Jóshwa 10 - Bokyi Bible

Banet-Ézerel ba/kpógê Banet-Ámórit

¹ Otu Adónyizédek mú otu-Jerúsélem o/jwo ba/fu, Jóshwa oo/koo Áyi o-bên kámú nang kaǎchwóm ka*da/waa* o-ju to otu ebe o-cibi ányi, wǎ eringe nyí o/chi Jéríku ne otu ebe. O-jwo to ba/fu, banet-Gyíbwon baa/chi kyikwáré ne banet-Ézerel, ne ba-kú ba-kyú u ne mbé to.

² Banet-Jerúsélem bushî bu/róng kámbé kanong kanong ké ńkyí ba/jwo éné, ké nǎ, Gyíbwon o/mû o/rêe kanong kanong wǎ oshê nang orá mú mbe ne otu. Mǔ o/mû o/rêe o-shwôm Áyi, ne banet emen ba/mû bannwa byití ḿbé banong banong.

³ Otu Adónyizédek o-twóm kyitwóm ńkyín kâng ba-kye Otu Hóham mú otu-Héboron ne Otu Pyíram mú otu-Jámut ne Otu Jáfya mú otu-Lákyishi ne Otu Dyíbyi mú otu-Égolon o/fu,

⁴ bâ n̂g ba-ba-chwáp mě byi-kye banet-Gyíbwon bunwa, ké nǎ, mbé ba/firi ké kyikwáré ne Jóshwa ne banet emen.

⁵ Batu-Ámórit ḿbén ashí atánge ba-cibi basúja ebe ba-kye Gyíbwon bunwa.

⁶ Banet-Gyíbwon ba-twóm kyitwóm ba-sét Jóshwa ké kyikit ńkyí ba/mû ba/bi bampyep ebe ké Gyígal, ba/fu, *dachi a-mîng bě* ǎ bonchí*. Bâ babap a-ba-chwáp bě. Batu-Ámórit bamúmú, ḿbé ba/fím esí nyí eku éku, baa/cibi basúja ebe ba-ba-kye bě bunwa.

⁷ Jóshwa ne basúja emen kángkáng, cibicibi ne basúja emen ḿbé badajang enwa byití, ba-zûu ké Gyígal.

⁸ Óburúkpâbí o-sét Jóshwa o/fu, *dachi a-shî kámbé*. Me nn/chi ǒ a-kpógê kámbé. Nang onet obónge ké burwám ebe oo*ba/chi o-man ebwom bunwa ne wo*.

⁹ Buchú ámbu bumúmú, Jóshwa ne basúja emen ba/dim ké Gyígal mbe ba-wâa ng ḿbú Gyíbwon. Ba-da-kye banet-Ámórit bunwa ḿbú ba*da/tî okabe*.

¹⁰ Óburúkpâbí o-chi banet-Ámórit ba-díp ochéé, ńdyí ba/ri basúja-Ézerel mbe ba-bâ. Banet-Ézerel ba-kpet eju kámbé ké Gyíbwon. Ba-zóngê e ne mbé ba-câ ké kyikû ba-shû ng kaku ba-câ ké kyikit ńkyí badayú kaku ánke ba-jâ ké oshê mú badakó Bét-Hóron. Ba-nwa ng ne mbé ba-câ tete ba-ribi ké busyísen-eshê nyí badakó Azéka ne Makéda.

¹¹ Nkéré mú banet-Ámórit mbe ba-chêe ng ba-shû ng kaku ba-câ ké kyikit ánkyi, Óburúkpâbí o/chi biimbâng-abíp byi-kûróng byi-câ kámbé ké byiko tete ba-ribi Azéka. Abíp ányi a/ju banet ba-jê ba-shwôm ḿbé banet-Ézerel ba/ju.

¹² Dyicí ńdyí Óburúkpâbí o/chi banet-Ézerel ba-kpógê banet-Ámórit, Jóshwa o/pem ne Óburúkpâbí. Nyǐ o/raa ké bushú ḿbú banet-Ézerel o/fu, ô Óburúkpâbí, chi óbyísû o-bwom ányi cip ké Gyíbwon, a-chi otukáku o-mîng ecen ké owo mú ké Ájalon.

¹³ Óbyísû o-bwom cip. Otukáku to o*da/chîcen* tete ké nkéré mú oshê-Ézerel baa/kpógê banet-bushwôn ebe. Ba/sáng ńkyín ké nwet mú Jásha, ba/fu, óbyísû o/bwom cip ké otyém-bubóng, ké kyirim-dyicí, o*da/ríbî*.

¹⁴ Dyizong-dyicí něen dyi/mû dyi*da/chi ne ne banyá ne banyá* ńdyí Óburúkpâbí o/chi ńkyí onet o/sét ǎ*. Óburúkpâbí o/nwa o-kye banet-Ézerel.

¹⁵ Ké nkéré mú ńkyín kii/shwôm, Jóshwa ne basúja emen ba-bwa dyijê ké Gyígal.

Jóshwa o/kám Batu-Ámórit Ashí Atánge

¹⁶ Batu-Ámórit kâng ba/chêe ba-jâ ké oshê mú Makéda ba-da-rem áku ké bucim bubónge.

¹⁷ Onet o-da-ri kámbé, ba-ba-sét Jóshwa kyi-kim ne nkyí.

¹⁸ Jóshwa o-sét kámbé o/fu, bírî n̂g biimbâng-aká ba-cít ké ocím-bucim. Ba-tî banet ányi ba-kûbám.

¹⁹ Ben *da n̂g echi ba-waa ányi*. Ca n̂g ne banet-bushwôn eten ké kyikû, ba-da-kye kámbé bunwa ké esim. *Da n̂g echi ba-bángê kámbé ba-nung ké eshê ebe*. Óburúkpâbí mú Osówo eten oo/chi běn ba-kpógê kámbé.

²⁰ Jóshwa ne banet emen ba-ju banet ámbe, nang ké bakíri ba/nwa ba-waa bakpó ké kafâ-oshê ebe, ké ekpe nyí e/wáp oshê e-fé ké kafâ.

²¹ Banet-Jóshwa bamúmú ba-bwa esim ba-kâm ǎ ne byitông ebe ké Makéda, ké kyikit ńkyí ba/mû mbe ba-kyú u. Onet o*fí ké esí ányi mú o/kan okǎn o-raa kyibî-kyiraa kyi-kim ne banet-Ézerel*.

²² Jóshwa o-kye kâng busa o/fu, bâa n̂g ocím-bucim ámbu ba-bâ mě ne batu ámbe kwán.

²³ Ba-bâa kâng ocím-bucim, ba-kpî kámbé

²⁴ ba-ba-kye Jóshwa. Jóshwa o-kó kâng kángkáng banet-Ézerel ba-bâ. Ne o-kye busa o/fu, banet-ashí-basúja emen ḿbé ba/mû ba/ce ne nyǐ babâ ba-ba-cím batu ámbe byiká ké kyitông. Ba-ba-chi éné.

²⁵ Jóshwa o-sét kámbé kâng o/fu, *da n̂g echi ba-shî* ba-kyú nang ne atyém afee*. Chi n̂g ne kángkáng busa enen, ba-kyú to ne dyityém dyibónge, ké nǎ, něen nké Óburúkpâbí o/chi o-chi kángkáng banet-bushwôn enen.

²⁶ Jóshwa o-ju kâng batu ámbe. O-yip kámbé o-kpong ké kyichí ké kyichí. Ba-waa ányi tete dyikurúku dyi-fyi.

²⁷ Ké nkéré mú esû ee/ríbî, Jóshwa o-kye busa, ba-fîm kâng kámbé ba-da-twóp ké ochíchí-bucim ámu mú ba/mû ba/darem. Ba-yip biimbâng-aká ba-cít ké ocím-bucim, ne aká ányi a/tôong áku.

Jóshwa o/chîkoo Esí-Banet-Ámórit

²⁸ Jóshwa o/dakye banet-Makéda bunwa ké ochíchí-dyicí ándyi, o-koo kámú, o-kám to otu ebe. O-ju kángkáng banet ḿbé ba/mû ké oshê ámu. Nang onet o*da/waa*. O-ju otu-oshê ámu wǎ eringe nyí o/ju otu-Jéríku.

²⁹ Ké nkéré mú ńkyín kii/shwôm, Jóshwa ne basúja emen ba-dim ké Makéda ba-wâa kashú ké oshê mú badakó Lyíbana, ba-da-kye kámbé bunwa.

³⁰ Óburúkpâbí o-chi to banet-Ézerel ba-kpógê oshê ámu ne otu ebe. Ba-ju kángkáng banet ḿbé ba/mû ányi, nang onet o*da/waa*. Ba-ju otu-oshê ámu wǎ eringe nyí ba/mû ba/ju otu-Jéríku.

³¹ Ké nkéré mú ńkyín kii/shwôm, Jóshwa ne basúja emen ba-dim ányi ké Lyíbana ba-wâa Lákyishi. Ba-wáp oshê ámu ba-fé ké kafâ. Ba-kye kámbé bunwa.

³² Óburúkpâbí o-chi banet-Ézerel ba-kpógê banet-Lákyishi, ké nnyinyěng-dyicí mú ba/chînwa byití. Ba-ju kámbé ashí kángkáng wǎ eringe nyí ba/mû ba/chi banet-Lyíbana, nang onet obónge ké oshê o*da/waa*.

³³ Otu Hóram mú otu-Géze o-bâ o-ba-chwáp banet-Lákyishi, nké Jóshwa o/kpógê ǎ ne basúja emen, ba-ju kámbé ashí kángkáng.

³⁴ Jóshwa ba-dim ányi ké Lákyishi kâng ba-wâa Égolon. Ba-wáp oshê ámu ba-fé ké kafâ. Ba-kye kámbé bunwa.

³⁵ Ba-waa ányi ké dyicí ándyi ba-koo oshê ámu. Ba-ju kángkáng banet ḿbé ba/mû ányi, wǎ eringe nyí ba/chi banet-Lákyishi.

³⁶ Ké nkéré mú ńkyín kii/shwôm, Jóshwa ne basúja emen ba/dim ányi ké Égolon ba-yú u eku ba-câ ké oshê mú badakó Héboron. Ba-kye kámbé bunwa.

³⁷ Ba-koo oshê ámu. Ba-ju otu-oshê ámu ne kángkáng banet ḿbé ba/mû ké kafâ-oshê ámu. Ba-ju to kángkáng banet ḿbé ba/mû ké eshê ekíri ányi fáráng. Jóshwa o-bên oshê ámu kángkáng, wǎ eringe nyí o/chi Égolon. Nang onet obónge o*da/waa okpó*.

³⁸ Jóshwa ne basúja emen ba-jâ kâng ké oshê mú badakó Dyíbyi. O-kye kámbé bunwa.

³⁹ O-koo kámú, o-koo to kángkáng eshê nyí e/mû ányi fáráng. Ba-ju kángkáng banet ḿbé ba/mû ányi. Jóshwa o/chi oshê ámu ne otu ebe ńkyí o/mû o/chi Héboron ne Lyíbana, cibicibi ne otu ebe.

⁴⁰ Jóshwa o/kpógê esí ányi emúmú. O-kpógê batu ḿbé mbe ba-kyú u ké esí nyí eku éku ne ḿbé mbe ba-kyú u ké esim-eku nyí kyicê ńkyí esû edabyí ne ḿbé mbe ba-kyú u ké byikû-eku nyí kyicê ńkyí esû edaríbî e-jâ cibicibi ne ḿbé ké kyikim-dyikán ké kyicê ńkyí busyísen. O*da/mîng onet nang obónge okpó*. Nyín něen ńkyí Óburúkpâbí mú Osówo-Ézerel o/mû o/sét ǎ o/fu, ochi.

⁴¹ Byití ḿbyí Jóshwa o/nwa o/kpet kámbyí ké Kádyishi-Bánya, ké busyísen, tete o-ribi ké oshê mú Gáza, mú mu fáráng ne bukô-baya ḿbé Medeterényan, cibicibi ne kángkáng esí nyí nyi ké Góshen, kyi-ribi tete ké kyicê-bushûyû-oshê mú Gyíbwon.

⁴² Jóshwa o/kpógê batu ḿbén kángkáng ne esí ebe, ké otáng-byití obónge enwa, ké nǎ, Óburúkpâbí mú Osówo-Ézerel o/mû mu o-nwa ng ké bubwô-Ézerel.

⁴³ Ké nkéré mú ńkyín kii/shwôm, Jóshwa ne basúja emen ba-bwa esim ké Gyígal, kyikit ńkyí ba/mû ba/bi bampyep-byití ebe.