Jóshwa 22 - Bokyi Bible

Jóshwa o/twóm Byikû-Banet-Ézerel ḿbé Kyicê ńkyí Esû edabyí ba-bwa Esim Dyijê

¹ Jóshwa o-kó kâng banet ḿbé ba/fím ké kyikû ńkyí Rúben ne ḿbé ba/fím ké kyikû ńkyí Gât ne ḿbé ba/fím ké kyikû ńkyí Manáse, ḿbé mbe ba-kyú u ké kyicê-Jódan ńkyí esû edabyí, ba-ba-cibi kyikit kyibónge.

² O-raa ne mbé o/fu, ben baa/chi kángkáng byěm ḿbyí Músis mú ḿgbán-Óburúkpâbí o/sét běn o/fu, bachi, ne ben baa/chi to kángkáng byěm ḿbyí me n/sét běn.

³ Tata kurún, ben ba*da/chêe ne ba-mîng barî-banet-Ézerel nang kabónge*. Ben baa/bám byiko enen eringe nyí badachi ńkyí Óburúkpâbí mú Osówo enen o/sét běn.

⁴ Kántîk kâng, wǎ eringe nyí Óburúkpâbí mú Osówo enen o/mû o/ryí ocím, nyǐ oo/kye barî-banet-Ézerel enen bunyîn-dyityém. Bwa n̂g dyijê kâng ba-jâ ké esí nyí ben ba/koo e-firi nyí enen, esí nyí nyi ké Jódan, ké kyicê ńkyí esû edabyí, nyí Músis mú ḿgbán-Óburúkpâbí o/kye běn.

⁵ Kû n̂g etî Byije ḿbyí Músis o/kye běn o/fu, tî n̂g. Óburúkpâbí mú Osówo enen ojê běn, ba-chi ńkyí nyǐ mu o-ryuu ng, ba-tî byije emen, ba-fé dyityém ne nyǐ, ba-kûchi bǎmkpóngé ba-kyâ ǎ ne dyityém enen kángkáng.

^6-8 Jóshwa o-twóm kámbé ba-bwa dyijê ne ojware mú o/jware kámbé. O-raa ne mbé o/fu, ben ba-kú ba-bwa ng dyijê ne efang nyí baa/fang kanong kanong, ne bujê-byitú ne syílyíba ne gûl ne borôn ne áyon ne byídí to chwóó. Kyii n̂g byěm ḿbyí ba/koo ne banet-bushwôn enen ba-kye barî-banet enen. Mbé ba-dim kâng dyijê. Músis o/mû oo/yip esí nyí ké kyicê-Jódan ńkyí esû edabyí o-kye kyicê-banet ḿbé ba/fím ké kyikû ńkyí Manáse, nké kyicê-banet ebe ńkyí áku, Jóshwa o/mû oo/kye kámbé esí nyí ké kyicê-Jódan ńkyí esû edaríbî e-jâ, cibicibi ányi ne byikû-banet-Ézerel ḿbyí áku.

⁹ Banet ámbe kâng ba-bwa esim dyijê. Ba-mîng banet-Ézerel ḿbé áku ké Shílo, ké esí nyí Kínan, ba-kpet ebwa esim dyijê ké esí nyí ebe, esí nyí Gyílet, nyí mbé baa/koo wǎ eringe nyí Óburúkpâbí o/sét kámbé ké ocím mú Músis.

Kyikit-Kyifen-Osówo echi ńkyí ba/bi ké Bukô-Jódan

¹⁰ Nkéré mú banet ámbe ba/ribi ké Gélilot, [ányi ba/tôong ké kyicê-Jódan ńkyí esû edaríbî e-jâ,] mbé ba/bi kiimbâng-kyikit-kyifen-Osówo echi ányi fáráng ne kace ánke.

¹¹ Banet-Ézerel ḿbé áku ba/jwo ba/fu, be Rúben baa/bi kyikit-kyifen-Osówo echi ké Gélilot, ké bukô-Jódan ḿbú eten.

¹² Ńdyí banet-Ézerel ámbe ba/jwo ńkyín, mbé ashí amúmú ba/dim ba-ba-cibi ké Shílo eringe nyí badadanwa byití ne byikû-banet-Ézerel ḿbé mbe ba-kyú u ké kyicê ńkyí esû edabyí.

¹³ Mbé ba-twóm kâng Fyinéhas mú wǎn-Elyǎza, mú nchi kyifen-Osówo ba/fu, oca ké esí nyí Gyílet o-da-ri be Rúben.

¹⁴ Banet-ashí ashí diǐkpú ne afee ba-dim ne Fyinéhas ké kyikû, onet obónge obónge ké byikû-banet-Ézerel ḿbé mbe ba-kyú u ké kyicê ńkyí esû edaríbî e-jâ, ne mbé to ba/mû banet-ashí ké byikû-abóng-byikim-banet-Ézerel.

¹⁵ Ba-da-ribi ké esí nyí Gyílet ba-kâm banet-Rúben ne ḿbé Gât ne ḿbé Manáse,

¹⁶ ba-kpet eraa ne mbé ké dyishí ńdyí kángkáng banet-Óburúkpâbí ba/fu, ebóng kyi/chi ne ben ba-chi kyibî-chwǒm ńkyín ba-bât Osówo-Ézerel. Ben baa/bírî bunwa ne Óburúkpâbí ké obi mú ba/bi kyikit-kyifen-Osówo echi ńkyín ba-kye byiko enen. Ben ba*fí to ba-cen n ne nyǐ ké kyikû*.

¹⁷ Zîim m̂ kyibî eten ńkyí byi/chi ké Pôo, nkéré mú Óburúkpâbí o/kye banet ḿbé emen busông ké kyibî-kyirwóm. Be byi/tôong byi-ri ng busông ké bubwô-kyibî ánkyi. Kyibî ánkyi kyi*da/kwárê dí*.

¹⁸ Ben bamu ba-bâ ebané ecen ne nyǐ ké kyikû kántîk dí. Â ben ba/bírî bunwa ne Óburúkpâbí kurún, nyǐ dyityém dyi/chi dyi-sa ǎ ne nang yeě nang yeě mú mu ké Ézerel nencí.

¹⁹ Kántîk kâng, â esí enen e*da/kwárê nyí ben badakûkye Osówo ofê ányi* bâ n̂g kwán ké esí nyí Óburúkpâbí, ké kyikit ńkyí mpyep-kyifen emen echi mu kô. Ba-man n ekoo kyicê-esí nyí eten e-firi nyí enen. Nké *da n̂g ebírî bunwa ne Óburúkpâbí* ba-chi bě to nang ochi byi-bírî bunwa ne nyǐ* ké obi mú badabi kyikit-kyifen-Osówo echi kyikíri ba-cibi ne ńkyí Óburúkpâbí mú Osówo eten*.

²⁰ Zîim m̂ eringe Ákan mú wǎn-Zéra o/né echi ńkyí Óburúkpâbí o/sét kyi-kim ne byěm ḿbyí nyǐ o/fu, babên kámbyí. Banet-Ézerel bamúmú ba/ri busông ké bubwô-chwǒm ánkyi. *Chí Ákan nké nke nké o/kpú ké bubwô-kyibî emen*.

²¹ Banet-Rúben ba-faa banet-ashí-byikû-banet-Ézerel ḿbé ba/bê éné, ba/fu,

²² nyǐ mú o/rêe o-shwôm o-chi i Osówo Óburúkpâbí. Nyǐ mu o-nyît ng ńkyí kyi/chi ne be byi-chi ńkyín, ne be byimu byi-ryuu ng byi/fu, ben to nyît n̂g. Â be byi/bírî bunwa ne Óburúkpâbí, ne byi*da/chîfé dyityém ne nyǐ* *da n̂g bě echîbángê byi-kpen byi-ca kashú*.

²³ Â be byi/né echi ńkyí Óburúkpâbí o/sét bě, byi-bi kyikit-kyifen emen echi byi-kye byiko eten eringe nyí byidakûchi byifen ḿbyí byěm eshí ányi, byi-tî to kánkyí wǎ nang kyikit-kyifen echi ńkyí esang-byichí nang wǎ kyikit-kyifen echi ńkyí kyikwáré, Óburúkpâbí oyén okye bě busông.

²⁴ Aa*wááng* o. Be byi/chi éné, ké nǎ, be byimu ne bushî byi/fu, ké nkéré mú mu o-bâ, banet ḿbé ba/fím ké kyikû enen ba/chi ba-kpet eraa ne ḿbé ba/fím ké kyikû eten ba/fu, ben ba/já ebóng kyiraa kyi-kim ne Óburúkpâbí mú Osówo-Ézerel.

²⁵ Nyǐ o/tî kace ńké Jódan wǎ buti ḿbú eten ne ben. Ben ba*da/já kyiraa ne nyǐ*. Kyi-fím ányi kâng, banet ḿbé ba/fím ké kyikû enen ba/chi ba-chi banet ḿbé ba/fím ké kyikû eten ba-mîng Óburúkpâbí ofê ekye.

²⁶ Ké bubwô ámbu kâng nké be byi/bi kyikit-kyifen-Osówo echi byi-tî, *chí něen ǎ byi-kû ng echi byifen ányi ḿbyí byěm eshí* nang ḿbyí eyáré ekye*.

²⁷ Nké byi/tî kánkyí wǎ ekap nyí banet eten ne ḿbé enen ne nyí byitông-banet ḿbé mbe ba-bâ eringe nyí badanyît ba/fu, ké ntûntû, be byi/fé Óburúkpâbí ké bushú-mpyep-kyifen emen echi ne eyáré eten ekye byi/fu, bashí, ne byifen to echi, ne eyáré ekye to nyí kyikwáré. Ńkyín kyi-man n echi banet ḿbé ba/fím ké kyikû enen baa*man to esét ḿbé ba/fím ké kyikû eten ba/fu, mbé ba*da/já kyiraa ne Óburúkpâbí*.

²⁸ Be byi/tî okabe něen byi/fu, â nang kyi/chi éné, banet ḿbé ba/fím ké kyikû eten ba-man n esét ba/fu, kan n̂ achi ba-ri, banchí eten ḿbé kpákpá ba/bi kyikit-kyifen-Osówo echi ńkyín wǎ eringe nyí ńkyí Óburúkpâbí. Mbé ba*da/bi kánkyí ba/fu, kyikyú ńkyí badakûshí eyáré* nang ńkyí byifen echi* nké ba/bi kánkyí wǎ ekap nyí banet eten ne ḿbé enen.

²⁹ Be bii*ba/chi byi-bírî bunwa ne banyá ne Óburúkpâbí* byi-mîng nang omîng ecen ne nyǐ ké kyikû kántîk* ké obi mú byidabi kyikit-kyifen emen echi* ńkyí byidakûshí eyáré ké nkyí* nang ńkyí esang-byichí-eyáré ekye nang byifen echi*. Be bii*ba/chi byi-bi kyikit-kyifen-Osówo echi kyikíri* kyi-cibi ne ńkyí Óburúkpâbí mú Osówo eten* ńkyí nkyi kyi-bwom m ké bushú-mpyep-kyifen emen echi*.

³⁰ Fyinéhas mú nchi kyifen-Osówo ne banet-ashí-oshê-Ézerel ámbe ashí diǐkpú ḿbé ba/mû ne nyǐ ké kyikû ba/jwo ńkyí banet ḿbé ba/fím ké byikû-banet ḿbyí Rúben ne Gât ne banet-Manáse ba/faa, ba-waa ányi ba-zût.

³¹ Fyinéhas o-raa ne mbé o/fu, kántîk, bii/nyît byi/fu, Óburúkpâbí mu ne be. Ben ba*da/bírî bunwa ne nyǐ*. Ne ké bubwô ámbu, ben baa/nyii banet-Ézerel ké busông ḿbú Óburúkpâbí.

³² Fyinéhas ne banet-ashí ámbe ba-dim kâng ba-mîng banet-Rúben ké esí nyí Gyílet, ba-bwa esim ké Kínan ba-kâm banet-Ézerel, ba-sét kámbé ńkyí ba/sét kámbé.

³³ Banet-Ézerel ba-zût, ba-kpet ekpee Osówo. Mbé ba*da/chîraa kyi-kim ne byití edanwa eringe nyí badabên esí nyí be Rúben mbe ba-kyú u*.

³⁴ Banet-Rúben ba-raa ba/fu, kyikit-kyifen-Osówo echi ńkyín kyi/bwom wǎ ntûesé mú eten ashí amúmú, kyi/fu, Óburúkpâbí o-chi i Osówo. Ba-waa kâng ányi ba-fé kánkyí dyizîn, Ntûesé.