Jójis 5 - Bokyi Bible

Okwan mú Dyibóra ne Bérek ba/kwán

¹ Ké dyicí ándyi, Dyibóra ne Bérek ba/kwán okwan mún.

² Ba/fu, kpee n̂g Óburúkpâbí. Banet-Ézerel ba/tigi ne dyityém ba/fu, mbé ba-nwa ng byití. Banet-Ézerel ba/bángê abwô afee ne bunyîn-dyityém.

³ Fwôo n̂g atông ba-jwo, ǎ batu. Tî n̂g atông ba-jwo, ǎ banet-ashí. Me n/chi n-kwán okwan, me n/chi n-kim ane n-kye Osówo-Ézerel mú mu Óburúkpâbí.

⁴ Óburúkpâbí, nkéré mú wo a/mîng eku nyí Sêe, nkéré mú a/byí ké esí nyí Édom, esí e/ninge, ne omu o/fím kyíbóng o-na. Âa, nkyi éné, omu o/fím ké éfíbí o-pwôo kyísí.

⁵ Eku e/náng ké bushú ḿbú Óburúkpâbí mú Sána, ké bushú ḿbú Óburúkpâbí mú Osówo-Ézerel.

⁶ Ké ací nyí Shámaga mú wǎn-Ánat, ké ací nyí Jâl, bujê-banet ba*da/chînyáng ké esí nyí Ézerel* ne bancen bucen ba/cen ké akwóp nyí bukô.

⁷ Banet ba/jaa ké eshê nyí Ézerel, nyǐ [e/waa kafâ dyikáá tete wo a-bâ, ǎ Dyibóra,] wǎ boné mú Ézerel.

⁸ Ne byití byi-róng kâng ké esí nkéré mú banet-Ézerel ba/cá erím-bakye. Ké égot-banet-Ézerel égot égot, ké bajam-byikit bafee, onet nang obónge o/kúng édem dí, nang kyíbye dí.

⁹ Dyityém ejí ndyi dyi-nyîn n mě ne banet ḿbé ba/bángê abwô afee ne bunyîn-dyityém. Kpee n̂g Óburúkpâbí. [

¹⁰ Sét n̂g kyi-kim ne nkyí,] ben ḿbé bamu ba-yú u ké boonyam-atû ḿbú kpárádádát, ḿbé bamu ba-kyú u ké bukyúng, ne ben to ḿbé badaman ba-cen ké byiká.

¹¹ Fwôo n̂g atông ba-jwo, bujê-banet ḿbé mbe ba-chi i kyicoge ké ajwáng-buce, mbe ba-sét ng kyi-kim ne dyikpóge ńdyí Óburúkpâbí, dyikpóge ńdyí banet-Ézerel. Banet-Óburúkpâbí [ba-fím kâng ké eshê ebe] nyí ba/bi kyíbóng-eku ba-cen ba-bâ kyísí.

¹² Ca bě kashú, ǎ Dyibóra, ca bě kashú. Ca bě kashú. Kwán okwan. Ca bě kashú. Ca kashú, ǎ Bérek. Kpî banet eyên ḿbé ba/kám kámbé ké byití.

¹³ Banet ḿbé ba/fé dyityém ne Óburúkpâbí ba-shû kâng kyísí ba-ba-kâm banet-ashí ebe. Banet ḿbé Óburúkpâbí ba/bê ba-kâm [ǎ] ne byiko kpákpá ḿbyí byití enwa. [

¹⁴ Ba/fím] ké oshê-Éferem ba-bâ [ké owo,] ba/bê kyikû-banet-Běnjámin ne banet emen ké kyikû. Banet-ashí-basúja ba/fím ké Mákyi ba-shû kyísí, banet-ashí ba-fím ké oshê-Zébélon ba-shû kyísí.

¹⁵ Banet-ashí-Ézaka ba/bê ne Dyibóra ké kyikû. Âa, nkyi éné, Ézaka o/bê ne Bérek to, ne ba/dim ne nyǐ ké kyikû ké owo. Nké kyikû-banet ńkyí Rúben ba/kyii barî, mbé ba*da/man etóbê eringe nyí mbé badabê*.

¹⁶ Ebóng kyi/chi ne mbé ba-waa áku ké esim ne etám-ebû eringe nyí mbé badajwo ejá nyí bambâm ebû mbe ba-kó ng. Âa, nkyi éné, banet ḿbé kyikû-Rúben ba/kyii barî. Mbé ba*da/man etóbê eringe nyí mbé badabê*.

¹⁷ Banet ḿbé ba/fím ké kyikû ńkyí Gât ba/waa ké kyicê ńkyí esû edabyí ké kace ńké Jódan, ne banet ḿbé ba/fím ké kyikû ńkyí Dǎn ba/waa áku ne bǎnsukyíkang. Banet ḿbé ba/fím ké kyikû ńkyí Ásha ba/waa áku ké eshê nyí e/fárâng ne baya ḿbé Medeterényan, mbé ba/waa ké bukô-baya.

¹⁸ Nké banet ḿbé ba/fím ké kyikû-Zébélon ne ńkyí Nafatályi ba/nángê ba-kye akpen ebe ké byití.

¹⁹ Ké Tának, fáráng ne kace ńké badakó Megído, batu ba/banwa byití ányi. Batu ḿbé Kínan ba/nwa, nké mbé ba*da/man ekúng syílyíba ba-dim ne mǔ*.

²⁰ Ékpére e/bwom kyíbóng e-nwa bunwa, nkéré mú e/cen e-nyáng bubóng, e/nwa byití ne Sisárá.

²¹ Kace ńké Kyíshon ka/sú ka-kúng kámbé, kace-Kyíshon ńké kadashwane. Me n/chi n-cen n-ca kashú wǎ súja ne busa.

²² Bubyî-orá bu-fím m kâng bu-zóngê e bu-bâ, bu-cím m esí bu-bâ.

²³ Orím mú onong mú Óburúkpâbí o-raa o/fu, shú Méroz kyishû, kyishû kyikyú ne banet ḿbé mbe ba-kyú u áku. Mbé ba*da/bê ba-ba-chwáp Óburúkpâbí* ba*da/bê wǎ basúja ba-ba-nwa bunwa ba-kye ǎ*.

²⁴ Onyinyi mú byiko byi/nwa ǎ byi-shwôm kángkáng banyinyi o-bángê e Jâl, onyi-Hébe mú o/fím Kên, nyǐ nké byiko byi/nwa ǎ byi-shwôm kángkáng banyinyi ḿbé mbe ba-kyú u ké bampyep.

²⁵ Sisárá o/bí o/fu, okye ǎ omu o-jwáp, nké nyǐ o/kye ǎ abî-mpong. Nyǐ o/ba ǎ ekye abî-mpong nyí aa/bírî bafwám ké dyicáng ńdyí dyinong dyinong.

²⁶ O/yip kyíkîm ńkyí badabi mpyep ké bubwô bubónge, o-yip áma nyí badachi bǎmkpóngé ké bubwô ḿbú bubónge. O-díp Sisárá kiǐfâa-dyishí kyi-sêe rugirugi, o-tím ǎ chwǒm ké dyishí kyi-sát.

²⁷ O-zû arông kyísí, o-myii kyísí o-waa ǎ ányi ké byiká. O/zû ǎ ké byiká ne arông emen kyísí o-myii, o-róng ányi kyísí o-kpú.

²⁸ Boné-Sisárá o-tún achi ké wíndu, [o-jebe achi] ké esim-byichí-wíndu. O-bí o/fu, ebóng kyi/chi ne mútu emen mú bubyî-orá budatut o*fí o-wá ng efyi*. Ebóng kyi/chi ne bubyî-orá emen bu*fí bu-wá ng efyi*.

²⁹ Ásé emen nyí adajang enyît kyiraa ba-faa ǎ, ne nyǐ o-kpet epem ne dyityém o-câ kashú, o/fu,

³⁰ mbé mbe obéng ba-kyé ng byěm ḿbyí badakoo ba-kyii barî. Súja ne súja ne wǎn-onyinyi, okíri bafee. Sisárá oyén o-já ng byídí ḿbyí byinong byinong nang ḿbyí ba/tím kanong kanong, ḿbyí [onyi-otu] odafé ké kyitông.

³¹ Kyi/bát kángkáng banet-bushwôn eyên bakpú éné, ǎ Óburúkpâbí. Nké kyi/bát bacín eyên basan wǎ óbyísû-dyicófóróng. Ne bunyîn-dyityém bu-nung kâng ké esí-Ézerel ányi ké bajam-aje bafee.