Jójis 9 - Bokyi Bible

Abyímélek

¹ Wǎn-Gyídyon mú odabángê Abyímélek o/dim o-ca ké oshê mú badakó Shékem, kyikit ńkyí bwǎn-bané-boné emen ashí amúmú mbe ba-kyú u, o-sét kámbé o/fu,

² basét banet-Shékem ba/fu, kyirá ńkyí kyidanyîn kámbé, ńkyí badakyú ké abwô nyí bwǎn-Gyídyon ashí bajam bachât esim diǐkpú aa, aa ńkyí badakyú ké abwô nyí wǎn emen obónge. Zîim m̂ ba/fu, me n-chi i wǎn-boné enen.

³ Bwǎn-bané-boné emen ba-pem ne banet-Shékem kyi-kim ne kyiraa ánkyi. Banet-Shékem kâng ba-tî okabe ba/fu, mbé ba-kyú u ké bubwô ḿbú Abyímélek, ké nǎ, nyǐ o-chi i wǎn-boné ebe.

⁴ Ba-fîm byikim-syílyíba bajam bachât esim diǐkpú ké kyikit-kyifen echi ńkyí bukye ḿbú badakó Bâl, mú Ocím eryí, ba-kye ǎ. O-yip akpuga ányi o-yámê enyam-banet ḿbé ba*da/byí chwǒm* ba-cibi ne nyǐ ké kyikû.

⁵ O-dim o-ca ké kyise-bonchí emen, ké Ófara, o-da-yú kyíbóng-buká bubónge o-ju bajam-bwǎn-bané emen bachât esim diǐkpú ḿbé banyinchéng ḿbé bwǎn-bonchí emen. Nké wǎn-boné emen mú wǎsíng, mú odabángê Jótam, o/darem, ne ba*da/ju*.

⁶ Kángkáng banet-Shékem ne ḿbé Bét-Myílo ba-dim ba-da-cibi, ba-dim ba-wâa ké kyichí-ociring ńkyí badakó ôok, ké Shékem, ba-kúng Abyímélek butu ányi.

⁷ Nkéré mú Jótam o/jwo kyi-kim ne nkyí, o/dim o-da-bwom kyíbóng-kaku ńké badakó Gerízim, o-wonge o-kó kámbé o/fu, fwôo n̂g atông ba-jwo mě, ben banet-Shékem, eringe nyí Osówo o/chi o-jwo běn to.

⁸ O/fu, nkéré obónge, byichí byi/dim byi-da-cibi kyikit kyibónge byi/fu, mbyí byi-kúng ng otu ebe. Byi-sét kyichí ńkyí badakó ólif byi/fu, kyikyú otu ebe.

⁹ Kyichí ánkyi kyi-faa kyi/fu, â n/fu, n-kyú u otu enen, m-man m-mîng bakút ebyí ḿbé badakúng ba-kye banet ne bakye ofê.

¹⁰ Byichí byi-raa kâng ne kyichí ńkyí badakó fyîk byi/fu, wo bâ a-ba-kyú otu eten.

¹¹ Nké kyichí ánkyi kyi/faa kyi/fu, â n/fu, n-kyú u otu enen, m-man m-mîng bagbelegbele-byirim ejí ezím.

¹² Byichí byi-raa kâng ne kyichí ńkyí badakó gerêp, ńkyí badachi bato ké byirim emen byi/fu, wo bâ a-ba-kyú otu eten.

¹³ Nké kyichí ánkyi kyi/faa kyi/fu, â n/fu, n-kyú u otu enen, m-man m-mîng bato echi ḿbé mbe ba-chi i banet ne bakye ba-kyú ké bunyîn-dyityém.

¹⁴ Byichí byimúmú byi-raa kâng ne byiwong byi/fu, wo bâ a-ba-kyú otu eten.

¹⁵ Byiwong byi-faa byi/fu, â ben ba/fu, ba-kúng ng mě butu ké ntûntû, bâ n̂g kâng ba-ba-nung ké busi ejí. Â ba*da/chi éné* okwâ o/chi o-byí ké byire ejí ḿbyí byiwong byíwong o-shí byichí ḿbyí Lebánon.

¹⁶ Jótam o-chîraa o-ca kashú kâng o/fu, ké ntûntû, ben atyém enen a/mû běn wááng ké nkéré ba/kúng Abyímélek butu dí. Ben ba/kye okúsí-Gyídyon ofê ba-chi to kyikû-banet emen kanong dí, wǎ eringe kyi/tyeem ne ńkyí nyǐ o/chi?

¹⁷ Zîim m̂ ba/fu, bonchí ejí o/nwa byití ké dyishí enen. Nyǐ o/nángê o-kye kyitông emen eringe nyí oda běn enyii ké abwô nyí banet-Médyan.

¹⁸ Nké kurún, ben baa/bírî bunwa ne banet-kyikû-bonchí ejí. Ben baa/ju bajam-bwǎn-banyinchéng emen bajam bachât esim diǐkpú kyíbóng-buká bubónge, ba-chi Abyímélek o-firi onet-dyishí mú Shékem, ké nǎ, Gyídyon o/fwon ǎ ne ósóng emen mú onyinyi, mú mu wǎn-boné enen.

¹⁹ Kántîk kâng, â ńkyí ben ba/chi Gyídyon ne kyikû-banet emen kurún kyi/mû wááng wááng, éné kâng, ben kyú n̂g ké bunyîn-dyityém ne Abyímélek, ne nyǐ to okyú ké bunyîn-dyityém ne ben.

²⁰ Nké â kyi*fí éné* kyi/bát okwâ obyí Abyímélek ké byiko o-shí banet-Shékem ne ḿbé Bét-Myílo. Kyi/bát okwâ obyí banet-Shékem ne ḿbé Bét-Myílo ké byiko o-shí Abyímélek.

²¹ Ne ké bubwô ḿbú nyǐ o/mû mu o-shî ng Abyímélek mú wǎn-boné emen, Jótam o/chêe o-jâ Bêe o-kûkyú áku.

²² Abyímélek o/kyú onet-dyishí-Ézerel ké aje achât.

²³ Osówo o-chi kâng Abyímélek ne banet-Shékem ba-kpet eshwôn ne barî, ba-bírî bunwa ne nyǐ.

²⁴ Ńkyín kyi/chi eringe nyí Abyímélek ne banet-Shékem ḿbé ba/fé ǎ busa o-ju bwǎn-Gyídyon bajam bachât esim diǐkpú, eringe nyǐ odari busông ké nkyí.

²⁵ Banet-Shékem ba-twóm banet ba-da-fé njât kyíbóng-eku eringe badakám Abyímélek. Banet ámbe ba/bam nang yeě nang yeě mú o/shwôm ányi byěm ba-koo. Ba-da-sét Abyímélek kyi-kim ne nkyí.

²⁶ Gâl mú wǎn-Ébet ne bwǎn-bané emen ba-dim kâng ba-bâ ké Shékem, ne banet-Shékem ba/fé dyityém ne nyǐ.

²⁷ Ba-dim ba-ca ké byifát ebe ba-da-bóng byirim-byichí, ba-kúng kámbyí ba-chi bato, ba-chi dyijî. Ba-dim ba-nung ké kyikit-kyifen echi ńkyí bukye ebe, ba-ryí byiryíng ányi ba-jwáp bato ba-kpet eware Abyímélek.

²⁸ Gâl o-raa o/fu, be byi-chi i ebóng banet něen ké Shékem. Ebóng ńkyí byimu byi-kyâ Abyímélek ofê. Nyǐ to yeě. Wǎn-Gyídyon. Zébul mu o-chi i ńkyí mú mǔ oda ǎ esét, nké aa be to byimu byi-kyâ ǎ ofê ebóng. Kû n̂g ekye Hámo mú bonchí enen mú kpákpá ofê, mú o/cen ne kyikim-kyikû-banet ńkyín kyi-firi.

²⁹ Kyi/mû kyi-nyîn n mě! â me nké m/mû onet-dyishí-banet ḿbén. M/mû n-chi i ba-man ne Abyímélek. [M/mû n-sét ng] ǎ n/fu, chîkoo basúja a-fé, a-byí a-bâ a-ba-nwa byití.

³⁰ Zébul, mú o/mû onet-dyishí-oshê ámu, kafâ ka/bírî ǎ ńdyí o/jwo ńkyí Gâl o/raa.

³¹ O-twóm banet-kyitwóm ba-ca kyikit-Abyímélek ké [Arúma,] o/fu, basét ǎ ba/fu, Gâl mú wǎn-Ébet ne bwǎn-bané emen baa/bajé Shékem, ne mbé baa*ba/chi ba-bángê ǒ a-nung ké oshê-Shékem*.

³² Ké bubwô ámbu kâng, wo ne banet eyên, dim m̂ ké buchú ba-ba-rem ké byifát.

³³ Bûu nensang nencí ké dyicófóróng â esû e-kú e-byí i a-ba-kye bunwa kiǐmút ké oshê. Â Gâl ne banet emen kâng ba/byí ba-bâ ebanwa ne wo, chi kámbé eringe nyí kyi/nyîn ǒ.

³⁴ Abyímélek ne banet emen ba-dim kâng ké buchú ba-ba-rem kyíjí ké oshê-Shékem, ba-kyii barî ké byikim byinyii.

³⁵ Nkéré mú Abyímélek ne banet emen ba/ri Gâl ké oo/byí o-ba-bwom ké ocím-dyifyi mú ké dyishí-bukwóp, ba-bûu nensang ké byikit ḿbyí ba/mû ba/rem.

³⁶ Gâl o-ri kámbé, o-raa ne Zébul o/fu, dǐi, banet baa/fím kyíbóng-eku mbe ba-shû ng ba-bâ. Zébul o-faa ǎ o/fu, *chí banet* biǐríribí nké mbyi éné kyíbóng-eku.

³⁷ Gâl o-chîraa o/fu, dǐi, banet nké mbe ba-shû ng éné ba-bâ kyíbóng-kaku, ne dyizu dyibónge mbe ba-bâ bukwóp búkwop ké kyichí-ôok ńkyí bansô epé.

³⁸ Zébul o-raa ne nyǐ kâng o/fu, ńkyí a/mû a-jang ng eraa kâng. Wo nké a/mû a/bí a/fu, ebóng ne byimu byi-kyâ onyinchéng mún ofê, mú odabángê Abyímélek. Nyín něen banet ḿbé a/mû a-jang ng eware kámbé. Byí kâng a-ca a-da-nwa ne mbé.

³⁹ Gâl o-kpî banet-Shékem ba-da-nwa ne Abyímélek.

⁴⁰ Gâl o-chêe, nké Abyímélek o/rim ne nyǐ ké kyikû. Ba-némê banet chwóó, nang ḿbé ba/mû baa/ribi ké ocím-dyifyi mú ké dyishí-bukwóp.

⁴¹ Abyímélek o-dim o-jâ ké Arúma, Zébul o-ró Gâl ne bwǎn-bané emen ké Shékem eringe nyí baa*kyú to ányi*.

⁴² Ké orî-dyicí, Abyímélek o-nyît o/fu, banet-Shékem ba/mû baa/nam ba/fu, mbé ba-byí i ba-ca ké byifát,

⁴³ ne o-kúng kâng banet emen o-kyii kámbé ké byikim byichât, ba-da-rem ké byifát mbe ba-bám m. Nkéré mú o/ri banet-Shékem mbe ba-byí i ké kafâ-oshê ba-bâ, o-byí ké kyikit ńkyí o/mû o/rem o-bâ kámbé ebaju.

⁴⁴ Ńdyí Abyímélek ne dyizu-banet emen ba/zóngê ba-bâ ebabám dyifyi ńdyí ké dyishí-bukwóp, byikim-banet ámbyi byifee ba/kye banet-Shékem bunwa ké byifát ba-ju kámbé ashí amúmú.

⁴⁵ Ba/nwa bunwa ámbu ké kyirim-dyicí. Abyímélek o-koo oshê ámu, o-ju banet ḿbé ba/mû ké mǔ, o-bú kámú o-pwó kyísí, o-yip bano o-pwó ké mǔ kángkáng.

⁴⁶ Nkéré mú kángkáng banet-ashí ḿbé ba/mû ké kiǐnyáám-kyikit-mbâm ba/jwo kyi-kim ne ńkyín, ba/nwa eringe mbé badachi ne ba-fem, ba-shwôm ba-nung ké kyikit-kyifen echi ńkyí bukye ḿbú badakó Bâl, ńkyí Ocím eryí.

⁴⁷ Ba-ba-sét Abyímélek ba/fu, ḿbé mbé baa/cibi áku,

⁴⁸ o-dim ne banet emen kâng o-yú kyíbóng-kaku ńké Zámon, nyǐ ne banet emen. O-yip dyikye o-két kyire-kyichí o-twôom ké kyikem. O-sét banet emen o/fu, bachi to éné babap.

⁴⁹ Nang yeě nang yeě kâng o/két to éné o-twôom. Ba-dim kâng ne nyǐ ké kyikû ba-da-zû ekwón ányi ké kyikit ńkyí banet ámbe ba/mû. Ba-fé okwâ ányi ne banet ḿbé mbe éné áku ké kafâ. Ne kángkáng banet ḿbé ba/mû áku ba-kpú. Banet ámbe ba-kyé ng eribi égot etánge, banyinchéng ne banyinyi.

⁵⁰ Abyímélek o-dim kâng o-wâa Tébez, o-wáp oshê ámu o-fé ké kafâ, o-koo kámú.

⁵¹ Kiǐnyáám-kyikit-mbâm kyi/mû ányi ńkyí nkyi kyi-shwane e, ne kángkáng banet ḿbé ké oshê, banyinchéng ne banyinyi ne banet-ashí, ba/chêe ba-da-nung ké nkyí. Ba-fín byiko ebe áku, ba-yú ba-jâ kyíbóng.

⁵² Nkéré mú Abyímélek o/bê ebakye bunwa ké kiǐnyáám-kyikit-mbâm ánkyi, o/dim o-ca ké dyifyi eringe odafé okwâ ké nkyí.

⁵³ Nké onyinyi obónge o/yip buká ḿbú badakwa byěm o-díp ǎ ké dyishí, dyishí kyi-sêe.

⁵⁴ O-kó okóng kâng mú wǎsíng-onyinchéng, mú o/mû mu o-kúng ng ǎ byěm-byití, o-sét ǎ o/fu, zú kashwám eyên a-ju mě. N*fí n-ryuu ng n/fu, ba-kûsét ba/fu, onyinyi nké o/ju mě*. Mú wǎsíng ámu kâng o-kpet ǎ o-ju.

⁵⁵ Nkéré mú banet-Ézerel ba/nyît ba/fu, Abyímélek oo/kpú, ba-bwa esim dyijê ashí kángkáng.

⁵⁶ Bukwóp ḿbún nké Osówo o/yip ne o-só Abyímélek ewa ké kyibî ńkyí o/chi ké bushú-bonchí emen, ké oju mú nyǐ o/ju bwǎn-bané emen bajam bachât esim diǐkpú.

⁵⁷ Osówo o/chi to banet-Shékem ba-ri busông ké dyityém ebe ńdyí ba/bên, wǎ eringe nyí Jótam mú wǎn-Gyídyon o/fu, ba/chi ba-ri, nkéré mú o/fé kyibî-nshwam o-kye kámbé.