Jóshwa 24 - Bokyi Bible

Jóshwa o/pem ne Banet-Ézerel ké Shékem

¹ Jóshwa o-cibi kángkáng byikû-banet-Ézerel kyikit kyibónge ké Shékem. O-kó ḿbé bakínkán-banet ne ḿbé banet-ashí ne bampan bampan ne banet-ashí-basúja, ba-ba-cibi ké bushú ḿbú Osówo.

² Jóshwa o-raa ne mbé ashí amúmú o/fu, nyín něen ńkyí Óburúkpâbí mú Osówo-Ézerel mu o-bâ běn ebasét. O/fu, ké nkéré mú o/shwôm ké esim chwóó, banchí enen ḿbé kpákpá ba/mû mbe ba-kyú u ké bukô-kace ńké Yuférétyis ḿbú áku, ne mbé ba/mû mbe ba-fâ to erím-bakye, tata kyi-ba-ribi ké nkéré mú Téra mú o/fwon Ébarahâm ne Náho.

³ Ne me n-kúng kâng Ébarahâm mú bonchí enen mú kpákpá ké esí ányi n-sí ǎ o-ri esí nyí Kínan emúmú. N-chi ǎ o-firi ne byikû-banet chwóó. N-kye ǎ Ázik.

⁴ N-kye Ázik Jekôp ne Éso. N-kye Éso esí nyí Édom nyí eku éku n/fu, efiri nyí emen. Nké Jekôp ne bwǎn emen ba/dim ba-jâ Éjip.

⁵ N-twóm kâng Músis ne Éron, n-chi kyibî-busông kyi-nung banet-Éjip. Nké n/tông běn kiǐfáng ba-byí.

⁶ N-fîm banchí enen ḿbé kpákpá ba-byí ké Éjip. Banet-Éjip ba-rim ne mbé ké kyikû ne bamútu ḿbé bubyî-orá budatut ne basúja to ḿbé badanwa byití kyíbóng-bubyî-orá. Nké ké nkéré mú banchí enen ḿbé kpákpá ba/ribi ké baya ḿbé badakó Rêt,

⁷ mbé ba/tii ba-kó mě ba/fu, nchwáp kámbé. Me n/tî ófíbí ké otyém ne otyém mú enen ne banet-Éjip. N-chi baya ámbe ba-cít banet-Éjip ba-tánê ké mbé. Ben bamu ba-nyît ng ńkyí n/chi banet-Éjip. Ben ba/rí ké kyikim-dyikán ké bujê-aje.

⁸ Ne n-chi běn kâng ba-nung ké esí-banet-Ámórit ḿbé mbe ba-kyú u ké kyicê-kace ńké Jódan ńkyí esû edabyí. Mbé ba/nwa ne ben, nké me n/chi běn ba-kpógê kámbé. Ben ba/koo esí ebe, ne n/ju kámbé ńdyí bamu ba-cen n ba-bâ.

⁹ Otu-Mówep kâng mú odabángê Otu Bálek, mú wǎn-Zípo o-kye běn bunwa. O-twóm ejá ba-sét Bálim mú wǎn-Bwô o/fu, mú mǔ ofé kyibî-nshwam o-kye běn.

¹⁰ Nké me n*da/tî atông ké ńkyí Bálim o/raa* ne ké bubwô ámbu, nyǐ o/jware běn, ne ké bukwóp ámbu nké me n/cen ne n-nyii běn ké abwô nyí Otu Bálek.

¹¹ Ben ba/nyáng Jódan ba-bâ Jéríku. Banet-Jéríku ba-nwa ne ben wǎ eringe nyí ḿbé Ámórit ne ḿbé Périzit ne ḿbé Kínan ne ḿbé Hyítat ne ḿbé Gyígashit ne ḿbé Hyíbit ne ḿbé Jébus ba/nwa ne ben. Nké me n/chi běn ba-kpógê kámbé ashí amúmú.

¹² Ńdyí bamu ba-cen n ba-bâ kashú, n/chi kámbé ba-pwôo byiryibyiryi eringe nyí ndaró batu-Ámórit ḿbé ashí afee ba-chêe. Bushwám enen ne búre enen byi*da/chi chwǒm*.

¹³ Me n/kye běn esí nyí ben ba*da/kpang kyifát ké nyǐ* ne eshê nyí ben ba*da/bi*. Kántîk, ben ba-kú ba-kyú u ké nyǐ ba-ryí i to byirim-byichí ḿbyí ben ba*da/kwón*.

¹⁴ Jóshwa o-chîraa o-ca kashú, o/fu, kántîk kâng, shî n̂g Óburúkpâbí, ba-kye ǎ ofê ne dyityém enen kángkáng kerededet. Pwó n̂g erím-bakye ányi nyí banchí enen ḿbé kpákpá ba/mû ba-kyâ kányí ofê ké Mesopotémya ne ké Éjip, ba-kûfé Óburúkpâbí nké nke.

¹⁵ Â ben ba*fí ba-bángê e ba/fu, ba-kyâ ǎ nyǐ ofê* sét n̂g kurún Osówo mú ben ba/chi ba-kû ǎ efé, nang erím-bakye ányi nyí banchí enen ḿbé kpákpá ba/mû ba-kyâ kányí ofê ké Mesopotémya, nang nyí banet-Ámórit, ké esí nyí ben ba-kú ba-kyú u kántîk. Ké kakim ńké ejí ne kyikû-banet ejí, be byi-fâ Óburúkpâbí.

¹⁶ Banet-Ézerel ba-faa ǎ ba/fu, be bii*ba/chi byi-mîng Óburúkpâbí ne banyá* byi-kûfé esówo ekíri*.

¹⁷ Óburúkpâbí mú Osówo eten nké o/fîm banchí eten ne be bayén byi-byí ké búsóng ké Éjip, ne be byi/ri akat nyí nyǐ o/chi. Nyǐ o*da/bángê chwǒm byi-chi bě* ké kyikit nang kyirá ńkyí byi/cen ké kángkáng eshê nyí be byi/shwôm ké nyǐ.

¹⁸ Nkéré mú be byi/mû byi-cen n byi-bâ kashú ké esí ńnyín, Óburúkpâbí o/ró kángkáng banet-Ámórit ḿbé ba/mû ba-kyú u nyín. Ké bubwô ámbu kâng, be to byi-man byi-kye Óburúkpâbí ofê. Nyǐ o-chi i Osówo eten.

¹⁹ Jóshwa o-faa kámbé o/fu, nké kyikíri ben baa*ba/chi ba-man ekye Óburúkpâbí ofê*. Nyǐ o-chi i Osówo mú onong, ne oo*ba/chi o-pwoo běn ké byibî enen*. Nyǐ oo*bángê ne bujinjang ekan*

²⁰ ne â ben ba/mîng ǎ ba-kpet erím-bakye efé, nyǐ o/chi o-bírî bunwa ne ben o-kye běn busông. O/chi o-ju běn, nang ké nyǐ o/mû o/cángê dyityém ne ben éné kpákpá.

²¹ Mbé ba-faa Jóshwa ba/fu, aa*wááng*. Be byi-kyâ Óburúkpâbí ofê.

²² Jóshwa o-faa kámbé o/fu, ben ba/bwom bantûesé ḿbé byiko enen ké ntûntû mú ben baa/cá éné ba/fu, ben ba-fâ Óburúkpâbí. Mbé ba-faa ǎ ba/fu, âa, nkyi éné. Be byi-chi i bantûesé.

²³ Jóshwa o-sét kámbé o/fu, ké bubwô ámbu kâng, pwó n̂g erím-bakye ányi nyí bamu ne nyǐ, ba-ryí ocím ké bushú ḿbú Óburúkpâbí mú mu Osówo mú Ézerel.

²⁴ Banet-Ézerel ba-faa Jóshwa kâng ba/fu, be byi-fâ Óburúkpâbí mú mu Osówo eten. Be byi-chi i ńkyí nyǐ oda bě esét.

²⁵ Jóshwa [o-chi kâng banet-Ézerel ba-ryí] ocím ba-sem Osówo dyicí ándyi, o-waa ányi ké Shékem o-kye kámbé byije ḿbyí mbé badakûtî.

²⁶ Jóshwa o/sáng byije ámbyi ké Nwet-Byije-Osówo. O-yip kâng kiimbâng-buká o-bi ké kyikû-kyichí ńkyí badakó ôok, ké mpyep-kyifen-Óburúkpâbí echi.

²⁷ O-raa ne mbé ashí amúmú o/fu, buká ḿbún bu/chi bu-kyú wǎ ntûesé eten. Mbú boo/jwo kángkáng byěm ḿbyí Óburúkpâbí o/raa ne be. Ké bubwô ámbu, mbú bu/chi bu-bwom ntûesé ne ben, eringe nyí boo*bángê běn ba-bírî bunwa ne Osówo enen*.

²⁸ Jóshwa o-fu kâng kámbé ba-bwa esim. Ne nang yeě nang yeě o/bwa esim ké esí nyí emen.

Jóshwa ne Elyǎza ba/kpú

²⁹ Nkéré mú ńkyí ánkyi kii/shwôm, Jóshwa mú ḿgbán-Óburúkpâbí, mú wǎn-Nûn o-kpú, ányi oo/rí bajam-aje batánge esim-aje diǐkpú.

³⁰ Ba-ryii ǎ ké esí nyí emen, ké Tyímanat-Séra, ké esí nyí Éferem nyí eku éku, ké kyicê-bushûyû-kaku ńké badakó Gáshi.

³¹ Nkéré mú Jóshwa o/mû o/tôong okpó, banet-Ézerel ba/kye Óburúkpâbí ofê. Ne ké nkéré mú nyǐ oo/kpú, mbé ba/wâa mbe ba-chi i éné ba-câ kashú, ńdyí banet-ashí ebe ámbe ba/tôong bakpó, ḿbé ba/kúng achi ebe ba-ri kángkáng byěm ḿbyí Óburúkpâbí oo/chi o-kye banet-Ézerel.

³² Kyikwóm-enyam-byiko-Josêf ńkyí banet-Ézerel ba/kúng ké Éjip ba-dim ne nkyí, mbé ba/ryii kánkyí ányi to ké Shékem, ké kyikit-esí ńkyí Jekôp o/mû o/ré ne bwǎn-Hámo mú o/mû bonchí mú Shékem, ké bajam-byikim-syílyíba batánge. Esí ányi banet ḿbé ba/fím ké kyikû ńkyí Josêf nké ba/ryí bukyû ké nyǐ.

³³ Elyǎza mú wǎn-Éron o-kpú. Ba-ryii ǎ ké Gyíbya. Oshê mún mu ké esí nyí Éferem nyí eku éku, nyí ba/mû ba/yip kányí ba-kye wǎn emen mú odabángê Fyinéhas.