Jóshwa 8 - Bokyi Bible

Banet-Ézerel ba/koo Áyi, ba-bên to Kámú

¹ Óburúkpâbí o-raa ne Jóshwa o/fu, kpî basúja eyên bamúmú a-ca ne mbé ké Áyi. *Dachi a-shî* a-zú to nang dyityém*. Me n/chi n-chi ǒ a-kpógê otu-Áyi ne banet emen ne oshê ámu, ne esí ányi e/chi e-firi nyí enen.

² A/chi a-chi oshê ámu ne otu ebe ńkyí a/chi Jéríku ne otu ebe. Nké ntáng mún, wo a-man n ekoo byěm ebe ne byitú ebe byi-firi ḿbyí enen. Kpá byiko a-kye kámbé bunwa kiǐmút ké esim nyí áku.

³ Jóshwa o-kpá kâng byiko ḿbyí badadim Áyi ne basúja emen bamúmú. O-cá bajam-égot-banet káchâtkányi esim batánge ḿbé badaman enwa byití ba-shwôm, o-twóm kámbé ba-dim ké buchú ámbu.

⁴ O-sét kámbé o/fu, ca n̂g ba-da-rem ké bukô-oshê ḿbú áku, *da n̂g echi ba-jang ng etíbî ne oshê*. Kpá n̂g byiko ḿbyí badakye kámbé bunwa.

⁵ Me ne banet ḿbé ejí byi/chi byi-tông kashú ké oshê. Â banet-Áyi ba/byí ba-bâ ebanwa ne be, be byi/chi byi-pín esim byi-chêe wǎ eringe nyí byi/mû byi/chêe.

⁶ Mbé ba/chi ba-zóngê ne be tete ba-tíbî. Mbé ba/chi ba-kûkabe ba/fu, be byi-kú byi-chêe ng kámbé wǎ eringe nyí byi/mû byi/chêe.

⁷ Kyi-fím ányi kâng, ben ba/chi ba-byí áku ba-ba-koo oshê ámu. Óburúkpâbí mú Osówo eten o/chi o-kye běn oshê ámu.

⁸ Ké nkéré mú baa/koo kámú, shí n̂g kámú wǎ eringe nyí Óburúkpâbí o/sét. Nyín něen ńkyí me n/sét běn.

⁹ Jóshwa o-twóm kámbé kâng ba-dim. Ba-da-rem ké kyikit ánkyi ba-kûbám, ké kyicê-Áyi ńkyí esû edaríbî e-jâ, ké otyém ne otyém mú Áyi ne Bétel. Jóshwa o-waa ányi dyi-cé.

¹⁰ Ké dyicófóróng pirípirí, Jóshwa o-bûu o-kó basúja ba-cibi kyikit kyibónge. Nyǐ ne banet-ashí-banet-Ézerel ba-kpî kámbé ba-dim ḿbú Áyi.

¹¹ Mbé ba/tông kashú ḿbú ochíchí-bukwóp ḿbú mbu bu-wâa ng ké oshê. Ba-da-bi bampyep-byití ebe ké kyicê-bushûyû ḿbú oshê ámu, owo o-waa kámbé ányi ké otyém ne otyém mú Áyi ne mbé.

¹² O-yip égot-basúja nang bujam esim etánge ba-da-rem ké kyicê-oshê ńkyí esû edaríbî e-jâ, ké otyém ne otyém mú Áyi ne Bétel.

¹³ Ba/bwât basúja ámbe ba-tî ké byití enwa, ba-bi bampyep chwóó ké kyicê ńkyí bushûyû-oshê ámu, basúja ḿbé áku ba-jâ ké kyicê-oshê ámu ńkyí esû edaríbî e-jâ. Jóshwa o-rí ányi ké owo ámu.

¹⁴ Ké nkéré mú otu-Áyi o/ri basúja-Jóshwa, o-kpá okpáng byiko babap. Nyǐ ne banet emen bamúmú ba-dim ba-wâa ḿbú owo mú ké Jódan eringe nyí badanwa ne banet-Ézerel ké ochíchí-kyikit mú ba/mû baa/nwa. Nyǐ o*da/nyît o/fu, ba/chi ba-kye ǎ bunwa kwán ké esim*.

¹⁵ Jóshwa ne banet emen ba-chi wǎ mbé ba-kú ba-chêe ng, ba-zóngê ba-jâ ké kyikim-dyikán.

¹⁶ Banet-Áyi ba-kó kángkáng banet ḿbé ké oshê kyikit kyibónge ba/fu, baca ne banet-Jóshwa ké kyikû. Nkéré mú mbe ba-ró ng kámbé éné ba-câ, mbe ba-tíbî ng otíbíng ba-câ fím ké oshê.

¹⁷ Nang onyinchéng obónge o/mû o*da/chîwaa ké [oshê*.] Mbé ashí amúmú ba/dim ne banet-Ézerel ké kyikû, afyi-oshê a-waa ányi fúú. Ne onet o/mû o*fí to mú odachîbám kámú*.

¹⁸ Óburúkpâbí o-sét kâng Jóshwa o/fu, fîm kyíbye eyên a-tông ké oshê ámu. Me n-kú n-kyâ ǒ kámú. Jóshwa o-chi wǎ eringe ba/sét ǎ.

¹⁹ Ne ńdyí nyǐ o-bêem m bubwô kyíbóng o-bâ, banet ḿbé ba/mû ba/darem éné ba-bûu obúng nensang, ba-zóngê ba-nung ké oshê ba-da-koo kámú. Ba-waa owǎng ba-mee okwâ ba-fé ké mǔ.

²⁰ Nkéré mú banet-Áyi ba/kan achi ké esim, ba-ri ké arúkwâ a-kú a-yú u a-jâ kyíbóng, mpât o/mû o*fí to mú mbé badachîchêe* ké nǎ, banet-Ézerel ḿbé ba/mû ba/zóngê ba-jâ ké kyikim-dyikán, baa/bírî esim ba-bâ kámbé bunwa ebakye.

²¹ Nkéré mú Jóshwa ne banet emen ba/ri ba/fu, banet ebe ḿbé áku baa/koo oshê ámu, ne baa/mee okwâ ba-fé ké mǔ, ba-bírî esim ba-kpet eju banet-Áyi.

²² Banet-Ézerel ḿbé ba/mû baa/nung ké oshê-Áyi, ba-fím áku ba-ba-fé abwô ké bunwa. Ba-wáp kâng banet-Áyi ba-fé ké otyém. Ba-ju kámbé ashí amúmú. Nang onet o*da/chêe* nang onet to o*da/waa okpó*.

²³ Kyi*da/shwôm otu-Áyi*. Ba-kám ǎ ba-ba-kye Jóshwa.

²⁴ Banet-Ézerel ba-ju kángkáng banet-bushwôn ebe ḿbé mbe ba-kyú u ké kyikim-dyikán ánkyi, ké kyikit ńkyí ba/mû baa/ró kámbé ba-chêe. Ba-bwa esim kâng ké Áyi ba-da-ju kángkáng banet ḿbé ba/mû ányi.

^25-26 Kyíbye ńkyí Jóshwa o/mû o/níbî ké bubwô o-tông ké Áyi, o*da/shû kánkyí kyísí* tete ba-ju kángkáng banet-Áyi. Bajam-égot-banet bachât nyí ba/ju ké dyicí ándyi, banyinchéng ne banyinyi.

²⁷ Banet-Ézerel ba/mîng byitú ne byěm ḿbyí ba/koo ké oshê ámu byi-waa kámbé ányi, wǎ eringe nyí Óburúkpâbí o/mû o/sét Jóshwa.

²⁸ Jóshwa o-fé okwâ ké oshê ámu o-shí, o-mîng kámú o-waa éné. Kyikit ánkyi kyi/tôong éné tete kurún.

²⁹ O-kám otu-Áyi o-ju, o-yip ǎ o-kpong ké kyichí, o-mîng ǎ ányi tete dyikurúku dyi-fyi. Ké nkéré mú esû ee/ríbî, o-kye busa o/fu, bafîm kyikwóm-enyam-byiko-otu ámu. Ba-fîm kánkyí ba-twóp ányi kyísí ké dyifyi ńdyí oshê ámu. Ba-zû ǎ kiimbâng-dyizu-aká ányi ké byiko, ńkyí kyi/tôong áku tete kurún.

Ba/kó Byije-Músis ké Kaku ńké Ébal

³⁰ Ka/chîrí, Jóshwa o-bi kyikit-kyifen-Osówo echi ké kaku ńké Ébal o-tî Óburúkpâbí mú Osówo-Ézerel.

³¹ Nyǐ o/bi kánkyí wǎ eringe nyí Músis mú ḿgbán-Óburúkpâbí o/mû o/sét banet-Ézerel, wǎ eringe nyí ba/sáng ké Nwet-Músis ba/fu, bi kyikit-kyifen-Osówo echi ké aká nyí baa*kúng biǐré ne ba-két*. Banet-Ézerel bakûchi kâng byifen ányi ḿbyí byěm eshí, ba-kyâ Óburúkpâbí, ba-chi i to byifen ányi ḿbyí kyikwáré ekwárê ne Óburúkpâbí.

³² Jóshwa o-yip kâng [aká] o-sáng byije ányi ké nyǐ, ḿbyí Músis o/mû oo/sáng. Banet-Ézerel mbe ányi ba-ri ng.

³³ Banet-Ézerel cibicibi ne bakínkán-banet ebe ne banet-ashí-basúja ebe ne bampan esuk ebe, cibicibi to ne bacinbánet ḿbé ba/mû ne mbé ké kyikû, ba-bwom ogba mún ne mún ba-fé mkpukpu-byěm-Óburúkpâbí ké otyém, ba-bírî achi mbe ba-tún n banchi kyifen-Osówo ḿbé kyikû-banet ńkyí Lyíva, ḿbé ba/kúng kámú. Byicê-banet ba/bwom ba-bírî esim ké kaku ńké badakó Gerízim, kyicê ńkyí áku ba-bírî to esim ké kaku ńké badakó Ébal. Músis mú ḿgbán-Óburúkpâbí nké o/mû o/sét kámbé o/fu, bachi éné, â nkéré oo/fyi mú banet-Ézerel badakoo ojware.

³⁴ Jóshwa o-kó kâng Byije ámbyi byimúmú, cibicibi ne banjware ḿbé Osówo odajware banet, ne byishû ḿbyí odashú banet, wǎ eringe nyí ba/sáng kámbyí ké Nwet-Byije-Músis.

³⁵ Jóshwa o/kó kángkáng Byije-Músis o-sét kángkáng banet ḿbé ba/mû ba/cibi ányi, cibicibi ne banyinyi ne bwǎsíng ne bacinbánet ḿbé ba/mû ne mbé ké kyikû.