Jóshwa 1 - Bokyi Bible

Óburúkpâbí o/sét Jóshwa o/fu, okoo Esí-Kínan

¹ Ké nkéré mú Músis mú ḿgbán-Óburúkpâbí oo/kpú, Óburúkpâbí o/raa ne Jóshwa mú wǎn-Nûn, mú o/mû mu o-chwáp ng Músis.

² Nyǐ o/sét Jóshwa o/fu, Músis mú ḿgbán ejí oo/kpú. Wo ne kángkáng banet-Ézerel, kpá n̂g byiko kántîk ba-nyáng kace ńké Jódan ba-da-nung ké esí nyí mu n-kyâ běn.

³ Wǎ eringe nyí me m/mû n/sét Músis, me nn/kye běn esí emúmú nyí bamu ba-wâa ng ké nyǐ.

⁴ Buti enen bu/chi bu-fím ké kyikim-dyikán ké kyicê-busyísen bu-ribi ké eku nyí Lebánon nyí nyi ké kyicê ńkyí bushûyû. Bu-fím ké kiǐtí-kace ńké Yuférétyis ké kyicê ńkyí esû nyi e-byí i, bu-shwôm ké oshê mú banet-Hyítat bu-ribi ké baya ḿbé Medeterényan ké kyicê ńkyí esû nyi e-ríbî ng e-jâ.

⁵ Onet o*fí nang obónge mú o/chi o-man běn ekpógê* â wo amu okpó* ǎ Jóshwa*. Me n/chi n-kyú ne wo wǎ eringe nyí m/mû ne Músis. Me n/chi n-kyú ne wo kángkáng nkéré. Me mm*ba/chi m-mîng ǒ ne banyá*.

⁶ Fé busa a-kyú to ne dyityém dyibónge, ké nǎ, wo nké a/chi a-kyú onet-dyishí-banet ḿbén, ńdyí ba-kú ba-koo ng esí ńnyín ba-câ, nyí n/ryí banchí ebe ḿbé kpákpá ocím.

⁷ Fé busa a-kyú to ne dyityém dyibónge. *Damîng etî kángkáng byije ḿbyí Músis mú ḿgbán ejí o/kye ǒ*. *Dachi a-né kaǎcê emen nang kabónge* ne kyi/chi kyi-kyú ǒ kanong nang a-ca nyá nang a-ca nyá.

⁸ Ri a/fu, mbe ba-kó ng Nwet-Byije ejí kángkáng nkéré. Kwâa kámú buchú ne esû, ne *damîng echi kángkáng byěm ḿbyí ba/sáng ké mǔ*. Kyi-fím ányi kâng, byěm byi/chi byi-kû ǒ ece kashú kerededet.

⁹ Zîim a/fu, me nn/sét ǒ n/fu, fé busa a-kyú to ne dyityém dyibónge. *Dachi a-shî* a-jwâa asa* ké nǎ, me Óburúkpâbí mú Osówo eyên, me mu ne wo nang a-ca nyá nang a-ca nyá.

Jóshwa o/kye Banet Busa

^10-11 Jóshwa o-sét kâng banet-ashí o/fu, badim ba-shwôm kyikit ńkyí ba/bi bampyep ebe ba-sét banet-Ézerel ba/fu, nap n̂g byiryíng ba-tî, ké nǎ, ké ací kurún achât, be byi/chi byi-nyáng kace ńké Jódan byi-jâ ké esí nyí Óburúkpâbí mú Osówo eten mu o-kyâ bě.

¹² Jóshwa o-sét banet ḿbé ba/fím ké kyikû ńkyí Rúben ne ńkyí Gât ne kyicê-banet ḿbé ba/fím ké kyikû-banet ńkyí Manáse o/fu,

¹³ zîim m̂ ńkyí Músis mú ḿgbán-Óburúkpâbí o/sét běn, o/fu, Óburúkpâbí mú Osówo enen o/chi o-kye běn esí ńnyín, nyí nyi ké kyicê-Jódan ńkyí esû nyi e-byí i, ba-firi ké nyǐ.

¹⁴ Banyi enen ne bwǎn enen ne byitú enen ba/chi ba-waa nyín, nké basúja enen ḿbé baa/kpá byiko-byití enwa ba/chi ba-bwóp banet-Ézerel ḿbé kwán kashú ba-nyáng kace eringe nyí badachwáp kámbé,

¹⁵ tete ké nkéré mú baa/koo esí nyí nyi ké kyicê-kace ńkyí áku, nyí Óburúkpâbí mú Osówo enen oo/kye kámbé. Ké nkéré mú Óburúkpâbí oo/bwât kángkáng byikû-banet-Ézerel o-tî kanong, ben ba-man ebwa esim nyín ké esí nyí enen, ké kyicê ńkyí esû nyi e-byí i, ké kace ńkén, nyí Músis mú ḿgbán-Óburúkpâbí o/kye běn.

¹⁶ Mbé ba-faa Jóshwa ba/fu, be byi-chi i nang ebóng chwǒm ńkyí a/sét bě, ne byi-câ to nang ebóng kyikit ńkyí a/twóm bě.

¹⁷ Be byi-kyâ ǒ ofê wǎ eringe nyí byi/mû byi-kyâ Músis kángkáng nkéré. Kyi/bát Óburúkpâbí mú Osówo eyên okyú ne wo wǎ eringe nyí o/mû ne Músis.

¹⁸ Nang yeě nké o/kán ké dyishí ké ńkyí wo a/sét, o-né nang ńkyí wo a/fu, byichi, ba-man ba-ju ǎ. Fé busa a-kyú to ne dyityém dyibónge.