Jóshwa 2 - Bokyi Bible

Jóshwa o/twóm Banet-Boǒfêp-Esí ba-ca Jéríku

¹ Jóshwa o-twóm kâng banet-boǒfêp-esí bafee fím ké bampyep ḿbé ké Akákya, ké kyikit ńkyí ba/mû ba-kyú u, o-sét kámbé o/fu, baca ké kadip ba-da-ryuu kyikû kyi-kim ne esí nyí Kínan, aciringaciring oshê mú Jéríku. Ké nkéré mú banyinchéng ámbe ba/nung ké Jéríku, ba/darí ké kyise-onyi-dyikpe obónge mú odabángê Ráhap.

² Otu-Jéríku o-jwo ba/fu, banet-Ézerel baa/nung ké oshê ké buchú ámbu ba-bâ ebaryuu kyikû kyi-kim ne oshê.

³ O-twóm kyitwóm ba-sét Ráhap ba/fu, banet ḿbé ba/nung ǒ éné ba/bê ebaryuu kyikû kyi-kim ne oshê eten omúmú, bâ ne mbé kyíjí.

^4-6 Ráhap o-faa o/fu, ké ntûntû, banyinchéng ba/bê ké kyise ejí, nké me n*fí n-nyît ng kyikit ńkyí ba/mû ba/fím*. Mbé ba/dim ké dyikurúku ne ba-kûfâng dyifyi ńdyí ké dyishí-bukwóp. Me n*da/bí kámbé kyikit ńkyí mbe ba-wâa ng*. Nké â a/ró kámbé ké kyikû babap, a-man n ekâm kámbé. Ányi Ráhap oo/kpî kámbé ba-yú ba-jâ kyíbóng-kyise o-da-rôo kámbé ké kafâ-azu-biǐbyâa ḿbyí o/mû o/tî.

⁷ Banet ḿbé otu o/twóm kámbé ba-zûu, ba-níbî dyifyi ńdyí ké dyishí-bukwóp ba-fâng. Ba-ryuu banet-Ézerel ámbe tete ba-ribi ké kyikit ńkyí bukwóp bu/nyáng kace ńké Jódan.

⁸ Ne banet-boǒfêp-esí ámbe ba-kûrí sáre ne buchú, Ráhap o/dim o-kâm kámbé,

⁹ o-sét kámbé o/fu, me mu n-nyît ng n/fu, Óburúkpâbí oo/kye běn esí ńnyín. Nang yeě nang yeě ké oshê mún mu o-shî ng běn.

¹⁰ Be byi/jwo eringe Óburúkpâbí o/chi baya ḿbé badakó Rêt ba-núng, ńdyí bamu ba-bâ, ké nkéré mú ba/dim ké Éjip. Be bii/jwo to eringe ba/ju Otu Síhon ne Otu Ôok, ḿbé batu-Ámórit, ké kyicê-Jódan ńkyí esû nyi e-byí i.

¹¹ Bushî bu/kám bě kanong kanong ńdyí byi-jwo ng kánkyí byi-bâ. Óburúkpâbí mú mu Osówo enen o-chi i Osówo mú bubóng ne esí ńnyín.

¹² Kántîk, sem m̂ ba-kó dyizîn emen ba/fu, ben ba/chi ba-tî kyikû-banet ejí kanong wǎ eringe nyí me nn/tî běn, ba-tông mě to ekap nyí eda mě echi n-fé dyityém ne ben.

¹³ Ryí n̂g mě ocím ba/fu, ba/chi ba-nyángê dyikpen ńdyí bonchí ejí ne boné ejí ne ńdyí bwǎn-bané ejí ḿbé banyinchéng ne ḿbé banyinyi ne kángkáng banet ebe. *Da n̂g echi ba-bángê ba-ju bě*.

¹⁴ Banet ámbe ba-faa Ráhap ba/fu, [kyi/bát Osówo oju bě, â byi*da/chi wǎ eringe nyí byi/raa*.] Â wo a*da/sét onet nang obónge ńkyí byimu byi-chi i* be byimu byi-ryí i ǒ ocím byi/fu, ké nkéré mú Óburúkpâbí oo/kye bě esí ńnyín, be byi/chi byi-tî ǒ kanong.

¹⁵ Ráhap o/mû mu o-kyú u ké kyise ńkyí ba/cibi ekpe emen ne ekpe nyí e/wáp oshê e-fé ké kafâ, ké bubwô ámbu kâng, nyǐ o/tú orí ké wíndu, banet ámbe ba-cen ányi ba-shû kyísí.

¹⁶ O-sét kámbé o/fu, cen n̂ ké esí nyí eku éku, â kyi*fí éné* banet-otu ba/chi ba-ri běn. Rem m̂ ányi ké ací achât, tete ba-bwa esim. Ne ba-shwôm kâng ba-dim kiǐfáng ńkyí enen.

¹⁷ Banet ámbe ba-faa Ráhap ba/fu, be byi-man byi-tî ocím mú a/chi bě byi-ryí.

¹⁸ Nyín něen ńkyí wo adaman a-chi. Ké nkéré mú bii/nung ne byití ké oshê enen, bwá kiǐshíshét-orí ńkyín ké wíndu ámu mú byi/cen ne byi-shû. Kpî bonchí eyên ne boné eyên ne bwǎn-bané eyên ḿbé banyinchéng ne kángkáng kyikû-dyibóng-bonchí eyên a-tî ké kyise eyên.

¹⁹ Nang yeě ké burwám ebe nké o/byí o-dim, ányi nyǐ nké o/ju byiko emen, ne abwô eten aa*ba/chi a-kyú ké kafâ*. Nké â nang yeě ké burwám ebe mú mu ké kafâ-kyise ne wo nké chwǒm kyi/chi ǎ, be nké kyi/tú bě.

²⁰ Ké bubwô ámbu to, â wo a/sét onet nang obónge ńkyí byimu byi-chi i, be bii*ba/chi byi-tî ocím eten mú a/chi bě byi-ryí ǒ*.

²¹ Ráhap o-bángê. O-fu kámbé ba-dim. Ké nkéré mú baa/dim, o-yip kiǐshíshét-orí ánkyi o-tú ké wíndu.

²² Banet-Ézerel ámbe ba-dim ba-da-rem ké eku. Banet ḿbé otu o/twóm kámbé ba-kyé kámbé ké esí emúmú ké ací achât, nké ba*da/ri kámbé*. Ba-bwa esim ké Jéríku.

²³ Banet-boǒfêp-esí ámbe ba-fím kyíbóng-eku ba-shû kyísí, ba-nyáng Jódan, ba-bwa esim ba-kâm Jóshwa. Ba-sét ǎ kángkáng byěm ḿbyí byi/chi.

²⁴ Ba-sét ǎ kâng ba/fu, be byimu byi-nyît ng byi/fu, Óburúkpâbí oo/kye bě oshê ámu omúmú. Banet ámbe bamúmú mbe ba-shî ng bě.