Jójis 7 - Bokyi Bible

Gyídyon o/kpógê Banet-Médyan

¹ Dyicí dyibónge, Gyídyon ne banet emen kángkáng ba/bûu ké dyicófóróng ba-da-bi bampyep-byití ebe fáráng ne kace ńké nke ka-byí i ké mbwo, ké kyikit ńkyí badakó Hárot. Bampyep ḿbé banet-Médyan ba/mû ké owo ké kyicê-bushûyû ebe, ké kaku ńké Móre.

² Óburúkpâbí o-raa ne Gyídyon o/fu, banet ḿbé mbe ne wo ké kyikû ba/jang ejê ba-shwôm mú me nda ǒ echi a-kpógê banet-Médyan. Mbé ba-kû ng ekabe ba/fu, mbé ba/kpógê banet-Médyan ké kakim ńké ebe, ne ké bubwô ámbu, me mm*ba/chi n-koo dyizîn*.

³ Sét kámbé a/fu, nang yeě mú mu o-shî ng, obwa esim dyijê, be byi-waa kwán ké kaku ńké Gyílet. Ńkyí o/raa éné kâng, égot-banet bajam batánge esim diǐkpú ba/bwa esim dyijê, nké égot-banet bajam bafee esim diǐkpú ba/waa.

⁴ Óburúkpâbí o-raa kâng ne Gyídyon o/fu, banet ba/tôong chwóó ba-shwôm. Kpî kámbé ba-ca ké kace, me n/chi n-kyii ǒ kámbé áku. Â n/sét ǒ n/fu, onet mún oca ne wo, onet ámu o/chi o-ca. Â n/sét ǒ n/fu, onet mún o*dachi o-ca* nyǐ oo*ba/chi o-ca*.

⁵ Gyídyon o-kpî kámbé kâng ba-dim ké kace. Óburúkpâbí o-raa ne nyǐ o/fu, nang yeě nké o/rû omu ké kabyíbabang wǎ kabyî, cá ǎ a-tî cát ne nang yeě mú o/tím arông emen kyísí ne o-jwáp omu.

⁶ Égot-banet e/mû ebónge ne kyicê ḿbé ba/tó omu ké abwô ba-rû, ḿbé áku ashí amúmú ba/tím arông kyísí ne ba-jwáp omu.

⁷ Óburúkpâbí o-raa ne Gyídyon o/fu, me n/chi n-nyii ǒ n-chi ǒ a-kpógê banet-Médyan ne égot-banet ányi ebónge ne kyicê ḿbé ba/rû omu orúng. Sét nang yeě nang yeě mú áku o-bwa esim dyijê.

⁸ Gyídyon o-sét kâng banet ámbe ashí amúmú ba-bwa dyijê, ḿbé égot ebónge ne kyicê ba-waa, ḿbé mbe ba-tún n byěm-byití ne bantán. Bampyep ḿbé banet-Médyan ba/mû kámbé kyísí ké owo.

⁹ Ké buchú ámbu, Óburúkpâbí o/sét Gyídyon o/fu, bûu nensang a-da-kye kámbé bunwa. Me mu n-chi i ǒ a-kpógê kámbé.

¹⁰ Nké â amu a-shî ng kámbé bunwa ekye, wo ne ḿgbán eyên mú odabángê Púra, dim m̂ ba-shû ba-ca áku.

¹¹ A/chi a-jwo ńkyí mbe ba-raa ng, kyi-fím ányi kâng dyityém dyi/chi dyi-rêe ǒ ńdyí adakye kámbé bunwa. Gyídyon ne ḿgbán emen ámu ba-shû kâng ba-ca áku ké otáng-bampyep-banet-bushwôn ebe.

¹² Banet-Médyan ne ḿbé Amálek ne byikû-banet ḿbé mbe ba-kyú u ké kyikim-dyikán baa/pwôo ké owo ámu byiryibyiryi wǎ agurubí, ne ba/mû to ne boonyam-atû éné wǎ éshíshě nyí ké bukô-baya.

¹³ Nkéré mú Gyídyon o/ribi, o/jwo onet obónge mu o-sét ng ocín emen burê ḿbú o/ri. Nyǐ o/mû mu o-sét ng ǎ o/fu, n/ri burê éné wǎ kyirim-berêt kyi/bírî kyi-ba-nung ké kyikit ńkyín, kyi-díp mpyep obónge. Mpyep ámu o-myii o-waa ányi kyísí.

¹⁴ Ocín emen ámu o-faa ǎ o/fu, ányi kashwám ńké Gyídyon mú wǎn-Jówashi, mú mu onet-Ézerel. Burê ámbu bu*da/byí chwǒm kyikíri*. Osówo oo/chi ǎ o-kpógê banet-Médyan ne basúja eten to bamúmú.

¹⁵ Nkéré mú Gyídyon o/jwo kyi-kim ne burê ḿbú onyinchéng ámu o/ri, ne dyishí emen to, o-tím arông kyísí o-fé Osówo. O-bwa kâng esim ké bampyep ḿbé banet-Ézerel o-raa ne mbé o/fu, bûu n̂g nensang. Óburúkpâbí o-kú o-chi i běn ba-kpógê basúja-Médyan.

¹⁶ O-kyii égot-basúja emen ányi ebónge ne kyicê ké byikit byichât, o-kye nang yeě nang yeě ntán ne katí ne buka ké kafâ-katí ánke.

¹⁷ O-sét kámbé o/fu, â n/ribi ké otáng-bampyep, kpúrî n̂g mě, ba-chi ńkyí ndachi.

¹⁸ Â nkéré mú me ne banet ḿbé mbe ne me byi/jwá bantán eten, ben to kâng jwá n̂g ḿbé enen ba-wáp bampyep ebe, ba-wonge ba-kó Óburúkpâbí ne me.

¹⁹ Gyídyon ne bajam-banet emen batánge ba-da-ribi ké otáng-bampyep ányi kyirê-buchú kyi-kú kyi-bâ efyi, ńdyí ba-yángê e banet-mbâm ba-bâ. Ba-jwá kâng bantán ba-sé butí ḿbú ba/mû ba/kám,

²⁰ byikim-banet ḿbyí áku byifee ba-chi to éné. Ba-níbî baka ké bubwô-eku, bantán ké bubwô-etyebéng, ba-wonge ba/fu, be byi/yip kashwám ké bubwô ḿbú Óburúkpâbí ne ḿbú Gyídyon.

²¹ Nang yeě nang yeě o-bwom cip ké kyikit ńkyí emen ba-wáp bampyep ámbe ba-fé ké kafâ, basúja bamúmú ḿbé banet-bushwôn ebe ba-díp ne ochéé ba-wonge e ba-câ.

²² Nkéré mú Gyídyon ne banet emen mbe ba-jwá ng bantán éné, Óburúkpâbí o-chi basúja ámbe ba-kye barî bunwa ne bushwám ebe. Ba-zóngê ba-jâ ḿbú Zárétan tete ba-ribi Bét-Shíta, tete ba-ribi oshê-Ébel-Mehóla, fáráng ne Tábat.

²³ Ne ba-twóm kâng ba-kó byikim-kyikû-banet ḿbyí Nafatályi ne Ásha ne byikû-banet-Manáse byimúmú, ne ba-rim ne banet-Médyan ké kyikû.

²⁴ Gyídyon o-twóm banet-kyitwóm ba-ca ké esí nyí Éferem, nyí eku éku, o/fu, basét kámbé ba/fu, bashû ba-bâ ba-ba-nwa ne banet-Médyan. Babwom ké Jódan ne ké buce tete ba-ribi Bét-Bára eringe nyí banet-Médyan baa*man enyáng*. Ba-kó banet-Éferem ba-ba-cibi, ba-da-tim bukwóp ḿbú Jódan ne buce tete ba-ribi Bét-Bára.

²⁵ Ba-kám batu-Médyan bafee, Otu Órep ne Otu Zêp. Ba-ju Otu Órep ké buká-Otu Órep, ba-ju to Otu Zêp ké kyikit-Otu Zêp ńkyí badanwárê byirim-byichí ba-chi bato. Ba/wâa ba-ró ng banet-Médyan ba-câ, ba-yip dyishí-Otu Órep ne ńdyí Otu Zêp ba-ba-kye Gyídyon ké kyicê-Jódan ńkyí esû edabyí, ké kyikit ńkyí o/mû.