Jóshwa 13 - Bokyi Bible

Esí nyí Banet-Ézerel badachîkoo

¹ Jóshwa o/mû oo/kâa kanong kanong. Dyicí dyibónge, Óburúkpâbí o-raa ne nyǐ o/fu, wo aa/kâa kanong kanong, nké esí e/tôong chwóó nyí adachîkoo.

² Esí-banet-Fyilíta emúmú ne nyí Géshu

³ cibicibi ne nyí Ábim emúmú ké kyicê ńkyí busyísen. Esí nyí fím ké kace ńké badakó Shího, ńké nke ké buti ḿbú banet-Éjip, tete a-ribi ké kyicê ńkyí bushûyû ké buti ḿbú Ékoron, esí ányi e/já banet-Kínan. Batu ḿbé Fyilíta ba/mû ba-kyú u ké Gáza ne Áshídot ne Áshíkelon ne Gât ne Ékoron.

⁴ Esí ekíri to e/tôong nyí ba*da/koo ne* ányi nyí banet-Kínan emúmú ne nyí Myâra, mú o/mû o/já banet-Sádon, tete a-byí Áfek, mú mu ké buti ḿbú banet-Ámórit.

⁵ Esí-banet-Gébal ne nyí banet-Lebánon emúmú, ké kyicê ńkyí esû edabyí, e-chi i nyí ebe, kyi-fím ké Bâl-Gât, mú mu ké kyicê ńkyí busyísen-kaku ńké Hémon, kyi-ribi ké kyikit ńkyí badayú kaku ánke, ké Hámat.

⁶ Ńkyín kyi/cibi ne kángkáng esí nyí banet-Sádon, ḿbé mbe ba-kyú u ké esí nyí eku éku, ké otyém ne otyém mú eku nyí Lebánon ne Myíserefut-Myâm. Me n/chi n-ró banet ḿbén â banet-Ézerel ba-kú ba-bâ. A-man a-kyii esí ányi a-kye banet-Ézerel wǎ eringe nyí n/sét ǒ n/fu, chi.

⁷ Kántîk kâng, mu n-sét ng ǒ n/fu, kyii esí ányi a-kye byikû-banet-Ézerel ḿbyí kátángekányi, a-kye to kyicê-banet kyikíri ké kyikû-banet ńkyí Manáse, ba-ryí bukyû ké nyǐ.

Esí ekyii nyí ké Kyicê-Kace ńké Jódan ńkyí Esû edabyí

⁸ Banet ḿbé ba/fím ké kyikû ńkyí Rúben ne ḿbé ba/fím ké kyikû ńkyí Gât ne kyicê-banet ḿbé ba/fím ké kyikû ńkyí Manáse ba/mû baa/koo esí nyí Músis mú ḿgbán-Óburúkpâbí o/kye kámbé. Esí ányi e/mû ké kyicê-kace ńké Jódan ńkyí esû edabyí.

⁹ Esí ebe ányi e/nere tete e-ribi oshê mú badakó Áro, mú mu ké bubwô-owo mú Ánon, cibicibi ne oshê mú mu ké otyém ne otyém mú owo ámu, cibicibi to ne kángkáng ndege-esí mú mu kyíbóng-kaku, kyi-fím ké Médéba a-ribi Dyíbon.

¹⁰ E/pwôo tete e-ribi buti ḿbú Ámon, cibicibi ne kángkáng eshê nyí e/mû ké abwô nyí otu-Ámórit, mú o/mû o-bángê e Otu Síhon, mú o/mû o-tún n oshê mú Héshibon.

¹¹ Esí ányi e/cít oshê mú Gyílet ne esí nyí Géshu ne Máka, cibicibi ne kángkáng kaku ńké Hémon, cibicibi to ne oshê mú Báshan, tete a-ribi Saléka.

¹² Esí ányi e/cít to butu ḿbú Otu Ôok, nryî esim-otu to mú banet-Réfyam, mú o/mû otu mú Ashítarat ne Édara. Músis o/mû oo/kpógê banet ḿbén o-ró kámbé.

¹³ Nké banet-Ézerel ba*da/ró banet-Géshu* ne ḿbé Máka*. Mbé ba/tôong ba-kyú u ké Ézerel.

¹⁴ Músis o/mû o*da/kye kyikû-banet ńkyí Lyíva esí*. Wǎ eringe nyí Óburúkpâbí o/mû o/sét Músis, nyǐ o/mû mu o-kyâ kámbé kyicê-byěm ḿbyí mbe ba-shí i ké kyikit-kyifen-Osówo echi ba-kyâ Óburúkpâbí mú Osówo-Ézerel.

Esí nyí Músis o/kye Rúben

¹⁵ Músis o/mû oo/kye kyikim-banet ḿbé ba/fím ké kyikû-Rúben kyicê-esí o/fu, kyifiri ńkyí ebe.

¹⁶ Esí ebe e/rêe tete e-ribi Áro, ké bubwô-owo mú Ánon ne oshê mú mu ké otyém ne otyém mú owo ámu, cibicibi ne kángkáng ndege-esí mú mu kyíbóng-kaku ánke, ńké ka/fárâng ne Médéba.

¹⁷ Esí ányi e/cít Héshibon ne kángkáng eshê nyí nyi ké ndege-esí mú kyíbóng-kaku. Ányi kyi/byí, Dyíbon ne Bámot-Bâl ne Bét-Bâl-Myôn

¹⁸ ne Jáhaz ne Kedémot ne Méfat ne

¹⁹ Kyíratam ne Síma ne Zeretesháha, mú mu ké kaku ké owo,

²⁰ ne Bét-Pôo, mú mu ké esim-kaku ńké Pyísaga, ne Bét-Jéshímot.

²¹ Esí ányi e/cít kángkáng eshê nyí nyi ké ndege-esí mú mu kyíbóng-kaku ánke ne kángkáng esí nyí otu-Ámórit mú odabángê Otu Síhon, mú o/mû otu mú Héshibon. Músis o/kpógê otu ámu, cibicibi ne banet-ashí ḿbé Médyan ḿbé badabángê Ébyi ne Rékem ne Zû ne Hôo ne Réba. Mbé ashí amúmú ba/mû batu ké bubwô ḿbú Otu Síhon.

²² Banet-Ézerel ba/ju to nsô epé obónge mú odabángê Bálim, mú wǎn-Bwô.

²³ Jódan nké o/mû buti ḿbú ké kyicê-esí ńkyí esû edaríbî e-jâ, nyí ba/kye banet ḿbé ba/fím ké kyikû ńkyí Rúben. Nyín něen eshê nyí eryên ne nyí boǒnyín nyí Músis o/kye byikû-abóng ḿbyí byi/fím ké kyikû-banet ńkyí Rúben o/fu, baryí bukyû.

Esí nyí Músis o/kye Gât

²⁴ Músis o/mû oo/kye to banet ḿbé ba/fím ké kyikû-banet ńkyí Gât kyicê-esí o/fu, baryí bukyû.

²⁵ Esí nyí ebe e/cít Jáze ne kángkáng eshê nyí nyi ké Gyílet ne kyicê-esí nyí banet-Ámon tete kyi-ribi ké Áro, mú mu ké kyicê-Rába ńkyí esû nyi e-byí i.

²⁶ Esí ebe ányi e/nere kyi-fím ké Héshibon kyi-ribi Rámat-Myízipa ne Betónim. Ne kyi-fím to ké Mahánam kyi-ribi ké buti ḿbú Lódéba.

²⁷ Ké owo mú Jódan, esí ányi e/cít Bét-Háram ne Bét-Nyímara ne Súkot ne Sáfon ne esí to emúmú nyí e/mû ké bubwô-Otu Síhon, mú otu-Héshibon. Buti ebe ḿbú ké kyicê ńkyí esû edaríbî e-jâ bu/mû ké kace ńké Jódan tete kyi-ribi ké kyicê-bushûyû-baya ḿbé Gályílyi.

²⁸ Nyín něen eshê nyí eryên ne nyí boǒnyín nyí Músis o/kye banet ḿbé ba/fím ké kyikû-banet ńkyí Gât, o/fu, baryí bukyû.

Esí nyí Músis o/kye Banet-Manáse, ḿbé mbe ké Kyicê ńkyí Esû nyi e-byí i

²⁹ Músis o/mû oo/kye to banet ḿbé ba/fím ké kyikû-banet ńkyí Manáse kyicê-esí o/fu, baryí bukyû.

³⁰ Esí ebe e/nere e-byí Mahánam, ne cibicibi to ne Báshan bamúmú. Esí emúmú nyí e/mû ké bubwô-Otu Ook, mú o/mû otu mú Báshan, cibicibi ne kángkáng bajam-eshê bachât ḿbé ba/mû ké dyishí-oshê obónge mú badakó Jáyi, mú mu ké esí nyí Báshan.

³¹ Nyǐ e/cít to kyicê-oshê mú badakó Gyílet, cibicibi ne Ashítarat ne Édara, eshê-dyityém nyí Otu Ôok, mú o/mû ké Báshan. Kángkáng eshê ńnyín Músis o/mû o/kye kyicê-kyikû-dyibóng-onyinchéng obónge mú odabángê Mákyi, mú wǎn-Manáse.

³² Éné nké Músis o/kyii esí nyí ké kyicê-Jéríku ńkyí esû nyi e-byí i, ne kace ńké Jódan to, ké nkéré mú nyǐ o/mû ké ndege-esí mú ké Mówep.

³³ Nké Músis o*da/kye banet ḿbé ba/fím ké kyikû ńkyí Lyíva esí*. Nyǐ o/sét kámbé o/fu, ńkyí mbé mbe ba-koo ng kyi-chi i kyicê-byěm ḿbyí mbe ba-chi i byifen ba-kyâ Óburúkpâbí mú Osówo-Ézerel.