Jóshwa 21 - Bokyi Bible

Eshê nyí ba/kye Kyikû-Banet-Lyíva

¹ Banet-ashí ḿbé byikû-abóng-Lyíva ba/dim ba-kâm Elyǎza mú nchi kyifen-Osówo ne Jóshwa mú wǎn-Nûn ne banet-ashí ḿbé kángkáng byikû-banet-Ézerel,

² ké oshê mú badakó Shílo, mú mu ké esí nyí Kínan. Ba-raa ne mbé ba/fu, Óburúkpâbí o/kye busa ké ocím mú Músis o/fu, ben kye n̂g bě eshê nyí byidakûkyú ké nyǐ, ba-kye bě to esí nyí byitú eten byidakûryí baryî ké nyǐ, fáráng ne eshê ányi.

³ Ké bubwô ḿbú ńkyí Óburúkpâbí o/raa éné kâng, banet-Ézerel ba/kye banet-Lyíva eshê ne esí nyí byitú ebe byidakûryí baryî ké nyǐ, ké esí ebe mbé bayén nyí ba/mû ba/kyii ba-kye kámbé.

⁴ Byikû-dyibóng-Lyíva ḿbyí kyikû-banet-onyinchéng obónge mú odabángê Kóhat nké ba/bwóp kashú ba-kye kámbé eshê. Banet ḿbé ba/fím ké kyikû ńkyí Éron mú nchi kyifen-Osówo, ba/kye kámbé eshê diǐkpú ne echât, ké esí nyí Júda ne Syímyon ne Běnjámin.

⁵ Banet ḿbé kwán ḿbé ba/waa, ḿbé ba/fím ké kyikû ńkyí Kóhat, ba/kye kámbé eshê diǐkpú ké esí nyí Éferem ne Dǎn ne ké esí nyí banet-Manáse ḿbé mbe ké kyicê ńkyí esû edaríbî e-jâ.

⁶ Banet ḿbé ba/fím ké kyikû ńkyí Géshon, ba/kye kámbé to eshê diǐkpú ne echât, ké esí nyí Ézaka ne Ásha ne Nafatályi ne ké esí nyí banet-Manáse ḿbé mbe ké kyicê ńkyí esû nyi e-byí i.

⁷ Banet ḿbé ba/fím ké kyikû ńkyí Merári, ba/kye kámbé eshê diǐkpú ne efee, ké esí nyí Rúben ne Gât ne Zébélon.

⁸ Ké bukwóp ḿbú ámám etwóp nké banet-Ézerel ba/kúng ne ba-kyii eshê ńnyín ne esí nyí byitú byidaryí baryî ba-kye banet-Lyíva, wǎ eringe nyí Óburúkpâbí o/sét ké ocím mú Músis.

⁹ Nyín něen azîn-eshê nyí e/fím ké esí nyí Júda ne Syímyon nyí ba/kyii ba-kye

¹⁰ banet ḿbé ba/fím ké kyikû-Éron mú o/mû o/fím ké kyikim-banet ḿbé Kóhat, ḿbé ba/mû ba/fím ké kyikû ńkyí Lyíva. Mbé nké ba/mû bambwôp kashú-banet ḿbé ba/kyii esí ba-kye kámbé.

¹¹ Ba/kye kámbé oshê mú Ába, Ába o/mû bonchí mú Ának, oshê ámu kántîk ba-kú ba-kó ng kámú Héboron, mǔ mu ké esí nyí Júda nyí eku éku, cibicibi ne byikit ḿbyí byitú byidaryí baryî, ḿbyí byi/wáp kámú byi-fé ké kafâ.

¹² Nké nang ké nkyi éné, akán-byifát nyí a/mû ké oshê ámu, cibicibi ne boǒshê emen, ba/mû baa/kyii kámbyí ba-kye Kálep mú wǎn-Jéfúne ba/fu, byifiri ḿbyí emen.

¹³ Eshê ńnyín to, cibicibi ne Héboron, mú o/mû to oshê-dyirem, eshê ńnyín to ba/mû ba/kyii kányí ba-kye banet ḿbé ba/fím ké kyikû ńkyí Éron mú o/mû nchi kyifen-Osówo. Eshê ányi ba-kó ng kányí Lyíbana

¹⁴ ne Játyi ne Eshitémwa

¹⁵ ne Hólon ne Dyíbyi

¹⁶ ne Âan ne Júta ne Bét-Shémes, cibicibi ne byikit-baryî-byitú ebe. Eshê kátángekányi nyí e/fím ké esí nyí Júda ne Syímyon.

¹⁷ Ké esí nyí Běnjámin, ba/kye kámbé eshê enyii, Gyíbwon ne Géba

¹⁸ ne Anátot ne Ámon, cibicibi ne byikit-baryî-byitú ebe.

¹⁹ Eshê ányi diǐkpú ne echât kángkáng kangkang, cibicibi ne byikit-baryî-byitú ebe, ba/kyii kámbyí ba-kye banchi kyifen-Osówo ḿbé ba/fím ké kyikû-Éron.

²⁰ Byikû-abóng-Lyíva ḿbyí byi/waa, ḿbé ba/fím ké kyikim-banet ńkyí Kóhat, ba/kye kámbé eshê ekíri nyí e/mû ké esí nyí Éferem.

²¹ Ba/kye kámbé eshê enyii. Obónge ba-kó ng kámú Shékem, cibicibi ne byikit-baryî-byitú emen. Mǔ o/mû ké esí nyí Éferem nyí eku éku. Mǔ to o/mû oshê-dyirem. Ba/kye kámbé to Géze

²² ne Kyibizam ne Bét-Hóron, cibicibi ne byikit-baryî-byitú ebe.

²³ Ké esí nyí Dǎn, ba/kye kámbé eshê enyii. Eshê ányi ba-kó ng kányí Etéke ne Gyíbeton

²⁴ ne Ájalon ne Gât-Ryímon, cibicibi to ne byikit-baryî-byitú ebe.

²⁵ Ké esí nyí banet-Manáse, ḿbé mbe ba-kyú u ké kyicê ńkyí esû edaríbî e-jâ, ba/kye kámbé eshê efee, Tának ne Gât-Ryímon, cibicibi ne byikit-baryî-byitú ebe.

²⁶ Banet ḿbén, ḿbé ba/fím ké byikû-abóng ḿbyí kyikim-banet ḿbé ba/fím ké kyikû-Kóhat, ba/kye kámbé eshê diǐkpú, cibicibi ne byikit-baryî-byitú ḿbyí byi/mû ké eshê ányi.

²⁷ Kyikim-banet-Lyíva kyikíri ḿbé ba/fím ké kyikim-kyikû-banet ńkyí Géshon, ba/kye kámbé eshê efee nyí e/mû ké esí-banet-Manáse ḿbé ba/mû ba-kyú u ké kyicê ńkyí esû edabyí. Obónge ba-kó ng kámú Gólan, mǔ o/mû ké esí nyí Báshan. Gólan o/mû to oshê-dyirem. Ba-kye to kámbé oshê-Byishítara, cibicibi ne byikit-baryî-byitú ḿbyí byi/mû ké eshê ányi.

²⁸ Ké esí nyí Ézaka, ba/kyii eshê enyii ba-kye kámbé. Eshê ányi ba-kó ng kányí Kyíshwon ne Dábarat

²⁹ ne Jámut ne Ngánim, cibicibi ne byikit-baryî-byitú ḿbyí byi/mû ké eshê ányi.

³⁰ Ké esí nyí Ásha, ba/kyii eshê enyii ba-kye kámbé. Eshê ányi ba-kó ng kányí Myíshal ne Ábodon

³¹ ne Hékat ne Réhop, cibicibi ne byikit-baryî-byitú ḿbyí byi/mû ké eshê ányi.

³² Ké esí nyí Nafatályi, ba/kyii eshê echât to ba-kye kámbé. Kédeshi mú mu ké Gályílyi, cibicibi ne byikit-baryî-byitú ḿbyí byi/mû ké mǔ. Kédeshi o/mû to oshê-dyirem. Ba-kye to kámbé Hámot-Dôo ne Kátan, cibicibi to ne byikit-baryî-byitú ḿbyí byi/mû ké eshê ányi.

³³ Byikû-abóng-banet ḿbé ba/fím ké kyikim-banet-Géshon, ba/kye kámbé eshê jangjang diǐkpú ne echât, cibicibi ne byikit-baryî-byitú ḿbyí byi/mû ké eshê ányi.

³⁴ Byikû-banet-Lyíva ḿbé ba/waa, ḿbé ba/fím ké kyikim-banet ńkyí Merári, ba/kye kámbé eshê enyii nyí e/mû ké esí nyí Zébélon. Eshê ányi ba-kó ng kányí Jokanyâm ne Káta

³⁵ ne Dyímana ne Nahálal, cibicibi ne byikit-baryî-byitú ḿbyí byi/mû ké eshê ányi.

³⁶ Ké esí nyí Rúben, ba/kye kámbé eshê enyii. Eshê ányi ba-kó ng kányí Béze ne Jáhaz

³⁷ ne Kédémot ne Méfat, cibicibi ne byikit-baryî-byitú ḿbyí byi/mû ké eshê ányi.

³⁸ Ké esí nyí kyikû-banet ńkyí Gât, ba/kye kámbé eshê enyii. Obónge ba-kó ng kámú Rímot, mú mu ké esí nyí Gyílet, cibicibi ne byikit-baryî-byitú ḿbyí byi/mû ké oshê ámu. Rímot o/mû to oshê-dyirem. Ba-kye to kámbé Mahánam

³⁹ ne Héshibon ne Jáze, cibicibi ne byikit-baryî-byitú ḿbyí byi/mû ké eshê ányi.

⁴⁰ Ké bubwô ámbu kâng, banet ḿbé ba/fím ké kyikim-banet ńkyí Merári, ba/kye kámbé eshê diǐkpú ne efee kángkáng kangkang.

^41-42 Ké esí ányi nyí e/já banet-Ézerel, ba/kye kyikû-banet ńkyí Lyíva bajam-eshê bafee, cibicibi ne byikit ḿbyí byitú byidaryí baryî.

Ézerel ba/koo Esí ányi ba-kyú

⁴³ Óburúkpâbí o/kye kâng banet-Ézerel kángkáng esí ányi nyí nyǐ o/mû oo/ryí banchí-banet-Ézerel ḿbé kpákpá ocím o-sem byiko emen o/fu, nyǐ o-kyâ kámbé. Ké nkéré mú mbé baa/koo kányí, mbé ba/kpet ekyú ányi.

⁴⁴ Óburúkpâbí o-kye kámbé bunyîn-dyityém ké esí ányi emúmú, wǎ eringe nyí nyǐ o/mû o/ryí banchí ebe ḿbé kpákpá ocím. Onet-bushwôn ebe nang obónge o*fí* mú oo/man ebwom ne mbé* ké nǎ, Óburúkpâbí o/kye busa o/fu, banet-Ézerel bakpógê banet-bushwôn ebe bamúmú.

⁴⁵ Óburúkpâbí o/tî ocím emen nang orá mú nyǐ o/ryí banet-Ézerel.