Jójis 3 - Bokyi Bible

Banet-Bushwôn-Ézerel ḿbé ba/waa ké Kínan

¹ Óburúkpâbí o/mîng kâng banet-bushwôn-Ézerel ké esí ányi eringe nyí odakan banet-Ézerel ḿbé ba/mû ba*da/ri byití ké Kínan*.

² Nyǐ o/chi ńkyín eringe nyí odatángê kyitông-banet-Ézerel nang kyirá kyi-kim ne byití, aciringaciring banet-Ézerel ḿbé ba/mû ba*da/ce ne byití nang kabónge*.

³ Banet ḿbé ba/mû ba/waa ké esí ányi ba/mû eshê-Fyilíta etánge ne banet-Kínan bamúmú ne banet-Sádon ne banet-Hyíbit ḿbé ba/mû ba-kyú u ké eku nyí Lebánon kyi-fím ké kaku ńké Bâl-Hémon tete kyi-ribi ké kyikit ńkyí badayú kaku, ńkyí badakó Hámat.

⁴ Mbé ba/mû wǎ okan mú Ézerel eringe nyí Óburúkpâbí odanyît â banet-Ézerel ba/chi ba-chi ńkyí nyǐ oo/kye banchí ebe ḿbé kpákpá ké abwô nyí Músis.

⁵ Ké bubwô ámbu kâng, banet-Ézerel ba/kyú ányi ne banet-Kínan ne ḿbé Hyítat ne ḿbé Ámórit ne ḿbé Périzit ne ḿbé Hyíbit ne ḿbé Jébus.

⁶ Ba-kûbé barî ba-sháng ng to bakye ne mbé.

Otenyêl

⁷ Banet-Ézerel ba/ráp Óburúkpâbí mú Osówo ebe. Ba-chi byibî ké bushú emen, ba-sháng erím-bakye nyí badakó Bâl ne Ashéra.

⁸ Ké bubwô ámbu kâng, kafâ ka-sa Óburúkpâbí ne mbé, o-mîng Otu Kúshan-Ryishátam mú o/fím Mesopotémya o-kpógê kámbé, ba-firi ké bubwô emen ké aje nyíryinyi.

⁹ Banet-Ézerel ba-tii kâng ba-kó Óburúkpâbí. O-twóm kâng onet mú o/bachi kámbé ba-fem. Onyinchéng ámu o-bángê e Otenyêl, mú wǎn-nche-Kálep mú odabángê Kénaz.

¹⁰ Busa ḿbú Busun ḿbú Óburúkpâbí bu/ba ǎ enung ké byiko, o-firi onet-dyishí mú Ézerel. O-dim o-wâa byití. Óburúkpâbí o-chi ǎ o-kpógê otu-Mesopotémya ámu.

¹¹ Bunyîn-dyityém bu-nung ké Ézerel ké bajam-aje bafee, ne Otenyêl kâng o-ba-kpú.

Éhut

¹² Banet-Ézerel ba/chîchi kyibî ké bushú ḿbú Óburúkpâbí. Ké bubwô ámbu, Óburúkpâbí o/chi Otu Égolon mú o/fím Mówep o-shwane o-shwôm banet-Ézerel.

¹³ Otu Égolon o-cibi ne banet-Ámon ne ḿbé Amálek ba-kpógê banet-Ézerel, ba-koo Jéríku mú oshê-bayêp báyep.

¹⁴ Banet-Ézerel ba-firi ké bubwô ḿbú Otu Égolon ké aje onyiryiká ne achât.

¹⁵ Banet-Ézerel ba-tii kâng ba-kó Óburúkpâbí. O-twóm onet mú o/bachi kámbé ba-fem. Onyinchéng ámu o-bángê e Éhut. Nyǐ o/mû o-chi i bubwô-eku. Bonchí emen o/mû o-bángê e Géra. Nyǐ o/fím ké kyikû-banet ńkyí Běnjámin. Banet-Ézerel ba/kye Éhut eyáré ba/fu, oda-kye Otu Égolon mú o/fím Mówep.

¹⁶ Éhut o/mû oo/chi kiitintang-mpyi mú odabyí nang bajam-basentyímyíta bafee esim diǐkpú. O-yip kámú o-bwa ké busín ké kyicê-bubwô-etyebéng emen ké kafâ-byídí ḿbyí o/bwá.

¹⁷ O-yip kâng eyáré ányi o-dim edakye Otu Égolon. Otu Égolon o/mû o/rêe baryên kanong kanong.

¹⁸ Ńdyí Éhut oo/kye ǎ eyáré ányi, o-sét banet ḿbé ba/mû ba/tû byěm ámbyi ba-kpet ebwa esim dyijê.

¹⁹ Nké nyǐ oyén o/bwa esim ké aká nyí ba/chi mpwô ké nyǐ, fáráng ne Gyígal, o-bwa esim o-kâm Otu Égolon. O-sét ǎ o/fu, otu ejí, me mu ne chwǒm ńkyí mu n-ryuu ng n-sét ǒ ké kadip. Otu Égolon o-sét kâng bǎmgbán emen o/fu, byí n̂g kpá. Ba-byí kâng ashí amúmú.

²⁰ Ńdyí otu oo/kyú kâng ányi kǎnchí ké nfût emen, mú mu o-kune e bembem, kyíbóng-kyise, Éhut o/dim o-kâm ǎ o-raa ne nyǐ o/fu, me mu ne kyitwóm ńkyí nda ǒ esét, ńkyí kyi/fím ne Osówo. Otu o-bûu nensang.

²¹ Éhut o-nabe bubwô-eku emen o-fîm mpyi ké kyicê-bubwô-etyebéng emen o-tím otu ké dyifít.

²² Mpyi ámu omúmú o-nung otu ké dyifít ne kyichí ne kyichí, [o-byí ké esim emen, bafwám ba-cít kámú kángkáng.]

²³ Éhut o-byí kâng, o-bwa ne afyi o-cít o-fín ǎ áku,

²⁴ o-dim. Bǎmgbán-otu ba-bâ, ba-rángê e afyi fínfín, nké mbé ba/mû ba/kabe ba/fu, otu mu áku omúng ké kafâ o-câ mbáre.

²⁵ Ba-bám tete kyi-kwárê kámbé, nké nkéré o*fí o-kuu ng dyifyi kâng* ba-yip kâng agbókóró ba-kuu dyifyi. Ba-rángê e bonchí ebe ányi kyísí ké dyibe-esí kpúkpú.

²⁶ Éhut o-dim ké nkéré mú mbe ba-bám m éné. O-da-shwôm ké aká nyí ba/chi mpwô éné ké nyǐ o-chêe o-jâ Séra.

²⁷ Ké nkéré mú o/nung áku ké esí nyí Éferem, nyí eku éku, o/yip ntán o-jwá eringe nyí odakó banet-Ézerel ba-da-nwa byití. O-kpî kámbé kâng ba-fím kyíbóng-eku ba-shû kyísí.

²⁸ O-sét kámbé o/fu, bâ n̂g ne me ké kyikû. Óburúkpâbí oo/chi běn ba-kpógê banet-bushwôn enen ḿbé Mówep. Ba-dim kâng ne Éhut ké kyikû ba-shû kyísí, ba-ba-koo kyikit ńkyí banet-Mówep ba/mû ba/chi ba-ba-nyáng Jódan. Ba*da/bángê onet nang obónge o-nyáng*.

²⁹ Dyicí ándyi, ba/ju égot-banet nang bajam bafee esim diǐkpú, bachíchí-basúja-banet-Mówep, nang onet obónge ké burwám ebe o*da/fem*.

³⁰ Banet-Ézerel ba/kpógê banet-Mówep dyicí ándyi. Bunyîn-dyityém bu-nung ké esí ányi ké aje nyíryinyi.

Shámaga

³¹ Nnyinyěng-onet-dyishí ebe o-bángê e Shámaga mú wǎn-Ánat. Nyǐ to o/nyii banet-Ézerel ké oju mú nyǐ o/ju égot-banet-Fyilíta echât ké kachí ńké badaró bampong.