Jóshwa 9 - Bokyi Bible

Banet-Gyíbwon ba/nîm Jóshwa

¹ Okpóge mú banet-Ézerel mbe ba-kpógê e banet o/ribi o-kâm kángkáng batu ḿbé mbe ké kyicê-Jódan ńkyí esû nyi e-ríbî ng e-jâ, ké eku ne ké byikû-eku ne ké kángkáng ndege-esí mú mu fáráng ne baya ḿbé Medeterényan, tete kyi-ribi ké Lebánon mú mu ké kyicê ńkyí bushûyû. Batu ámbe ba/mû batu-Hyítat ne ḿbé Ámórit ne ḿbé Kínan ne ḿbé Périzit ne ḿbé Hyíbit ne ḿbé Jébus.

² Ba-dim ba-cibi basúja ebe kyikit kyibónge eringe badanwa ne Jóshwa ne banet emen.

³ Nké banet-Gyíbwon, ḿbé ba/mû banet-Hyíbit, ba/jwo ńkyí Jóshwa o/chi banet-Jéríku ne ḿbé Áyi.

⁴ Ba-tî kâng okabe ba/fu, mbé ba-nîm m ǎ. Ba-da-kyé byiryíng ba-bwá boonyam-atû ebe ké esim ké biimbam ne byiféng-bato ḿbyí bii/kâa.

⁵ Ba-yip bakâa-byídí ba-bwá ne abe nyí aa/kâa ba-zim ozǐm. Ba-kúng berêt mú oo/jwóm o-fip.

⁶ Ba-da-nung ké Gyígal, ké kyikit ńkyí banet-Ézerel ba/mû ba-kyú u. Ba-sét Jóshwa ne banet-Ézerel ba/fu, be byi/fím tíbítíbí ne byi-bâ nyín. Byimu byi-ryuu ng byi/fu, byichi kyikwáré ne ben.

⁷ Nké banet-Ézerel ba/bí kámbé ba/fu, ebóng bamu ba-ryuu ng ba/fu, be byichi kyikwáré ne ben. Kakíri ben bamu ba-kyú u nyín fáráng ne be.

⁸ Mbé ba-faa Jóshwa ba/fu, be byi-chi i bǎmgbán eyên. Jóshwa o-bí kámbé o/fu, ben ba-chi i ebóng banet. Ba/fím nyá.

⁹ Mbé ba-kpet ǎ esét kâng ba/fu, be byi/fím tíbítíbí ne byi-bâ nyín, ǎ bonchí, ké nǎ, be bii/jwo kyi-kim ne dyizîn ńdyí Óburúkpâbí mú Osówo eyên. Be bii/jwo kyi-kim ne kángkáng byěm ḿbyí nyǐ o/chi ké Éjip

¹⁰ ne ńkyí o/chi batu-Ámórit ashí afee, ḿbé ba/mû ba-kyú u ké kyicê-kace ńké Jódan ńkyí esû edabyí, Otu Síhon mú o/fím Héshibon ne Otu Ôok mú o/fím Báshan, mú o/mû o-kyú u ké Ashítarat.

¹¹ Banet-ashí eten ne kángkáng banet ḿbé mbe ba-kyú u ké esí eten ba/sét bě ba/fu, byida-kyé byiryíng byi-kpá byiko ḿbyí byidadim bucen byi-ba-kâm ǒ. Mbé ba/sét bě ba/fu, byikúng byiko eten byi-kye ǒ wǎ bǎmgbán eyên, byi-bí ǒ byi/fu, chi kyikwáré ne be.

¹² Kan achi a-ri berêt eten. Ké nkéré mú byi/dim ké byise byi/fu, byi-bâ ng ǒ ekâm, mǔ o/mû oo/tôong o-sóng ng. Nké kan achi a-ri eringe oo/jwóm o-fip.

¹³ Nkéré mú byi/fé bato ké byiféng ḿbyín, byi/mû byifyîfî, nké kan achi a-ri eringe bii/kâa. Byídí eten ne abe eten to bii/kâa ké bubwô ḿbú bukwóp ḿbú bu/jang etíbî.

¹⁴ Banet-Ézerel ba-koo kyicê-byiryíng ḿbyí banet ámbe ba/bê ne mbyí, ba-ryí, ba-tông ba/fu, ba/chi kyikwáré ne mbé, ba*da/bí Óburúkpâbí kyi-kim ne nkyí*.

¹⁵ Jóshwa o-chi kyikwáré ńkyí bunyîn-dyityém ne banet-oshê ámu. O-mîng kámbé ba-waa bakpó. Banet-ashí ḿbé oshê-Ézerel ba-ryí ocím kanong kanong ba/fu, mbé ba-tî ng ocím ebe mú mbé ba/ryí éné.

¹⁶ Nkéré mú baa/ryí ocím ámu kyi-rí ací achât, banet-Ézerel ba/jwo ba/fu, ké ntûntû, banet ámbe mbe ba-kyú u ányi fáráng ne mbé.

¹⁷ Banet-Ézerel ba-dim kâng mbe ba-cen n ba-câ. Ne ké nkéré mú ací aa/shwôm achât, ba-da-ribi ké eshê nyí banet ámbe mbe ba-kyú u, Gyíbwon ne Kéfyira ne Byírot ne Kyíryat-Jérim.

¹⁸ Nké banet-Ézerel ba*da/man eju kámbé* ké nǎ, banet-ashí ebe ba/mû baa/ryí ocím kanong kanong ne mbé ké dyizîn ńdyí Óburúkpâbí mú Osówo mú Ézerel. Kángkáng banet ba-kpet eraa ne banet-ashí ebe kyi-kim ne nkyí.

¹⁹ Nké mbé ba/faa kámbé ba/fu, be bii/ryí kámbé ocím kanong kanong ké dyizîn ńdyí Óburúkpâbí mú Osówo-Ézerel. Kántîk, be bii*man echi to kámbé kyibî*.

²⁰ Be byi-man byi-mîng kámbé ba-kyú ké dyikpen, ké bubwô ḿbú ocím mú byi/ryí kámbé. Â byi*da/chi éné* Osówo o-kyâ bě busông.

²¹ Mîng n̂g kámbé ba-kyú, nké mbé ba/chi ba-kû bě esá ekwón ba-tó ng bě omu. Něen nké ḿbé banet-ashí ba/mû ba/kabe.

²² Jóshwa o-kye busa o/fu, bakpî banet-Gyíbwon ba-bâ ne mbé. O-bí kámbé o/fu, ebóng kyi/chi ne ba-nîm bě ba-sét bě ba/fu, oshê enen o/tíbî, mú bamu bě nyín ké kyikpút.

²³ Ké bubwô ḿbú ben ba/chi ńkyín, Osówo oo/két mpan o-bên běn. Banet enen ba-man ba-kyú básóng kángkáng nkéré, ba-sá ng ekwón ba-tó ng omu ba-kyâ ké kyise-kyifen-Osówo ejí echi.

²⁴ Mbé ba-faa ba/fu, be byi/chi éné, ǎ bonchí, ké nǎ, be byi/jwo ba/fu, nkyi ntûntû něen, Óburúkpâbí mú Osówo enen o/sét Músis mú ḿgbán emen o/fu, okye běn esí ńnyín emúmú, ba-ju to banet ḿbé mbe ba-kyú u ké nyǐ, â ba-kú ba-tín n ba-bâ. Be byi/chi éné, ké nǎ, bushî bu/chi bě ne ben kanong kanong. Ne bushî bu/mû mbu bu-chi i bě kyi-kim ne akpen eten.

²⁵ Kántîk, be byi/firi ké bubwô eyên. Chi bě ńkyí wo a/kabe a/fu, nkyi kanong.

²⁶ Nyín něen ńkyí Jóshwa o/chi. Nyǐ o/ku kámbé. O*da/bángê banet-Ézerel ba-ju kámbé*.

²⁷ Nké o/chi kámbé ba-firi básóng, ba-kûsá ekwón ba-tó ng omu ba-kyâ banet-Ézerel, ba-kyâ to ké kyikit-kyifen-Osówo echi. Tete kurún, mbé ba/tôong ba-chi i bǎmkpóngé ámbe ba-kyâ ké kyikit ńkyí Óburúkpâbí oo/cá o/fu, bakû ǎ ekye ofê ányi.