Jóshwa 14 - Bokyi Bible

Esí ekyii nyí ké kyicê-Jódan ńkyí Esû edaríbî e-jâ

¹ Nyín něen eringe ba/kyii esí-Kínan, ké kyicê-Jódan ńkyí esû edaríbî, ba-kye banet-Ézerel. Elyǎza mú nchi kyifen-Osówo ne Jóshwa mú wǎn-Nûn ne banet-ashí-byikû-banet-Ézerel ba/kyii esí ányi ba-kye kámbé.

² Wǎ eringe nyí Óburúkpâbí o/mû o/sét Músis, esí nyí byikû-banet-Ézerel kátángekányi ne kyicê, nyí ké kyicê-Jódan ńkyí esû edaríbî, ba/mû ba/kyii kányí ké dyímám etwóp.

^3-4 Músis o/mû oo/kyii esí nyí ké kyicê ńkyí esû edabyí o-kye byikû-banet-Ézerel ḿbyí áku byifee ne kyicê. Banet ḿbé ba/fím ké kyikû-banet ńkyí Josêf ba/mû ba/kyii kámbé ké byikim-byikû-banet byifee, Manáse ne Éferem. Nké Músis o/mû o*da/kye banet ḿbé ba/fím ké kyikû ńkyí Lyíva kyikim-esí nang kyibónge*. Ba/mû ba/kye kámbé eshê nyí badakyú nké nke ne byikim-akán ḿbyí badanen byitú ebe.

⁵ Banet-Ézerel ba/kyii esí ányi wǎ eringe Óburúkpâbí o/sét Músis.

Jóshwa o/kye Kálep Oshê mú badakó Héboron

⁶ Nkéré mú mbe ba-kyú u ké Gyígal, banet ḿbé ba/fím ké kyikû ńkyí Júda ba/dim ba-kâm Jóshwa. Obónge o/mû o-bángê e Kálep. Bonchí emen o/mû o-bángê e Jéfúne, mú o/fím oshê mú badakó Kénez. Nyǐ o/raa ne Jóshwa o/fu, wo amu a-nyît ng ńkyí Óburúkpâbí o/sét Músis mú ḿgbán emen ké Kádyishi-Bánya kyi-kim ne me ne wo.

⁷ Ké nkéré ámu, me m/mû nn/rí bajam-aje bafee, ńdyí Músis mú ḿgbán-Óburúkpâbí o/twóm mě ké Kádyishi-Bánya o/fu, me mba-kyé kyikû kyi-kim ne esí ńnyín. Me m/bwa esim ne ejá nyí ntûntû n-da-sét ǎ.

⁸ Nké banet ḿbé ba/mû ba/bê ne me ba/chi banet eten ba-kpet eshî. Nké me n/chi ńkyí Óburúkpâbí mú Osówo ejí o/sét mě, ne dyityém ejí.

⁹ Ké bubwô ḿbú ńkyí me n/chi éné, Músis o/ryí mě ocím o/fu, ké ntûntû, me ne bwǎn ejí byi-man byi-ryí bukyû ké esí nyí me n/cen ké nyǐ.

¹⁰ Nké kan kâng achi a-ri kántîk, aje aa/byí bajam bafee esim atánge ńdyí Óburúkpâbí o/sét Músis kyiraa ánkyi. Ńkyín kyi/mû ké nkéré mú banet-Ézerel mbe ba-cen n ba-câ ké kyikim-dyikán. Nké wǎ eringe nyí Óburúkpâbí o/mû o/ryí ocím, nyǐ oo/tî mě okpó tete kurún. Kan achi a-ri, me nn/rí bajam-aje banyii esim-aje atánge,

¹¹ nké me n/tôong n-shwane e wǎ eringe nyí m/mû, ńdyí Músis o/mû o/twóm mě. Me n/tôong n-shwane e kanong kanong mú ndanwa byití ne mú ndachi to nang ebóng chwǒm.

¹² Kye mě kâng esí nyí eku éku ányi, nyí Óburúkpâbí o/mû o/ryí mě ocím dyicí ándyi, ńdyí me ne banet ejí byi/ba ǒ esét byiraa ámbyi. Be byi/mû byi/sét ǒ byi/fu, banet ḿbé ba/fím ké kyikû-biǐnât-banet, ḿbé badakó kámbé Ának mbe áku ké eshê nyí ba/bi kiimbâng-ekpe ba-wáp kányí ba-fé ké kafâ. Kakíri Óburúkpâbí o/chi o-kyú ne me n-ró kámbé ba-chêe wǎ eringe nyí Óburúkpâbí o/sét.

¹³ Jóshwa o-jware Kálep, o-kye ǎ oshê mú Héboron o/fu, oryí bukyû ké mǔ.

¹⁴ Héboron o/tôong ké abwô nyí banet ḿbé ba/fím ké kyikû ńkyí Kálep mú wǎn-Jéfúne, mú o/fím Kémizit, ké nǎ, Kálep o/chi ńkyí Óburúkpâbí mú Osówo-Ézerel o/sét ǎ, ne dyityém emen.

¹⁵ Ne ńkyín kyi-kûchi, Héboron ba/mû ba-kó ng kámú oshê mú Ába. Ába nké o/mû okân-onet ké oshê ámu. Bunyîn-dyityém bu-nung kâng ké esí ányi.