Jójis 4 - Bokyi Bible

Dyibóra ne Bérek

¹ Ńdyí Éhut oo/kpú, banet-Ézerel ba/chîchi kyibî ké bushú ḿbú Óburúkpâbí.

² Ké bubwô ámbu kâng, Óburúkpâbí o/mîng Otu Jábyin o-kpógê kámbé, nyǐ o/mû otu mú Kínan. O/mû o-kyú u ké Házo. Onet mú o/mû onet-dyishí-basúja emen o/mû o-bángê e Sisárá, nyǐ o/mû o-kyú u ké oshê mú Haróshet, mú o/já banet ḿbé ba*fí banet-Ézerel*.

³ Jábyin o/mû ne égot-bamútu enyii ne bajam batánge ḿbé ba/chi ké biǐré, ḿbé bubyî-orá budatut, ne nyǐ o/cít banet-Ézerel ne kyibî-dyityém ké aje bujam. Banet-Ézerel ba-tii kâng ba-kó Óburúkpâbí ba/fu, ochwáp kámbé.

⁴ Dyibóra kâng mú onyi-Lápyídot o/mû mkpábé mú odasét byiraa-Osówo, ne nyǐ o/mû mu o-chi i bǎmkpóngé wǎ mpan bampan mú banet-Ézerel.

⁵ O/mû mu o-fwam m ekyú ké kyikû-buyêp bubónge ké otyém ne otyém mú eshê nyí badakó Ríma ne Bétel, ké esí-Éferem nyí eku éku. Banet-Ézerel ba/mû mbe ba-câ áku o-pan n kámbé bampan.

⁶ Dyicí dyibónge, o/twóm o/fu, Bérek mú wǎn-Abyínwam, mú mu o-kyú u ké oshê-Kédeshi ké esí nyí Nafatályi obâ. O-sét ǎ o/fu, Óburúkpâbí mú Osówo-Ézerel nké o/raa ńkyín. O/fu, wo ayip égot-banet bajam bafee esim diǐkpú ké kyikû-banet ńkyí Nafatályi ne ńkyí Zébélon ba-kpî kámbé ba-ca ké kaku-Tábo.

⁷ Nyǐ o/chi o-bâ ne Sisárá mú onet-dyishí-basúja-Otu Jábyin o-ba-nwa ne wo ké kace ńké Kyíshon. Ne o/chi o-bâ ne basúja emen ne bamútu emen ḿbé bubyî-orá budatut, nké me n/chi n-chi ǒ a-kpógê ǎ.

⁸ Bérek o-faa kâng o/fu, me n-câ, â a/ce ne me ké kyikû. Nké â wo a*da/ce* me to nn*ce*.

⁹ Dyibóra o-faa o/fu, nkyi kanong, me n-câ ne wo ké kyikû, nké aa*ba/chi a-ryí mpún ké dyikpóge ándyi* ké nǎ, Óburúkpâbí o/chi o-níbî Sisárá o-kye onyinyi. Dyibóra ba-dim kâng ḿbú Kédeshi ne Bérek.

¹⁰ Bérek o-kó banet ḿbé ba/fím ké kyikû ńkyí Zébélon ne ḿbé Nafatályi ba-dim Kédeshi. Égot-banet bajam bafee esim diǐkpú ba-dim ne nyǐ ké kyikû. Dyibóra to o-dim ne nyǐ.

¹¹ Ké nkéré ámu, Hébe mú o/fím Kên o/mû oo/bi mpyep emen mú badabi ké kyídí jwángjwáng ne Kédeshi, fáráng ne kyichí ńkyí badakó ôok, ké Zánanim. Nyǐ o/mû oo/pap banet-Kên ḿbé áku, ḿbé ba/fím ké kyikû ńkyí Hóbap mú wǎn-boné-onyi-Músis.

¹² Nkéré mú Sisárá o/jwo ba/fu, Bérek oo/dim kyíbóng-kaku-Tábo,

¹³ o-kó o/fu, babâ ǎ ne égot-bamútu emen enyii ne bajam batánge ḿbé bubyî-orá budatut, ḿbé ba/chi ké biǐré, ne kángkáng banet emen to, o-twóm kámbé ba-dim ké Haróshet, oshê mú o/já banet ḿbé ba*fí banet-Ézerel* ba-dim ba-wâa ḿbú kace ńké Kyíshon.

¹⁴ Dyibóra o-raa kâng ne Bérek o/fu, cen a-ca, Óburúkpâbí mu ǒ ké kashú. Kurún, oo/chi ǒ a-kpógê Sisárá. Bérek o-shû kâng kaku-Tábo ne basúja emen ámbe.

¹⁵ Nkéré mú Bérek ne basúja emen ba/kye bunwa, Óburúkpâbí o-chi Sisárá o-firi yógeyóge, cibicibi ne kángkáng bamútu emen ámbe ne banet emen. Sisárá o-shû ké mútu emen o-chêe o-dim byiká kyísí.

¹⁶ Bérek o-rim ne bamútu ne basúja ámbe ké kyikû ba-ribi ké Haróshet. Ba-ju basúja-Sisárá kángkáng, nang ocincing o*da/waa*.

¹⁷ Sisárá o-chêe o-da-rem ké mpyep-Jâl mú onyi-Hébe, mú o/fím Kên, ké nǎ, Otu Jábyin mú o/fím Házo o/mû ké kyikwáré ne banet-Hébe.

¹⁸ Jâl o-dim o-wâa edakâm Sisárá, o-raa ne nyǐ o/fu, nung a-bâ ké kafâ, ǎ bonchí. Nung ké mpyep ejí. *Dashî*. Sisárá o-nung kâng ké kafâ-mpyep. Jâl o-yip ǎ [o-rôo ké ékpígí.]

¹⁹ Sisárá o-sét Jâl o/fu, kamgbe, kye mě omu n-jwáp. Omu o-kú o-jê ng mě kanong kanong. Jâl o-bâa kyiféng-abî-mpong, o-kye ǎ o-jwáp. O-chî ǎ ekpî o-da-rôo.

²⁰ Sisárá o-sét ǎ kâng o/fu, bûu a-bwom ké ocím-dyifyi, ne â onet o/ba ǒ ebí o/fu, onet mu ányi dí. Sét ǎ a/fu, aa*wááng*.

²¹ Sisárá o/mû oo/kyee kanong kanong, o-waa ányi o-róng ké burê. Jâl o-yip kâng áma ne kyíkîm ńkyí badabi mpyep, o-nyábê o-kâm Sisárá, o-mán ǎ kyíkîm ánkyi ké bukô-dyishí kyi-shwôm kyi-da-tím kyísí, o-kpú.

²² Nkéré mú Bérek o/bê o-kyé ng Sisárá o-bâ, Jâl o-dim o-da-kâm ǎ, o-sét ǎ o/fu, bâ kwán. N/chi n-tông ǒ onet mú amu a-kyé ng. Bérek o-nung kâng ne nyǐ ké kafâ-mpyep, o-rángê Sisárá ányi kyísí, ké oo/kpú, ne kyíkîm-mpyep ńkyí ba/mán ǎ ké dyishí kyi-sát.

²³ Dyicí ándyi, Osówo o/chi banet-Ézerel ba-kpógê otu Jábyin mú otu-Kínan.

²⁴ Ba/waa ba-fâ busa ba-câ kashú káshu ne nyǐ ké kyikû tete ba-ju ǎ.