Kolóshan 2 - Bokyi Bible

¹ Me mu n-ryuu ng n-sét běn eringe nyí nn/chi bǎmkpóngé kanong kanong n-kye běn, n-kye to kángkáng banet ḿbé oshê mú Lehodyisáya, ne kángkáng banet ḿbé baa*nyît mě ké achi*.

² Me mu n-chi i éné, eringe nyí ndafé kámbé busa ké atyém, ne eringe ndacibi kámbé kyikit kyibónge ké kyijé, ne ba-já efang nyí obánge, nyí byinyídíng ḿbyí ntûntû mbyi byi-bâ bě nyǐ. Ne ké bubwô ámbu, mbé ba/chi ba-nyît ntûntû mú mu ké kafâ-dyityém-Osówo, mú mu Karâs oyén.

³ Nyǐ nké mu agbókóró nyí nyi a-kuu ng kángkáng kanong ńké bubong ne byinyídíng ḿbyí Osówo, ńké nke ké kadip, o-tî ng fúú.

⁴ Me mu n-sét ng běn kâng n/fu, *da n̂g emîng onet nang obónge o-kúng okân ké dyishí ké byěm ḿbyí byi*fí ké kafâ* o-nîm běn* nang ba/bwa mbe ba-raa ng kanong nǎ*.

⁵ Ké ebóng, nang me n*fí ne ben ké enyam-byiko* dyityém ejí ndyi ne ben, ne me mu n-jêe ng eringe nyí mu n-ri ng dyibwom ńdyí bamu ba-bwom m kíngkíng kyikit kyibónge ké dyityém enen ńdyí ba/fé ne Karâs.

Dyikpen esú ne Karâs

⁶ Ké eringe nyí ben baa/koo Jisos Karâs wǎ Otu Kyítá, kyú n̂g ké ocibi ne nyǐ.

⁷ Fé n̂g eriri enen kyísí ne nyǐ, ba-nap akpen enen ne nyǐ, ne ba-firi shwaneshwane ba-shwôm ké dyityém enen ńdyí ba/fé ne Karâs wǎ eringe nyí ba/mû ba/tángê běn. Ne atyém enen asú ne asǎma ekó.

⁸ Bám m̂ byiko enen kâng, eringe nyí onet nang obónge oo*ba/chi o-nîm běn ne ekabe nyí banet nyí e*da/tíbî* ne e*fí ké kafâ* nyí e/jêem busi ké otánge mú banet ḿbé kpákpá ne ké busa ḿbú byibî-bací ne ḿbú bukye nang burá* ké Karâs.

⁹ Ké nǎ, ké byiko ḿbyí Karâs byimúmú nké Osówo mu o-kyú u.

¹⁰ Ne Osówo oo/kye běn dyikpen kerededet ké ocibi enen ne Karâs. Nyǐ o/rêe o-shwôm kángkáng byibî-barím ne byibî-bací.

¹¹ Ké ocibi ne nyǐ, Osówo o/cên běn. *Chí dyizong-dyicên ńdyí banet mbe ba-cên n* nké o/cên běn ne dyicên ńdyí Karâs oyén, ńdyí dyi/chi běn ba-fem ké busa ḿbú dyityém ńdyín ńdyí byibî.

¹² Ké nǎ, ké nkéré mú ba/kye běn osoo mú Osówo, nyǐ o/mû o/ryii běn ne Karâs, ne ké osoo ámu to obónge, Osówo o/jwóbê běn ké bukyû ne Karâs ké bubwô ḿbú dyityém enen efé, ké busa emen, nyǐ mú o/jwóbê Karâs ké bukyû.

¹³ Ben ba/mû baa/kpú ké basun, ké bubwô ḿbú byibî enen ne ké bubwô ḿbú ben baa*chi banet-Jûs* ne ba/mû ba*fí ba-nyît ng byije ḿbyí Osówo*. Nké kántîk, Osówo oo/chi běn ba/firi ké dyikpen ne Karâs. Osówo oo/pwoo bě ké kángkáng byibî eten.

¹⁴ Oo/byiryi ńkyí nyǐ o/mû o/sáng kyi-kim ne afwá nyí byibî eten ne byije to ḿbyí mbyi ké nyǐ, ne oo/ráp kyi-kim ne nyǐ ne dyityém emen ké omân mú o/mán kánkyí ké kyikwap ńkyí ba/shwân Karâs ne o-kpú.

¹⁵ Ne ké kyikwap ánkyi, Karâs o/nyii byiko emen o-fem ké abwô nyí byibî-barím ne nyí byibî-bací. Nyǐ o/yip kámbyí o-tông wááng wǎ ekap ké kashú ńké o/bwóp kámbyí wǎ bamgbokobá ḿbé mbe ké otán-byití ekpógê.

¹⁶ Ké bubwô ámbu, onet o*dachi o-chi byije kyi-kim ne ńkyí ben badaryí* nang kyi-kim ne ńkyí badajwáp* nang kyi-kim ne ací-ociring* nang kyi-kim ne dyijî-kyifen ńkyí otukáku mú ofyîfî* nang kyi-kim ne dyicí-ékwâbashi enen*.

¹⁷ Kángkáng azong-byěm ányi a*fí chwǒm kyikíri* kyi-cibi ne biǐríribí-byěm ḿbyí ké nkéré mú mu o-bâ*. Karâs nké mu ochíchí-chwǒm.

¹⁸ *Da n̂g emîng onet nang obónge mú mu o-sét ng o/fu, nyǐ o/rêe o-shwôm o-pan běn mpan ké byiko* ké nǎ, nyǐ o/ri byěm-akat* ne mu o-raa ng kángkáng nkéré kyi-kim ne byiko ené* ne barím esháng*. Dyizong-onet ándyi dii/sú ne byiko etông dyikáá ké okabe mú enyam-byiko emen,

¹⁹ ne oo/né ebwom ne Karâs mú mu otu-dyishí mú enyam-byiko emen. Ké bubwô-busa ḿbú Karâs, Osówo mu o-nen n enyam-byiko emúmú, ne acit ne byikúú byi-níbî ng kányí kyikit kyibónge, ne nyi e-kán n eringe nyí Osówo mu o-ryuu ng o/fu, ekán.

Bukyû ekpú ne Karâs ne Dyikpen to ekyú ne Nyǐ

²⁰ Ben baa/kpú ne Karâs, ne oo/chi běn ba-fem ké abwô nyí byibî-bací ḿbé ké ejíí ńnyín. Ebóng kâng ńkyí ben bamu ba-kyú u dyikpen éné wǎ ben ba-chi i banet ḿbé ejíí ńnyín. Ebóng kyi/chi ne ben bamu ba-kyâ azong-byije ńnyín ofê nyí a/fu,

²¹ *da n̂g eníbî ńkyín* *da n̂g efwôo ńkyí ányi* *da n̂g eta ńkyí áku*.

²² Kángkáng byěm ḿbyín byi-bên n ké nkéré mbe ba-chi i byěm ké mbyí. Mbyí byi-chi i byije nké nke ne byěm etángê ḿbyí banet ba/chi.

²³ Nké mbyí mbyi byi-rángê e éné wǎ mbyi ne bubong ké otíring ebe mú barím esháng ne byiko ené ne busông ḿbú enyam-byiko ekye. Nké mbyí byi*da/byí ochíchí-chwǒm ḿbyí byidaman eníbî byibî-ekabe kyi-kim ne byěm ḿbyí enyam-byiko nyi e-ryuu ng*.