Lamantéshan 2 - Bokyi Bible

Busông ḿbú Óburúkpâbí o/kye Jerúsélem

¹ Óburúkpâbí, ké kafâ esa emen, oo/cít Záyon ne kyifip. Nyǐ oo/pín bunong ḿbú Záyon ḿbú boo*nwa eri* bu-bírî ecing. Ké dyicí kafâ kada ǎ esa, nyǐ o-mîng ng nang [kiǐtí-kyise-kyifen emen echi.]

² Óburúkpâbí o/bên kángkáng eshê-Júda, byiko byi*da ǎ ekpú*. Nyǐ oo/sé byikit-dyirem ḿbyí mbyi byi-ku ng esí. Nyǐ o/fé oshê ámu ne banet-ashí-esí ányi éshwân.

³ Ké kafâ esa emen, nyǐ o/bên busa ḿbú Ézerel. Nyǐ o/né bě echwáp ké nkéré onet-bushwôn eten o/bê. Nyǐ o/sa kafâ ne be wǎ okwâ, o-bên kángkáng byěm.

⁴ Nyǐ o/kan bě abán emen wǎ onet-bushwôn. Nyǐ o/ju kángkáng banet ḿbé ba/mû ba-nyîn n bě kanong kanong. Be byi/jwo nyín ké Jerúsélem kafâ esa emen ńké nke ka-mang ng.

⁵ Óburúkpâbí oo/bên Jerúsélem wǎ o-chi i onet-bushwôn. Nyǐ oo/mîng byikit-dyirem ḿbyí Jerúsélem ne byibám-batu emen byi-firi biǐbwô-byise. Nyǐ o/bê ne banet-Júda ne bafip ḿbé baa*man*.

⁶ Nyǐ o/shiryi kiǐtí-kyise-kyifen emen echi ńkyí byi/mû byi-kyâ ǎ ofê kyi-firi boǒcê boǒcê. Nyǐ o*da/chîbángê ajî-byifen ne ací-ékwâbashi eten a-ca kashú*. Batu ne banchi kyifen-Osówo baa/jwo busa ḿbú dyityém-busa emen.

⁷ Óburúkpâbí oo/né kyikit-kyifen emen echi, ne oo/mîng kiǐtí-kyise-kyifen emen echi. Nyǐ o/mîng banet-bushwôn eten ba-bú ekpe-kiǐtí-kyise-kyifen emen echi. Mbé ba/wonge ké bunyîn-dyityém ké okpóge mú ba/kpógê kyikit ńkyí byi/mû bii/kye Osówo ofê nkéré obónge.

⁸ Óburúkpâbí o/mû o/tigi o/fu, ekpe nyí Záyon ebûu. Nyǐ o/kan kányí o-tî eringe badaman ebên kányí kángkáng. Biǐnyáám-byise-mbâm ne ekpe byi-firi biǐbímbíng.

⁹ Afyi-oshê aa/róng kyísí. Baa/sé biǐré ebe byicê byicê kántîk, otu ne biǐtí-banet ba/firi banet ḿbé ba/kúng kámbé ba-jâ eshê ekíri. Ba*fí to ba-tángê e byije ḿbyí Óburúkpâbí* ne Óburúkpâbí o*fí to o-tông ng bamkpábé ḿbé badasét byiraa emen byěm-akat*.

¹⁰ Bakâa-banyinchéng-Jerúsélem ba-kú ba-byak ng ké ecing ojá o*fí to kámbé* ne édúkǎndú ké ashí ne byídí-dyikán eta ké byiko. Ásé a-kú a-tíngê e ashí ebe kyísí.

¹¹ Achi ejí aa/kyee ké bukyû etii. Dyityém ejí ndyi ké bafip. Bafip baa/man mě asa ké banet ejí ḿbé ba/ju. Bwǎsíng ne bwǎn-bajújwô ba-kú ba-jwâa ng ké byiká-oshê.

¹² Esong ne kyijé-omu nké mbé mbe ba-tii ng ba-kó ng bané ebe. Mbé mbe ba-myii ng kyísí ké byiká-oshê éné wǎ ba/némê kámbé, ne mbe ba-kpú u ba-câ ké byikem-bané ebe.

¹³ Ô Jerúsélem, Jerúsélem mú mu o-jê ng mě, me n-sét ng ebóng kyi-kim ne wo. Me n-cen n nǎ ne n-fé ǒ dyityém. Onet o*fí mú oo/ri busông wǎ ḿbún*. Afaníkong eyên a*fí ne bunyerenyere* wǎ baya ḿbé baryên. Bukwóp ḿbú onyánge bu*fí*.

¹⁴ Bamkpábé eyên ba/mû ba*fí ne chwǒm ńkyí bada ǒ esét* kyi-cibi ne byisédéng*. Byiraa ebe ḿbyí ba/mû mbe ba-sét ng byi/nîm ǒ, ké nǎ, mbyí byi/mû byi*fí byi-tông ng byibî eyên wááng*. Mbé ba/chi ǒ a-kûkabe a/fu, wo a*dachîryuu byiko esaa*.

¹⁵ Banet ḿbé mbe ba-shwôm m ké oshê mbe ba-tún n ǒ ne écábé. Mbé mbe ba-ninge e ashí ba-jwó ng biǐbwô-byise ḿbyí Jerúsélem o/firi. Ba-raa ng ba/fu, nyín oshê ámu mú odajang enwa? Nyín něen oshê mú o/mû o-nyîn n ejíí emúmú?

¹⁶ Kángkáng banet-bushwôn eyên mbe ba-fát ng ǒ kiikuku ba-tún n ǒ byibî-achi ne busa-dyityém. Mbé mbe ba-nyîim m byibî-ocím ebe ba-nyet ng byibî-ejwó ba/fu, bii/bên kámú. Dyicí ńdyí byi/mû byi-bám m něen.

¹⁷ Óburúkpâbí oo/rugi o-chi ńkyí o/fu, nyǐ o-chi i. Nyǐ oo/ju bě, byiko byi*da ǎ ekpú* wǎ eringe nyǐ o/kuri bě ekó ké nkéré mú o/shwôm ké esim. Nyǐ o/chi banet-bushwôn eten ba-kpógê. O/chi kámbé ba-jêe ké orông eten. [

¹⁸ Ô Jerúsélem, ekpe eyên etii e-kó Óburúkpâbí.] Mîng batíí ba-sen ǒ buchú ne esû wǎ kace. *Dajáng ké bukyû etii* ne ké bafip eyên*.

¹⁹ Chîjwóbê ké buchú bumúmú a-chîtii a-kó Óburúkpâbí. Sét kángkáng byěm ḿbyí mbyi ǒ ké dyityém a-tîm ǎ arông o-ri bwǎn eyên bafip, bwǎn ḿbé mbe ba-kpú u esong ké byiká-oshê byimúmú.

²⁰ Ô Óburúkpâbí, kan achi a-ri banet ḿbé wo amu a-kyâ kámbé busông. Banyinyi ba-kú ba-ryí i byikwóm-enyam-byiko ḿbyí bwǎn ḿbé ba/mû ba-jê ng kámbé. Ba-kú ba-ju ng banchi kyifen eyên ne bamkpábé ḿbé badasét byiraa eyên ké kafâ-kiǐtí-kyise-kyifen eyên echi kyiyén.

²¹ Byisat ne bakâa ba/firi byikwóm kyísí ké byiká-oshê, ba/ju byisat ne ásé ké bushwám. Wo a/ju kámbé, byiko byi*da ǒ ekpú* ké dyicí ńdyí ka/sa ǒ.

²² Wo a/kó banet-bushwôn ejí a/fu, bakám kyibî-dyijî ba-wâng mě. Ne onet o*fí mú odaman efem ké dyicí-kafâ esa eyên ándyi*. Mbé ba/ju bwǎn ejí ḿbé me n/nen, ḿbé ba/mû ba-jê ng mě.