Jóna 1 - Bokyi Bible

Jóna o/né echi ńkyí Óburúkpâbí o/sét ǎ o/fu, ochi

¹ Dyicí dyibónge, Óburúkpâbí o/raa ne Jóna mú wǎn-Amyíta,

² o-sét ǎ o/fu, ca ké kiǐtí-oshê ánkyi ńkyí badakó Nyínyíve a-da-shú kámú. Me mu n-nyît ng eringe nyí banet-oshê ámu ba/bên.

³ Jóna kâng o/dim kiǐfáng kyikíri eringe nyí odachêe Óburúkpâbí. O/dim o-wâa Jópa, o-ri ńsukyíkang mú mu o-wâa ng Syipîn. O-kye akpuga, o-nung ké ńsukyíkang ámu o/fu, nyǐ o-dim m Syipîn, eringe nyí odachêe Óburúkpâbí.

⁴ Nké Óburúkpâbí o/twóm afú nyí aryên a-náng baya ámbe. Afú ányi a/mû a-tugi ng kakânkakân kanong kanong, nyí ńsukyíkang o/mû o-kú o-sêe ng.

⁵ Bushî bu/kám banet-bǎmkpóngé-ńsukyíkang, nang yeě nang yeě o-kpet oriro efé, o-fâ nshwam o-kyâ osówo emen o/fu, ochwáp ǎ. Eringe nyí ba/chi [ba-chi ńsukyíkang o-fûu] kâng, ba-fîm [atû nyí a/mû ké kafâ] ba-pwó ké baya. Ńdyí byěm ḿbyín mbyi byi-chi i éné, Jóna o/mû o/shû o-jâ ké kyikû-ńsukyíkang, o-rí sáre mu o-rê ng.

⁶ Onet-dyishí-ńsukyíkang o-da-ri ǎ ké kyikit ńkyí mu o-rê ng éné, ne o-raa ne nyǐ o/fu, wo amu a-chi i ebóng ne burê. Bûu nensang a-fé nshwam a-kye Osówo eyên o-chwáp bě. Katô o/chi o-ri bě bafip, o-nyii bě.

⁷ Banet-bǎmkpóngé-ńsukyíkang ba-raa ne barî ba/fu, bâ n̂g byi-twóp dyímám byi-ri onet mú mu o-chi i bě byi-ri ng afaníkong ńnyín. Ba-twóp dyímám dyi-bên Jóna.

⁸ Ne ba-raa ne nyǐ kâng ba/fu, sét bě, wo nké amu a-cen n ne afaníkong ńnyín? Wo amu a-chi i ebóng ńnyín. Wo a/fím ebóng oshê. Wo a/fím ebóng kyire.

⁹ Jóna o-faa o/fu, me n-chi i onet-Hyíburus. Me mu n-fâ Óburúkpâbí mú mu Osówo mú kyíbóng, mú o/chi esí ne baya.

¹⁰ Jóna o-sét kámbé to o/fu, nyǐ mu o-chêe ng Óburúkpâbí. Bushî bu-kám banet ámbe, [ne ba-raa ne Jóna ba/fu, ńkyí wo a/chi kyi*da/nwa*.]

¹¹ Afú nyi a-tugi ng a-rêe ng a-câ, ne banet ámbe ba-bí kâng Jóna ba/fu, be byi-chi i ǒ ebóng ne afú ńnyín a-mîng etugi.

¹² Jóna o-faa kámbé o/fu, fîm m̂ mě ba-twóp ké baya, ne byikit byi/chi byi-chee beem. Me mu n-nyît ng n/fu, me nké n/cen ne nkyí ne ba-nung ké kyibî-afú ńkyín.

¹³ Nké banet ámbe ba/kan ba/fu, mbé ba-fung ng kámú ne busa ba-tîm ké bukô-baya. Nké afú a/mû nyi a-yógê ng oyógóng a-câ, ne ba*da/man etín ba-ca kashú nang kaǎnyín*.

¹⁴ Ne ba-wonge kâng ba-kó Óburúkpâbí ba/fu, ô Óburúkpâbí, be byimu byi-fâ nshwam byi-kyâ ǒ, byi/fu, *da bě eju* â byi/ju onyinchéng mún*. Wo, ǎ Óburúkpâbí, nké amu a-kyâ bě busông ḿbún. Wo nké amu a-chi i kánkyí.

¹⁵ Ne ba-fîm kâng Jóna ba-twóp ké baya, ne afú a-waa ányi a-chee beem.

¹⁶ Ńkyín kyi/chi banet ámbe ba-kpet eshî Óburúkpâbí, ba-chi kyifen ba-kye ǎ, ba-ryí ocím ba/fu, mbé ba-kû ng ǎ efé.

¹⁷ Óburúkpâbí o/kye kiimbâng-kakworê busa, ka-kúng Jóna ka-myii, o-rí kánké ké dyifít ací achât.