Jóshwa 23 - Bokyi Bible

Jóshwa o/sét Banet-Ézerel o/fu, bakyú Kanong

¹ Ké nkéré mú ńkyín kii/shwôm, ka-rí chwóó, Óburúkpâbí o/fîm banet-Ézerel bushî ké byiko ké abwô nyí banet-bushwôn ebe ḿbé ba/mû ányi fáráng ne mbé. Ké nkéré ámu, Jóshwa o/mû oo/kâa kanong kanong.

² O-kó kâng banet-Ézerel ashí amúmú cibicibi ne bakínkán-banet ebe ne banet-ashí ebe ne bampan bampan ebe ne banet-ashí-basúja ebe, o-raa ne mbé o/fu, me nn/kâa kanong kanong.

³ Ben baa/ri kángkáng byěm ḿbyí Óburúkpâbí mú Osówo enen oo/chi eshê ńnyín kángkáng, ké bubwô enen. Óburúkpâbí mú Osówo enen mu o-nwa ng bunwa o-kyâ běn kángkáng nkéré.

⁴ Me nn/kúng esí-eshê nyí e/waa n-kye byikû-byikim-banet enen n/fu, efiri nyí ebe, cibicibi ne kángkáng eshê nyí me mm/kpógê kámbé, kyi-fím ké kace ńké Jódan ké kyicê ńkyí esû edabyí tete kyi-ribi ké baya ḿbé Medeterényan, ḿbé mbe ké kyicê ńkyí esû edaríbî e-jâ.

⁵ Óburúkpâbí mú Osówo enen o/chi o-chi kámbé ba-kûbwa kyikû esim ésim ké bushú enen, ne nyǐ o/chi o-ró kámbé ba-chêe, â ben ba-kú ba-câ. Ben ba/chi ba-koo esí ebe wǎ eringe nyí Óburúkpâbí mú Osówo enen oo/ryí běn ocím.

⁶ Ké bubwô ámbu kâng, ben kû n̂g ebám byiko ba-kû ǎ ejwo ba-chi to nang ebóng chwǒm ńkyí ba/sáng ké Nwet-Byije-Músis. *Da n̂g echi ba-né kyikit-nwet ámu nang kyibónge*

⁷ eringe nyí baa*bé barî ne banet ḿbén ḿbé ba/waa ne ben* ba-raa to nang oraa kyi-kim ne erím-bakye ebe* ba-kúng nang erím-bakye ebe ányi ba-sem chwǒm* ba-kye nang erím-bakye ányi ofê* ba-tím nang arông kyísí ba-kye kányí*.

⁸ Nké fé n̂g dyityém ne Óburúkpâbí wǎ eringe baa/fé tete kyi-ribi dyicí ńdyí kurún.

⁹ Óburúkpâbí oo/ró biǐtí-eshê ḿbyí mbyi ne busa byi-chêe eringe nyí ben bamu ba-bâ, ne nang onet obónge o*fí mú oo/man ebwom ne ben*.

¹⁰ Onet enen nang orá o-man n echi égot-banet etánge ba-chêe, ké nǎ, Óburúkpâbí mú Osówo enen mu o-nwa ng o-kyâ běn wǎ eringe nyí nyǐ o/ryí ocím.

¹¹ Bám m̂ byiko enen kâng, eringe nyí badatông Óburúkpâbí mú Osówo enen kyijé.

¹² Â ben ba/né ǎ, ba-cibi ne eshê nyí e/waa ne ben, ba-kûbé barî,

¹³ ben ba/chi ba-ri ké ntûntû ba/fu, Óburúkpâbí mú Osówo enen oo*ba/chi o-chîró eshê ńnyín ba-chêe* â ben ba-kú ba-bâ*. Nké mbé ba/chi ba-bwom běn chwǒm-bukyû wǎ kaǎtám ne wǎ dyibíng ne wǎ kachí ńké bada běn emín ké esim nang wǎ byiwong ḿbyí bada běn etím ké achi. Ne ńkyí ánkyi kyi-waa ng éné tete ba-kpú ba-man ké kiǐnínǒng-esí ńkyín, ńkyí Óburúkpâbí mú Osówo enen oo/kye běn.

¹⁴ Kántîk, nkéré mú ejí oo/fyi, mú ndadim dyijê. Ben kángkáng bamu ba-nyît ng ké atyém enen ba/fu, Óburúkpâbí mú Osówo enen oo/kye běn kángkáng byěm ḿbyí byinong byinong ḿbyí nyǐ o/ryí ocím. Nyǐ oo/tî kángkáng ocím mú nyǐ o/mû o/ryí, nang obónge o*da/waa*.

¹⁵ Nké wǎ eringe nyí nyǐ o/tî kángkáng ocím mú nyǐ o/mû o/ryí běn éné, ké bubwô ámbu to kâng, nyǐ o/chi o-kúng to kángkáng busa-dyityém emen.

¹⁶ Â ben ba*da/tî ocím mú Óburúkpâbí mú Osówo enen o/fu, ben batî* ne â ben to ba-kú ba-chi i bǎmkpóngé ba-kyâ erím-bakye, ba-kye to kányí nang ofê, ké kafâ emen esa, nyǐ o/chi o-kye běn kâng busông, ne kaa*ba/chi ka-bwon* ne ben ashí amúmú ba-man ké kiǐnínǒng-esí ńkyín ńkyí nyǐ oo/kye běn*.