Jóshwa 7 - Bokyi Bible

Kyibî ńkyí Ákan o/chi

¹ Ńkyí Óburúkpâbí o/sét banet-Ézerel o/fu, ba*dachi ba-kúng chwǒm nang kyibónge ké Jéríku ba-dim ne nkyí* mbé ba*da/jwo*. Onyinchéng obónge mú odabángê Ákan o/róng kyije ánkyi. Ké bubwô ámbu kâng, kafâ ka/sa Óburúkpâbí kanong kanong ne banet-Ézerel. Bonchí-Ákan o/mû o-bángê e Kámyi. Ne bonchí emen mú kánkán o/mû o-bángê e Zábadyi. Nyǐ o/fím ké kyikim-oshê ńkyí onyinchéng obónge mú odabángê Zéra, kyicê-kyikû-banet ńkyí Júda.

² Jóshwa o-twóm banet ké Jéríku o/fu, baca oshê mú odabángê Áyi, ba-da-kyé kyikû kyi-kim ne mǔ. Oshê ámu mu ké kyicê-oshê mú badakó Bétel, ńkyí esû edabyí, fáráng ne oshê mú badakó Betáben. Ké nkéré mú baa/ce ba-bwa esim dyijê,

³ ba/basét Jóshwa ba/fu, kyi*fí ńkyí basúja bamúmú badace*. Twóm égot-basúja nang diǐkpú nang onyiryiká nké nke ba-ca. *Dachi a-twóm basúja bamúmú*. Oshê ámu o*da/rêe*.

⁴ Ké bubwô ámbu, égot-basúja nang onyiryiká ba-dim kâng ba-ca ba-da-kye bunwa. Nké oshê ámu ba/tín kámbé ké busa ba-bwa esim.

⁵ Banet-Áyi ba-ró kámbé kyi-fím ké dyifyi ńdyí ké dyishí-bukwóp-oshê ba-ribi ké kyikit ńkyí badasé aká. Ba-ju banet nang bujam esim onyiryiká ne din, nkéré mú mbe ba-shû ng kaku ba-bâ. Kyi-fím ányi kâng, banet-Ézerel ba-zú dyityém.

⁶ Jóshwa ne banet-ashí-banet-Ézerel ba-ját byídí ké byiko, ké bafip, ba-myii kyísí ké bushú ḿbú mkpukpu-byěm-Óburúkpâbí. Ba-waa ányi tete dyikurúku dyi-fyi. Ba-wuri édúkǎndú ba-fé ké dyishí, ké bafip eri.

⁷ Jóshwa o-fé nshwam o/fu, Osówo Óburúkpâbí, kyi/cen ocěn nǎ ne wo a-chi bě byi-nyáng kace ńké Jódan. Eringe nyí ada bě ekúng a-kye banet-Ámórit dí. Eringe nyí ada bě eju dí. Byi/mû byi/chi byi-waa esim-kace nyí áku.

⁸ Kántîk, me n-fu ng nǎ, ǎ Óburúkpâbí, mú banet ámbe baa/tín banet-Ézerel ba-bwa esim.

⁹ Banet-Kínan ne kángkáng banet ḿbé mbe nyín ba-man ba-jwo kyi-kim ne nkyí. Mbé ba-man ba-ba-wâng bě ashí amúmú ba-ju. Wo a/chi a-chi nǎ kâng ne a-ku dyizîn eyên.

¹⁰ Óburúkpâbí o-faa Jóshwa o/fu, bûu nensang. Ebóng ńkyí a/myii kyísí éné.

¹¹ Banet-Ézerel baa/chi kyibî. Mbé baa/bên ocím ejí mú n/ryí ne mbé n/fu, batî. Mbé baa/kúng byěm byikíri ḿbyí n/fu, babên. Mbé ba/jii kámbyí, ba-sét kyisédéng kyi-kim ne mbyí, ba-yip kámbyí ba-cibi ne byěm ḿbyí ebe.

¹² Nkyí nké mbé baa*man ebwom to ba-nwa ne banet-bushwôn ebe*. Mbé ba*da/man ebwom ba-nwa ne banet-bushwôn ebe* ké nǎ, mbé to nn/két mpan n/fu, bakpú. Me mm*ba/chi n-chîkyú ne ben* tete ben ba-bên byěm ámbyi ḿbyí n/sét běn n/fu, *da n̂g ekúng*.

¹³ Bûu nensang. Banet eyên basoo byiko ebe, a-kpá kámbé byiko ḿbyí badabê ké bushú ejí nencí. Sét kámbé a/fu, bakpá byiko, ké nǎ, me Óburúkpâbí mú Osówo-Ézerel nké n/raa n/fu, ben bamu ne byěm ányi byikíri ḿbyí n/sét běn n/fu, bên n̂ kámbyí. Ben baa*ba/chi ba-man ebwom ne banet-bushwôn enen* tete ba-bên byěm ámbyi.

¹⁴ Sét kámbé kâng a/fu, nencí ké dyicófóróng, ba/chi ba-kpî kámbé ba-bâ ne mbé ké bushú ejí, ké byikim ké byikim. Nang kyikim-banet kyirá nké n/tông kámbé kafwa, ba/chi ba-byí kâng ba-bâ kyíjí, ké kyikû ké kyikû. Nang kyikû-banet kyirá nké n/tông kámbé kafwa, ba/chi ba-byí ba-bâ kyíjí ké kyikû-dyibóng ké kyikû-dyibóng. Nang kyikû-dyibóng kyirá nké n/tông kámbé kafwa, ba/chi ba-byí ba-bâ kyíjí ké onet ké onet.

¹⁵ Onet nang orá kâng mú n/tông ǎ kafwa, n-nyît n/fu, nyǐ nké mu ne byěm ámbyi ḿbyí n/sét n/fu, babên kámbyí, ba-man ba-shí onet ámu, cibicibi ne kyikû-banet emen ne kángkáng byěm ḿbyí mu ne mbyí, ké nǎ, nyǐ oo/yip kyibî-éshwân o-fé banet-Ézerel ké byiko, ne nyǐ oo/bên to ocím ejí mú nyǐ o/ryí.

¹⁶ Ké orî-dyicí, ké dyicófóróng pirípirí, Jóshwa o/sét banet-Ézerel o/fu, babyí kyíjí, ké byikim ké byikim. O-ba-tông kyikim-banet ńkyí Júda kafwa.

¹⁷ O-fu kámbé ba-byí kyíjí ké kyikû ké kyikû. O-ba-tông kyikû-banet ńkyí Zéra kafwa. O-fu kámbé ba-byí kyíjí ké kyikû-dyibóng ké kyikû-dyibóng. O-ba-tông kyikû-dyibóng ńkyí Zábadyi kafwa.

¹⁸ O-fu kámbé kâng ba-byí kyíjí ké onet ké onet. Ne o-ba-tông kâng Ákan mú wǎn-Kámyi kafwa, mú bonchí emen mú kánkán o/mû o-bángê e Zábadyi.

¹⁹ Jóshwa o-raa ne nyǐ o/fu, wǎn ejí, sét ntûntû nyín ké bushú ḿbú Óburúkpâbí mú mu Osówo mú banet-Ézerel. Sét mě ńkyí a/chi. *Dachi a-rôo kánkyí*.

²⁰ Ákan o-faa o/fu, ntûntû, nkyi éné. Me nn/chi kyibî ké bushú ḿbú Óburúkpâbí mú Osówo-Ézerel. Něen nké n/chi.

²¹ Ké burwám-byěm ámbyi ḿbyí byi/koo éné, n/ri kyídí ńkyí kyinong kyinong, ńkyí banet-Bábyílon ba/chi, ne syílyíba mú odaró wǎ bakyílogaram bafee, ne ochu-gûl mú odaró o-shwôm kyicê-kyílogaram. Byi/nyîn mě kanong kanong, n-yip kámbyí kâng. A-ri ng kámbyí ké n/sím n-fé kyísí ké kafâ-mpyep ejí, kyíbóng-syílyíba.

²² Jóshwa o-twóm kâng kyicê-banet, ba-zóngê ba-da-ri byěm ámbyi wǎ eringe Ákan o/sét.

²³ Ba-yip kámbyí ba-byí ne mbyí kyíjí, ba-kúng ba-ba-kye Jóshwa ne kángkáng banet-Ézerel, ba-tî ányi kyísí ké bushú ḿbú Óburúkpâbí.

²⁴ Jóshwa ne kángkáng banet-Ézerel ba-yip Ákan ne syílyíba ámu ne kyídí ánkyi ne ochu-gûl ámu ne bwǎn-Ákan ne bampong emen ne boonyam-atû emen ne etám-ebû emen ne mpyep emen ne kángkáng byěm emen ḿbyí mu ne mbyí, ba-dim ne mbé ké Owo-Afaníkong.

²⁵ Jóshwa o-bí kâng Ákan o/fu, ebóng kyi/chi ne a-wuri afaníkong ńnyín a-tû bě ké dyishí. Óburúkpâbí mu o-bâ ǒ ebakye afaníkong abeabe. Banet ámbe kángkáng kâng ba-tím Ákan aká tete o-kpú. Ba-tím to kyikû-banet emen aká tete ba-kpú. Ba-shí kámbé cibicibi ne byěm emen ḿbyí o/mû ne mbyí.

²⁶ Ba-wuri kiimbâng-dyizu-aká ba-zû ǎ ányi, ńdyí dyi/tôong ányi tete kurún. Ányi nké kyi/cen ne ba-kûkó kyikit ánkyi, Owo-Afaníkong tete kurún. Kafâ ka-mîng kâng Óburúkpâbí esa.