Jóshwa 18 - Bokyi Bible

Bukyii ḿbú Esí nyí e/waa

¹ Nkéré mú banet-Ézerel baa/koo esí ányi, mbé ashí kángkáng ba/bacibi kyikit kyibónge ké oshê mú Shílo, ba-bi mpyep-kyifen-Óburúkpâbí echi.

² Byikû-banet-Ézerel byi/mû byi/tôong káchâtkányi ḿbyí ba/mû ba*da/kyii ne esí nyí ebe ba-kye kámbé*.

³ Jóshwa o-raa kâng ne banet-Ézerel o/fu, ben ba-bám m ka-rí nǎ ne ba-dim ba-nung ba-da-koo esí ányi nyí Óburúkpâbí mú Osówo-banchí enen ḿbé kpákpá oo/kye běn.

⁴ Kye n̂g mě banet bachât bachât ké kyikû-banet nang kyirá. Me n/chi n-twóm kámbé ba-dim ba-ca ké oshê omúmú ba-da-sáng kyísí kyi-kim ne esí nyí edanyîn kámbé ba/fu, efiri nyí ebe. Ba-bwa esim kâng ba-kâm mě.

⁵ N-kúng ng esí ányi n-kyii kámbé ké byikit káchâtkányi. Júda o/chi o-waa ké esí nyí emen ké kyicê ńkyí busyísen, Josêf to o-waa ké kyicê ńkyí emen ńkyí bushûyû.

⁶ Sáng n̂g kyísí eringe esí ányi nyi, ba-kyii kányí ké byikit káchâtkányi ba-ba-kye mě. Me n/chi n-twóp dyímám m-pem ne Óburúkpâbí mú Osówo eten ké bubwô enen.

⁷ Nké banet-kyikû-banet-Lyíva baa*ba/chi ba-koo kyicê-esí ne ben* ké nǎ, kyicê-esí ńkyí ebe ányi kyifen echi ba-kye Óburúkpâbí. Ne nkyi to ntûntû něen, byikû-banet ḿbyí Gât ne ḿbyí Rúben ne banet-Manáse ḿbé mbe ké kyicê ńkyí esû edabyí baa/koo esí nyí ebe ké kyicê-kace ńké Jódan ńkyí esû edabyí, nyí Músis mú ḿgbán-Óburúkpâbí o/kye kámbé.

⁸ Banet ámbe ba-dim ba-wâa edasáng kyísí kyi-kim ne esí ányi, ányi Jóshwa oo/sét kámbé ejá ńnyín o/fu, ca n̂g ké esí ányi emúmú ba-da-sáng kyísí kyi-kim ne nyǐ, ba-bwa esim ba-kâm mě. Me kâng n/chi m-pem ne Óburúkpâbí nyín ké Shílo, ké dyímám etwóp, ké bubwô enen.

⁹ Banet ámbe ba-dim kâng ba-ca ké esí ányi emúmú ba-sáng kyísí eringe ba/kyii esí ányi ké byikit káchâtkányi, ba-pan to eshê nyí nyi ké nyǐ. Ba-bwa esim kâng ba-kâm Jóshwa ké Shílo.

¹⁰ Jóshwa o-twóp dyímám eringe odapem ne Óburúkpâbí ké bubwô ebe, o-kyii kâng esí ányi ké byikim ké byikim o-kye byikû-banet-Ézerel ḿbyí byi/mû byi/waa.

Esí nyí o/kye Běnjámin

¹¹ Esí nyí o/kyii o-kye banet ḿbé ba/fím ké kyikû-Běnjámin nké e/mû e/bwóp kashú. Esí ebe e/mû ké otyém ne otyém mú byikû-banet ḿbé Júda ne ḿbé Josêf.

¹² Ké kyicê ńkyí bushûyû, buti ebe bu/kpet ké Jódan bu-dim ányi bu-wâa kyíbóng ké bukô-kaku ḿbú ké kyicê-bushûyû-oshê mú Jéríku, ne ké kyicê ńkyí esû edaríbî e-jâ, bu/shwôm ké esí nyí eku éku tete bu-ribi ké kyikim-dyikán ńkyí ké Betáben.

¹³ Bu-fím ányi kâng bu-wâa ké bukô ḿbú ké busyísen-kyicê ńkyí Lûz, oshê mún ba-kó ng kámú to Bétel, bu-shwôm ányi kâng bu-shû bu-jâ kyísí ké oshê mú Átarot-Áda, ké kaku ńké nke ké kyicê-busyísen-oshê mú Bét-Hóron mú busyísen.

¹⁴ Bu-shwôm ányi kâng bu-wâa kyicê kyikíri, bu-bírî bu-jâ kyicê ńkyí busyísen ké kyicê ńkyí bubwô-eku-kaku ánke ne bu-shwôm bu-jâ Kyíryat-Bâl, oshê mún ba-kó ng kámú to Kyíryat-Jérim, mú o/já banet ḿbé ba/fím ké kyikû-Júda. Nyín něen buti ḿbú kyicê ńkyí esû edaríbî e-jâ.

¹⁵ Buti ḿbú kyicê-busyísen bu/kpet ké bukô-oshê mú Kyíryat-Jérim [bu-jâ] ké buce ḿbú budabyí ké bambwo, ké oshê mú Néfatwa.

¹⁶ Bu-shû kâng ányi bu-jâ kyísí ké kyikû-kaku ńké nke kyíbóng bu-bírî kashú ké owo mú ké Hyínom, ké kyicê ńkyí bushûyû-bukô-owo mú ké Réfyam. Bu-bírî kâng ányi bu-jâ ké kyicê ńkyí busyísen, bu-shwôm ké owo mú ké Hyínom, ké kyicê-busyísen-oshê mú Jébus, ké otáng-eku mú mu ké oshê ámu, ké kyicê-oshê mú Nrógel.

¹⁷ Bu-bírî kâng ányi bu-jâ ké kyicê ńkyí bushûyû ké oshê mú Nshémes bu-shwôm kâng bu-wâa Gélilot mú o/bírî kashú ne kyikit ńkyí badayú kaku ké Adúmim. Bu-pín kâng ányi bu-jâ kyísí ké Buká ḿbú Búhan. Búhan o/mû wǎn mú Rúben.

¹⁸ Bu-shwôm kâng ányi bu-jâ ké kyicê ńkyí bushûyû-otáng-eku mú mu kyíbóng-owo mú ké Jódan. Bu-shû kâng ányi bu-jâ kyísí ké owo,

¹⁹ bu-shwôm ké kyicê-bushûyû-otáng-eku mú ké Bét-Hógala, ne bu-kúlî ké kyicê-bushûyû-kyiká-baya ḿbé badakó Bukyû, ké kyikit ńkyí kace ńké Jódan ka/tîm ké baya ámbe. Nyín něen buti ḿbú kyicê ńkyí busyísen.

²⁰ Kace ńké Jódan nké nke buti ḿbú kyicê ńkyí esû edabyí. Nyín něen bati ḿbé esí nyí banet ḿbé ba/fím ké kyikû ńkyí Běnjámin ba/koo esí ányi e-firi nyí ebe.

²¹ Eshê nyí e/já banet ḿbé ba/fím ké kyikû ńkyí Běnjámin e/mû Jéríku ne Bét-Hógala ne Émek-Kyíziz

²² ne Bétáraba ne Zemaryâm ne Bétel

²³ ne Ábim ne Pára ne Ófara

²⁴ ne Kéfaramónyi ne Ófyinyi ne Géba. Eshê emúmú diǐkpú ne efee, cibicibi ne boǒshê ḿbú bu/wáp kányí bu-fé ké kafâ.

²⁵ Eshê ekíri to e/mû kô wǎ Gyíbwon ne Ríma ne Byírot

²⁶ ne Myízipa ne Kéfyira ne Móza

²⁷ ne Rékem ne Épel ne Tarála

²⁸ ne Zéla ne Hálep ne Jébus, oshê mún ba-kó ng kámú to Jerúsélem, ne Gyíbya ne Kyíryat-Jérim. Eshê diǐkpú ne enyii, cibicibi ne boǒshê ḿbú bu/wáp kányí bu-fé ké kafâ. Nyín něen esí nyí banet ḿbé ba/fím ké kyikû ńkyí Běnjámin ba/koo e-firi nyí ebe.