Jówel 2 - Bokyi Bible

Agurubí ányi a/bwom wǎ Ekó ekuri nyí Dyicí ńdyí Óburúkpâbí

¹ Jwá n̂g ntán, wonge ê agurubí ké kaku-ociring ńké Osówo, ńké badakó Záyon. Shî n̂g ba-tím banê, ǎ banet ḿbé Júda. Dyicí ńdyí Óburúkpâbí ndyi dyi-bâ abeabe.

² Dyicí ándyi dyi/chi dyi-kyú dyicí-kyifip kyífip. Dyi/chi dyi-kyú kiimpyimpyam-dyicí ne ńdyí ófíbí ófibi. Kiimbâng-dyibóng-agurubí nkyi kyi-bâ wǎ kyifip ńkyí kyidacít eku. Chwǒm éné wǎ ńkyín kyi*da/chi ne* ne kii*ba/chi kyi-chîchi ne banyá*.

³ Agurubí ányi nyi a-ryí i byichí wǎ okwâ. Ké kashú ebe, esí nyi wǎ kyifát ńkyí Osówo o/chi ké Édin, nké ké esim ebe, kyi/firi wǎ kyikim-dyikán ńkyí kyi*fí ne chwǒm*. Chwǒm kyi*fí ńkyí nkyi kyi-fem m kányí*.

⁴ Agurubí ányi nyi wǎ bubyî-orá, ne nyi a-zóngê e ochéé wǎ bubyî-orá-byití.

⁵ Â a-kú a-nyíp ng kyíbóng-eku, a-kûchi kyicoge wǎ bamútu ḿbé bubyî-orá budatut. Nyi a-chi i kyicoge wǎ okwâ mú odamang ké aro nyí aa/jwóm. Nyǐ a/bwom ké etáng wǎ bujê-basúja ḿbé baa/kpá byiko-byití.

⁶ Nang nyá nké a/ribi, nang yeě nang yeě o-firi ng ké bushî, bushú nang ḿbú yeě bu-firi dábe.

⁷ Nyǐ nyi a-kyâ bunwa wǎ bannwa byití a-yú u ké ekpe-oshê wǎ basúja. Nyǐ kángkáng nyi a-bâ kashú káshu. A*fí a-yángê e kiǐfáng*

⁸ a-két ng nang barî ké kashú*. Nyi a-nyáng ng kángkáng ero-byibám, chwǒm kyi*fí ńkyí kyidaman eku kányí*.

⁹ Nyǐ nyi a-nung ng ké oshê, baa*tî ekpu* a-yú u a-pyiryi ng ké ekpe, a-yú u ké byise, a-ryuu ng ké bawíndu a-shwôm m wǎ banet-bujii.

¹⁰ Â a-kú a-cen n a-bâ, bubóng ne esí byi-kpet enáng, óbyísû ne otukáku byi-firi kyifip, nang ékpére ee*san to*.

¹¹ Óburúkpâbí mu o-nyán n basúja emen. Basúja ḿbé mbe ba-jwo ng ǎ ba/jê, ne mbe ne busa. Dyicí ńdyí Óburúkpâbí dii*nwa eri*. Yeě o/chi o-man ecíp kándyí.

Dyikô ńdyí Byiko esaa

¹² Óburúkpâbí o/raa o/fu, nké nang kántîk, byiko byikpú běn ké ntûntû, ba-bwa esim ba-kâm mě ké esong ecîp ne bukyû etii ne dyikán eta.

¹³ Byiko byikpú běn ké ntûntû. Byídí eját ké byiko byi*da/kwárê*. Bwa n̂g esim ba-kâm Óburúkpâbí mú mu Osówo enen. Nyǐ o/cángê dyityém, ne mu o-ri ng banet bafip kanong kanong. Nyǐ kafâ kaa*sa ǎ babap* ne mu o-tî ng ocím emen mú o/ryí. Nyǐ o/kpá byiko kángkáng nkéré ḿbyí odapwoo banet, *chí ḿbyí odakye kámbé busông*.

¹⁴ Katô Óburúkpâbí mú mu Osówo enen o/chi o-yángê dyityém emen, o-jware běn, o-kye běn byíkwôn chwóó. Ne ben kâng ba/chi ba-kye ǎ byiryíng ne bato.

¹⁵ Jwá n̂g ntán ké kaku ńké Záyon. Kye n̂g busa ḿbú badacíp esong, ba-kó banet ba-bâ kyikit kyibónge.

¹⁶ Kó n̂g banet ḿbé Júda ba-bâ kyikit kyibónge. Kpá n̂g kámbé byiko ké ncibi mú Osówo. Bâ n̂g ne ḿbé bakínkán ne ḿbé bwǎsíng ne ḿbé bwǎn-bajújwô to. Nang banet ḿbé ba/bé dyibé abeabe ba-man ba-byí ké banfût ebe, ba-bâ kyíjí.

¹⁷ Banchi kyifen-Osówo ḿbé mbe ba-chi i bǎmkpóngé ḿbé Óburúkpâbí ké otyém ne otyém mú kyikit-kyifen echi ne ocím-dyifyi mú kiǐtí-kyise-kyifen-Osówo echi, ba-man ba-tii ba-fé nshwam ba/fu, Óburúkpâbí, ri banet eyên bafip. *Dachi a-bángê banet-bushwôn eten ba-jwó bě* ba-fát bě kiikuku* ba-kûraa ba/fu, Osówo enen mu nyá*.

Osówo o/chi Esí e-chîkpet ebát Byiryíng

¹⁸ Ne Óburúkpâbí o-tông kâng o/fu, esí ányi e/já ǎ nyǐ, o-ri banet emen bafip.

¹⁹ O-faa kámbé o/fu, kántîk, me n/chi n-kye běn byiryíng ne bato ne bakút ne kyi/chi kyi-kwárê běn. Banet-bushwôn enen baa*ba/chi ba-chî běn eshú*.

²⁰ Me n/chi n-fîm dyibóng-agurubí ńdyí dyi/fím ké kyicê ńkyí bushûyû, ne n/chi n-ró kyicê n-twóp ké kyikim-dyikán. N/chi n-ró bambwôp kashú ebe m-pwó ké baya ḿbé badakó Bukyû, n-ró banryî esim ebe m-pwó ké baya ḿbé Medeterényan. Byikwóm-enyam-byiko ebe byi/chi byi-kûnung tuktuk. Me n/chi n-ju kányí ké bubwô ḿbú kángkáng byěm ḿbyí aa/chi běn.

²¹ Byifát, *da n̂g echîshî* nké kyú n̂g ké bunyîn-dyityém ba-jêe ké bubwô ḿbú kángkáng byěm ḿbyí Óburúkpâbí oo/chi o-kye běn.

²² Enyam, *da n̂g echîshî*. Aro aa/byet. Byichí kángkáng byi-kú byi-zím m byirim, ne byirim-byichí bii/jê chwóó.

²³ Jêe n̂g, ǎ banet ḿbé Záyon. Jêe n̂g ké ńkyí Óburúkpâbí mú mu Osówo enen oo/chi o-kye běn. Nyǐ oo/kye běn [omu-kyifang mú o/kwárê.] Nyǐ oo/kye běn omu mú burwom ne omu mú ashí-burwom wǎ eringe nyí o/mû o-fwam m echi.

²⁴ Esang-byichí e/chi e-sú ké byikit ḿbyí mbe ba-kim m kányí. Abíng nyí nyi ké byikit ḿbyí mbe ba-nwárê ng babî-byirim-byichí a/chi a-sú ne bato ne bakút a-pwôo kyísí.

²⁵ Me n/chi n-chi běn ekye byěm ḿbyí byi/rím běn ké aje nyí abóng-agurubí a/ryí byíkwôn enen. Me nké n/twóm abóng-agurubí ányi ké oshê enen.

²⁶ Kántîk, ben ba/chi ba-firi ne byěm chwóó ḿbyí badaryí ba-zût. Ben ba/chi ba-kpee Óburúkpâbí mú mu Osówo enen, mú oo/chi biǐtí-byěm o-kye běn. Banet baa*ba/chi ba-chîfé banet ejí éshwân*.

²⁷ Wo kâng, ǎ Ézerel, a/chi a-nyît a/fu, me mu ne wo, a-nyît to a/fu, me Óburúkpâbí nké mu Osówo eyên, okíri o*fí to*. Banet baa*ba/chi ba-chîfé banet ejí éshwân*.

Dyicí ńdyí Óburúkpâbí

²⁸ Ké nkéré mú mu o-bâ ké kashú, n/chi n-twóm busa ḿbú Busun ejí bu-sú nang yeě nang yeě ké byiko. Bwǎn enen ḿbé banyinchéng ne ḿbé banyinyi ba/chi ba-sét kyitwóm ejí wǎ bamkpábé. Bakínkán-banet enen ba/chi ba-ri barê, ne byisat enen ne ásé enen ba/chi ba-ri byěm-akat.

²⁹ Ké nkéré ámu, me n/chi n-twóm busa ḿbú Busun ejí bu-sú to nang bǎmgbán ḿbé banyinchéng ne ḿbé banyinyi ké byiko.

³⁰ Me n/chi n-tông ekap nyí dyicí ándyi ké bubóng ne esí. Baróng ba/chi ba-byí ne okwâ ne arúkwâ.

³¹ Óbyísû o/chi o-jîi, ne otukáku o/chi o-kûbwam shíshét wǎ baróng, ne kiǐtí-kyibî-dyicí ńdyí Óburúkpâbí dyi-bâ.

³² Nké kángkáng banet ḿbé ba/kó Óburúkpâbí ba/fu, ochwáp kámbé, ba/chi ba-fem. Wǎ eringe nyí Óburúkpâbí oo/raa o/fu, kyicê-banet ḿbé mbe ké Jerúsélem ba/chi ba-fem. Banet ḿbé me n/kó kámbé ba/chi ba-kpen.