Jójis 2 - Bokyi Bible

Orím mú Onong mú Óburúkpâbí ké Bukim

¹ Orím mú onong mú Óburúkpâbí o/dim ké Gyígal o-ca Bukim o-da-raa ne banet-Ézerel o/fu, me n/fîm běn ba-byí ké Éjip, m-kpî běn m-bâ ne ben ké esí nyí me m/mû n/ryí banchí enen ḿbé kpákpá ocím. N-raa n/fu, me mm*ba/chi m-bên ocím mú n/ryí ne ben ne banyá*.

² *Da n̂g echi ba-ryí ocím nang obónge ne banet ḿbé mbe ba-kyú u ké esí ńnyín*. Ben ba-man ba-bú byikit ebe ḿbyí mbe ba-sháng ng bakye. Nké ben ba*da/chi ne ńkyí me n/sét běn*. Ben baa/chi ńkyí me m/mû n/sét běn n/fu, *da n̂g echi*.

³ Ké bubwô ámbu kâng, me mu n-sét ng běn kántîk n/fu, me mm*ba/chi n-ró banet ḿbén ba-dim* â ben ba-kú ba-bâ*. Mbé ba/chi [ba-kû běn ecít,] ne ofê mú mbé mbe ba-fâ erím-bakye ebe o/chi o-kám běn wǎ kaǎtám.

⁴ Nkéré mú orím ámu oo/raa byiraa ḿbyín, banet-Ézerel ba-kpet etii ashí amúmú.

⁵ Éné nké mbe ba-kó ng kyikit ánkyi Bukim. Ba-waa ányi ba-chi byifen ba-kye Óburúkpâbí.

Bukyû ḿbú Jóshwa

⁶ Jóshwa o-fu banet-Ézerel ba-dim. Ne onet nang orá o/dim o-jâ ké esí nyí emen nyí ba/kyii ba-kye ǎ.

⁷ Nkéré mú Jóshwa o/mû o/tôong okpó, banet-Ézerel ba/kye Óburúkpâbí ofê, nang ńdyí nyǐ oo/kpú, mbé ba/kye ǎ ofê ba-ca kashú, ńdyí banet-ashí ebe ba/tôong bakpó, ḿbé ba/kúng achi ebe ba-ri kángkáng biǐtí-byěm ḿbyí Óburúkpâbí oo/chi o-kye banet-Ézerel.

⁸ Jóshwa mú ḿgbán-Óburúkpâbí, mú wǎn-Nûn, o/kpú ányi oo/rí bajam-aje batánge esim-aje diǐkpú.

⁹ Ba/ryii ǎ ké esí nyí emen ké oshê mú Tyímanat-Séra, ké esí nyí Éferem, nyí eku éku, ké kyicê-bushûyû-kaku ńké Gáshi.

¹⁰ Kyitông-banet ánkyi ba-ba-kpú to ba-man ashí amúmú. Kyitông-banet ńkyí kyi/nye ne mbé ba-ráp kyi-kim ne Óburúkpâbí ne byěm ḿbyí nyǐ oo/chi o-kye banet-Ézerel.

Banet-Ézerel ba/mîng Óburúkpâbí Ofê ekye

¹¹ Banet-Ézerel ba-ba-chi kâng kyibî ké bushú ḿbú Óburúkpâbí, ba-kpet erím-bakye-Bâl ofê ekye.

¹² Ba-mîng Óburúkpâbí ofê ekye, mú Osówo mú banchí ebe ḿbé kpákpá, Osówo mú o/fîm kámbé ba-byí ké Éjip, ba-kpet ekye erím-bakye ekíri ofê, erím-bakye nyí e/já banet ḿbé mbe ányi ne mbé fáráng. Ba-kûsiring kyísí ba-kyâ kányí ofê, ba-chi Óburúkpâbí kafâ ka-kpet ǎ esa.

¹³ Ba-mîng Óburúkpâbí ofê ekye, ba-kûfé erím-bakye-Bâl ne Asatáte.

¹⁴ Óburúkpâbí kafâ ka-sa ǎ kâng ne banet-Ézerel, o-mîng banet-kajii ba-kye kámbé bunwa kiǐmút, ba-bam kámbé byěm ba-koo. O-mîng banet-bushwôn ebe ké kángkáng byikit ba-koo kámbé busa, banet-Ézerel ba*fí to ba-man n ebám byiko ebe*.

¹⁵ Nang nkéré orá nké ba/ce byití, Óburúkpâbí o*da/bwom ne mbé* wǎ eringe nyí nyǐ o/mû o/sét o/fu, nyǐ o-chi i. Bafip ba-nung banet-Ézerel ḿbé baa*nwa eri*.

¹⁶ Óburúkpâbí o-kye kâng banet-Ézerel banet-ashí ḿbé ba/nyii kámbé ké abwô nyí banet-kajii ámbe.

¹⁷ Nké banet-Ézerel ba*da/fwôo atông ba-jwo banet-ashí ebe ámbe*. Oshê-Ézerel o*da/fé dyityém ne Óburúkpâbí* ne mbe ba-kyâ erím-bakye ofê. Banchí ebe ba/mû ba/chi ńkyí Óburúkpâbí o/sét kámbé, nké kiǐfyîfî-kyitông-banet ńkyín ba/mîng éné echi nang obwon ka*da/bwon*.

¹⁸ Nang nkéré orá nké Óburúkpâbí o/kye banet-Ézerel onet-dyishí, nyǐ o-chwáp ng onet ámu o-nyii banet-Ézerel ké abwô-banet-bushwôn ebe, â onet ámu o/tôong okpó. Óburúkpâbí o-ri ng kámbé bafip, ké nǎ, mbé mbe ba-byâ ké busông ebe ḿbú mbe ba-ri ng, ne ocît to mú baa/cít kámbé.

¹⁹ Nké â onet-dyishí ámu o/kpú, banet-Ézerel ba-bwa esim ké byibî-akwóp ebe, ba-kpet echi édúú nyí e/bên e-shwôm kyitông-banet ńkyí kyi/shwôm ké esim. Mbé ba-kû ng efé erím-bakye, ba-chi i bǎmkpóngé to ba-kyâ kányí, ba-né to abwô ezú ké byibî-akwóp ḿbyí ebe.

²⁰ Kafâ ka-kpet esa kâng Óburúkpâbí ne banet-Ézerel, o-raa o/fu, oshê mún oo/bên ocím mú me m/mû n/sét banchí ebe ḿbé kpákpá n/fu, batî. Ne ké nǎ, mbé ba*da/chi ńkyí me n/sét kámbé*

²¹ me mm*ba/chi n-chîró oshê nang obónge mú o/mû o/waa ké esí ńnyín* ńdyí Jóshwa oo/kpú*.

²² Me n/chi n-kúng kámbé n-kan n-ri â banet-Ézerel ḿbén ba/chi ba-koo kyiká-édúú ejí wǎ eringe nyí banchí ebe ḿbé kpákpá ba/mû ba/chi.

²³ Óburúkpâbí o-mîng kâng eshê ányi e-waa ké esí ányi. Nyǐ o*da/chi Jóshwa o-kpógê kámbé* o-ró nang kámbé babap ba-dim* ńdyí Jóshwa o-kpú u o-bâ*.