Jóshwa 4 - Bokyi Bible

Aká nyí Dyizíím

¹ Nkéré mú banet-Ézerel kángkáng baa/nyáng kace ánke, Óburúkpâbí o/sét Jóshwa o/fu,

² cá banyinchéng ashí diǐkpú ne afee, onet obónge obónge ké kyikû-banet nang kyirá,

³ a-sét kámbé a/fu, bakúng buká bubónge bubónge ké otyém-kace ńkén, ké ochíchí-kyikit ámu mú banchi kyifen ejí ba/mû ba/bwom. Sét kámbé a/fu, bakúng aká ányi ba-ca ne nyǐ ba-da-tî kányí ké kyikit ńkyí ben ba/chi ba-rí kurún.

⁴ Jóshwa o-kó kâng banet ámbe ashí diǐkpú ne afee ḿbé nyǐ o/mû oo/cá.

⁵ O-sét kámbé o/fu, ca n̂g ké kace ánke ńké badakó Jódan. Bwóp n̂g mkpukpu-byěm-Óburúkpâbí mú Osówo enen kashú. Nang yeě ké burwám enen okúng buká bubónge o-twôom ké byikem, ké byikû-banet-Ézerel byimúmú.

⁶ Aká ńnyín a/chi a-kûzîim banet-Ézerel kyi-kim ne ńkyí Óburúkpâbí oo/chi. Ké nkéré mú mu o-bâ, â bwǎn enen ba/bí běn ba/fu, aká ńnyín a/byí nǎ,

⁷ ben ba/chi ba-sét kámbé ba/fu, kace ńké badakó Jódan ka/mîng esen nkéré mú ba/kúng mkpukpu-byěm-Óburúkpâbí ba-nyáng kánké. Aká ńnyín a/chi a-kûzîim banet-Ézerel kángkáng nkéré kyi-kim ne ńkyí kyi/chi nyín.

⁸ Banet ámbe ba-bángê ńkyí Jóshwa o/sét kámbé. Ba-kúng aká diǐkpú ne afee ké otyém-kace wǎ eringe nyí Óburúkpâbí o/sét Jóshwa, ké byikû-banet-Ézerel diǐkpú ne byifee. Ba-bâ ne nyǐ ké kyikit ńkyí ba/chi ba-rí, ba-tî kányí ányi kyísí.

⁹ Jóshwa o/sím to aká diǐkpú ne afee o-bi cip ké otyém-kace, ké kyikit ńkyí banchi kyifen-Osówo ḿbé ba/kúng mkpukpu-byěm-Osówo ba/mû ba/bwom. Nang kántîk, aká ányi a/tôong áku.

¹⁰ Banchi kyifen-Osówo ámbe ba/bwom ányi ké otyém-kace tete ba-chi kángkáng byěm ḿbyí Óburúkpâbí o/sét Jóshwa o/fu, osét banet ba-chi. Nyín něen ńkyí Músis o/mû o/sét kámbé. Banet-Ézerel ba/nyáng kace ánke ochéé óchee.

¹¹ Nkéré mú baa/nyáng kace ánke ashí amúmú, banchi kyifen-Osówo ḿbé ba/mû ba/kúng mkpukpu-byěm-Óburúkpâbí ba-bwóp kámbé kashú.

¹² Banet ḿbé ba/fím ké kyikû ńkyí Rúben ne ḿbé ba/fím ké kyikû ńkyí Gât ne kyicê-banet ḿbé ba/fím ké kyikû ńkyí Manáse, ḿbé baa/kpá byiko-byití enwa, ba-bwóp banet ḿbé áku kashú wǎ eringe nyí Músis o/mû o/sét kámbé.

¹³ Bajam-égot-banet nang bajam bafee ḿbé baa/kpá byiko ḿbyí byití enwa, ba/nyáng ba-jâ ké ndege-esí mú mu fáráng ne Jéríku, Óburúkpâbí o/mû ányi ne mbé.

¹⁴ Ńkyí Óburúkpâbí o/chi dyicí ándyi kyi/chi banet-Ézerel ba-kúng Jóshwa wǎ kiǐtí-onet. Ba-kpet ǎ ekye ofê kángkáng nkéré ké dyikpen emen, wǎ eringe nyí ba/mû ba-kyâ Músis.

¹⁵ Óburúkpâbí o-sét kâng Jóshwa o/fu,

¹⁶ osét banchi kyifen-Osówo ḿbé ba/kúng mkpukpu-byěm-Osówo ba-byí ké kace.

¹⁷ Jóshwa o-chi éné.

¹⁸ Ne ké nkéré mú mbé baa/ribi ké bukô, kace ka-kpet esen, ka-sú tete ka-ribi eringe nyí ka/mû.

¹⁹ Banet-Ézerel ba/nyáng kace ánke ké ací diǐkpú, ké mbwôp kashú-otukáku, ba-bi bampyep ebe ké oshê mú badakó Gyígal, oshê ámu mu ké kyicê-Jéríku ńkyí esû edabyí.

²⁰ Ányi nké Jóshwa o/zû aká ányi diǐkpú ne afee, nyí ba/yip ké Jódan.

²¹ O-sét banet-Ézerel o/fu, ké nkéré mú mu o-bâ, â bwǎn enen ba/bí běn ba/fu, aká ńnyín a/byí nǎ,

²² ben ba-man n esét kámbé kyi-kim ne nkéré mú banet-Ézerel ba/nyáng kace ńkén ké esí nyí jwómjwóm.

²³ Sét n̂g kámbé ba/fu, Óburúkpâbí mú Osówo enen o/chi kace ńkén ka-núng ké bubwô eten tete ké nkéré mú bii/nyáng, wǎ eringe nyí nyǐ o/chi baya ḿbé badakó Rêt ba-núng ké bubwô eten.

²⁴ Ké bubwô ḿbún, kángkáng banet ḿbé mbe ké ejíí ba/chi ba-nyît eringe nyí busa ḿbú Óburúkpâbí bu/rêe, ne ben ba/chi ba-kye ǎ ofê ne banyá ne banyá.