Jówel 3 - Bokyi Bible

Osówo o/chi o-pan Eshê nyí Ejíí Mpan

¹ Óburúkpâbí o/raa o/fu, ké nkéré ámu, me n/chi m-bwa esim ne kanong ké Júda ne Jerúsélem.

² Me n/chi m-kpaa eshê nyí ejíí emúmú m-bâ ne nyǐ ké owo mú mpan epan. Ányi nké n/chi m-pan kányí mpan ké kángkáng byěm ḿbyí ee/chi banet ejí. Baa/pwó banet ḿbé Ézerel byiryibyiryi ké eshê nyí nyi banet-bushwôn ebe, ne baa/kyii Ézerel nyí nyi esí ejí.

³ Mbé ba/twóp dyímám ba-ri oshê mú o/chi o-kúng banet ḿbé ba/kám kámbé wǎ básóng. Mbé ba/shee bwǎn-banyinchéng ne ḿbé banyinyi ba-yip akpuga ba-kye akpara, ba-ré bato.

⁴ Ben banet ḿbé Táya ne Sádon ne kángkáng eshê nyí Fyilíta bamu ba-kan n ba/fu, ba-chi i mě ebóng. Ben bamu ba-ryuu ng ba/fu, ba-só ng mě ewa ké chwǒm? Â bamu ba-ryuu ng ba/fu, ba-só ng mě ewa, me n/chi n-só běn kányí ochéé óchee.

⁵ Ben baa/kúng basyílyíba ne bagûl ejí, ba-kúng bujê-esang ejí ba-da-fé ké byise-byifen echi enen.

⁶ Ben baa/kúng banet ḿbé Júda ne Jerúsélem ba-dim ne mbé tíbítíbí ba-mîng oshê ebe, ba-yip kámbé ba-shee banet ḿbé Girîs.

⁷ Kántîk, me n-kú m-bâ ekúng kámbé ké byikit ḿbyí ba/shee kámbé m-bwa ne mbé esim. Me n/chi n-chi běn ńkyí ben ba/chi kámbé.

⁸ N/chi m-mîng ba-yip bwǎn enen ḿbé banyinchéng ne ḿbé banyinyi, ba-shee banet ḿbé Júda. Ba/chi ba-kúng kámbé ba-shee banet ḿbé Shéba ḿbé tíbítíbí. Me Óburúkpâbí nké n/raa.

⁹ Je n̂g ńkyín ké eshê ba/fu, kpá n̂g byiko ké byití. Kó n̂g bannwa byití enen. Kó n̂g kángkáng basúja enen ba-dim byití.

¹⁰ Ree n̂g byijwap enen byi-firi bushwám, ba-ree bamkpé enen ba-firi byíbye. Nang banet ḿbé ba*fí ne busa* ba-man ba-nwa.

¹¹ Bâ n̂g [babap,] ben eshê nyí nyi wângwâng, ba-ba-cibi ké owo. Ô Óburúkpâbí, twóm basúja eyên ba-ba-kye kámbé bunwa.

¹² Eshê e-man e-kpá byiko e-bâ ké owo mú mpan epan. Ányi nké me Óburúkpâbí n/chi m-pan kángkáng eshê nyí nyi wângwâng mpan.

¹³ Eshê ányi e/bên atyém kanong kanong. Két kányí a-pwó kyísí wǎ nkurung mú badabún ké nkéré mú oo/bwam. Nwárê kámbé wǎ byirim-byichí ḿbyí badanwárê ké kyikit ńkyí badachi bato tete bato ba-byí ba-pwôo kyísí.

¹⁴ Égot-banet chwóó nyi ké owo mú mpan. Ányi nké dyicí ńdyí Óburúkpâbí dii/fárâng.

¹⁵ Óbyísû ne otukáku byi/chi byi-jîi pyam, ne ékpére ee*san to*.

Osówo o/chi o-jware Banet Emen

¹⁶ Óburúkpâbí mu o-nyán n ké kaku ńké Záyon. Ejá emen nyi e-fím m ké Jerúsélem e-róng ng wǎ etare, bubóng ne esí byi-náng ng. Nké nyǐ o/chi o-bwom banet emen ké esim.

¹⁷ Ben banet ḿbé Ézerel ba/chi ba-nyît kâng ba/fu, me n-chi i Óburúkpâbí mú mu Osówo enen. Me mu n-kyú u ké Záyon mú mu kaku-ociring ejí. Jerúsélem o/chi o-kyú oshê mú ejí. Banet-bushwôn emen baa*ba/chi ba-chîkpógê kámú ne banyá*.

¹⁸ Ké nkéré ámu, byichí ḿbyí badayip byirim emen ba-chi bato byi/chi byi-cít eku, ne kaku nang kará ka/chi ka-firi ne bampong. Omu o/chi o-sú ké kángkáng buce ḿbú Júda. Kace kabónge ka/chi ka-byí ké kiǐtí-kyise-kyifen-Óburúkpâbí echi, ne ka/chi ka-sen ké owo mú Akákya.

¹⁹ Éjip ne Édom e/chi e-bírî kyikim-dyikán, ké nǎ, mbé ba/kye Júda bunwa ba-ju banet emen ḿbé ba*da/chi chwǒm*.

^20-21 N/chi [n-só ewa] nyí banet ḿbé ba/ju kámbé. Mm*ba/chi m-pwoo banet ḿbé ba/chi kyibî ánkyi*. Nké banet ba/chi ba-kyú ké Jerúsélem ne Júda ne banyá, ne me Óburúkpâbí n/chi n-kyú ké kaku ńké Záyon.