Jójis 21 - Bokyi Bible

Banyi ḿbé badakye Kyikû-Banet ńkyí Běnjámin

¹ Nkéré mú banet-Ézerel ba/mû ba/cibi ké Myízipa, mbé ba/ryí ocím shwaneshwane ké bushú ḿbú Óburúkpâbí ba/fu, nang onet obónge ké burwám eten o*dachi o-bángê onet mú o/fím ké kyikû ńkyí Běnjámin o-bé wǎn emen*.

² Banet-Ézerel ba-dim kâng ba-ca Bétel ba-da-kyú ányi ké bushú ḿbú Óburúkpâbí tete dyikurúku dyi-fyi. Ba-tii bukyû kakânkakân ḿbú boo*nwa eri*

³ ba/fu, Óburúkpâbí mú Osówo-Ézerel, ebóng kyi/chi ne chwǒm ńkyín kyi-chi. Ebóng ńkyí banet ḿbé ba/fím ké kyikû-Běnjámin ba-kú ba-bâ ebatánê ké esí-Ézerel.

⁴ Pirí ké orî-dyicí ké dyicófóróng, baa/bi kyikit-kyifen-Osówo echi ányi, ba-chi byifen ḿbyí kyikwáré, ba-shí to byitú byirim byirim ké byifen echi ba-kye Óburúkpâbí.

⁵ Ba-bí barî ba/fu, kyikim-banet nkyi kô nang kyibónge ké kángkáng kyikû-banet-Ézerel ḿbé ba*da/ce ocibi ne be ké Myízipa* ké bushú ḿbú Óburúkpâbí*? Mbé ba/mû baa/ryí ocím shwaneshwane ba/fu, nang yeě nké o*da/ce Myízipa* ba-man ba-ju ǎ.

⁶ Banet-Ézerel byiko byi-kpú kámbé ne bwǎn-bané ebe ḿbé kyikû-Běnjámin, ba-raa ba/fu, kurún, oshê-Ézerel oo/tánê kyikû-banet emen kyibónge.

⁷ Be byi/chi byi-chi nǎ ne byi-já banyi byi-kye banet-Běnjámin ḿbé ba/waa. Be bii/ryí ocím ké bushú ḿbú Óburúkpâbí kanong kanong byi/fu, be bii*ba/chi byi-bángê kámbé ba-bé bwǎn eten*.

⁸ Nkéré mú ba/bí ba/fu, kyikim-banet nkyi kô nang kyibónge ké byikû-banet-Ézerel ḿbé ba*da/ce ocibi ne be ké Myízipa dí, mbé ba/ri ba/fu, nang onet obónge mú o/fím Jábeshi, ké esí nyí Gyílet, mú o/ce ne mbé o*fí*.

⁹ Nkéré mú ba/kó azîn, onet-súja o*fí nang obónge mú o/faa* mú o/fím Jábeshi*.

¹⁰ Banet ḿbé ba/cibi éné ba-twóm kâng bajam-égot-banet bachât ḿbé baa*nwa efé kafwa* ba/fu, ca n̂g ba-da-ju nang yeě nang yeě mú mu ké Jábeshi, cibicibi ne banyinyi ne bwǎn.

¹¹ Ba/fu, ju n̂g kángkáng banyinchéng ne onyinyi to nang orá mú oo/nyît onyinchéng.

¹² Ké burwám-banet ámbe, mbé ba/já égot-bwǎsíng-banyinyi efee ḿbé ba*da/nyît ne onyinchéng* ba-kpî kámbé kâng ba-bâ ne mbé ké kyikit ńkyí ba/bi bampyep ebe, ké Shílo.

¹³ Burwám-banet-Ézerel ámbe ba-twóm kâng ejá ba-sét banet-Běnjámin ḿbé ba/mû ké buká ḿbú Ryímon ba-sét kámbé ba/fu, bachi kyikwáré.

¹⁴ Banet-Běnjámin ba-bwa kâng dyijê, banet-Ézerel ba-yip kâng bwǎn-banyinyi ámbe ba-kye kámbé, ḿbé ba/fím Jábeshi, ḿbé ba/waa bakpó. Nké kyicê-banet-Běnjámin kyi/waa kyísí.

¹⁵ Banet-Ézerel byiko byi-kpú kámbé ne banet-Běnjámin, ké nǎ, Óburúkpâbí oo/bên kyikwáré ńkyí byikû-banet-Ézerel.

¹⁶ Banet-ashí-banet-Ézerel ḿbé ba/cibi éné ba-raa kâng ba/fu, banyinyi ba*fí to ké kyikû-banet-Běnjámin* be byi/chi byi-chi nǎ ne byi-já banyi byi-kye banet-Běnjámin ḿbé ba/waa.

¹⁷ Oshê-Ézerel oo*man o-tánê kyikû-banet emen nang kyibónge ké byikû diǐkpú ne byifee*. Byi-man byi-kyé bukwóp ḿbú kyikû-banet-Běnjámin badakpen,

¹⁸ nké bii*ba/chi byi-bángê kámbé ba-bé bwǎn eten* ké nǎ, be bii/fé kyibî-nshwam byi-kye nang yeě nang yeě ké burwám eten mú o/bángê onet-Běnjámin o-bé wǎn emen.

¹⁹ Ba-kabe kâng ba/fu, dyijî-kyifen ńkyí badachi kángkáng dyije ké Shílo dii/fárâng. Shílo mu ké kyicê-bushûyû-Bétel, ne kyicê-busyísen ḿbú Lebóna, ne kyicê ńkyí esû edabyí ńkyí bukwóp ḿbú mbu ké otyém ne otyém mú Bétel ne Shékem.

²⁰ Ba-sét banet-Běnjámin ba/fu, ca n̂g ba-da-rem ké kafâ-byifát,

²¹ ba-kûbám. Â bwǎn-banyinyi ḿbé ba/fím Shílo ba/byí ba-bâ ane ebane ké nkéré mú dyijî-kyifen, byí n̂g ké kafâ-byifát ba-bâ. Nang yeě ké burwám enen okám wǎn-onyinyi ké busa ké burwám-bwǎn-banyinyi ámbe o-firi onyi emen, ba-kpî kámbé ba-jâ ne mbé ké esí nyí Běnjámin.

²² Â banchí ebe nang bwǎn-bané ebe ḿbé banyinchéng ba/bê ebakán ké dyishí ne [ben, sét n̂g] kámbé ba/fu, kamgbe, mîng n̂g byi-kyú ne mbé, ké nǎ, be byi*da běn ekoo kámbé ké byití* byi/fu, bafiri banyi eten*. Ne ké bubwô ḿbú ben to ba*da/kúng kámbé ba-kye bě* ben ba*da/bên ocím enen mú ba/ryí*.

²³ Banet-Běnjámin ba-chi éné. Nang yeě ké burwám ebe o/cá onyi ké Shílo, ké burwám-bwǎn-banyinyi ḿbé ba/mû mbe ba-ne ng ane, o-kpî ǎ o-dim ne nyǐ. Ba-bwa esim kâng ké esí nyí ebe, ba-bwât eshê ebe ba-bi, ba-kûkyú ányi.

²⁴ Banet-Ézerel to ḿbé kwán ba-bwa esim, nang yeě nang yeě o/bwa esim o-kâm kyikû-banet ńkyí emen ne banet emen ne byěm emen.

²⁵ Otu o/mû o*fí ké Ézerel ké nkéré ámu*. Nang yeě nang yeě o/mû mu o-chi i eringe kyi/nyîn ǎ.