Jójis 19 - Bokyi Bible

Onet-Lyíva ne Ósóng Emen

¹ Ké nkéré ámu, ne banet-Ézerel ba-firi ne otu, onet-Lyíva o/mû kô mú o/mû mu o-kyú u ké esí-Éferem nyí eku éku, nyí ké kafâ ké kafâ. Nyǐ o/ré ósóng-wǎn-onyinyi mú o/fím Bételehêm, ké esí nyí Júda, o-tî ǎ wǎ onyi emen.

² Nké wǎn-onyinyi ámu kafâ ka/sa ǎ ne nyǐ, o-bwa esim o-jâ ké kyise-bonchí emen, ké Bételehêm, o-rí áku etukáku enyii.

³ Mú onet-Lyíva ámu o-kabe kâng o/fu, nyǐ o-câ ne mú mǔ ké kyikû o-da-chi ǎ eringe odabwa esim. O-kpî ḿgbán emen ne boonyam-atû bufee. Mú wǎn-onyinyi ámu o-kpî onyinchéng ámu ba-dim ké kyise. Ne ké nkéré bonchí emen o/ri mú mǔ, o/koo ǎ abwô afee.

⁴ Bonchí-wǎn ámu o-tú dyishí o/fu, mú mǔ o*dachi o-dim dyijê*. Onyinchéng ámu o-rí kâng ányi ací jangjang achât. Onyinchéng ámu ne ósóng emen mbe ba-ryí i bubwô-byiryíng kyikit kyibónge, ba-rí i to karíng kabónge.

⁵ Ké dyicófóróng ké ací anyii, ba-jwóbê pirí! ba-kpá byiko ḿbyí badadim. Nké bonchí-wǎn-onyinyi ámu o/raa ne mú onet-Lyíva o/fu, mîng kpá a-jwáp omu ne a-dim.

⁶ Onyinchéng ámu ne bonchí-ósóng emen ba-kyú me ba-ryí byiryíng ba-jwáp bato. Bonchí-wǎn ámu o-sét kâng onet-Lyíva ámu o/fu, kamgbe, chîrí nyín a-kyú ké bunyîn-dyityém.

⁷ Mú onet-Lyíva o-bûu nensang eringe nyí odadim, nké bonchí-ósóng emen o/sét ǎ o/fu, o*dadim*. O-chîrí kâng dyicí ányi.

⁸ Ké dyicófóróng ké ací atánge, o-kpá byiko ḿbyí odadim. Nké bonchí-ósóng emen o/sét ǎ o/fu, kamgbe, jwáp kpá omu. Bám tete nkéré mú esû. Ba-ryí kâng byiryíng kyikit kyibónge.

⁹ Nkéré mú onyinchéng ámu ne ósóng emen ne ḿgbán emen ba/chîkpet edim dyijê, bonchí-ósóng emen o-sét ǎ o/fu, dǐi, dyikurúku dii/fyi. A-man n echîrí nyín. Buchú bu-kú bu-bâ ejí. Kyú nyín, a-kyú ké bunyîn-dyityém. Nencí a-man n ebûu ké dyicófóróng a-dim dyijê.

^10-11 Nké onyinchéng ámu o/mû o*fí to o-ryuu ng o/fu, nyǐ o-chî ng erí dyicí ányi* nyǐ ne ósóng emen ba-dim kâng, cibicibi ne ḿgbán emen ne boonyam-atû emen bufee ne bukyúng ké mbú. Dyicí dyi/mû dii/kán, nkéré mú baa/cen ba-fárâng Jébus, ányi kyi/byí, Jerúsélem. Mú ḿgbán emen o-raa ne nyǐ kâng o/fu, ebóng bii*waa nyín byi-rí ké oshê-banet-Jébus mún*.

^12-13 Nké bonchí emen o/sét ǎ o/fu, be bii*ba/chi byi-bwom ké oshê mú banet ḿbé ba*fí banet-Ézerel*. Byi/chi byi-shwôm byi-ca kaǎníngéníngê byi-da-rí ké oshê mú Gyíbya nang Ryíma.

¹⁴ Ba-shwôm kâng Jébus ba-dim ba-cen n ba-câ. Esû e/mû ee/ríbî ńdyí ba/daribi ké Gyíbya, ké esí nyí kyikû-banet ńkyí Běnjámin.

¹⁵ Ba-ján ba-dim edarí ányi. Ba-nung ké kafâ-oshê ba-da-kyú ányi ké ótíbingé, nké onet o*fí nang obónge mú o/basét kámbé o/fu, bada-rí ké kyise emen*.

¹⁶ Nkéré mú mbe éné ányi, okâa-onyinchéng obónge o-cen n o-bâ, oo/fím ké dyikán o-kú o-fyi ng. Ba/fwon ǎ ké esí-Éferem nyí eku éku, nké nyǐ o/mû o/kú o-kyú u ké Gyíbya. Banet ḿbé áku, ḿbé ba/mû ányi, ba/fím ké kyikû-banet ńkyí Běnjámin.

¹⁷ Onyinchéng ámu o-ri kámbé ké ótíbingé, o-nyît o/fu, bacinbánet. O-bí kámbé o/fu, ben ba/fím nyá. Bamu ba-wâa ng nyá.

¹⁸ Mú onet-Lyíva o-faa ǎ o/fu, byi/mû byi/ce Bételehêm, ké esí nyí Júda, nké kántîk, byimu byi-bwa ng esim [dyijê] ké esí-Éferem nyí eku éku, nyí ké kafâ ké kafâ. Onet o*fí nang obónge mú oda bě ekpî byi-da-rí ne nyǐ*

¹⁹ nang ké be byimu něen ne byiryíng ḿbyí boonyam-atû eten budaryí ne biǐbyâa ḿbyí budarí sáre* cibicibi ne berêt ne bato ḿbyí ósóng ejí ne me ne ḿgbán ejí byidaryí*. Be byimu ne kángkáng byěm ḿbyí byimu byi-ryuu ng.

²⁰ Okâa-onyinchéng ámu o-faa ǎ o/fu, m-man n běn ekpî byi-jâ ké kyise ejí. Me n/chi n-tún běn, kii*nwa ńkyí badarí ké ótíbingé*.

²¹ O-kpî kâng kámbé o-jâ ne mbé ké kyise emen, o-kye boonyam-atû ebe byiryíng bu-ryí. O-kye kámbé omu ba-soo byiká, ba-ryí byiryíng.

²² Mbé ba/mû ké bunyîn-dyityém, ké nkéré banet-babép ḿbé mbe ké oshê ámu ba/bawâng owááng kyise ánkyi ba-fé ké kafâ, ba-kpet ekíbî dyifyi. Ba-raa ne okâa-onyinchéng ámu ba/fu, bâ ne onyinchéng ámu kyíjí, mú o/ba ǒ enung. Be byimu byi-ryuu ng byi/fu, byi-rí i ne nyǐ.

²³ Nké okâa-onyinchéng ámu o/byí o-da-raa ne mbé o/fu, aa*wááng* ǎ bacín ejí. Kamgbe, *da n̂g echi kyibî-chwǒm ánkyi*. Onyinchéng mún o-chi i ocinónet ejí.

²⁴ Kû n̂g eri, nyín něen ósóng mú emen ne wǎn ejí to mú onyinyi, mú o*da/nyît ne onyinchéng*. Me mu m-bâ ne mbé kyíjí kántîk, ne ben ba-man n erí ne mbé. Chi n̂g kámbé ńkyí kyi/nyîn běn. Nké *da n̂g echi onyinchéng mún kyibî-chwǒm ánkyi*.

²⁵ Nké banet ámbe ba*da/fwôo atông ké ńkyí o/raa éné*. Mú onet-Lyíva ámu o-yip kâng ósóng emen ámu o-tî kámbé áku kyíjí. Ba-kpet erí ne nyǐ ké busa, ké buchú ámbu bumúmú tete dyicí dyi-cé.

²⁶ Nkéré mú dyicí dii/cé, mú wǎn-onyinyi ámu o-ba-myii ké ocím-dyifyi-okâa-onyinchéng ámu, kyikit-otyép emen o/mû. O/waa ányi kyísí tete dyicí dyi-wángê.

²⁷ Otyép emen o-bûu ké dyicófóróng ándyi, ne ké nkéré nyǐ o/kuu dyifyi ńdyí o-kú o-bâ ebadim, o/ri mú ósóng emen ámu ányi sáre ké bushú-kyise ne abwô ké dyifyi.

²⁸ O-raa ne nyǐ o/fu, bûu nensang, byidim. Nké mú mǔ o*da ǎ efaa ojá*. O-yip kâng kyikwóm-enyam-byiko-onyinyi ámu o-twôom ké kaanyam-atû emen o-dim dyijê.

²⁹ Nkéré mú o/ribi ké byise, o-nung ké kafâ-kyise emen o-yip kashwám. O-yip kyikwóm-enyam-byiko-ósóng emen ámu o-két byikim diǐkpú ne byifee, o-twóm kyikim kyibónge kyibónge ba-kye byikû-banet-Ézerel diǐkpú ne byifee.

³⁰ Nang yeě mú o/ri kánkyí, o-raa o/fu, be byi/mû byi*da/jwo ne dyizong-chwǒm ńdyín*. Dyizong-chwǒm wǎ ńdyín dyi/mû dyi*da/chi ne kyi-fím ké nkéré mú banet-Ézerel ba/dim ké Éjip*. Byi-man byi-chi chwǒm kyi-kim ne nkyí. Byi-chi i ebóng dyizong-chwǒm.