Jójis 8 - Bokyi Bible

Nryî Esim-Dyikpóge mú ba/kpógê Banet-Médyan

¹ Banet-Éferem ba-raa kâng ne Gyídyon ba/fu, ebóng kyi/chi ne a*da bě ekó ńdyí a/dim edanwa ne banet-Médyan*. Ebóng kyi/chi ne a-chi bě dyizong-chwǒm ńdyín. Ba-raa kanong kanong kyi-kim ne nkyí.

² Nké nyǐ o/faa kámbé o/fu, ńkyí me n/chi, baa*kan ne ńkyí ben baa/chi*. Nang onyin mú ben banet-Éferem ba/chi o/rêe o-shwôm ńkyí kyikim-kyikû-banet ejí kyimúmú baa/chi.

³ Kan n̂ achi ba-ri, ké busa ḿbú Osówo, ben baa/ju batu-Médyan bafee, Otu Órep ne Otu Zêp. Me n/chi ebóng ńkyí badakúng ba-kan ne dyizong-chwǒm ándyi. Nkéré mú nyǐ o/raa ńkyín, kafâ ka*da/chîjang esa kámbé*.

⁴ Ké nkéré ámu, Gyídyon ne égot-banet emen ebónge ne kyicê baa/ribi ké kace ńké Jódan ba-nyáng ne onyâng. Mbé ba/mû baa/kyee, nké ba/mû ba/tôong ba-ró ng banet-bushwôn ebe.

⁵ Nkéré mú ba/ribi ké Súkot, o-raa ne banet-oshê ámu o/fu, kamgbe, kye n̂g banet ejí byirim-berêt. Mbé baa/kyee, ne me mu n-ró ng Otu Zéba ne Otu Zamúna ḿbé batu-Médyan.

⁶ Nké banet-ashí-Súkot ba/faa ba/fu, kyi-cen n nǎ ne be byi-kûkye basúja eyên byiryíng. Wo a*da/kám ne Otu Zéba ne Otu Zamúna*.

⁷ Gyídyon o-faa kámbé kâng o/fu, nkyi kanong, â nkéré mú Óburúkpâbí oo/kám Otu Zéba ne Otu Zamúna o-kye mě, n/chi m-mín běn ké byiwong.

⁸ Gyídyon o-shwôm o-ribi Pénwel o-chîbí banet ámbe wǎ eringe o/mû o/bí ḿbé áku. Nké banet ámbe ba/faa ǎ wǎ eringe banet-Súkot ba/mû ba/faa ǎ.

⁹ Nyǐ o-faa kámbé kâng o/fu, me m-bwa ng esim nyín nang chwǒm kii*chi mě*. Nké â m/bwa esim, n/chi m-bú kiǐnyáám-kyikit-mbâm enen m-pwó kyísí.

¹⁰ Otu Zéba ne Otu Zamúna ba/mû ké Káko ne basúja ebe. Ké bujê-basúja ḿbé kyikim-byikû-banet ḿbyí kyikim-dyikán, kyi*da/shwôm kyikíri égot-banet etánge etánge ké byikit onyiryiká nké ba/mû ba/waa*. Égot etánge etánge ké bajam-byikit nyâchât ba/mû baa/kpú.

¹¹ Gyídyon o-dim o-cen n o-câ ké bukwóp, ké ashí-kyikim-dyikán, ké kyicê ńkyí Nóba ne Jogbéha, ńkyí esû edabyí o-da-byí kámbé bunwa kiǐmút.

¹² Batu ámbe bafee, Otu Zéba ne Otu Zamúna, ba-chêe. Nké nyǐ o/rim ne mbé ké kyikû tete o-da-kám kámbé, o-chi basúja ebe ba-pwôo byiryibyiryi.

¹³ Nkéré mú Gyídyon o-kú o-fím m byití o-fyi ké bukwóp ḿbú budaribi kyikit ńkyí badayú kaku ké Héres,

¹⁴ o/kám wǎn-kyisat obónge mú o/fím Súkot, o-kpet ǎ ebí bǎmbím. Wǎn ámu o-sáng bajam-azîn bachât esim azîn onyiryiká ne afee kyísí, nyí banet-ashí-Súkot, o-kye Gyídyon.

¹⁵ Gyídyon o-dim kâng o-kâm banet-Súkot o-raa ne mbé o/fu, zîim m̂ kyi-kim ne ńkyí ba/mû ba/né mě echwáp. Ba/fu, ben baa*kye bakyikyee-basúja ejí byiryíng* ké nǎ, me n*da/kám ne Otu Zéba ne Otu Zamúna*. Kan n̂ achi ba-ri kámbé kâng.

¹⁶ O-yip kâng byiwong ne buchí ḿbú budashwane o-mín banet-ashí-Súkot.

¹⁷ O-bú kiǐnyáám-kyikit-mbâm ńkyí banet-Pénwel o-twóp kyísí, o-ju banet ḿbé ba/mû ké oshê ámu.

¹⁸ O-bí kâng Otu Zéba ne Otu Zamúna o/fu, banet ḿbé ba/ju kámbé kâng ké Tábo. Mbé ba-faa ǎ ba/fu, banet ámbe ba/bí ǒ, mbé ashí amúmú ba/mû wǎ bwǎn-otu.

¹⁹ Gyídyon o-faa kámbé o/fu, mbé ba/mû ba-chi i bwǎn-boné ejí, boné ejí nké o/fwon kámbé. Me mu n-ryí i ocím ké bushú ḿbú Óburúkpâbí n/fu, â ba*da/ju ne kámbé* me mm*ba/chi n-ju běn*.

²⁰ O-sét kâng Jéte mú ókpá emen o/fu, ca kashú a-man ne mbé. Nké mú wǎsíng o*da/zú kashwám emen ké nkwóp*. Nyǐ o*da/bángê echi* ké nǎ, nyǐ o/mû o/tôong wǎsíng.

²¹ Otu Zéba ne Otu Zamúna ba-raa kâng ne Gyídyon ba/fu, cen a-bâ, yip bubwô ḿbú eyên a-ju bě. Bǎmkpóngé ḿbé okínkán ba/já okínkán. Gyídyon o-ju kâng kámbé, o-pii boonyam-atû ebe biǐré-bukye ḿbyí ba/mû ba/fé kámbú ké kyitông.

²² Nkéré mú ńkyí ánkyi kii/shwôm, banet-Ézerel ba-raa ne Gyídyon ba/fu, wo nké adakyú otu eten, wo ne bwǎn eyên. Wo aa/nyii bě ké abwô nyí banet-Médyan.

²³ Gyídyon o-faa kámbé o/fu, me mm*ba/chi n-kyú otu enen* nang wǎn mú ejí*. Óburúkpâbí nké odakyú otu enen.

²⁴ Nké nyǐ o/chîraa o/fu, mîng mě m-bí běn ba-kye mě chwǒm kyibónge. Nang yeě nang yeě ké burwám enen okye mě boǒré-atông ḿbú o/yip. Banet-Médyan, wǎ eringe nyí banet bakíri ḿbé mbe ba-kyú u ké kyikim-dyikán, ba/mû ba-fâ boǒré-atông ḿbú gûl.

²⁵ Banet-Ézerel ba-faa ǎ ba/fu, be kyi-nyîn n bě ńkyí byida ǒ ekye kámbú. Ba-yip kyídí ba-tát kyísí, nang yeě nang yeě o/fé boǒré-atông ányi ḿbú o/mû o/koo.

²⁶ Boǒré-atông ḿbú Gyídyon o/koo bu/kúng bakyílogaram bujam ké burô. Ne byěm wǎ biǐré-bukye ámbyi ne byibwáng-kyitông ne byídí ḿbyí shíshét ḿbyí batu-Médyan ba/mû ba-fâ, nang emâp nyí ba/mû ba-fâ boonyam-atû ebe ké kyitông ba/mû ba*da/cibi kámbyí ányi*.

²⁷ Gyídyon o-yip gûl o-chi orím-bukye o-tî ké oshê emen mú Ófara. Banet-Ézerel kángkáng ba-né Osówo efé, ba-kûce áku ba-da ng efé orím-bukye ámu. Orím-bukye ámu o/mû kaǎtám ńké Gyídyon ne kyikû-banet emen.

²⁸ Banet-Ézerel ba/kpógê banet-Médyan kâng, ne mbé ba/mû ba*fí to kámbé chwǒm-bushî*. Esí ányi e/kyú ké bunyîn-dyityém ké bajam-aje bafee tete Gyídyon o-kpú.

Bukyû ḿbú Gyídyon

²⁹ Gyídyon o/bwa esim ké oshê emen o-kûkyú ányi.

³⁰ Nyǐ o/mû ne bajam-bwǎn-banyinchéng bachât esim diǐkpú, ké nǎ, nyǐ o/mû ne banyi chwóó.

³¹ Nyǐ o/mû to ne onyi mú wǎsíng obónge ké Shékem mú o/fwon ǎ wǎn-onyinchéng, o-fé ǎ dyizîn, Abyímélek.

³² Gyídyon o/kpú ké nkéré mú oo/kán o-kwárê, ne ba/ryii ǎ ké dyikun ńdyí bonchí emen Jówashi, ké Ófara, oshê mú mu ké esí nyí Abyǎza.

³³ Nkéré mú Gyídyon oo/kpú, banet-Ézerel ba/chîchi kyibî ké bushú ḿbú Osówo, ba-kye Bâl ofê. Mbé ba/chi Bâl mú Ocím eryí ebe o-firi bukye ebe,

³⁴ ba-mîng Óburúkpâbí mú Osówo ebe ofê ekye, mú o/nyii kámbé ké abwô nyí banet-bushwôn ebe bamúmú ḿbé ba/wáp kámbé ba-fé ké kafâ.

³⁵ Mbé ba*da/chi kyikû-banet ńkyí Gyídyon kanong* ké kángkáng kanong ńké o/chi o-kye banet-Ézerel*.