú ragerage o/firi bimê. Aká nyí kiǐtí-kyise-kyifen-Osówo echi a/firi byiryibyiryi ké byiká-oshê.

² Byisat ḿbyí Záyon byi/mû byi/rí bě ké dyityém wǎ gûl. Nké kántîk, ba-kú ba-kúng ng kámbé wǎ butí-ecing.

³ Nang enyam-dyikán e-nen n bwǎn emen, nké banet ejí ba/firi wǎ byibî-bunurung ḿbú bu/bên atyém ne bwǎn ebe.

⁴ Mbé mbe ba-mîng ng bwǎn ebe ba-kpú u kyijé-abî. Bwǎsíng mbe ba-rém m byiryíng ḿbyí onet o*fí mú o/chi o-kye kámbé*.

⁵ Banet ḿbé nkéré obónge ba/mû ba-ryí i byiryíng ḿbyí byi/nwa byi-shwôm, ba-kú ba-kpú u esong ké byiká-oshê. Banet ḿbé ba/nen kámbé ké byěm ḿbyí byinong ba-kú ba-fware ng biǐbímbíng ba-kyé ng byiryíng. [

⁶ Baa/kye banet ejí busông bu-shwôm] nang ḿbú banet ḿbé oshê-Sódom mú o/róng kiǐmút ké abwô nyí Osówo. [

⁷ Batu-ashí eten] ba/mû ba*fí ne dyikpât* ne ba/mû kpárádádát wǎ abíp, cîpcîp ne busa ne nyangenyange ké byiko.

⁸ Kántîk, ba/firi kyísí ké byiká-oshê onet mú odanyît kámbé o*fí*. Bashú ebe pyame ké bukyû ne enyam-byiko ebe jwómjwóm wǎ ekwón ee/tut ké kafâ-byikúú ebe.

⁹ Kyi/mû kanong ne banet ḿbé ba/kpú ké byití kyi-shwôm ne ḿbé ba/kpú ńdyí byití bii/shwôm, ḿbé ba/kpú esong kaǎnyín kaǎnyín, byiryíng ḿbyí badaryí ba-kpen byi*fí*.

¹⁰ Busông ḿbú bu/bê bu-kâm banet ejí bu/bê ne bushî. Bané ḿbé bwǎn ba/mû ba-jê ng kámbé ba/rám bwǎn ḿbé ebe ba-ryí.

¹¹ Óburúkpâbí oo/tông kafâ esa emen kamúmú. Nyǐ o/fé okwâ ké Záyon mú o/shí kámú kángkáng.

¹² Onet o*fí ké kyikit nang kyibónge* nang batu ḿbé eshê nyí tete ba*fí* ḿbé ba/mû ba/bángê ba/fu, onet-byití mu nang obónge mú odaman enung ké afyi nyí Jerúsélem*.

¹³ Nké ńkyín kyi/chi, ké nǎ, bamkpábé emen ḿbé badasét byiraa-Osówo ba/chi byibî, ne banchi kyifen-Osówo emen ba/chi kyibî ńkyí ba/cen ne bukyû ḿbú banet ḿbé ba*da/chi chwǒm*.

¹⁴ Banet-ashí emen ba/yêe ké byiká-oshê wǎ bansêe achi ne baróng ké byiko chwóó, onet o*fí mú o/ta kámbé*.

¹⁵ Banet ba/nyán ba/fu, dim m̂ ányi. Ben baa/bên byiko. *Da n̂g mě eta*. Ké bubwô ámbu, mbé ba/yêe ba-jâ ké eshê, onet mú odakoo kámbé o-tî o*fí*.

¹⁶ Óburúkpâbí o/mû o*fí to o-kérê ng kyi-kim ne mbé*. Nyǐ oyén nké o/pwó kámbé byiryibyiryi. Nyǐ o*da/kúng banchi kyifen-Osówo eten ne banet-ashí eten wǎ chwǒm*.

¹⁷ Be byi/kyé tete byi*da/chîman ekyé ochwâp* mú o*da/tigi o-bâ*. Be byi/waa byimu byi-bám m oshê mú oo*man bě ekye ochwâp* byi/fu, ochwáp bě.

¹⁸ Onet-bushwôn eten o/mû o-bám m o/fu, nyǐ o-ri ng bě. Be byi/mû byi*fí byi-man n ecen nang ké byiká-oshê*. Ací eten a/mû aa/man, ne nkuli kyikû o/mû oo/ribi.

¹⁹ Mbé ba/nwa ne be ba-kám bě ba-fé kyísí éné wǎ ba-chi i biinkwa ḿbyí mbyi byi-byí i kyíbóng ochéé óchee. Mbé ba/nye bě ké kyikû ba-kám ké eku. Mbé ba/kám bě kiǐmút ké kyikim-dyikán.

²⁰ Mbé ba/kám onet mú dyikpen eten ndyi dyi-fím m, otu mú Óburúkpâbí o/cá, nyǐ mú be byi/mû byi/tî atyém byi/fu, oku bě ké abwô nyí kángkáng banet-byití.

²¹ Banet-Édom ne Ôz, jwó n̂g éjwô ba-ca kashú. Jêe n̂g ké nkéré mú badaman ejêe. Busông ḿbú enen mbu bu-bâ to. Ben to ba/chi ba-kûcíng ba-câ osíndyíbang ne éshwân.

²² Záyon o/ré dyifwá ké byibî emen. Óburúkpâbí oo*mîng bě to byi-waa ké eshê nyí ba/kúng bě byi-jâ wǎ básóng*. Nké Édom, wo, Óburúkpâbí o/chi o-kye ǒ busông. Nyǐ o/chi o-tông byibî eyên wááng.