Lamantéshan 1 - Bokyi Bible

Bafip ḿbé Jerúsélem

¹ Nang ké Jerúsélem o/firi kǎnchí, Jerúsélem mú nkéré obónge o/mû ne banet pwat, mú nkéré obónge, ejíí e/mû e-kyâ kámú ofê, mǔ o/firi kántîk wǎ onyǐnkú. Oshê mú o/nwa o-shwôm eshê kángkáng o/firi oshê-básóng.

² Mǔ mu o-tii ng buchú bumúmú, batíí ba-sen n kámú ké ánán. Ké burwám-bákyî emen kángkáng, nang obónge o*da/waa mú oda ǎ efé dyityém*. Banet-kyikwáré emen baa/nîm kámú, ne mbé kángkáng baa/bírî kámú esim.

³ Banet-Júda [ba/firi básóng ḿbé ényángenyánge e*fí kámbé* ḿbé baa/ró kámbé ké oshê ebe.] Mbé mbe ba-kyú u ké esí ekíri, kyikit ńkyí mbé badakó ńkyí ebe kyi*fí kámbé*. Banet-bushwôn ebe baa/wâng kámbé, bukwóp ḿbú mbé badachêe bu*fí kámbé*.

⁴ Onet o*fí to kántîk* mú mu o-bâ ké kiǐtí-kyise-kyifen-Osówo echi Osówo efé* ké ací nyí a/já Osówo*. Bwǎn-banyinyi ḿbé ba/mû ba-kwán n ekwan ányi mbe ba-ri ng busông, ne banchi kyifen-Osówo baa*man echi chwǒm kyikíri kyi-cibi ne dyibyê ebyé*. Afyi-oshê aa/waa kafâ dyikáá, ne Záyon o/firi ké afaníkong.

⁵ Banet-bushwôn emen baa/kpógê, o/firi ké abwô ebe. Óburúkpâbí oo/chi kámú o-ri busông ké bubwô-bujê-byibî emen. Baa/kám bwǎn emen ba-dim ne mbé.

⁶ Bunong ḿbú Jerúsélem bu/firi chwǒm ńkyí kii/shwôm ké esim. Banet-ashí emen ba/firi wǎ enyam nyí esong ee/chi kányí e-firi kyeekyee, nyí asa aa/man kányí ké nkéré e-kú e-chêe ng banryuu akán.

⁷ Jerúsélem mú o/firi biǐbwô-oshê kántîk o-kú o-zîim m bunong emen ḿbú kpákpá. Ké nkéré mú o/róng ké abwô nyí banet-bushwôn emen, onet nang obónge o/mû o*fí mú oda ǎ echwáp*. Banet ḿbé ba/kpógê kámú ba-kú ba-jwó ng dyirông emen.

⁸ Ofê emen oo/man, mǔ o/firi osíndyíbang ne ba-kú ba-kyâ kámú edángé. Mǔ o-kú o-byâ ne mu o-rôo ng bushú emen ké éshwân. Jerúsélem o/chi byiko emen nunut ké biinkaa-byiko-byibî.

⁹ Babat emen ba/mû ba*fí ba-sóng ng eri* nké mǔ o*da/kérê kyi-kim ne bukyû emen*. Dyirông emen dyi/mû dii*nwa eri*. Onet o*fí mú oda ǎ eman efé dyityém*. Banet-bushwôn emen baa/kpógê, ne o-kú o-tii ng o-kó ng o/fu, Óburúkpâbí ori ǎ bafip.

¹⁰ Banet-bushwôn emen ba/bam ǎ kángkáng esang emen ba-koo. O/ri kámbé ké mbe ba-nung ng ké kafâ-kiǐtí-kyise-kyifen-Osówo echi kyiyén, ńkyí Óburúkpâbí o/fu, banet ḿbé ba*da/fím ne banet-Jûs* ba*danung*.

¹¹ Banet emen mbe ba-byâ ké nkéré ba-kú ba-kyé ng chwǒm ńkyí badaryí. Mbé mbe ba-kyâ esang ebe ba-koo byiryíng eringe nyí badanyángê akpen ebe. Mǔ mu o-tii ng o/fu, Óburúkpâbí, bírî a-ri mě. Ri mě ké bafip ejí. [

¹² Mǔ mu o-tii ng o-sét ng nang yeě mú mu o-shwôm m o/fu, ri n̂g mě.] Onet o*fí nang obónge mú oo/ri busông wǎ ḿbú ejí* busông ḿbú Óburúkpâbí o/bê mě ne mbú ké byiko ké nkéré mú kafâ esa emen.

¹³ Nyǐ o/twóm okwâ mú o/fím kyíbóng, okwâ mú mu o-shí i mě ké kafâ. Nyǐ o/kuu kaǎtám o-tî mě o-chi mě m-myii kyísí. Nyǐ o-dim kâng o-mîng mě ké bubân ḿbú boo*man*.

¹⁴ Nyǐ o/ri byibî ejí kángkáng ne o-kúng kámbyí kángkáng o-cibi kyikit kyibónge. Nyǐ o/kpong mě kámbyí ké kyitông, ne burô ebe boo/man mě busa. Óburúkpâbí nké o/kúng mě o-kye banet-bushwôn ejí, ne ochwâp o/mû o*fí mě mú ndafem kámbé*.

¹⁵ Óburúkpâbí o/jwó kángkáng basúja ejí ḿbé badashwane ba-shwôm. Nyǐ o/twóm basúja ba-ba-ju byisat ejí. Nyǐ o/shiryi banet ejí wǎ byirim-byichí ḿbyí ké kyikit-bato enwárê.

¹⁶ Bubwô ámbu nké achi ejí nyi a-sen n batíí. Onet o*fí mú oda mě eman efé dyityém*. Onet o*fí mú oda mě eman efé busa*. Onet-bushwôn ejí oo/kpógê mě. Chwǒm kyi*da/chîwaa banet ejí*.

¹⁷ Me mu n-tan n abwô ejí, nké onet o*fí mú o/chi o-chwáp mě*. Óburúkpâbí oo/kó banet-bushwôn ejí ba-bwom mě byicê byimúmú. Mbé mbe ba-kúng ng mě wǎ kiinunut-chwǒm.

¹⁸ Nké Óburúkpâbí oo*ryí acît* ké nǎ, me nn/né echi ńkyí nyǐ o/sét. Banet ḿbé mbe nang nyá, fwôo n̂g atông ba-jwo mě. Ri n̂g mě ké busông ejí. Baa/kám byisat ne ásé ejí ba-dim ne mbé.

¹⁹ Me n/kó banet-kyikwáré ejí, nké mbé ba/né mě echwáp. Banchi kyifen-Osówo ne banet-ashí ba/kpú ké byiká-oshê, ké byiryíng ekyé ḿbyí badachwáp akpen ebe.

²⁰ Ô Óburúkpâbí, ri afaníkong ejí, ri busông ḿbú dyityém ejí. Dyityém ejí dyi/firi ké bafip, ké bubwô-byibî ejí. Banet eju mbe ké byiká-oshê, nang ké kafâ-byise bukyû mbu kô. [

²¹ Fwôo atông a-jwo] dyibyê ejí. Onet o*fí nang obónge mú oda mě efé dyityém*. Banet-bushwôn ejí mbe ba-jêe ng ké busông ḿbú wo a/bê mě ne mbú. [Bâ ne] dyicí ándyi ńdyí a/ryí ocím. Chi banet-bushwôn ejí ba-ri busông wǎ eringe nyí me mu n-ri ng.

²² Két mpan o-bên kámbé ké byibî-atyém ebe kángkáng. Kye kámbé busông wǎ eringe nyí wo a/kye mě ké bubwô-byibî ejí. Me mu m-byâ ké bafip, ne n*fí ké bunyîn-dyityém*.