Jójis 20 - Bokyi Bible

Banet-Ézerel ba/kpá Byiko-Byití enwa

¹ Kángkáng banet-Ézerel ḿbé ba/fím ké kyikû-Dǎn, ḿbé mbe ké kyicê-bushûyû tete a-ribi ké Byíshíba ké kyicê-busyísen, cibicibi to ne ḿbé ba/fím ké esí nyí Gyílet ké kyicê ńkyí esû edabyí, ba/bê kyikit ńkyí ba/kó kámbé burwám kyikit kyibónge ké bushú ḿbú Óburúkpâbí, ké oshê mú Myízipa.

² Kángkáng banet-ashí-byikû-banet-Ézerel ba/mû ányi ké ocibi mú banet-Osówo ne égot-basúja ḿbé badakán byití ba/mû égot etánge etánge ké égot-byikit efee.

³ Ké nkéré ámu, banet ḿbé ba/fím ké kyikû-Běnjámin baa/jwo ba/fu, banet-Ézerel ḿbé áku kángkáng baa/cibi ké Myízipa. Banet-Ézerel ba-bí mú onet-Lyíva ámu ba/fu, sét bě, kyi/cen nǎ ne mbé ba-chi kyibî.

⁴ Nyǐ onet-Lyíva ámu mú ba/ju ósóng emen o-faa kámbé o/fu, me ne ósóng ejí byi/ce Gyíbya mú mu ké esí nyí Běnjámin byi/fu, byi-da ng erí ányi.

⁵ Banet-Gyíbya ba-bâ mě bunwa ebakye, ba-wâng kyise ba-fé ké kafâ ké buchú ámbu. Ba/fu, mbé ba-ju ng mě, nké ba/bam ósóng ejí ba-rí ne nyǐ ké busa, o-kpú.

⁶ N-kúng kyikwóm-enyam-byiko emen n-két byikim byikim, n-twóm kyikim kyibónge kyibónge ké byikû-banet-Ézerel diǐkpú ne byifee. Banet ámbe baa/chi kyibî, onunut-kyibî-chwǒm ké burwám eten.

⁷ Ben ḿbé bamu nyín ashí amúmú ba-chi i banet-Ézerel. Byi-chi i nǎ kyi-kim ne nkyí.

⁸ Mbé ashí kángkáng ba-bûu ba-bwom nensang, ba-raa ba/fu, nang onet obónge ké burwám eten, nang mu o-kyú u ké mpyep mú badabi ké kyídí, nang mu o-kyú u ké kyise kyiyén, oo*ba/chi o-dim dyijê*.

⁹ Nyín něen ńkyí byi/chi byi-chi. Byi/chi byi-twóp ámám byi-cá banet [ba-da-kye Gyíbya bunwa.]

¹⁰ Kyikim-banet-Ézerel kyibónge ké byikit diǐkpú ba/chi ba-kûkye basúja byiryíng, ḿbé áku ba/chi ba-ca ba-da-kye banet-[Gyíbya] busông ké onunut-kyibî-chwǒm mú mbé baa/chi ké esí-Ézerel.

¹¹ Kángkáng banet-Ézerel ba-cibi kâng ne ejá ebónge ba/fu, mbé ba-kyâ oshê ámu bunwa.

¹² Byikû-banet-Ézerel ba-twóm banet-kyitwóm ba-ca ké esí-byikû-banet-Běnjámin byimúmú ba/fu, babí kámbé ba/fu, ebóng dyizong-kyibî něen ńkyí ben ba/chi.

¹³ Kántîk, twóm m̂ kâng banet-babép ámbe, ḿbé ké Gyíbya ba-kye bě, eringe nyí byidaju kámbé byi-fîm kyibî ánkyi ké Ézerel. Nké banet-Běnjámin ba*da/fwôo atông ké ńkyí banet-Ézerel ḿbé áku ba/fu*.

¹⁴ Banet ba-fím ké eshê-Běnjámin emúmú ba-bâ ké Gyíbya, eringe nyí badabanwa ne banet-Ézerel ḿbé áku.

^15-16 Ba-kó égot-basúja etánge etánge ké byikit bujam esim nyâchât, ké eshê ebe dyicí ándyi. Bwa kwán, banet-Gyíbya bayén ba/cibi égot-banet echât ne kyicê ḿbé baa*nwa efé kafwa* ḿbé badachi bubwô-eku. Nang yeě ké burwám ebe o-man n etím buká ké kyiká-oji boo*shwôm kyísí*.

¹⁷ Banet-Ézerel ḿbé áku ba-cibi égot-basúja etánge etánge ké égot-byikit efee, ḿbé baa/kwâa byití kanong kanong.

Byití ḿbyí ba/nwa ne Banet-Běnjámin

¹⁸ Banet-Ézerel ba-dim ba-ca ké Bétel, ké kyikit ńkyí mbe ba-fâ Osówo, ba-bí ǎ ba/fu, kyikû-banet kyirá kyidabwóp kashú kyi-kye banet-Běnjámin bunwa. Óburúkpâbí o-faa kámbé o/fu, kyikû-banet ńkyí Júda.

¹⁹ Banet-Ézerel ba-zûu kâng ké orî-dyicí ké dyicófóróng, ba-da-bi bampyep-byití ebe fáráng ne oshê-Gyíbya.

²⁰ Ba-dim ba-wâa basúja-Běnjámin byití ekye, ba-tî basúja ké byikit ba-bírî kashú ké oshê.

²¹ Basúja-Běnjámin ba-byí ké kafâ-oshê, ne ne dyicí dyi-kûcé, mbé ba/ju égot-basúja-banet-Ézerel etánge etánge ké byikit bujam esim byifee.

^22-23 Banet-Ézerel ba-dim kâng ba-wâa ké kyikit ńkyí mbe ba-fâ Osówo, ba-tii ké bushú-Óburúkpâbí tete dyikurúku dyi-fyi. Ba-bí ǎ ba/fu, byichîce byi-da-nwa byití ne banet-Běnjámin ḿbé bwǎn-bané eten dí. Óburúkpâbí o-faa o/fu, âa. Dyityém dyi-shwane kâng banet-Ézerel, ba-chîdatî basúja ebe wǎ eringe ba/mû ba/tî dyicí ándyi.

²⁴ Ba-chîkye basúja-Běnjámin bunwa ké kampén kafee.

²⁵ Banet-Běnjámin ba-chîbyí ké kafâ-oshê-Gyíbya ba-bâ. Ne kyitông ńkyín ba/ju égot-basúja-banet-Ézerel ḿbé baa/kwâa byití kanong kanong etánge etánge ké byikit onyiryiká ne byichât.

²⁶ Kángkáng banet-Ézerel ba-yú kâng ba-ca ké Bétel, ba-tii. Ba-kyú áku ké bushú ḿbú Óburúkpâbí tete dyikurúku dyi-fyi, chwǒm ba*da/ryí*. Ba-chi byifen-kyikwáré, ba-shí byitú byirim byirim ké byifen echi, ké bushú ḿbú Óburúkpâbí.

^27-28 Mkpukpu-byěm-Osówo o/mû áku ké Bétel, ké nkéré ámu, ne Fyinéhas to mú wǎn-Elyǎza, mú wǎn-wǎn-Éron, nké o/mû o-tún n kámú. Banet-Ézerel ba-chîbí Óburúkpâbí ba/fu, byica byi-da-nwa ne banet-Běnjámin ḿbé bwǎn-bané eten dí, aa byizú abwô. Óburúkpâbí o-faa kámbé o/fu, nwa n̂g. Nencí n/chi n-chi běn ba-kpógê kámbé.

²⁹ Banet-Ézerel ba-da-tî kâng basúja bakíri ké karem ba-wâng Gyíbya ba-fé ké kafâ.

³⁰ Ké kampén kachât, ké ací achât kâng, banet-Ézerel ba-chîkye basúja-Běnjámin bunwa, ba-tî basúja ebe ké byikit-bunwa enwa ba-bírî kashú ké Gyíbya, wǎ eringe ba/mû ba/tî kpákpá.

³¹ Banet-Běnjámin ba-byí ké kafâ-oshê ba-bâ byití ebanwa, ba-dim ba-mîng oshê áku. Ba-bwa ba-kpet banet-Ézerel bakíri eju ké byikit byikíri, ké bukwóp ḿbú budajé Bétel ne ḿbú budajé Gyíbya, wǎ eringe ba/mû ba/ju kámbé kpákpá. Ba/ju banet-Ézerel nang bujam esim diǐkpú.

³² Ba-kpet eraa ba/fu, bii/chîchi kámbé wǎ eringe byi/mû byi/chi. Nké banet-Ézerel ba/mû baa/tóbê ba/fu, mbé ba-bwa ng esim ba-chi kámbé ba-tíbî ne oshê, byi-jâ ké akwóp.

³³ Nkéré mú bujê-basúja-Ézerel ba/tín kâng ba-bwa esim ba-da-cibi barî ké Bâl-Táma, basúja ebe ḿbé ba/mû ba/wâng Gyíbya ba-kpû okpúng ké byikit ḿbyí ba/mû ba/rem ké esí nyí aká áka fáráng ne [Gyíbya.]

³⁴ Égot-basúja bajam bafee esim diǐkpú, bachíchí ebe ḿbé baa/cá kámbé ké eshê-Ézerel emúmú, ba-kye banet-Gyíbya bunwa, ne bunwa ámbu bu/sóng ḿbú! Banet-Běnjámin ba/mû ba*da/nyît ba/fu, ba/chi ba-ju kámbé*.

³⁵ Óburúkpâbí o-chi banet-Ézerel ba-kpógê banet-Běnjámin. Banet-Ézerel ba-ju égot-banet-bushwôn ebe etánge etánge ké byikit bujam esim byitánge ne bajam-banet batánge, ké dyicí ándyi.

³⁶ Ne banet-Běnjámin ba-nyît ba/fu, baa/kpógê kámbé. Bujê-basúja ḿbé Ézerel ba/bwa kyikû esim ésim ké bushú-banet-Běnjámin, ké nǎ, mbé ba/mû ba/jêem esim ne banet ebe ḿbé ba/mû ba/tî kámbé ké karem fáráng ne Gyíbya.

Eringe nyí kyi/cen ne Banet-Ézerel ba-kpógê

³⁷ Banet ámbe ba/zóngê babap ba-dim ḿbú Gyíbya, ba-pwôo byiryibyiryi ké oshê ba-ju kángkáng banet ányi.

³⁸ Bujê-basúja-Ézerel ne ḿbé ba/mû ba/rem ba/mû ba/tóbê kyi-kim ne ekap nyí badasét barî. Nkéré mú ba/ri ké bujê-erúkwâ e-kú e-byí i ké oshê,

³⁹ banet-Ézerel ḿbé ba/mû kyíjí ké byití ba/ríbî ba-bwa esim. Bankéré ámbe ányi banet-Běnjámin baa/ju kámbé banet bujam esim diǐkpú. Ba-kpet eraa ne barî ba/fu, âa, bii/chi kámbé wǎ eringe byi/mû byi/chi.

⁴⁰ Ekap ányi kâng e-byí, bujê-erúkwâ e-kpet ebyí ké oshê. Banet-Běnjámin ba-bírî achi ké esim, ba-waa ocím ké dyishí fúú ké ori mú ba/ri oshê omúmú o-kú o-byí i erúkwâ.

⁴¹ Banet-Ézerel ba-bírî kâng esim, banet-Běnjámin ba-kpet eshî, ké nǎ, mbé ba/nyît ba/fu, mbé ba-kú ba-bâ ekpú.

⁴² Ba-chêe ba-bwa esim ésim, ba-zóngê ba-jâ byikit byikíri, nké ba*da/man efem*. Ba-waa ké otyém ne otyém mú bujê-basúja-Ézerel ne banet ebe ḿbé ba/mû baa/fím ké kafâ-[oshê] mbe ba-bâ, ba-ju kámbé. [

⁴³ Banet-Ézerel baa/wâng banet-bushwôn ebe ba-fé ké kafâ, ba/wâa mbe ba-ró ng kámbé ba-câ tete ba-ribi ké kyikit kyibónge, ké kyicê-Gyíbya ńkyí esû edaríbî e-jâ, ba-ju ng kámbé ba-câ.]

⁴⁴ Ba/ju bachíchí-basúja-Běnjámin égot etánge etánge ké byikit onyiryiká ne byichât.

⁴⁵ Ḿbé áku ba-bírî ba-zóngê ba-jâ ké kyikim-dyikán, ké buká ḿbú Ryímon. Ba/ju égot-banet bujam esim etánge ké bukwóp. Banet-Ézerel ba/wâa ba-ró ng ḿbé ba/waa ba-câ tete ba-ribi Gyídom, ba-ju égot-banet diǐkpú.

⁴⁶ Kángkáng kangkang, ba/ju égot-banet-Běnjámin etánge etánge ké byikit bujam esim byitánge, ké dyicí ándyi. Mbé ashí amúmú ba-chi i bankân byití.

⁴⁷ Nké égot-banet ebe echât ba/man echêe ba-jâ ké kyikim-dyikán, ké buká ḿbú Ryímon, ba-rí áku etukáku enyii.

⁴⁸ Banet-Ézerel ba-bwa esim ba-kâm banet-Běnjámin ḿbé kwán, ba-ju kámbé kángkáng, banyinchéng ne banyinyi ne bwǎn, cibicibi ne byitú. Ba-shí kángkáng eshê ké esí ányi emúmú.