Jóshwa 20 - Bokyi Bible

Eshê-Dyirem

¹ Óburúkpâbí o-sét kâng Jóshwa o/fu,

² osét banet-Ézerel o/fu, bacá eshê-dyirem nyí nyǐ o/sét Músis o/fu, osét kámbé.

³ Nang ebóng onet nké o/ju orî-onet ké bukwóp ḿbú ofene, onet ámu o-man n echêe o-da-rem áku, ké bubwô-onet mú mu o-kyé ng ǎ o/fu, nyǐ o-só ng ǎ ewa.

⁴ Nyǐ o-man n echêe o-da-rem ké oshê mún obónge, o-dim o-da-kyú ké kyikit-mpan, ké ocím-dyifyi mú oshê ámu, o-sét banet-ashí eringe nyí kyi/cen. Mbé kâng ba/chi ba-bángê ǎ o-nung ké kafâ-oshê, ba-kye ǎ kyikit ńkyí odakûkyú, o-firi kâng ányi.

⁵ Â onet mú mu o-kyé ng o/fu, nyǐ o-só ng ǎ ewa o/dim o-kâm ǎ áku, banet ḿbé mbe ké oshê ámu ba*dachi ba-kúng ǎ ba-kye onet ámu*. Mbé ba-man ba-bám ǎ, ké nǎ, nyǐ o/ju onet ámu ké bukwóp ḿbú ofene, *chí ké busa-dyityém*.

⁶ Nyǐ o-man n ekyú ké oshê ámu tete ba-pan ǎ mpan ké bushú ḿbú kángkáng banet, ne o-man ewaa to ányi tete onet mú mu otu-nchi kyifen-Osówo ké nkéré ámu o-kpú. Kyi-fím ányi kâng, nyǐ o-man n ebwa esim o-jâ ké oshê emen mú o/mû o/chêe o-mîng.

⁷ Ké bubwô ámbu kâng, mbé ba/cá Kédeshi mú mu ké esí nyí Gályílyi, ké kyicê-kace ńké Jódan ńkyí esû edaríbî e-jâ, esí nyí Nafatályi nyí eku éku. Ba-cá to Shékem mú mu ké esí nyí Éferem nyí eku éku. Ba-cá to Héboron mú mu ké esí-Júda nyí eku éku,

⁸ ké kyicê-kace ńké Jódan ńkyí esû edabyí, ké kyikim-dyikán-ndege-esí mú mu kyíbóng-kaku, ké kyicê-oshê-Jéríku ńkyí esû edabyí, ba-cá to Béze mú mu ké esí nyí Rúben. Ba-cá to Rímot mú mu ké Gyílet, ké esí nyí Gât. Ba-cá to Gólan mú mu ké Báshan, ké esí nyí Manáse.

⁹ Nyín něen eshê-dyirem nyí ba/cá ba-tî kángkáng banet-Ézerel, cibicibi to ne ocinónet nang orá mú mu o-kyú u ne banet-Ézerel. Nang yeě nké o/ju onet ké bukwóp ḿbú ofene o-man n ejá kyikit-dyirem ké eshê ńnyín, ké bubwô-onet mú mu o-kyé ng ǎ o/fu, nyǐ o-só ng ǎ ewa. Baa*ju onet ámu* tete ba-pan ǎ mpan ké bushú ḿbú kángkáng banet.