Jóshwa 11 - Bokyi Bible

Jóshwa o/kpógê Otu Jábyin ne Banet-Kyikwáré Emen

¹ Nkéré mú Otu Jábyin mú otu-Házo o/jwo kyi-kim ne okpóge mú banet-Ézerel mbe ba-kpógê e banet, nyǐ o/twóm kyitwóm ba-sét Otu Jóbap mú otu-Mádon, o/fu, obâ ne basúja emen. O-twóm to ba-sét batu ḿbé Shímoron ne ḿbé Ákyishap,

² batu ḿbé mbe ba-kyú u ké esí nyí eku éku, nyí nyi ké kyicê ńkyí bushûyû ne ḿbé ké owo mú Jódan, ké kyicê ńkyí busyísen-baya ḿbé Gályílyi, ne ḿbé ké byikû-eku ne ḿbé Medeterényan, fáráng ne oshê mú badakó Dôo.

³ O-twóm to kyitwóm ba-sét banet-Kínan ké byicê byimúmú ḿbyí kace ńké Jódan, ba-sét to banet-Ámórit ne ḿbé Hyítat ne ḿbé Périzit ne ḿbé Jébus, ḿbé mbe ba-kyú u ké esí nyí eku éku, cibicibi ne ḿbé Hyíbit, ḿbé ba/mû ba-kyú u ké kyikû-kaku ńké Hémon, ké esí nyí Myízipa.

⁴ Banet ámbe ba-bâ ne kángkáng basúja ebe. Bujê-basúja ámbe bu/mû wǎ éshíshě nyí nyi ké bukô-baya. Ba/mû ne bubyî-orá chwóó ne bamútu to chwóó ḿbé bubyî-orá budatut.

⁵ Banet ḿbén kángkáng ba-cibi basúja ebe kyikit kyibónge ba-ba-bi bampyep-byití ebe ké kaace ńké Mérom, eringe nyí badanwa ne banet-Ézerel.

⁶ Óburúkpâbí o-sét Jóshwa o/fu, *dachi a-shî kámbé*. Ne bankéré ḿbén ba-kûribi nencí, n-ju ng kámbé ashí kángkáng n-kye Ézerel. Wo a/chi a-chi bubyî-orá ebe bu-firi bankwa, a-shí to bamútu ebe ḿbé bubyî-orá budatut.

⁷ Jóshwa ne kángkáng basúja emen ba-da-kye banet ámbe kâng bunwa kiǐmút ké kyikit ánkyi.

⁸ Óburúkpâbí o-chi banet-Ézerel ba-kpógê kámbé. Ba-kye kámbé bunwa ba-zóngê e ba-câ ne mbé tete ba-ribi ne mbé ké kyicê ńkyí bushûyû, ké eshê nyí badakó Myíserefut-Myâm ne Sádon, ba-ribi tete ne mbé ké kyicê ńkyí esû nyi e-byí i ké owo mú Myízipa. Bunwa ámbu bu/ce kashú tete banet-Ézerel ba-ju kángkáng banet-bushwôn ebe ámbe.

⁹ Jóshwa o-chi kámbé ńkyí Óburúkpâbí o/sét ǎ o/fu, ochi kámbé. O-chi bubyî-orá ebe bu-firi bankwa, o-shí to bamútu ebe ḿbé bubyî-orá budatut.

¹⁰ Jóshwa o-bwa kâng esim, o-ba-koo oshê mú badakó Házo, o-ju otu ebe. Ké nkéré ámu, oshê ámu nké o/mû o-shwane e o-shwôm kángkáng batu ámbe.

¹¹ Ba-ju kángkáng banet ḿbé ba/mû ké oshê ámu. Ba-shí to kámú.

¹² Jóshwa o/koo kángkáng eshê ányi, o-kám to batu ebe, o-ju to kángkáng banet wǎ eringe nyí Músis mú ḿgbán-Óburúkpâbí o/mû o/sét ǎ.

¹³ Nké banet-Ézerel ba*da/shí oshê nang obónge mú ba/bi ké kyikit ńkyí ba/mû baa/bi oshê ányi* kyi*da/shwôm Házo nké Jóshwa o/shí*.

¹⁴ Banet-Ézerel ba-yip kángkáng byěm ḿbyí byinong ne byitú ḿbyí byi/mû ké eshê ányi, ba-tî byiko ebe. Nké mbé ba/ju kángkáng banet ḿbé ba/mû ké eshê ányi, nang onet o*da/waa*.

¹⁵ Óburúkpâbí nké o/mû o/sét Músis mú ḿgbán emen ńkyín, Músis o-yip o-sét Jóshwa, ne Jóshwa o-chi kâng wǎ eringe ba/sét ǎ. Nyǐ o/chi kángkáng byěm ḿbyí Óburúkpâbí o/mû o/sét Músis.

Esí nyí Jóshwa o/koo

¹⁶ Jóshwa o/koo esí emúmú. Esí nyí eku éku ne nyí ké byikû-eku, ké kyicê ńkyí bushûyû ne ńkyí busyísen, ne kángkáng esí nyí Góshen ne kyikim-dyikán ké kyicê ńkyí busyísen, cibicibi ne owo mú Jódan.

^17-18 Esí ányi e/yage kyi-fím ké kaku ńké Hálak, ńké nke ké kyicê ńkyí busyísen, fáráng ne oshê mú badakó Édom, tete e-ribi Bâl-Gât, mú mu ké kyicê ńkyí bushûyû, ké owo mú Lebánon, ké kyicê-busyísen-kaku ńké Hémon. Jóshwa o/nwa byití ne batu ḿbé ba/mû ké esí ńnyín kyi-rí kanong kanong, nké nyǐ o/kám kámbé ashí amúmú o-ju.

¹⁹ Banet ḿbé Gyíbwon nké nke nké ba/chi kyikwáré ne banet-Ézerel, oshê mú banet-Hyíbit bakíri ba/mû mbe ba-kyú u. Ḿbé áku ashí kángkáng, nyǐ o/kpógê kámbé ké byití.

²⁰ Óburúkpâbí nké o/chi kámbé ba-rêe dyityém ba/fu, mbé ba-nwa ng byití ne banet-Ézerel eringe badaju kámbé nang kaǎnyín-bafip kaa*kyú*. Něen nké Óburúkpâbí o/mû o/sét Músis o/fu, ochi.

²¹ Ké nkéré ámu, Jóshwa o/ju to biǐnât-kyikû-banet ḿbé badabángê Ának, ḿbé ba/mû ba-kyú u ké esí nyí eku éku, nyí Héboron ne Dyíbyi ne Ánap, ne ké kángkáng esí nyí eku éku to nyí Júda ne Ézerel. Jóshwa o/ju kángkáng, nang onet o*da/waa*. O-bên to kángkáng eshê ebe e-nung ké ecing.

²² Onet-Ának nang obónge o*da/waa ké esí ányi*. Nké boǒnyín-banet ámbe ba/mû ba/waa ké Gáza ne Gât ne Áshídot.

²³ Jóshwa o-koo esí ányi emúmú wǎ eringe nyí Óburúkpâbí o/mû o/sét Músis. Jóshwa o-yip kányí o-kye banet-Ézerel e-firi nyí ebe. O-kyii kámbé kányí ké byikim ké byikim. Kyikû-banet-Ézerel nang kyirá ba-kúng kyikim kyibónge. Kyi-fím ányi kâng, atyém ebe a-shû kyísí ké byití enwa.