Jóshwa 16 - Bokyi Bible

Esí nyí ba/kye Banet-Éferem ne Banet-Manáse ḿbé mbe ba-kyú u ké Kyicê ńkyí Esû edaríbî e-jâ

¹ Buti ḿbú ké kyicê-busyísen-esí nyí ba/kye banet ḿbé ba/fím ké kyikû ńkyí Josêf bu/kpet ké Jódan fáráng ne Jéríku, ké kyikit ńkyí nkyi ké kyicê-buce ńkyí esû edabyí, ké buce ḿbú Jéríku ḿbú budabyí ké bambwo, tete bu-ribi ké kyikim-dyikán. Bu-fím ányi ké Jéríku bu-jâ ké esí nyí eku éku tete bu-ribi Bétel.

² Bu-fím ányi ké Bétel bu-ribi Lûz, bu-shwôm bu-ribi Átarot-Áda, kyikit ńkyí banet-Ákit ba/mû ba-kyú u.

³ Bu-shwôm ányi kâng bu-wâa kyicê ńkyí esû edaríbî e-jâ, ké esí nyí banet-Jéfelet, tete bu-ribi ké oshê-Bét-Hóron, mú busyísen. Bu-fím ányi bu-ribi ké Géze, bu-da-tî dyishí ké Medeterényan.

⁴ Bwǎn ḿbé Josêf ḿbé ba/fím ké kyikû ńkyí Éferem ne Manáse ḿbé mbe ba-kyú u ké kyicê ńkyí esû edaríbî e-jâ nké ba/koo esí ńnyín ba-ryí bukyû ké nyǐ.

Esí nyí Éferem

⁵ Nyín něen esí nyí e/já byikû-banet-Éferem. Buti ebe bu/kpet ké Átarot-Áda, kyicê ńkyí esû edabyí, bu-ribi oshê mú Bét-Hóron mú bushûyû.

⁶ Bu-fím ányi kâng bu-ribi Medeterényan. Oshê mú Myikyímétat o/mû kámbé ké kyicê ńkyí bushûyû. Kyi-fím ányi, ké kyicê ńkyí esû edabyí, buti bu/nep bu-jâ kyicê ńkyí Tánat-Shílo, bu-shwôm ányi kâng bu-jâ ké kyicê ńkyí esû edabyí ké oshê mú badakó Janáwa.

⁷ Bu-fím ányi kâng bu-shû bu-jâ kyísí ké Janáwa bu-ribi Átarot ne Nára, tete bu-ribi Jéríku bu-da-kúlî ké Jódan.

⁸ Bu-fím ké Tápwa bu-jâ kyicê ńkyí esû edaríbî e-jâ bu-ribi kace ńké Kána, bu-da-kúlî ké baya ḿbé Medeterényan. Esí ńnyín nké ba/kye banet ḿbé ba/fím ké kyikû-Éferem ba/fu, baryí bukyû,

⁹ cibicibi ne eshê ekíri ne boǒshê to bukíri nyí e/mû ké kafâ-esí nyí Manáse, nké ba/kúng kányí ba-kye banet-Éferem.

¹⁰ Nké mbé ba*da/ró banet-Kínan ḿbé ba/mû ké Géze*. Ké bubwô ámbu kâng, banet-Kínan baa/kyú ne banet-Éferem tete dyicí ńdyí kurún, ne banet-Éferem mbe ba-tírîng ng kámbé ké busa ba-chi i kámbé bǎmkpóngé wǎ básóng.