Lamantéshan 3 - Bokyi Bible

Busông eri ne Byiko esaa ne Achi etî

¹ Me nké mu n-nyît ng eringe nyí nkyi â Osówo o/kye ǒ busông.

² Nyǐ o/tut mě o-fé ké kyifip ké kafâ ké kafâ.

³ Ne o/díp mě akwâ o-nye ng o-fâ byiko byi*da ǎ ekpú*.

⁴ Nyǐ oo/mîng enyam-byiko ejí e-waa fúú ne byibáp byikpó, ne oo/sé mě byikúú.

⁵ Nyǐ oo/fín mě ké mgbokobá-bafip ne busông.

⁶ Nyǐ oo/chi mě ké busa n-kyú ké kyifip-bukyû ńkyí banet ḿbé baa/kpú nyáá.

⁷ Nyǐ oo/bwá mě ké bamgbokobá. Me n/firi onet-mgbokobá mú bukwóp-dyifem bu*fí*.

⁸ Me mu n-tii ng ne ejá kyíbóng kyíbóng n/fu, bachwáp mě, nké Osówo mu o-né ng ejwo.

⁹ Me mu n-cen n n-cíng ng, ne ekpe-aká nyi e-ku ng mě nang m/bírî kyicê kyirá.

¹⁰ Nyǐ o/bam mě wǎ kyibî-enyam, o-cím mě ké byiko wǎ ekpang.

¹¹ Nyǐ o/nwa ne me n-tánê kiǐfáng, o-ját mě byicê byicê o-dim o-mîng mě.

¹² Nyǐ o/tut búre emen o-chi mě n-firi kyikit ńkyí abán emen adatím.

¹³ Nyǐ o/ché abán emen a-nung ké kafâ-enyam-byiko ejí.

¹⁴ Banet mbe ba-jwó ng mě dyicí dyimúmú. Me mu kámbé wǎ chwǒm-ayâa.

¹⁵ Nyǐ o/tírîng buruu bu-sát mě ké omiríng, o-chi mě n-sú ne biiruuruu-byiryíng ne omu.

¹⁶ Nyǐ o/kwa bushú ejí ké ecing ne o/bú asháng ejí ké aká.

¹⁷ Me nn/ráp eringe nyí dyikpen ne bunyîn-dyityém ne dyityém chee mbyi.

¹⁸ Me mm*kpen to n-tíbî*. Okabe ejí etî ne Óburúkpâbí oo/man.

¹⁹ Okabe kyi-kim ne bubân ejí ne oshê mú o*fí mě* mbyi mě wǎ buruu.

²⁰ Me mu n-kabe ng kángkáng nkéré kyi-kim ne nkyí ne dyityém ejí dyi*fí dyi-nyîn n mě*.

²¹ Nang ké nkyi éné, mu n-kyú u ne okabe ké nkéré nn/zîim chwǒm ńkyín kyibónge n/fu,

²² kyijé ne byiko ekpú ḿbyí Óburúkpâbí ḿbyí bii*man* byi/tôong byi-câ kashú,

²³ nyangenyange wǎ dyicófóróng ne wǎ óbyísû mú oo*mîng ebyí*.

²⁴ Óburúkpâbí kǎnchí nké me mu ne mǔ, ne ké bubwô ámbu, me mu n-tî ng achi ké nyǐ.

²⁵ Óburúkpâbí o/nwa dyityém ne nang yeě mú mu o-fâ dyityém ne nyǐ.

²⁶ Ké bubwô ámbu, kyi-nwa ng kyi-shwôm ńkyí byidabwom chee, byi/fu, onyii bě.

²⁷ Ne kyi-nwa ng kyi-shwôm ńkyí adakwâa dyibwom chee ńdyín ké bubwásíng eten.

²⁸ Ké nkéré byi-kú byi-ri ng busông, byikyú kǎnchí chee.

²⁹ Byitíngê kyísí ké ofê ekye, ké nǎ, kakíri byi-chî ng eman etî achi.

³⁰ Nang ba/mín bě ba-cábê bě, byikoo kámbyí kángkáng.

³¹ Óburúkpâbí, byiko byi-kpú u ǎ, ne oo*ba/chi o-né bě kángkáng nkéré*.

³² Nyǐ o-man n bě ekye bafip, nké kyijé emen ne be nkyi ntûntû, ne nkyi shwaneshwane.

³³ Kyi*fí ǎ chwǒm-bunyîn-dyityém* ńkyí nyǐ oda bě ekûchi byi-ri ng bafip* nang busông*.

³⁴ Óburúkpâbí mu o-nyît ng nkéré mú baa/ju atyém eten ké byibám-mgbokobá.

³⁵ Nyǐ mu o-nyît ng nkéré mú baa/né bě ekye busa ḿbú nyǐ o/kye bě.

³⁶ Nyǐ mu o-nyît ng nkéré mú ntûntû o*fí to ké esuk*. [

³⁷ Ńkyí Óburúkpâbí mu o-ryuu ng kǎnchí nké badachi.]

³⁸ Kyibî ne kanong byi-chi i ké busa emen. [

³⁹ Be byi*fí ne bukwóp ḿbú byida ǎ ebîn* ké nkéré baa/kye bě busông ké bubwô-byibî eten*.]

⁴⁰ Mîng n̂g byi-kpúrî édúú eten byi-bírî byi-kâm Óburúkpâbí.

⁴¹ Mîng n̂g byi-bâa atyém eten byi-kye Osówo mú kyíbóng, byi-fé nshwam byi/fu,

⁴² be bii/chi byibî ne bii/bírî bunwa ne wo, ne wo, ǎ Óburúkpâbí, a*da bě epwoo*.

⁴³ Wo a/zóngê ne be ké kyikû a-ju bě. Byiko eyên ekpú ne banet byi/waa cítcít ké kafâ esa eyên

⁴⁴ ńké nke wǎ okpí-ófíbí mú o/cîp o-shwôm, mú banshwam eten baa*man eshwôm ké mǔ*.

⁴⁵ Wo aa/chi bě byi-firi dyibwôm-biǐbyém-byiryíng epwó ńdyí ejíí.

⁴⁶ Kángkáng banet-bushwôn eten mbe ba-dángê e bě ba-fát ng bě kiikuku.

⁴⁷ Be byi/firi ké busông ne afaníkong ne bushî ne bukyû.

⁴⁸ Achi ejí nyi a-sen n batíí wǎ kace ké bubwô-banet ejí ḿbé ba/ju.

⁴⁹ Batíí ejí ba*fí ba-mîng ng esen*.

⁵⁰ Tete Óburúkpâbí o-bwom kyíbóng o-bírî o-ri bě.

⁵¹ Dyityém ejí dii*nyîn mě* ké nkéré ndari ńkyí kyi/chi banyinyi-oshê*.

⁵² Banet-bushwôn ejí ḿbé mu n-sa ng kámbé kafâ dyikáá ba/mû ba/kám mě ké kaǎtám wǎ kanurung.

⁵³ Mbé ba/twóp mě okpó ké kafâ-dyibíng ba-cít kándyí ne aká.

⁵⁴ Omu o/kpet mě ecít o-bâ, ne me m/mû n/kabe n/fu, bukyû boo/fárâng.

⁵⁵ Ô Óburúkpâbí, me m/mû ké kafâ-dyibíng n-tii ng n-kó ng ǒ.

⁵⁶ Ne ké nkéré n/tîm ǒ arông n/fu, fwôo atông a-jwo bukyû ejí ḿbú mu n-tii ng, wo a/jwo.

⁵⁷ Wo a/faa mě ojá a-sét mě a/fu, me n*dashî*.

⁵⁸ Óburúkpâbí, wo a/bê mě enyángê ne a/nyii dyikpen ejí.

⁵⁹ Két mpan o-nwa mě. Wo amu a-nyît ng byibî-byěm ḿbyí ba/chi mě.

⁶⁰ Wo amu a-nyît ng eringe nyí mu n-sa ng banet-bushwôn ejí kafâ ne eringe nyí mbé mbe ba-nam m mě eju.

⁶¹ Ô Óburúkpâbí, wo aa/jwo kámbé ké mbe ba-cábê ng mě, ne amu a-nyît ng kángkáng ḿbyí mbe ba-nam m.

⁶² Kyirim-dyicí kángkáng, mbé mbe ba-raa ng kyi-kim ne me, ba-nam m byěm ebe.

⁶³ Mbé mbe ba-fát ng mě kiikuku kyi-fím ké dyicófóróng tete dyikurúku.

⁶⁴ Ô Óburúkpâbí, kye kámbé busông ké ńkyí mbé baa/chi.

⁶⁵ Shú kámbé a-chi atyém ebe a-firi kyeekyee.

⁶⁶ Kyé kámbé a-kám, a-man ne mbé ké ejíí.