Jóshwa 17 - Bokyi Bible

Esí nyí Banet-Manáse ḿbé ké Kyicê ńkyí Esû edaríbî e-jâ

¹ Kyicê-esí ńkyí ké kyicê-kace ńké Jódan ńkyí esû edaríbî e-jâ ba/mû ba/kyii kányí ba-kye kyicê-banet ḿbé ba/fím ké kyikû-dyibóng-wǎn-Josêf mú okínkán, mú odabángê Manáse. Mákyi mú bonchí-Gyílet o/mû ókpá-Manáse mú onyinchéng, ne okân-nnwa byití mú o/byí dyizîn. Ké bubwô ámbu kâng, oshê mú Gyílet ne mú Báshan, nyí nyi ké kyicê-kace ńké Jódan ńkyí esû edabyí, ba/kyii kányí ba-kye ǎ.

² Ba-kúng esí nyí Jódan emúmú nyí kyicê ńkyí esû edaríbî e-jâ, ba-kye bwǎn-Manáse ḿbé ba/waa. Mbé ba/mû ba-bángê e Abyǎza ne Hélek ne Áserel ne Shékem ne Héfe ne Shémyida. Nyín něen bwǎn-banyinchéng ḿbé ba/fím ké kyikû ńkyí Manáse mú wǎn-Josêf, ne mbé ba/mû to banet-ashí ké kyikû-dyibóng ánkyi.

³ Zélófahat mú wǎn-Héfe, mú wǎn-Gyílet, mú wǎn-Mákyi, mú wǎn-Manáse, o/mû o*da/fwon wǎn-onyinchéng nang obónge* nké o/fwon banyinyi nké nke. Mbé ba/mû ba-bángê e Mála ne Núwa ne Hógala ne Myíka ne Tyíza.

⁴ Mbé ba/dim ba-kâm Elyǎza mú nchi kyifen-Osówo ne Jóshwa mú wǎn-Nûn ne banet-ashí-banet-Ézerel, ba-sét kámbé ba/fu, Óburúkpâbí o/mû o/sét Músis o/fu, okye bě to kyicê-esí byi-ryí bukyû ké nyǐ wǎ eringe nyí o/kye bwǎn-bané eten ḿbé banyinchéng. Nké wǎ eringe nyí Óburúkpâbí o/sét, ba/kye kámbé esí cibicibi ne bwǎn-bané ebe ḿbé banyinchéng.

⁵ Éné nké kyi/cen ne ba-chîkye Manáse byikim-esí diǐkpú cibicibi ne eshê nyí Gyílet ne Báshan ḿbyí ba/mû baa/kye ǎ ké kyicê-kace ńké Jódan ńkyí esû edabyí,

⁶ ké nǎ, bwǎn-bané emen ḿbé banyinyi ne ḿbé banyinchéng ba/kye kámbé esí to. Esí nyí Gyílet ba/kye banet ḿbé ba/fím ké kyikû ńkyí Manáse.

⁷ Esí nyí Manáse e/fím ké Ásha e-ribi Myikyímétat, mú mu ké kyicê-oshê mú Shékem ńkyí esû edabyí. Buti bu-fím ányi kâng bu-jâ ké kyicê ńkyí busyísen, eringe nyí banet ḿbé Ntápwa badanung to.

⁸ Esí nyí e/fárâng Tápwa e/já Manáse nké oshê-Tápwa mú mu ké buti o/já banet ḿbé ba/fím ké kyikû ńkyí Éferem.

⁹ Kyi-fím ányi kâng, buti bu/shû bu-jâ kyísí ké kace ńké Kána. Eshê nyí nyi ké busyísen-kace ánke e/já banet-Éferem, nang ké e/mû ké esí nyí Manáse. Buti ḿbú Manáse bu/wâa éné ké kyicê ńkyí bushûyû-kace ánke tete bu-da-nyere ké baya ḿbé Medeterényan.

¹⁰ Éferem o/mû ké kyicê ńkyí busyísen, Manáse ké kyicê ńkyí bushûyû, baya ḿbé Medeterényan ba-bwom kámbé wǎ buti ḿbú kyicê ńkyí esû edaríbî e-jâ. Ásha o/mû ké kyicê-bushûyû ké kyicê ńkyí esû edaríbî e-jâ. Ézaka o/mû ké kyicê-bushûyû, ké kyicê ńkyí esû edabyí.

¹¹ Ké kafâ-esí-Ézaka ne Ásha, Manáse o/mû ne eshê ányi nyí Bét-Shân ne Ébyam, cibicibi ne eshê nyí e/wáp eshê ányi e-fé ké kafâ, ne eshê ekíri to wǎ [Dôo, oshê mún ba/bi kámú ké bukô-baya ḿbé Medeterényan,] ne Ndo ne Tának ne Megído ne eshê nyí e/wáp kányí e-fé ké kafâ.

¹² Nké banet-Manáse ba*da/man eró banet ḿbé ba/mû ba-kyú u ké eshê ányi*. Ké bubwô ámbu kâng, banet-Kínan ba/waa ányi.

¹³ Nang nkéré mú banet-Ézerel ba-kú ba-shwane e ba-shwôm, mbé ba*da/ró banet-Kínan bamúmú*. Nké ba/chi kámbé ké busa ba-kûchi kámbé bǎmkpóngé.

Banet-Éferem ne Banet-Manáse ba/bí ba/fu, bachîkye Kámbé Esí

¹⁴ Banet ḿbé ba/fím ké kyikû ńkyí Josêf ba-raa ne Jóshwa ba/fu, ebóng kyi/chi ne a-kye bě kyicê-esí kyibónge nké nke a/fu, kyifiri ńkyí eten. Be byi/jê kanong kanong, ké nǎ, Óburúkpâbí oo/jware bě.

¹⁵ Jóshwa o-faa kámbé o/fu, â ben ba/jang ejê chwóó, ne esí nyí eku éku nyí e/já Éferem ee*kwárê běn to* dim m̂ kâng ba-nung ké byizinge, ké esí nyí banet-Périzit ne nyí banet-Réfyam, ba-tyém kyikit ńkyí enen.

¹⁶ Mbé ba-faa ǎ ba/fu, esí nyí eku éku ee*kwárê bě* nké banet-Kínan ḿbé mbe ba-kyú u ké ndege-esí mbe ne bamútu ḿbé bubyî-orá budatut, ḿbé ba/chi ké biǐré, cibicibi éné ne ḿbé mbe ba-kyú u ké Bét-Shân ne eshê nyí e/wáp kámbé e-fé ké kafâ ne ḿbé mbe ba-kyú u ké owo mú Jézerel.

¹⁷ Jóshwa o-faa banet ḿbé ba/fím ké kyikû ńkyí Éferem ne ḿbé Manáse o/fu, ntûntû, ben ba/jê, ne ben bamu to ne busa kanong kanong. Ba/chi ba-kyú ne esí e-jê e-shwôm éné.

¹⁸ Esí nyí eku éku e/chi e-kyú nyí enen. Nang ké nyǐ nyi éné kyizinge kyízinge, ben ba/chi ba-tyém kányí e-firi nyí enen kyi-fím nyín tete a-ribi kú. Nké kyi-kim ne banet-Kínan, ben ba/chi ba-ró kámbé ba-chêe, nang ké mbé mbe éné ne bamútu ḿbé ba/chi ké biǐré, ne ba-chi i banet to ḿbé mbe ba-shwane e.