Jóshwa 3 - Bokyi Bible

Banet-Ézerel ba/nyáng Jódan

¹ Ké orî-dyicí, ké dyicófóróng pirípirí, Jóshwa ne kángkáng banet-Ézerel ba-jwóbê ba-fút bampyep ebe ba-dim ké Akákya, ba-ribi ké Jódan ba-chîbi bampyep mbe ba-bám m ba/fu, mbé banyáng kace ánke.

² Ńdyí ací aa/shwôm achât, banet-ashí ebe ba-cen ké kyikit ńkyí ba/mû éné,

³ ba-sét ng banet ba/fu, â ba/ri banchi kyifen-Osówo ḿbé mbe ba-kúng ng mkpukpu-byěm-Óburúkpâbí mú Osówo enen, fút n̂g bampyep ba-dim ne mbé ké kyikû.

⁴ Ben ba/mû ba*da/bê ne nyín*. Ne ké bubwô ámbu, mbé nké bada běn etông kiǐfáng ńkyí badacen. Nké *da n̂g echi ba-cen ba-fárâng mkpukpu-byěm-Osówo*. Waa n̂g kwán ké esim, ké kyilómyíta nang obónge.

⁵ Jóshwa o-sét banet-Ézerel o/fu, soo n̂g byiko enen, ké nǎ, nencí Óburúkpâbí o/chi o-chi akat o-kye běn.

⁶ O-sét kâng banchi kyifen-Osówo o/fu, bakúng mkpukpu-byěm-Osówo ba-ca ne mǔ kashú. Ba-chi kâng wǎ eringe nyǐ o/sét kámbé.

⁷ Óburúkpâbí o-raa ne Jóshwa o/fu, ńkyí me n/chi n-chi kurún kyi/chi kyi-chi banet-Ézerel ba-kpet ǒ ekye ofê wǎ kiǐtí-onet, ne mbé to ba/chi ba-kûnyît ba/fu, me mu ne wo wǎ eringe m/mû ne Músis.

⁸ Sét banchi kyifen ejí ḿbé ba/kúng mkpukpu-byěm ejí a/fu, â ba/ribi ké Jódan, mbé banung ké kafâ, ba-bwom fáráng ké bukô.

⁹ Jóshwa o-sét kâng banet o/fu, bâ n̂g kwán ba-ba-jwo ńkyí Óburúkpâbí mú Osówo enen mu o-sét ng běn.

¹⁰ O/fu, â ben ba-kú ba-câ kashú, nyǐ o-man o-ró banet ḿbé Kínan ne ḿbé Hyítat ne ḿbé Hyíbit ne ḿbé Périzit ne ḿbé Gyígashit ne ḿbé Ámórit ne ḿbé Jébus. Ben ba/chi ba-nyît ba/fu, Osówo mú mu okpó mu ne ben,

¹¹ ké nkéré mú baa/kúng mkpukpu-byěm-Óburúkpâbí mú mu Otu mú ejíí emúmú ba-kú ba-bwóp ng běn kashú ba-nyáng Jódan.

¹² Kántîk, cá n̂g banyinchéng ashí diǐkpú ne afee, onet onet ké kyikû-banet-Ézerel nang kyirá.

¹³ Ké nkéré mú banchi kyifen-Osówo ḿbé ba/kúng mkpukpu-byěm-Óburúkpâbí mú mu Otu mú ejíí emúmú ba/fé abe ebe ké kace, kace ka/chi ka-mîng esen, ne omu mú mu ké kyicê ńkyí bushûyû o/chi o-ba-cibi kyikit kyibónge.

^14-15 Ba/mû mbe ba-fuu ng byiryíng ké nkéré ámu, ne kace ka/mû kaa/sú kanong kanong. Ńdyí banet-Ézerel ba/fút bampyep ebe ba-dim ba/fu, mbé ba-da ng enyáng kace ánke, banchi kyifen-Osówo ḿbé ba/kúng mkpukpu-byěm-Osówo nké ba/bwóp kashú. Mbé ba-cím m abe ké kace ba-bâ,

¹⁶ kace ka-mîng omíng esen, ka-cibi kyikit kyibónge, tete ka-ribi oshê mú badakó Ádam, mú mu tíbítíbí ké bushûyû-kace, fáráng ne oshê mú badakó Zárétan. Kyikim ńkyí busyísen, ńkyí kyi/ribi ké baya ḿbé badakó Bukyû, kyi/núng onúng nang onyin o*da/waa*. Banet-Ézerel ba-nyáng kâng fáráng ne Jéríku.

¹⁷ Nkéré mú banet-Ézerel mbe ba-nyáng ng ba-câ ké esí nyí jwómjwóm, banchi kyifen-Osówo ḿbé ba/kúng mkpukpu-byěm-Óburúkpâbí ba/bwom ányi ké otyém-kace ké esí nyí jwómjwóm tete kángkáng banet ba-nyáng.