Jóshwa 6 - Bokyi Bible

Jéríku o/róng

¹ Ba/mû ba/fâng afyi nyí Jéríku, ne banet to ba/mû mbe ba-bám m kányí eringe nyí banet-Ézerel baa*man enung*. Onet nang obónge ba/mû baa*bángê ǎ to o-nung ké kafâ* o-byí nang kyíjí*.

² Óburúkpâbí o-sét Jóshwa o/fu, me mu m-bâ ebakúng Jéríku ne otu ebe ne bakân-basúja emen n-fé ǒ ké abwô.

³ Wo ne basúja eyên, kû n̂g ecen kángkáng dyicí kampén kabónge ba-wáp ng kámú, ké ací nyâchât.

⁴ Banchi kyifen ejí ashí káchâtkányi bakúng bantán káchâtkányi ba-bwóp mkpukpu-byěm ejí kashú. Ké ací káchâtkányi, wo ne basúja eyên, cen n̂ ba-wáp oshê ámu kampén káchâtkányi, banchi kyifen ejí bacen to ba-jwá ng bantán ámbe.

⁵ Mbé bajwá kâng ntán obónge mú odabwon. Â ba-jwo ng okwan ámu ba-bâ, kángkáng banet bawonge kakânkakân, ekpe nyí ba/bi ba-wáp oshê ba-fé ké kafâ e/chi e-myii. Basúja eyên bamúmú baca ocǎng kashú káshu ba-nung ké oshê.

⁶ Jóshwa o-kó banchi kyifen-Osówo o-sét kámbé o/fu, kúng n̂g mkpukpu-byěm-Osówo. Banet káchâtkányi babwóp kámú kashú ne bantán ké abwô.

⁷ O-sét kâng banet emen o/fu, bakpet ecen ba-wáp ng oshê, basúja bakíri ba-câ mkpukpu-byěm-Osówo kashú.

^8-9 Ne wǎ eringe nyí Jóshwa o/sét, basúja bakíri ḿbé mbe ba-jwá ng bantán ba/kpet ecen ba-câ kashú. Banchi kyifen-Osówo ḿbé ba/kúng mkpukpu-byěm-Osówo ba-nye ne mbé, basúja ḿbé kwán ba-ryí esim. Mbe ba-jwá ng bantán ámbe ba-câ.

¹⁰ Nké Jóshwa o/mû oo/sét kámbé o/fu, ba*dachi ba-wonge* ba-faa nang ojá* tete nyǐ o-sét kámbé.

¹¹ Nyǐ o/sét banet ámbe o/fu, bakúng mkpukpu-byěm-Óburúkpâbí ba-ca ba-da-wáp oshê ámu kampén kabónge, ba-bwa esim ké kyikit ńkyí mbe ba-kyú u.

^12-13 Jóshwa o-bûu nensang ké orî-dyicí ké dyicófóróng pirípirí, banchi kyifen-Osówo ne basúja ba-chîdawáp oshê ámu wǎ eringe nyí ba/mû ba/chi. Basúja bakíri nké ba/bwóp kashú, banchi kyifen-Osówo ashí káchâtkányi ḿbé mbe ba-jwá ng bantán ba-nye ne mbé, banchi kyifen-Osówo ḿbé ba/kúng mkpukpu-byěm-Óburúkpâbí ba-ba-nye, ne basúja ḿbé kwán ba-kûnye. Bantán mbe ba-raa ng ba-câ.

¹⁴ Ba-chîdawáp oshê ámu ba-bwa esim dyijê. Ba-chi éné ké ací jangjang nyâchât.

¹⁵ Ké ací káchâtkányi, ba-chîbûu ké dyicófóróng pirípirí, ba-cen ba-wáp oshê ámu kampén káchâtkányi wǎ eringe ba/mû ba-chi i. Dyicí ándyi nké nke nké ba/cen ba-wáp oshê ámu kampén káchâtkányi.

¹⁶ Ké nkéré mú ba-kú ba-wáp ng kámú ké kampén káchâtkányi, ńdyí banchi kyifen-Osówo ba-kú ba-bâ ebajwá bantán, Jóshwa o/sét banet emen o/fu, bawonge. O-sét kámbé to o/fu, Óburúkpâbí oo/kye běn oshê mún.

¹⁷ Oshê mún ne kángkáng byěm ḿbyí mbyi ké mǔ ba-man ba-bên kámbyí kángkáng wǎ kyifen echi ba-kye Óburúkpâbí. Kyi*da/shwôm Ráhap mú onyi-dyikpe ne kyikû-banet emen nké badawaa* ké nǎ, nyǐ o/rôo banet-boǒfêp-esí eten.

¹⁸ Nké *da n̂g echi ba-yip chwǒm nang kyibónge ba-dim ne nkyí* ḿbyí n/fu, babên*. Â ba/yip, ba/chi ba-bâ ne busông ne bukyû ké oshê-Ézerel.

¹⁹ Kángkáng byěm ḿbyí ba/chi ké syílyíba ne gûl ne borôn ne áyon ba-man ba-tî kámbyí cát. Mbyí byi/já Óburúkpâbí. Ba-man ba-kúng kámbyí ba-tî ké nfût-byěm erôo mú Óburúkpâbí.

²⁰ Banchi kyifen-Osówo ba-jwá kâng bantán. Basúja ba-jwo ng kámbé ba-bâ, ba-wonge kakânkakân, ekpe nyí e/mû e/wáp oshê e-fé ké kafâ e-myii. Basúja ba-kpû okpúng ashí amúmú kyíbóng-kaku ba-shwôm ba-nung ké oshê, ba-koo kámú.

²¹ Ba-zú bushwám ba-ju kángkáng banet ḿbé ba/mû ké oshê ámu, banyinchéng ne banyinyi ne bwǎsíng ne bakâa. Ba-ju to bampong ne etám-ebû ne boonyam-atû.

²² Jóshwa o/mû oo/sét banet-boǒfêp-esí ḿbé ba/mû baa/bê ányi o/fu, ca n̂g ké kyise ńkyí mú onyi-dyikpe ámu ba-da-kpî ǎ ne kyikû-banet emen ba-byí kyíjí, wǎ eringe nyí ba/mû ba/ryí ǎ ocím.

²³ Ba-dim kâng ba-da-kpî Ráhap o-byí kyíjí, nyǐ ne bonchí ne boné emen ne bwǎn-bané emen ḿbé banyinchéng ne kángkáng kyikû-banet emen. Ba-kpî kámbé kángkáng ba-da-tî kámbé kanong kanong, fáráng ne kyikit ńkyí banet-Ézerel mbe ba-kyú u.

²⁴ Ba-mee okwâ kâng ba-fé ké oshê ba-shí kámú o-firi atông átong, cibicibi ne kángkáng byěm ḿbyí byi/mû ké mǔ. Kyi*da/shwôm byěm ḿbyí ba/chi ké gûl ne syílyíba ne borôn ne áyon, ḿbyí ba/kúng ba-tî ké nfût-byěm erôo mú Óburúkpâbí nké byi/waa*.

²⁵ Jóshwa o/mîng Ráhap ne kyikû-banet emen okpó, ké nǎ, o/rôo banet-boǒfêp-esí ḿbé nyǐ o/twóm ba-ca Jéríku. Banet ḿbé ba/fím ké kyikû emen ba/tôong ké Ézerel tete kurún.

²⁶ Jóshwa o-tut banet butông ké nkéré ámu o/fu, nang yeě mú o/fu, nyǐ o-nap ng Jéríku o-bi, Óburúkpâbí oshú ǎ. Nang yeě nké o/kpet kámú ebi, wǎn emen nang orá okpú.

²⁷ Óburúkpâbí o/mû ne Jóshwa, ne dyizîn emen dyi/káng ké oshê omúmú.