Jówel 1 - Bokyi Bible

¹ Nyín kyitwóm ńkyí Óburúkpâbí o/twóm mkpábé emen obónge mú odabángê Jówel, mú wǎn-Pétwel.

Banet ḿbé Júda ba/tii kyi-kim ne Byíkwôn ḿbyí byi/bên

² Fwôo n̂g atông ba-jwo, ben banet ḿbé bamu bakínkán. Nang yeě mú mu ké Júda ofwôo atông o-jwo. Dyizong-chwǒm wǎ ńdyín dyi/mû dii/chi ké nkéré mú enen? nang ké nkéré mú banchí enen?

³ Sét n̂g bwǎn enen kyi-kim ne nkyí. Mbé ba/chi ba-sét bwǎn ebe ḿbé ba/chi ba-sét to bwǎn ḿbé ebe.

⁴ Abóng-agurubí ké bunye ké bunye aa/sú ké byíkwôn. Byíkwôn ḿbyí dyibóng-agurubí dyibónge dyi*da/man eryí* nnyinyěng-dyibóng dyi/ryí.

⁵ Jwóbê n̂g ké burê ba-tii, ben bambwôm bato. Tii n̂g, ben banjwâp bato. Byirim-byichí ḿbyí mbe ba-yip ng ba-chi i bato ḿbé bafyîfî, agurubí aa/ryí kpók.

⁶ Kiimbâng-dyibóng-agurubí kii/nung ké esí eten. Agurubí ányi nyi ne busa a-shwôm, ne a/jê a-shwôm nyí aa*nwa epan*. Asháng ebe nyi a-nen n jangjang ne nyí ekpang.

⁷ Agurubí ányi aa/bên byifát eten, a-ryí kángkáng byichí eten. Aa/ryí byichí ne biintaa emen kángkáng tete byire ebe byi-kú byi-cé ng kpárádádát.

⁸ Ben banet ḿbé Júda, tii n̂g wǎ wǎn-onyinyi odatii ókyî emen mú oo/kpú, mú o/mû o/chi o-bé ǎ.

⁹ Byiryíng ne bato byi*fí to* ḿbyí badakye wǎ eyáré-kyifen echi ké kiǐtí-kyise-kyifen-Osówo echi*. Banchi kyifen-Osówo ba-kú ba-tii ng, ké nǎ, ba*fí to ne byifen ḿbyí badachi ba-kye Óburúkpâbí*.

¹⁰ Byifát bii/waa kafâ dyikáá. Esí e-kú e-tii ng, ké nǎ, baa/bên byíkwôn kángkáng, bato ba-man kángkáng. Bakút to ba-man kángkáng.

¹¹ Ben banchi byifát, tii n̂g. Ben mú bamu ba-tún n byifát, tii n̂g, ké nǎ, agurubí aa/ryí esang-byichí ne kángkáng byíkwôn.

¹² Byifát bii/jwóm. Kángkáng byichí ḿbyí byidazím byirim bii/jwóm byi-kpú. Bunyîn-dyityém ḿbú banet ḿbé Júda bu*fí to*.

¹³ Fé n̂g byídí-dyikán eta ba-tii, ben banchi kyifen ḿbé bamu ba-chi i bǎmkpóngé ké kyikit-kyifen-Osówo echi. Ca n̂g ba-da-nung ké kiǐtí-kyise-kyifen-Osówo echi ba-tii buchú bumúmú. Byiryíng ne bato byi*fí to* ḿbyí badakye Osówo enen*.

¹⁴ Kye n̂g kyije ńkyí badacíp esong. Kó n̂g banet kyikit kyibónge. Kó n̂g banet-ashí ne kángkáng banet ḿbé Júda ba-bâ ké kafâ-kiǐtí-kyise-kyifen Óburúkpâbí mú mu Osówo enen echi, ba-tii ba-kó ǎ.

¹⁵ Dyicí ńdyí Óburúkpâbí dii/fárâng. Dyicí ńdyí nyǐ mú o/rêe o-shwôm o/chi o-bâ ne bukyû ekpú. Bushî ḿbú dyicí ándyi dyi/chi dyi-bâ ne mbú boo*nwa eri*.

¹⁶ Be byimu byi-tún n achi, chwǒm bii*man echi* byi-ri ng eringe nyí agurubí nyi a-bên n byíkwôn eten. Bunyîn-dyityém bu*fí to* ké kiǐtí-kyise-kyifen-Osówo echi ńkyí Osówo eten*.

¹⁷ Esang-byichí e-kú e-kpú u ké esí nyí ee/jwóm. Esang-byichí nyí badatî e*fí to*. Byise ḿbyí badatî esang-byichí bii/bên.

¹⁸ Byitú byi-kú byi-wonge e ké bafip, ké nǎ, biǐbyâa byi*fí to ḿbyí badaryí*. Abóng-ebû a-kú a-ri ng afaníkong.

¹⁹ Me mu n-tii ng n-kó ng ǒ, ǎ Óburúkpâbí, ké nǎ, aro ne byichí bii/jwóm kpók wǎ okwâ nké o/shí kámbyí.

²⁰ Nang enyam ké dyikán nyi e-tii ng e-kó ng ǒ, ké nǎ, buce boo/núng kpók.