Jóshwa 5 - Bokyi Bible

¹ Kángkáng batu-Ámórit ḿbé mbe ké kyicê-kace ńké Jódan, ńkyí esû nyi e-byí i, ne kángkáng batu to ḿbé Kínan, ḿbé mbe ba-kyú u ké bukô-baya ḿbé badakó Medeterényan ba/jwo ba/fu, Óburúkpâbí oo/chi Jódan o-núng tete banet-Ézerel ba-nyáng kánké. Bushî bu-róng kámbé kanong kanong.

Dyicên ńdyí ké Gyígal

² Óburúkpâbí o-sét kâng Jóshwa o/fu, chi boǒshwám ké aká a-cên banet-Ézerel.

³ Jóshwa o-chi kâng eringe Óburúkpâbí o/sét ǎ. O-cên kâng banet-Ézerel ké kyikit ńkyí ba-kú ba-kó ng Kaku-Dyicên.

^4-6 Ké nkéré mú banet-Ézerel ba/byí ké Éjip, banyinchéng-Ézerel bamúmú ba/mû baa/cên. Nké ké bajam-aje ámbe bafee ḿbé mbé ba/rí ké nkéré mú mbe ba-nyáng ng kyikim-dyikán ánkyi, nang wǎn ebe obónge mú onyinchéng o/mû o*da/cên ne*. Ne ké kyikim-nkéré ánkyi to, kángkáng banet ebe ḿbé ba/mû baa/kán mú badanwa byití, ńdyí ba/byí ké Éjip, ba/mû baa/kpú, ké nǎ, mbé ba/né ejá nyí Óburúkpâbí. Ne wǎ eringe nyí nyǐ o/mû o/ryí ocím o-sem byiko emen, nyǐ o/mû o*da/bángê o/fu, mbé bari onínǒng-esí ámu mú nyǐ o/ryí ocím o/fu, nyǐ o-kyâ banchí ebe ḿbé kpákpá*.

⁷ Bwǎn-banet ámbe ba/mû ba*da/cên ne*. Ne kyi/mû kyitông-banet ámbe nké Jóshwa o/cên kámbé.

⁸ Ké nkéré mú oo/cên kámbé ashí amúmú, mbé ba/waa ányi ké kyikit ńkyí ba/bi bampyep ebe tete acên ebe a-kpú.

⁹ Óburúkpâbí o-raa ne Jóshwa o/fu, kurún, nn/fîm běn éshwân ké bushú, nyí ba/mû básóng ké esí-Éjip. Ányi nké kyi/cen ne ba-kûkó kyikit ánkyi Gyígal, éné to nké kyi/tôong kyi-bángê e.

¹⁰ Nkéré mú banet-Ézerel mbe ba-kyú u ké kyikit ánkyi, ńkyí nkyi ké ndege-esí mú o/fárâng ne Jéríku, mbé ba/chi dyijî-kyifen ńkyí Shwôm, ké dyikurúku, ké ací diǐkpú ne achât nyí otukáku ámu.

¹¹ Ké orî-dyicí ba-byii byiryíng ḿbyí ba/kpang ké Kínan, esang-byichí nyí ba/fwá ofwáng ne berêt mú ba*da/fé bukye ḿbú odamut*.

¹² Berêt mú badakó mána o-mîng eróng ké dyicí ándyi. Banet-Ézerel ba*da/chîryí kámú*. Kyi-fím ké nkéré ámu, mbé ba/kpet eryí byiryíng ḿbyí mbe ba-kpang ng ké Kínan.

Jóshwa ne Onyinchéng mú o/níbî Kashwám

¹³ Ké nkéré mú ba/tôong ányi fáráng ne Jéríku, Jóshwa o/ri onyinchéng obónge ké kashú emen cip ne kashwám ké bubwô. Jóshwa o-dim o-kâm ǎ, o-da-bí ǎ o/fu, wo a-chi i nnwa byití eten dí, aa onet-bushwôn.

¹⁴ Nké onyinchéng ámu o/faa ǎ o/fu, me mu nyín wǎ onet-dyishí mú basúja ḿbé Óburúkpâbí. Jóshwa o-tím arông kyísí o-kye ǎ ofê. O-faa o/fu, me n-chi i ḿgbán eyên, ǎ bonchí. Wo a/fu, nchi nǎ.

¹⁵ Nyǐ o-sét ǎ o/fu, pii abe ké byiká. A/bwom éné ké esí-ociring. Jóshwa o-chi eringe o/sét ǎ.