Jójis 6 - Bokyi Bible

Gyídyon

¹ Banet-Ézerel ba/chîchi kyibî ké bushú ḿbú Óburúkpâbí. Óburúkpâbí o-mîng kâng banet-Ézerel ba-firi ké abwô nyí banet-Médyan ké aje káchâtkányi.

² Banet ámbe ba/mû ba-kú ba-shwane e ba-shwôm banet-Ézerel. Ne banet-Ézerel ba-kpet erem ké bacim ne ké byikit byikíri ké eku ḿbyí chwǒm kii*chi kámbé*.

³ Nang nkéré orá nké banet-Ézerel ba/kwón esang-byichí nang erá, banet-Médyan ba-bâ ne ḿbé Amálek ne ḿbé byikû-banet ḿbyí mbe ba-kyú u ké kyikim-dyikán ba-ba-kye kámbé bunwa.

⁴ Ba-bâ ng ebi bampyep ké esí ányi, ḿbé badabi ké kyídí, ba-bên esang-byichí ányi tete ba-ribi tíbítíbí ké kyicê ńkyí busyísen, ké esí nyí e/fárâng ne Gáza. Ba-yip ng byitú byimúmú, etám-ebû ne bampong ne boonyam-atû, ba-mîng kámbé abwô ábwo.

⁵ Ba-bâ ne byitú ebe ne bampyep ebe ḿbé badabi ké kyídí wǎ agurubí. Onet o*fí mú odaman epan kámbé ne boonyam-atû ebe*. Ba/bê ba-ba-bên esí ányi,

⁶ ne onet o/mû o*fí mú odachwáp banet-Ézerel ké abwô ebe*.

⁷ Banet-Ézerel ba-tii kâng ba-kó Óburúkpâbí ba/fu, ochwáp kámbé ké abwô-banet-Médyan.

⁸ Ne nyǐ o-twóm kámbé kâng mkpábé mú odasét byiraa emen, mú o/basét kámbé kyitwóm ńkyín, ńkyí kyi/fím ké abwô nyí Óburúkpâbí mú Osówo-Ézerel. O/fu, me nké n/chi běn ne ba-byí ké búsóng, ké Éjip.

⁹ Me n/nyii běn ké abwô nyí banet-Éjip ne nyí banet ḿbé ba/mû mbe ba-nwa ng ne ben nyín ké esí ńnyín. Me n/ró kámbé ba-chêe ńdyí ben bamu ba-bâ, ne me n/kye běn ben esí ebe.

¹⁰ Me n/sét běn n/fu, me n-chi i Óburúkpâbí mú Osówo enen, n-sét běn to n/fu, ben *da n̂g echi ba-kûkye erím-bakye nyí banet-Ámórit ofê* banet ḿbé ben bamu ba-kyú u ké esí ebe kántîk. Nké ben ba*da/jwo ńkyí me n/sét běn*.

¹¹ Orím mú onong mú Óburúkpâbí o-dim kâng o-bâ ké kaǎshê ńké badakó Ófara, o-ba-kyú ké busi-kyichí ńkyí badakó ôok. Kyichí ánkyi kyi/já Jówashi mú o/fím ké kyikim-kyikû-banet ńkyí Abyǎza. Wǎn emen Gyídyon o/mû mu o-cím m esang-byichí ké kadip, ké kyikit ńkyí badachi bato, eringe nyí banet-Médyan baa*ri ǎ*.

¹² Orím mú Óburúkpâbí o-byí o-kâm ǎ ányi, o-raa ne nyǐ o/fu, Óburúkpâbí mu ne wo, wo a-chi i okân-onet ne a/rêe to kanong kanong.

¹³ Gyídyon o-faa ǎ o/fu, â nang m/bí kâng, ǎ bonchí n/fu, ebóng kyi/chi ne kángkáng byěm ḿbyín byi-chi bě, â Óburúkpâbí mu ne be. Kyi-kim to kâng ne kángkáng biǐtí-akat-byěm ḿbyí banchí eten ba/sét bě ba/fu, Óburúkpâbí o/mû mu o-chi i, eringe nyí o/fîm kámbé ba-byí ké Éjip. Óburúkpâbí oo/né bě o-mîng bě ké abwô nyí banet-Médyan.

¹⁴ Óburúkpâbí o-sét ǎ kâng o/fu, ca ne kiǐtí-busa eyên ánkyi kyimúmú a-da-nyii banet-Ézerel ké abwô-banet-Médyan. Me oyén nké mu n-twóm m ǒ.

¹⁵ Gyídyon o-faa ǎ o/fu, nké me n-cen n nǎ ne n-nyii banet-Ézerel. Kyikim-kyikû-banet ejí nké mbe ba-jwâa ng ba-shwôm kángkáng banet ké kyikû-banet ńkyí Manáse, ne me to nké mu nryî esim-onet ké kyikû-banet ejí.

¹⁶ Óburúkpâbí o-faa ǎ o/fu, wo a-man n echi kánkyí, ké nǎ, me n/chi n-chwáp ǒ. Wo a/chi a-ju banet-Médyan nang osông kii*sóng ǒ* wǎ a/ju onet obónge.

¹⁷ Gyídyon o-faa ǎ o/fu, â dyityém ndyi dyi-nyîn n ǒ ne me, tông mě ekap nyí edatông e/fu, wo a-chi i Óburúkpâbí ké ntûntû.

¹⁸ Kamgbe, *dachi a-dim* tete m-ba-kye ǒ byiryíng. Óburúkpâbí o-faa ǎ o/fu, n-kyú u nyín tete a-bwa esim.

¹⁹ Gyídyon o-dim kâng ké kyise emen o-da-rám kyisu-ebû, o-yip nkôp-filáwa o-chi berêt mú oo*mut*. O-yip enyam-ebû ányi o-fé ké kaakye, o-fé kasu emen ké katí, o-kúng o-ba-kye orím-Óburúkpâbí ámu ké busi-kyichí.

²⁰ Orím ámu o-sét ǎ o/fu, twôom enyam ányi ne berêt ké buká ḿbún, a-yip kasu ánke a-pwó ké mbyí. Gyídyon o-chi éné.

²¹ Orím ámu o-yip dyishí-ochí mú o/mû o/kám ké bubwô o-ta byěm ámbyi. Okwâ o-byí ké buká ámbu o-shí byěm ámbyi. O-waa ányi kâng o-rím.

²² Gyídyon o-waa o-nyît kâng o/fu, orím-Óburúkpâbí nké nyǐ o/ri éné, o-faa kâng ne bushî o/fu, Óburúkpâbí mú mu Otu Kyítá, me nn/kwárê kashú ejí ne orím eyên.

²³ Nké Óburúkpâbí o/faa ǎ o/fu, bunyîn-dyityém bukyú ne wo, *dashî*. Chwǒm kii*chi ǒ*.

²⁴ Gyídyon o-bi kyikit-kyifen-Óburúkpâbí echi ányi, o-fé kánkyí dyizîn o/fu, Óburúkpâbí, ányi Bunyîn-Dyityém. Kyi/tôong áku ké Ófara mú o/já kyikim-kyikû-banet ńkyí Abyǎza.

²⁵ Ké buchú ámbu, Óburúkpâbí o/sét Gyídyon o/fu, yip [otyép-mpong-bonchí eyên ne obónge to mú oo/rí aje káchâtkányi.] Bú kyikit-kyifen echi ńkyí bonchí eyên o/bi o-tî bukye ḿbú badakó Bâl, a-twom to kiinchéng-bukye ńkyí badakó Ashéra, ńkyí nkyi ányi fáráng ne Bâl.

²⁶ Bi kyikit-kyifen echi ńkyí Óburúkpâbí mú Osówo eyên, ńkyí kyinong kyinong ké dyizu-byěm ḿbyí a/bú éné. A-yip kâng [otyép-mpong mú obónge] a-shí kámú kángkáng ké kyifen echi, a-yip kiinchéng-bukye ńkyí a/twom éné a-fé ké okwâ wǎ ekwón.

²⁷ Gyídyon o-yip kâng bǎmgbán emen ashí diǐkpú ba-chi wǎ eringe Óburúkpâbí o/sét ǎ. Nyǐ o/mû mu o-shî ng banet emen ne ḿbé oshê kanong kanong eringe nyí odachi byěm ámbyi ké esû, ké bubwô ámbu, o/chi kámbyí ne buchú.

²⁸ Nkéré mú banet-oshê ba/jwóbê ké dyicófóróng, ba/ri ba/fu, kyikit-kyifen ńkyí Bâl ne kiinchéng-Ashéra baa/twom ba-twóp, ba-ri to ba/fu, nnyinyěng-otyép-mpong baa/shí kámú ké kyikit-kyifen echi ńkyí baa/bi ányi.

²⁹ Ba-kpet ebí barî ba/fu, yeě o/chi ńkyín. Ba-kyé kyikû tete ba-nyît ba/fu, Gyídyon mú wǎn-Jówashi nké o/chi kánkyí.

³⁰ Ba-raa kâng ne Jówashi ba/fu, bâ ne wǎn eyên kwán eringe nyí byida ǎ eju. Nyǐ nké o/bú kyikit-kyifen echi ńkyí Bâl o-twom to kiinchéng-Ashéra ńkyí kyi/mû ányi.

³¹ Nké Jówashi o/raa ne banet ḿbé ba/mû mbe ba-raa ng ne nyǐ éné o/fu, ben nké badaraa ba-kye Bâl dí. Ben nké badasét ké ocím mú emen dí. Nang yeě nké o/bwom o/fu, nyǐ o-raa ng o-kye ǎ, oyén o-man o-kpú ne dyicí dyi-kûcé. Â Bâl o-chi i osówo, mîng n̂g ǎ o-nyii byiko emen. Ba/bú kyikit-kyifen echi ńkyí emen.

³² Kyi-fím ké dyicí ándyi kyi-ca kashú, ba/kpet ekó Gyídyon Jérubâl, ké nǎ, bonchí emen o/fu, mîng n̂g Bâl o-nyii byiko emen, ké nǎ, kyikit-kyifen echi emen nké ba/bú.

³³ Banet-Médyan kâng ne ḿbé Amálek ne byikû-banet ḿbé mbe ba-kyú u ké kyikim-dyikán ba-cibi barî, ba-nyáng Jódan, ba-ba-bi bampyep-byití ebe ké owo mú Jézerel.

³⁴ Busa ḿbú Busun ḿbú Óburúkpâbí bu-nung Gyídyon ké byiko, o-jwá ntán eringe odakó banet ḿbé ba/fím ké kyikim-kyikû-banet ńkyí Abyǎza ba-ca ne nyǐ ké kyikû.

³⁵ O-twóm banet-kyitwóm ba-ca ké esí nyí Manáse emúmú eringe nyí badadakpî kámbé ba-dim ne nyǐ ké kyikû. O-twóm banet kyikit-byikû-banet ḿbyí Ásha ne Zébélon ne Nafatályi, ba-dim to ba-bâ ǎ ebakâm.

³⁶ Gyídyon o-raa kâng ne Osówo o/fu, wo a/sét a/fu, wo aa/tî a/fu, wo a-kúng ng mě me a-chi banet-Ézerel ba-fem.

³⁷ Ké bubwô ámbu kâng, me mu m-bâ ebatát dyíyú nyín kyísí ké kyikit ńkyí byidacage esang-byichí. Ké dyicófóróng, â n/ri kyibû ké dyíyú nké nke, kyísí kyi*fí* fím ányi n/chi n-nyît n/fu, wo a-kúng ng mě a-chi banet-Ézerel ba-fem.

³⁸ Éné to nké kyi/chi ké ntûntû. Nkéré mú Gyídyon o/jwóbê ké dyicófóróng, o/nwárê dyíyú ándyi, kyibû kyi-byí kanong kanong ńkyí kyidasú kaǎcáng-omu.

³⁹ Gyídyon o-raa kâng ne Osówo o/fu, *dachi a-sa kafâ ne me* mîng mě n-chîraa kampén kabónge. Kamgbe, mîng mě n-chîchi nkan obónge ne dyíyú ńdyín. Katáng ńkén, mîng dyíyú dyi-waa yéyé, esí e-cok.

⁴⁰ Ké buchú ámbu, Osówo o/chi ochíchí-chwǒm ámu. Ké dyicófóróng, dyíyú dyi/waa yéyé, nké esí e/cok kyibû.